Kliagut Long Mining Bilong Baptais

1. Wanem samting i soim olsem baptais em wanpela bikpela tok i tru bilong Baibel?

YUMI save amamas tru long lukim ol manmeri i kisim baptais! Ol manmeri i bin pilim kain amamas olsem long fes miting bilong kongrigesen Kristen long Pentikos 33 C.E. taim ol i lukim planti manmeri i kisim baptais. Long dispela bung, aposel Pita i mekim wanpela tok i stori long ol bikpela tok i tru long sait bilong baptais. (Apo. 2:​38, 40, 41) Aposel Pol i stori long “ol as bilip bilong Krais” na dispela i makim tu “ol tok bilong ol kain kain baptais.” (Hib. 6:​1, 2) Maski baptais em wanpela tok bilong Baibel em yumi save pinis long en, yumi mas kliagut moa long en. Bilong wanem?

2. Wai na yumi mas kliagut long baptais i makim wanem samting?

² Taim faundesen bilong haus i stap strong, dispela bai helpim haus long stap strong, olsem tasol, taim yumi kliagut long mining tru bilong baptais, dispela bai helpim bilip bilong yumi long stap strong. Yumi olgeta i mas kliagut long mining bilong baptais, maski yumi baptais inap planti yia pinis o yumi wok long winim ol mak bilong kisim baptais. So long dispela atikol, yumi bai kisim bekim bilong ol dispela askim olsem: Wanem mining bilong baptais? Wanem samting i insait long baptais Kristen? Na wai na yumi save kisim baptais long nem bilong Papa, Pikinini, na holi spirit?

MINING BILONG BAPTAIS BILONG YU

3. Baptais i makim wanem samting?

³ Taim yu kisim baptais, yu soim long ai bilong olgeta manmeri olsem yu bilip long tok i tru long God Jehova na Jisas Krais, yu tanim bel long ol sin bilong yu, yu senisim laip bilong yu long mekim wok bilong Jehova, na yu luksave olsem Jisas em rot Jehova i makim bilong kisim bek ol manmeri, na yu beten na tokim God Jehova olsem yu bai wok gut wantaim oganaisesen bilong em long mekim laik bilong em. Taim yu mekim dispela tok promis em yu dediket, na bihain yu kisim baptais na wokabaut long dispela rot i go long laip oltaim.

4. Taim yu go insait tru long wara na kam ausait long taim bilong baptais, dispela i makim wanem samting? (Lukim tu piksa.)

⁴ Taim yu kisim baptais, ol i putim yu i go insait tru long wara na bringim yu i kam ausait,a i olsem yu bin dai long ol olpela pasin bilong yu na ol i kirapim yu bek gen. (Skelim Kolosi 2:12) Baptais i olsem piksa na i makim ol bikpela senis yu mekim long laip bilong yu. Hau? Taim yu go insait long wara, yu soim olsem yu stop long bihainim ol olpela pasin em bipo yu save bihainim long laip bilong yu. Taim yu kam ausait long wara, yu kirapim nupela laip em long mekim laik bilong God.

5. Olsem wanem wok bilong redi long kisim baptais i wankain long wok bilong Noa long wokim sip? (1 Pita 3:​18-21)

⁵ Ritim 1 Pita 3:​18-21. Wok bilong redi long kisim baptais i wankain olsem wok bilong Noa long wokim sip. Sapos yu kirap nau tasol long kisim save long Jehova, i gat planti wok moa yu mas mekim na ating dispela inap mekim yu tingting planti wankain olsem bikpela wok Noa i gat bilong wokim sip. Yu ting yu mas mekim dispela bikpela wok? Noa i bin bihainim tok na mekim olsem. God yet i bin wokim disain bilong dispela sip, na Noa i mas bihainim gut dispela disain long wokim sip bambai em i ken lukautim laip bilong ol manmeri long Bikpela Tait. Noa i bilip long God na God i sapotim em na em i bihainim tok na wokim sip. Wankain olsem Noa, yu tu i ken “mekim olgeta samting em God i tokim [yu] long mekim.”—Stt. 6:22.

6. Olsem wanem baptais i ken kisim bek yu?

⁶ Long ves 21, aposel Pita i tok olsem baptais i “kisim bek yupela.” Tru tru pasin bilong i go insait long wara na kam ausait i no makim olsem God i kisim bek yu, na tu, dispela i no wasim na rausim ol sin bilong yu, nogat. Ofa bilong Jisas tasol inap wasim yu na mekim yu i kamap klin long ol sin bilong yu. (1 Jon 1:7) Baptais em i bikpela samting bilong yu ken mekim olgeta samting God i tokim yu long mekim na taim yu baptais i olsem yu “askim God long mekim maus bilong bel bilong [yu] i stap klin.” Jehova bai amamas tru long givim samting em yu askim long en. So i olsem baptais i “kisim bek yupela,” o bringim yupela i go long God i ken kisim bek yupela.

