Mekim Gutpela “Wok Tisa” Taim Yu Autim Tok

1. Yumi laik kisim wanem pasin, na bilong wanem? (2 Timoti 4:2) (Lukim tu piksa.)

JISAS i tokim ol disaipel bilong em: “Kamapim ol disaipel long olgeta lain man, na . . . skulim ol long bihainim olgeta samting mi tokim yupela long mekim.” (Mat. 28:​19, 20) Dispela tok Jisas i mekim i makim olsem olgeta Kristen i mas mekim wok tisa. Tru Jehova yet i save kirapim “olgeta manmeri em bel bilong ol i gutpela” long kam long em, na ol ensel i save stiaim yumi i go long ol kain man olsem. (Apo. 13:48; Jon 6:44; Rev. 14:6) Maski i olsem, i gat sampela wok em yumi mas mekim. Skelim eksampel bilong aposel Pol na Barnabas. Baibel i tok taim ol i autim tok long sinagog long Aikoniam, ol i “autim gut tok na bikpela lain manmeri ol i bilip, em ol Juda na Grik wantaim.” (Apo. 14:1) I klia tru olsem Pol na Barnabas i gat pasin bilong “mekim gutpela wok tisa.” (Ritim 2 Timoti 4:2.) Yumi olgeta Kristen i laik wok strong long kisim dispela pasin.

2. Wai na sampela Kristen inap pilim olsem ol i no inap mekim gut wok tisa?

² Sampela inap pilim olsem ol i no inap mekim gut wok tisa bikos ol i no go long bikpela skul bilong graun o ol i no gat gutpela pasin bilong toktok. Sampela man em Baibel i stori long ol, ol tu i bin pilim olsem. (Kis. 4:10; Jer. 1:6) Na ol narapela inap pilim bel hevi long pasin bilong ol long mekim wok tisa bikos ol i no gat planti Baibel stadi olsem ol narapela o ol gutpela ekspiriens. Tru i no olgeta man yumi autim tok long ol bai amamas long kisim save long gutnius. Maski ol man i putim gut yau long tok yumi autim o nogat, dispela i no makim olsem yumi no mekim gut wok tisa. Olsem yumi stori pinis, Jehova na ol ensel i save stiaim yumi i go long ol man i gat gutpela bel. So yumi laik givim bel tru long autim tok long pasin we ol man i ken pilim tru ol tok yumi mekim. Bilong helpim yumi long mekim olsem, yumi bai stori long 3-pela rot yumi ken mekim gut wok tisa taim yumi autim tok.

TINGIM GUT OL MAN I PUTIM YAU LONG YU

3. Wai na ol tok Jisas i autim i sindaun gut long bel bilong ol manmeri i putim yau long em?

³ Baibel i tok olsem Jisas “yet i save long bel bilong ol” man. (Jon 2:25) Dispela tok i makim olsem Jisas i save long tingting bilong ol man na ol samting i stap long bel bilong ol na i kirapim ol long mekim samting. So ol tok Jisas i skulim ol man long en i sindaun gut long bel bilong ol manmeri i putim yau long em bikos em i kliagut long ol samting ol i nidim. Em i lukim olsem ol manmeri i hangre tru long ol tok bilong stiaim ol na mekim gut bel bilong ol na ol hetman bilong lotu i putim planti lo na ol kastam we i daunim tru ol dispela manmeri. (Mat. 9:36; 23:4) Jisas i stori long ol dispela samting long Bikpela Tok Long Maunten. Planti manmeri i amamas long putim yau long dispela tok bikos em i stori long ol samting em ol i tingting planti na wari long en.

4. Olsem wanem yumi ken soim olsem yumi tingim tru ol manmeri? (Lukim tu ol piksa.)

⁴ Yumi ken soim olsem yumi tingim tru ol manmeri yumi autim tok long ol long rot bilong kliagut long ol samting ol i tingting planti long en. Olgeta manmeri yumi bungim i save wari na tingting planti long ol hevi ol i bungim long dispela graun em Satan i bosim. Taim yumi tingim dispela samting, dispela bai helpim yumi long pilim tru tingting bilong ol manmeri long teritori bilong yumi. Olsem, i gat wanpela samting i kamap long hap bilong yu em ol manmeri i tingting planti long en? Ol papamama i wari long seifti bilong ol pikinini bilong ol long skul? Planti manmeri i no gat wok mani? Traim piksaim long tingting laip bilong ol manmeri i olsem wanem long dispela “taim nogut” bilong nau na ol i no gat gutpela samting bilong wetim i kamap bihain olsem Baibel i tok promis long en.—2 Tim. 3:1; Ais. 65:​13, 14.

