Wok Yet Long Winim Mak Bilong Kisim Baptais

1. (a) Wanem gutpela samting i kamap taim yu kisim baptais? (b) Bai yumi stori long wanem samting long dispela atikol?

OLSEM WANEM? Yu bin dediketim yu yet long Jehova na kamapim klia dispela dediket long rot bilong kisim baptais long wara? Sapos olsem, orait yu askim God long mekim maus bilong bel bilong yu i stap klin. (1 Pita 3:21) Taim yu kisim baptais, yu stap olsem gutpela eksampel long ol yangpela na ol nupela manmeri em ol i bung wantaim kongrigesen bilong yu. So yu bin mekim gutpela disisen tru! Tasol olsem wanem sapos yu no kisim baptais yet? Em i klia tru olsem yu laikim Jehova na yu laik mekim laik bilong em. Na yu save olsem baptais em bikpela samting bilong Jehova i ken fogivim ol sin bilong yu na orait long yu. (Apo. 2:​38-40) Tasol yu wok long surik yet long kisim baptais. Wanem samting i ken helpim yu? Long dispela atikol yumi bai stori long (1) wai na sampela i surik long kisim baptais, (2) wai na em i bikpela samting long tingim olsem pinis i kam klostu, na (3) olsem wanem pasin bilong hariap long winim ol mak bilong kisim baptais bai helpim yu.

WAI NA SAMPELA I SURIK LONG KISIM BAPTAIS?

2. Wai na sampela i surik long kisim baptais?

² Sampela i pret long kisim baptais, long wanem, ol i pret. Olsem, maski ol i gat laik tru long mekim wok bilong Jehova, ol i pret olsem ol i no gutpela inap long amamasim em. Sapos yu pilim olsem, orait skelim ol ves bilong Baibel we i ken helpim yu long bilip tru olsem Jehova i no askim yu long mekim samting i winim mak bilong yu, na em i save amamas taim yumi givim bes bilong yumi long mekim wok bilong em. (Sng. 103:​13, 14; Kol. 3:23) Sapos yu pret long ol man bai birua long yu, orait beten na askim Jehova long strongim bel bilong yu wankain olsem man bilong raitim song i mekim, em i tok: “Jehova i stap long sait bilong mi; olsem na mi no inap pret. Ol man bai mekim wanem long mi?”—Sng. 118:6.

3. Wanem tingting inap pasim sampela long kisim baptais? (Lukim tu piksa.)

³ Sampela em ol i laikim Jehova, ol i surik long kisim baptais bikos ol i pilim olsem ol i no gat inap save. Tasol yu mas i gat save inap long wanem mak? Skelim wanpela eksampel long Baibel. Taim aposel Pol na Sailas i stap long kalabus, graun i guria na i seksekim haus kalabus tupela i stap long en na tupela i kirap long autim tok long woda na ol wanhaus bilong em. Dispela woda na famili bilong em i kliagut olsem wanpela mirakel i bin kamap. Na ol i kisim save long planti samting long Jehova na Jisas long dispela nait. Em as na “kwiktaim olgeta i kisim baptais.” (Apo. 16:​25-33) Sapos yu kisim save long Jehova, laikim em long bel olgeta bilong yu, kisim save long ol bikpela tok i tru bilong Baibel, tanim bel long ol sin bilong yu, na yu tingting strong long bihainim ol lo bilong em, orait yu redi long kisim baptais.—Mak 12:30.

4. Sampela i pilim olsem wanem na dispela i pasim ol long kisim baptais? (Lukim tu piksa.)

⁴ Sampela i laik mekim ol senis bilong amamasim God na kisim baptais, tasol ol i pilim hatwok long mekim olsem. Em savetingting long skelim gut wanem ol disisen yu laik mekim long laip bilong yu. (Luk 14:​27-30) Tasol sampela i wari long lusim ol samting ol i save amamas long en bilong ol i ken mekim wok bilong God. Candace husat i bin kisim save long tok i tru taim em i liklik, em i bin pilim olsem taim wanpela i laik stadi wantaim em long Baibel taim em i kamap bikpela meri pinis. Em i tok: “Mi save long samting mi mas mekim bilong lotuim Jehova, tasol mi laikim ol samting mi save mekim long dispela graun na dispela i pasim mi. Mi save olsem mi bai hatwok tru long givap long ol dispela samting.” Ol narapela i tingting planti olsem ol man i baptais i mas bihainim ol lo bilong Jehova na ol dispela lo i strong tumas long ol i bihainim. Ol i wari olsem bihain long ol i baptais, nogut ol i mekim wanpela bikpela sin na kongrigesen i seperetim ol. Sapos ol kain tingting olsem i pasim yu long kisim baptais, orait yu ken mekim wanem?