WANEM SAMTING I INSAIT LONG BAPTAIS KRISTEN

7. Ol i mas bihainim wanem pasin long taim bilong baptais?

⁷ Baibel i stori long taim man i baptais, em i go insait olgeta long wara na kam ausait, tasol Baibel i no stori long ol narapela samting long sait bilong baptais. Maski i olsem, Ol Rait Holi i helpim yumi long kisim save long samting yumi mas mekim long taim bilong baptais. Olsem, ol stiatok bilong Baibel i helpim ol manmeri bilong baptais long werim ol klos i stret taim ol i kisim baptais, na tu, ol dispela stiatok i helpim ol man i sanap lukim baptais long pasin ol i mas mekim. (1 Kor. 14:40; 1 Tim. 2:9) Long nau, ol elda i save baptaisim ol manmeri na yumi no givim biknem long ol brata em ol i mekim dispela wok God i givim long ol. (1 Kor. 1:​14, 15) Na baptais i stret long ai bilong God, maski bikpela lain manmeri i lukim baptais i kamap o liklik lain tasol i lukim.—Apo. 8:36.

8. Ol i save givim wanem askim long ol lain i laik kisim baptais, na bilong wanem? (Aposel 2:​38-42) (Lukim tu piksa.)

⁸ Baibel i soim olsem yumi mas “tokaut long dispela bilip bilong [yumi] long ai bilong ol manmeri, na God i kisim bek” yumi. (Rom 10:​9, 10) Yumi mekim “tokaut long dispela bilip” bilong yumi long God bai kisim bek yumi taim yumi autim tok na moa yet long taim yumi kisim baptais! Em as na ol i save givim tupela askim long ol lain i laik kisim baptais. Namba 1 askim: “Yu hevi long ol sin yu bin mekim na yu tanim bel na dediket pinis long Jehova na bilip long samting em i mekim bilong kisim bek ol manmeri long rot bilong Jisas Krais?” Dispela askim i kamapim klia ol samting man i mekim bilong redi long kisim baptais na em wankain long tok aposel Pita i mekim long bikpela lain manmeri i bung long Pentikos. Namba 2 askim: “Yu kliagut olsem taim yu baptais pinis, dispela samting i makim olsem nau yu wanpela Witnes Bilong Jehova na yu insait long oganaisesen bilong Jehova?” Dispela askim i bilong kirapim tingting bilong yumi olsem yumi mas bihainim dediket bilong yumi long rot bilong bihainim daireksen i kam long oganaisesen bilong Jehova na mekim wok bilong God wantaim ol wanbilip Kristen bilong yumi, wankain olsem ol disaipel long taim bilong ol aposel i bin mekim. (Ritim Aposel 2:​38-42.) So ol manmeri em ol i tok yes long dispela tupela askim, ol i winim mak bilong kisim baptais.

9. Olgeta manmeri i mas mekim wanem samting bambai God i ken orait long ol?

⁹ Paslain long yu kisim save long tok i tru, ating yu bin i gat gutpela laip na yu no bin mekim ol bikpela sin. O ating ol papamama Kristen i bin mekim bikpela long yu na helpim yu long laikim Jehova. So yu ting yu gat wok yet long tanim bel na kisim baptais bambai God i ken orait long yu? Yes. Maski yumi gat wanem kain bekgraun, yumi olgeta i mas luksave olsem yumi bin kisim sin taim yumi bon na dispela i mekim na yumi stap longwe long God. (Sng. 51:5) Tasol taim yumi kisim save long Jehova, yumi makim olsem yumi laik putim laik bilong em i stap nambawan samting long laip bilong yumi. Taim yumi mekim olsem, yumi ken tanim bel long ol pasin yumi save mekim bipo na baut na kirap bihainim ol pasin we i amamasim Papa bilong yumi long heven. Na bihain long dispela yumi ken kisim baptais.—Apo. 3:19.

10. Yu mas mekim wanem sapos bipo yu bin baptais olsem memba bilong narapela lotu?

¹⁰ Sapos bipo yu bin kisim baptais olsem wanpela memba bilong narapela lotu, orait yu gat wok long kisim baptais olsem wanpela Witnes Bilong Jehova. Bilong wanem? Long wanem, yu no bin i gat stretpela save long tok i tru bilong God Jehova na Jisas long bipo. Na maski yu bin mekim tok promis long mekim laik bilong God long rot bilong beten, yu no bin kliagut long laik bilong God so stretpela save long laik bilong God i no as bilong promis yu bin mekim. Taim aposel Pol i bin bungim ol man bilong Efesus em bipo ol i bin kisim baptais, tasol ol i no gat stretpela save long ol bilip Kristen, em i stretim rot long ol i kisim baptais gen.b (Apo. 19:​1-5) Olsem tasol, long nau baptais bilong yu bai i stret long ai bilong God sapos yu kisim stretpela save long laik bilong God na em risen na yu kisim baptais.