5. Olsem wanem wok tisa bilong Jisas i no wankain long ol Farisi long taim bilong em? (Matyu 11:​28-30)

⁵ Jisas i save tingim tru ol manmeri i putim yau long em, na ol i luksave long dispela samting long pasin em i mekim long ol. Em i no wankain long ol Farisi em ol i save luk daun long ol man nating na tingim ol olsem ol i samting nating tasol! (Mat. 23:13; Jon 7:49) Jisas i save mekim gutpela pasin na pasin rispek long ol manmeri. Em i gat “pasin isi na pasin daun,” na dispela i helpim em long mekim gut wok tisa. (Ritim Matyu 11:​28-30.) Yumi tu i mas mekim gutpela pasin na pasin rispek long ol man i putim yau long yumi.

6. Olsem wanem yumi ken mekim gutpela pasin na pasin rispek long ol man i no laik putim yau long tok yumi autim?

⁶ Sampela man i save sakim o birua long yumi long ol tok yumi autim. Yumi ken mekim wanem pasin long ol? Jisas i tokim yumi long pasin yumi mas mekim long ol kain man olsem. Em i tok: “Mekim gutpela pasin long ol man i heitim yupela. Na askim God long blesim ol man husat i tok olsem ol samting nogut i ken kamap long yupela. Na beten long ol man i mekim ol tok i bagarapim bel bilong yupela.” (Luk 6:​27, 28) Em bai isi long yumi mekim kain pasin olsem sapos yumi holim tingting olsem ating i gat risen bilong pasin ol i mekim. Em tru olsem sampela manmeri i save birua tru long yumi. Tasol sampela narapela i no laik toktok wantaim yumi bikos i gat sampela hevi insait long famili o i gat sampela samting em ol i tingting planti long en, na i no bikos ol i bel nogut long yumi. O ating yumi go kamap long haus bilong ol taim ol i pilim sik o bel hevi. Long ol kain taim olsem, yumi laik bihainim tok Baibel i mekim olsem “oltaim tok bilong yupela i mas gutpela, olsem yupela i putim sol long en, na bai yupela inap save long wanem tok i stret long bekim long olgeta man wan wan.” (Kol. 4:6) Sapos yumi gat pasin bilong pilim tru hevi bilong ol manmeri na traim long kliagut long ol samting ol i nidim, yumi no inap bel hevi hariap long pasin ol i mekim na yumi inap kamap ol gutpela tisa.

YUSIM BAIBEL LONG SKULIM OL NARAPELA

7. Olsem wanem Jisas i soim olsem em i yusim Tok Bilong God taim em i skulim ol man? (Jon 7:​14-16)

⁷ Jisas i no skulim ol man long save bilong em yet, nogat. Ol tok em i skulim ol man long en i kam long Tok Bilong God, na em i mekim tok long pasin we ol man i putim yau i ken kisim gut na bihainim ol dispela tok. Baibel i tok Jisas i skulim ol manmeri “olsem man i gat namba, na i no olsem ol saveman bilong Lo.” Na ol manmeri “i kirap nogut tru” long wok tisa bilong em. (Mak 1:22) Ol saveman long taim bilong Jisas i save kolim tok bilong ol tisa i gat biknem bilong sapotim tok ol i skulim ol man long en. Tasol Jisas i kisim ol tok bilong em long Ol Rait Holi. Em i Pikinini Bilong God na paslain long em i kam long graun, em i bin stap long heven na ating em inap yusim dispela bikpela save bilong em long skulim ol manmeri na ol inap kirap nogut tru long dispela. Tasol em i no mekim olsem. Em i skulim ol manmeri long Tok Bilong God na laik bilong God. (Ritim Jon 7:​14-16.) Jisas i stap gutpela eksampel tru em ol disaipel bilong em i ken bihainim.