5. Yumi mas putim tingting long wanem ol samting taim yumi laik mekim disisen bilong kisim baptais o nogat? (Matyu 13:​44-46)

⁵ Taim yumi laik baim wanpela samting, yumi save skelim prais bilong en, na tu, veliu bilong en. Sapos yumi lukim olsem veliu bilong en i antap moa winim prais bilong en, orait kwiktaim yumi save baim dispela samting. Olsem tasol, taim yumi skelim olsem yumi bai baptais o nogat, yumi no ken skelim tasol ol samting yumi mas lusim o ol senis yumi mas mekim, i gutpela long yumi tingim samting i gat bikpela veliu em pasin pren bilong yumi wantaim Jehova. Jisas i mekim tupela tok piksa bilong skulim yumi long dispela poin. (Ritim Matyu 13:​44-46.) Long dispela tupela tok piksa, Jisas i stori long wanpela man i salim olgeta samting bilong em bambai em i ken baim wanpela samting i gat bikpela veliu em i bin painim. Yu tu i bin painim samting i gat bikpela veliu em tok i tru bilong Kingdom. So sapos yu surik long mekim ol senis na kisim baptais, orait tingim gut ol dispela tok piksa Jisas i mekim. Yu ken askim yu yet olsem: ‘Mi bilip tru tru olsem mi painim samting i gat bikpela veliu? Mi tingim tru pasin pren bilong mi wantaim Jehova, ol gutpela tok promis bilong em long bihain, na bikpela lain bratasista i gat pasin laikim?’ Ol bekim bilong yu long ol dispela askim bai helpim yu long putim tingting long ol senis em yu mas mekim na bai yu ken kisim baptais.

6. Yumi ken mekim wanem na bai yumi gat gutpela bel?

⁶ Long tok piksa bilong Jisas long man bilong planim ol sid, em i tok bel bilong man inap pasim em long winim ol mak bilong bilip. Tasol Jisas i tok tu olsem ol man em “bel bilong ol i stretpela na i gutpela,” ol bai putim yau na bihainim gutnius bilong Kingdom ol i harim. (Luk 8:​5-15) Sapos yu pilim olsem tingting bilong yu i bruk na yu no save bai yu bihainim ol tok yu lainim o nogat, orait no ken givap long yu yet. God bai helpim yu long kisim “nupela bel,” na dispela bai helpim yu long bihainim ol tok bilong em yu lainim. Beten na askim Jehova long mekim isi bel bilong yu na bai dispela tok i tru bilong Kingdom i ken putim kru na gro insait long bel bilong yu.—Ese. 18:31; 36:26.

7-8. Wai na sampela yangpela i surik long winim ol mak bilong kisim baptais? (Lukim tu piksa.)

⁷ Sampela yangpela i laikim Jehova, tasol ol i surik long winim ol mak bilong kisim baptais bikos long tok o pasin ol narapela i mekim. Olsem, sampela tisa long skul inap givim edvais long ol sumatin olsem sampela kain pasin na ol laip stail i orait long bihainim, maski ol dispela pasin i no stret wantaim ol lo bilong Jehova. Tasol ol kain edvais olsem inap kamapim bikpela hevi long laip bilong yu. (Sng. 1:​1, 2; Prov. 7:​1-5) Yu ken abrusim ol kain hevi olsem long rot bilong bihainim eksampel bilong man bilong raitim song, em i tokim Jehova olsem: “Mi save skelim gut ol samting winim ol tisa bilong mi, long wanem, mi save tingting strong long ol tok bilong yu bilong kirapim gen tingting.”—Sng. 119:99.

⁸ Ol ripot i soim olsem sampela papamama Witnes i pasim ol pikinini bilong ol long kisim baptais. Ating ol papamama i putim tingting long ediukesen bilong pikinini na wok mani em bai kisim bihain, o sampela papamama i no inapim gut wok bilong ol long helpim pikinini long winim ol mak bilong bilip. Olsem wanem? Yu ting papamama bilong yu inap helpim yu long winim ol mak bilong bilip? I gutpela yu toktok wantaim ol long dispela samting. Yu ken save olsem maski yu gat wanem krismas, dispela i no ken pasim yu long mekim ol samting bilong kamap gutpela pren bilong Jehova.—Prov. 20:11.