“LONG NEM BILONG PAPA NA BILONG PIKININI NA BILONG HOLI SPIRIT”

11. Wanem mining bilong dispela tok kisim baptais “long nem bilong papa na bilong pikinini na bilong holi spirit”? (Matyu 28:​18-20)

¹¹ Jisas i tok olsem ol nupela disaipel i mas kisim baptais “long nem bilong Papa na bilong Pikinini na bilong holi spirit.” (Ritim Matyu 28:​18-20.) Wanem mining bilong dispela tok em i mekim? Long Baibel, planti taim dispela tok “nem” i save makim gutnem bilong wanpela. Na em inap makim tu namba na wok bos em dispela nem i makim. So taim yumi mekim wanpela samting long nem bilong wanpela man o wanpela samting, yumi luksave long strong em dispela nem i gat. So taim yumi kisim baptais long nem bilong Jisas na Jehova, yumi luksave long strong na rait em ol i gat bilong tokim yumi long ol samting yumi mas mekim. Na taim yumi kisim baptais long nem bilong holi spirit, dispela i makim olsem yumi larim holi spirit i stiaim yumi. Nau yumi ken stori moa long hau yumi ken mekim olsem.

12. Wanem insait bilong dispela tok kisim baptais long nem bilong Papa? (Revelesen 4:11) (Lukim tu ol piksa.)

¹² Long nem bilong Papa. Yumi luksave olsem Jehova em i Papa bilong yumi long heven na em Man Bilong Givim Laip. Em i God i Gat Olgeta Strong na em i Krieta bilong olgeta samting. (Ritim Revelesen 4:11.) Yumi luksave long em olsem Man Bilong Harim beten bilong yumi, na yumi kolim nem bilong em long pasin rispek taim yumi beten long em na tokim ol narapela long em. (Sng. 65:2) Tasol i gat sampela samting moa i insait long dispela tok baptais long nem bilong Papa. Ol man i bin putim yau long tok bilong Pita long Pentikos, ol i save pinis long Jehova, tasol long dispela taim ol i mas luksave long em olsem Man Bilong Givim laip oltaim long ol long rot bilong Jisas Krais.—Rom 5:8.

13. Wanem mining bilong dispela tok kisim baptais long nem bilong Pikinini? (Lukim tu piksa.)

¹³ Long nem bilong Pikinini. Yumi luksave olsem Jisas em i dispela wanpela Pikinini bilong God. Jisas em i “rot” na long rot bilong em tasol yumi inap pas gut wantaim Jehova. (Jon 14:6) Na tu, Jisas em man bilong baim bek yumi na em man husat i bin dai bilong helpim yumi na bai yumi ken kisim laip oltaim. Dispela save i bin kirapim yumi long bihainim ol pasin bilong em long olgeta de long laip bilong yumi, na i no long taim yumi kisim baptais tasol. (1 Jon 2:6) So yumi givim bel tru long autim tok olsem em i save mekim na yumi no larim wanpela samting i pasim yumi. (Luk 4:43) Na yumi redi long sanap strong taim ol man i mekim nogut long yumi bikos yumi stap gut long mekim wok bilong God. (2 Tim. 3:12) Yumi rispektim Jisas olsem “het bilong kongrigesen,” olsem na yumi amamas long stap daun long ol man em i givim wok long ol long go pas long mekim ol wok insait long kongrigesen na long lukautim ol disaipel bilong em.—Efe. 4:​8, 11, 12; 5:23.

14. (a) Wanem mining bilong dispela tok olsem kisim baptais long nem bilong holi spirit? (Lukim tu ol piksa.) (b) Wanem narapela baptais em ol man God i makim i save kisim? (Lukim blok “Baptais Em Ol Kristen God i Makim i Kisim.”)

¹⁴ Long nem bilong holi spirit. Yumi kisim stretpela save long tok i tru long holi spirit em i wanem samting. Em i no wanpela man na em i no hap bilong God Triwan, nogat, em i strong bilong God. Yumi luksave olsem holi spirit i bin stiaim ol profet na ol man bilong raitim Baibel so taim yumi ritim Baibel long olgeta de i olsem yumi larim holi spirit i stiaim yumi. (2 Pita 1:​20, 21) Na yumi sakim pasin bilong mekim ol bikpela sin, long wanem, yumi save olsem ol kain sin olsem i save pasim holi spirit bilong God long kam long yumi, na tu, em i pasim spirit bilong God long wok insait long kongrigesen.—Efe. 4:30.

15. Yumi mas tingting strong long mekim wanem?

¹⁵ Sapos yu wanpela Kristen husat i baptais pinis, orait tingting strong long kliagut long olgeta samting i insait long “ol tok bilong ol kain kain baptais”c na bihainim tok promis yu bin mekim long Jehova long taim yu dediket na baptais. Tasol olsem wanem sapos yu no bin baptais yet olsem wanpela Kristen? Wanem samting i pasim yu? Atikol i kamap bihain bai stori long hau yu ken winim yet ol mak bilong kisim baptais.