8. Olsem wanem aposel Pita i bihainim pasin bilong Jisas long skulim ol man?

⁸ Ol disaipel bilong Jisas i bin yusim Tok Bilong God taim ol i mekim wok tisa. Olsem, skelim tok aposel Pita i bin mekim long Pentikos 33 C.E. Pita i no go long bikpela skul bilong dispela graun. Tasol ol manmeri i pilim tru ol tok em i mekim taim em i eksplenim gut ol tok profet long Ol Rait Holi em Jisas i bin truim. (Apo. 2:​14-37) Wanem samting i kamap long dispela? Baibel i tok: “Ol manmeri husat i bilipim tok bilong em, ol i kisim baptais, na long dispela de inap olsem 3,000 manmeri i joinim lain bilong ol.”—Apo. 2:41.

9. Wai na yumi mas yusim Tok Bilong God taim yumi skulim ol manmeri?

⁹ I no gat narapela tul i gutpela moa bilong helpim ol manmeri, nogat, Baibel tasol inap helpim gut ol manmeri. (Hib. 4:12) Olsem na yumi mas tingting strong long yusim Tok Bilong God taim yumi mekim wok tisa. Yumi mas “autim tok bilong God” na i no save bilong yumi yet. (2 Tim. 4:2) Provep 2:6 i tok: “Jehova yet i save givim savetingting; na maus bilong em i save kamapim tok bilong givim save na tok bilong helpim ol man long skelim gut ol samting.” So taim yumi yusim Baibel long skulim ol man, i olsem yumi larim Jehova yet i toktok long ol. (Mal. 2:7) Yumi laik helpim ol manmeri long save olsem ol savetingting i stap long Baibel i winim tru savetingting bilong ol man. God yet i as bilong ol dispela save i stap long Baibel na taim yumi kisim save long ol, dispela inap helpim yumi long amamasim Krieta bilong yumi na stap amamas long nau.—2 Tim. 3:​16, 17.

10. Olsem wanem yumi ken helpim sumatin long kliagut olsem ol tok em i lainim i kam long Baibel?

¹⁰ Taim yu redi long mekim wanpela Baibel stadi, painimaut ol rot we yu ken helpim sumatin long kliagut moa long ol tok Baibel i mekim. Sumatin bilong yu i mas kliagut olsem maski i gat ol piksa na ol vidio bilong helpim em kliagut long ol tok, bikpela samting em i mas stadi long en em Baibel. So ritim ol skripsa na helpim sumatin long wokim tingting na kliagut long ol tok bilong ol. Taim yu stori long ol piksa na ol vidio, helpim sumatin long kliagut long ol stiatok bilong Baibel em dispela vidio o piksa i laik skulim ol long en. Na i no gat wok long yu mekim planti toktok o ritim planti skripsa bilong mekim olsem. Taim yu ritim wanpela skripsa, givim haptaim long em long kliagut long ol dispela tok, na sapos em i no kliagut long poin bilong skripsa, orait ritim gen. Taim yu mekim olsem, yu kamapim klia olsem yu mekim wanpela Baibel stadi, na i no wanpela buk stadi o piksa stadi o vidio stadi.—1 Kor. 2:13.

11-12. (a) Yumi ken mekim wanem na bai yumi no les kwik long ol Baibel sumatin bilong yumi? (Aposel 17:​1-4) (Lukim tu piksa.) (b) Sampela i no luksave long wanem samting long Baibel, na olsem wanem yumi ken helpim ol?

¹¹ Sapos Baibel sumatin bilong yu i hatwok long kliagut long wanpela poin, orait tingim olsem “yu mas autim tok bilong God . . . na yu mas mekim wantaim pasin bilong i no les kwik long man.” I no olgeta sumatin i save mekim ol senis na winim mak long wankain taim. Sampela sumatin i mas lusim bikpela haptaim moa bilong kliagut long ol bikpela tok i tru bilong Baibel em yumi save pinis long en. Pol i bin autim tok long ol Juda long Tesalonaika planti taim na em i eksplenim gut ol tok bilong Ol Rait Holi long ol na dispela i helpim ol long kisim gut ol poin em i kamapim.—Ritim Aposel 17:​1-4.