9. Wai na sampela i surikim taim bilong kisim baptais?

⁹ Sampela i winim mak pinis bilong kisim baptais, tasol ol i surikim taim bilong baptais bikos long presa i kam long ol wanlain, ating ol i laik wetim wanpela narapela long winim wankain mak na bai ol i ken kisim baptais wantaim. Olsem, ating ol i gat laik olsem ol bai kisim baptais long wankain taim wantaim wanpela pren o wanpela ol i laikim tumas. Em orait long yu ken kisim baptais long wankain taim olsem wanpela narapela yu laikim tumas. Tasol tru tru yu ting ol kain samting olsem i mas pasim yu long kisim baptais nau? Tingim, dediket bilong yu em samting yu yet i mekim wantaim God na i no gat narapela i insait long en. So baptais bilong yu tu em samting bilong yu yet na disisen bilong narapela i no ken insait long en.—Rom 14:12.

WAI NA YU MAS TINGIM OLSEM PINIS I KLOSTU

10. Wai na sampela i no hariap long kisim baptais?

¹⁰ Yumi stori pinis long ol risen na planti i surik long kisim baptais, tasol sampela i surik long kisim baptais bikos ol i ting olsem bikpela haptaim i stap yet paslain long pinis i kamap. Tasol yu ting i stret long holim kain tingting olsem? Jisas i givim tok lukaut long ol disaipel bilong em olsem: “Redi i stap, long wanem, Pikinini bilong man bai kam long taim yupela i no ting em bai kam.”—Luk 12:40.

11. Olsem Buk Song 119:60 i kamapim, yumi mas mekim wanem long ol lo bilong Jehova taim yumi kisim save long ol?

¹¹ Pasin bilong laikim Jehova i mas kirapim yumi long dediket long em. Taim yumi save gut moa long gutpela God bilong yumi, dispela bai kirapim yumi long laikim tru ol lo bilong em na kirap hariap long bihainim ol dispela lo taim yumi kisim save long ol. (Ritim Buk Song 119:60.) Disaipel Jems i tok narapela risen na yumi mas kirap hariap long bihainim ol lo bilong Jehova em bikos yumi no save long wanem samting bai painim yumi long tumora. Sapos yumi “save long stretpela pasin em [yumi] mas mekim,” orait yumi mas kirap hariap long mekim nau yet bikos yumi no save bai yumi stap laip tumora o nogat.—Jems 4:​13-17.

12. Yumi inap kisim wanem skul long tok piksa bilong Jisas long gaden wain?

¹² Olsem wanem long tok piksa bilong Jisas long gaden wain? Em i bin tok olsem sampela wokman bai wok wanpela aua tasol na ol bai kisim wankain pe olsem ol man i bin wok de olgeta. Na dispela em tru! Tasol lukim tok em ol dispela man i wok wanpela aua i mekim long risen na ol i no kirap hariap long wok. Ol i tok: “I no gat man i haiarim mipela.” Ol dispela man i no bin givim eskius na sindaun nating de olgeta, nogat, ol i no bin wok bikos i no man i haiarim ol. Taim ol i kisim singaut bilong wok, wantu tasol ol i kirap long mekim wok. (Mat. 20:​1-16) Long nau, Jisas i singautim yumi long kamap ol disaipel bilong em na insait long wok bilong Kingdom. So yumi mas hariap long bihainim singaut bilong em taim yumi harim dispela singaut.

13. Yumi inap kisim wanem skul long meri bilong Lot?

¹³ Ol manmeri i surikim taim bilong winim ol mak bilong lotuim Jehova, ating ol bai luksave olsem taim ol i wet longpela taim, dispela bai givim hatwok long ol. Jisas i save long ol dispela samting na em i givim tok lukaut long ol disaipel bilong em olsem: “Tingim meri bilong Lot.” (Luk 17:​31-35) Meri bilong Lot i save olsem kot bilong God bai painim taun Sodom na Gomora klostu taim, tasol i luk olsem em i hatwok long givim baksait ol samting em i bin lusim pinis. (Stt. 19:​23-26) Ol samting i painim meri bilong Lot i stap olsem tok lukaut na i skulim yumi olsem God i makim pinis taim bilong kisim bek ol manmeri na em bai i no inap surikim taim. Long taim stret God i makim, i olsem em bai pasim dispela dua bilong kisim laip na em bai lokim olgeta.—Luk 13:​24, 25.