¹² Narapela rot yumi ken soim ol Baibel sumatin olsem yumi no les kwik long ol, em long givim ol askim na larim ol i kamapim tingting bilong ol na sakim laik bilong toktok planti. Traim long putim gut yau na kliagut long tingting bilong ol. Na ritim na stori long sampela skripsa bilong helpim ol long kliagut long tingting bilong God long dispela poin. Na tingim dispela: Sampela man i no kliagut long Baibel na ol i no save long wanem ol tok i stap insait long en. So em gutpela long yu kisim wanpela Baibel na soim long ol. Yu ken helpim ol long lukim “Tok i Go Pas Long Tok Bilong God” long fran bilong Nupela Taim Trenslesen Baibel bilong helpim ol long kliagut long planti gutpela tok i stap insait long Baibel. Yu ken soim ol long hau Baibel i ken helpim ol long rot bilong soim ol long wanpela o tupela skripsa i stap aninit long askim 15 na stori long hau Baibel i ken helpim ol long stap amamas. So bikpela poin em olsem: Sapos yu soim sumatin bilong yu long strong bilong Tok Bilong God, orait wok tisa bilong yu bai kamapim gutpela samting.

HELPIM OL LONG KISIM SAVE LONG JEHOVA

13. Taim yumi mekim wok tisa, yumi laik stiaim tingting bilong sumatin i go long husat? Stori long tok piksa.

¹³ Mak yumi laik winim em long helpim ol man i harim tok bilong yumi long save long Jehova na go klostu long em. (Jems 4:8) Yumi ken tok piksa long wok bilong yumi olsem wok bilong wanpela teknisen bilong lait long wanpela konset. Long taim bilong konset, em i no save sutim lait i go long em yet, nogat. Em i save sutim lait i go long singa i sanap long pletfom na bai ol manmeri i ken lukim em gut. Yumi mas mekim olsem long taim yumi mekim wok tisa, yumi mas stiaim tingting bilong sumatin i go long Jehova na i no long yumi yet.

14. Olsem wanem yumi ken helpim sumatin long tingting oltaim long amamasim Jehova?

¹⁴ Taim yu mekim wanpela Baibel stadi, helpim sumatin long i gat laik long amamasim Jehova. (Prov. 27:11) Yu no skulim em long bihainim tasol wanem ol pasin i stret o i no stret na em tasol, nogat. Yu laik bai sumatin bilong yu i mekim ol senis bilong amamasim Jehova. Sapos sumatin bilong yu i hatwok long lusim wanpela pasin nogut bilong em, givim em ol kain askim olsem: “Wai na Jehova i heitim dispela pasin? Wai na Jehova i askim yu long lusim dispela pasin em yu amamas long en? Olsem wanem dispela samting Jehova i askim yu long mekim i soim olsem em i laikim yu?” Taim yu helpim sumatin bilong yu long holim wankain tingting olsem bilong Jehova, dispela bai helpim em long save olsem em i gat gutpela Papa long heven husat i laikim em tru. Na dispela bai helpim em long i gat laik long amamasim Jehova.

WOK YET LONG MEKIM GUT WOK TISA

15. Yu ken mekim wanem bilong mekim wok tisa bilong yu i kamap gutpela moa?

¹⁵ Yu ken beten askim Jehova long helpim yu long skelim wok tisa bilong yu na luksave long hau yu ken mekim gut moa dispela wok. (1 Jon 5:14) Bilong bihainim beten bilong yu, yu mas putim gut yau na kisim gutpela trening i kam long Jehova long rot bilong ol miting bilong kongrigesen. Yu ken askim wanpela i save gut long mekim wok tisa long go wantaim yu long Baibel stadi bilong yu. Na bihain askim em long tingting em i gat long wok tisa bilong yu. Tingim tu olsem maski yu save gut long ol poin yu laik stadi wantaim sumatin long en, ating sumatin i no kliagut yet long ol dispela samting. So yu ken traim long holim wankain tingting olsem sumatin i gat long dispela topik. Na helpim sumatin long luksave olsem tok yu skulim em long en em gutnius. Dispela i ken kirapim sumatin long pas gut moa wantaim Jehova na helpim em long stap amamas tru.—Sng. 1:​1-3.

16. Wanem gutpela samting bai kamap sapos yumi wok yet long mekim gut wok tisa bilong yumi?

¹⁶ Wok bilong skulim ol narapela long Jehova em wanpela wok we i save givim bikpela amamas tru long yumi. Na bai yumi mekim moa yet dispela naispela wok long nupela taim God bai kamapim. So long nau yumi ken wok yet long tingim tru ol man i putim yau long yumi, yusim Baibel long skulim ol man, na helpim ol man long kisim save long Jehova taim yumi autim gutnius. Long dispela rot, yumi bai mekim gut moa wok tisa bilong yumi taim yumi autim tok.