14. Olsem wanem ol profet i stori long taim bilong pinis inap mekim sampela samting long yu?

¹⁴ Long olgeta wan wan de, ol samting i kamap long graun olgeta i truim ol tok profet Baibel i mekim long pinis bilong dispela haptaim bilong nau. Sapos ol dispela samting i no mekim wanpela samting long yu, orait ol samting i kamap long olgeta hap i ken helpim yu long was i stap na mekim ol senis na winim mak bilong kisim baptais. Skelim samting i kamap long taim bilong ol aposel. Aposel Pita i tokim ol Kristen olsem ol i mas was i stap na “redi oltaim,” long wanem, “pinis bilong olgeta samting i kam klostu.” (1 Pita 4:7) Dispela tok “pinis” long hia i makim pinis bilong haptaim bilong ol Juda. Na ol manmeri em Pita i bin raitim pas long ol, ol i no stap klostu long Jerusalem, so bagarap i kamap long taun Jerusalem bai i no mekim wanpela samting long ol. (1 Pita 1:1) Tasol taim ol i lukim tok profet i kamap tru, dispela i strongim bilip bilong ol long olgeta narapela tok promis bilong Jehova. Olsem tasol, taim yu lukim truim bilong ol tok profet i stori long pinis bilong dispela haptaim bilong nau, dispela bai kirapim yu long redi i stap long rot bilong winim ol mak na kisim baptais.

15. Yumi mas i gat wanem tingting long de bilong Jehova? (2 Pita 3:​10-13)

¹⁵ Long namba 2 pas bilong Pita, em i stori long hau yumi mas redi long de bilong Jehova, em pinis bilong dispela haptaim bilong nau. Ol Kristen em ol i bin stap long taim bilong ol aposel, dispela de i bin stap longwe tru. Maski i olsem, Pita i tokim ol long “tingim na wetim” dispela de o “tingim dispela de i kam klostu pinis.” (Ritim 2 Pita 3:​10-13.) Yumi tu i ken tingim olsem dispela de i kam klostu pinis long rot bilong redi na wetim dispela de i kamap. Yumi soim olsem yumi wetim dispela de long rot bilong “wokabaut long pasin i holi na bihainim pasin bilong givim bel tru long God.” Tingim bikpela amamas Jehova bai pilim taim yu “bihainim pasin bilong givim bel tru” long em! Tru tumas, em bai amamas long lukim yu dediket long em na kisim baptais.

GUTPELA SAMTING I KAMAP TAIM YU BAPTAIS NAU

16. Wanem gutpela taim bilong kisim baptais? (2 Korin 6:​1, 2) (Lukim tu ol piksa.)

¹⁶ Gutpela taim tru bilong kisim baptais em nau. (Ritim 2 Korin 6:​1, 2.) Man Itiopia em Filip i bin bungim em, em i luksave olsem em i mas mekim sampela samting hariap. Taim em i kliagut long gutnius na em i luksave olsem rot i op long em inap kisim baptais, em i no tingting long em yet olsem: ‘Mi laik kisim sampela save moa long gutnius pastaim. O ating i gat narapela wara daunbilo long rot we mi ken kisim baptais long en,’ nogat. Wantu tasol em i askim Filip: “Wanem samting i pasim mi long kisim baptais?” (Apo. 8:​26, 27, 35-39) Em i stap gutpela eksampel tru! Bihain long em i kisim baptais em i “amamas na i go.”

17. Yu ken save tru long wanem samting?

¹⁷ Sapos yu wok long surik long kisim baptais, orait yu ken save tru olsem Jehova i redi long helpim yu long pas gut wantaim em. (Rom 2:4) Em i ken helpim yu long daunim pasin bilong yu long pret, ol wari yu gat, na ol tok o pasin bilong ol narapela we inap pasim yu long kisim baptais. Taim yu baptais na kisim klinpela maus bilong bel i kam long God, yu bai luksave olsem ol samting yu lusim pinis, ol i no bikpela samting moa long yu. (Fili. 3:​8, 13) Yu ken putim tingting i go long “ol samting bai kamap bihain” em taim we Jehova bai truim ol tok promis bilong em long ol manmeri em ol i dediket long em na kisim baptais.—Apo. 3:19.