Yu Redi Long Karim Ol Hevi Bihain Long Yu Kisim Baptais?

1-2. Yumi ken mekim wanem bilong redi long ol hevi inap painim yumi insait long tok i tru? Stori long dispela.

YUMI ken save olsem yumi bai karim ol hevi long dispela graun em Satan i bosim. Jisas i save long dispela, olsem na em i givim tok lukaut long ol disaipel bilong em olsem: “Dispela pasin bilong pundaunim ol arapela i mas kamap.” (Mat. 18:7) Yumi tingim dispela tok lukaut, na yumi luksave olsem yumi mas redi nau long karim ol hevi, dispela inap makim tu ol hevi i kamap namel long yumi na ol wanbilip.

² Tingim dispela tok piksa. Lain bilong Jehova i save kisim ol tok bilong helpim ol long redi long ol netrol disasta. Hau yumi save redi long ol disasta? Pastaim, yumi painimaut wanem ol disasta inap kamap long hap yumi stap long en. Em bikpela samting long mekim olsem sapos yumi go stap long nupela ples. Bihain long yumi painimaut wanem ol disasta inap kamap, yumi mas plenim ol samting yumi ken mekim bilong redi long ol dispela disasta. (Prov. 21:5) Olsem tasol, i gutpela long yumi luksave long wanem ol hevi inap painim yumi taim yumi kisim save long tok i tru na bai yumi ken redi nau yet long karim ol dispela hevi taim ol i kamap. Taim yumi mekim olsem, ol dispela hevi i no inap daunim yumi na bagarapim pasin pren bilong yumi wantaim Jehova. (Sng. 17:5) Yumi bai stori long tripela hevi we inap kamap na samting yumi ken mekim bilong redi long karim ol dispela hevi.a

WANPELA BRATA O SISTA I RONGIM YU

3. Yumi inap bungim wanem hevi insait long kongrigesen?

³ Yu bin pilim olsem wanem long namba 1 taim yu kam long miting na yu lukim pasin laikim namel long lain bilong Jehova? Olsem wanem? Long dispela taim yu bilip tru olsem yu painim pinis tok i tru? (Jon 13:35; Kol. 3:12) Em samting Biancab i bin pilim. Tasol bihain long em i kisim baptais, samting em i no ting bai kamap i bin kamap long em. Em i tok: “Wanpela sista i mekim hatpela pasin long mi. Mi luksave tu olsem em i no save mekim ol gutpela tok long ol narapela taim em i stori wantaim ol arapela. Mi no ting kain samting olsem bai kamap; mi bin kisim save olsem ol Witnes Bilong Jehova i save wok strong long stap bel isi wantaim ol narapela na soim pasin laikim long ol.” Em tru olsem lain bilong Jehova i wok strong long kisim ol pasin bilong em, tasol yumi no gutpela olgeta so sampela taim ol inap mekim ol tok o ol pasin i rongim yumi. (Efe. 4:​23, 24; 1 Jon 1:8) So sampela taim, wanpela wanbilip inap mekim tok o pasin i bagarapim bel bilong yu. (Jems 3:8) Sori tru olsem sampela i larim ol kain hevi olsem i daunim ol na ol i stop long mekim wok bilong Jehova.

4. Wanem samting i ken helpim yumi long redi long karim hevi taim wanpela brata o sista i rongim yumi? (Efesus 4:32)

⁴ Yu ken mekim wanem long nau bilong redi long karim hevi taim wanpela brata o sista i mekim yu bel hevi o i rongim yu? Yu ken traim long bihainim edvais i stap long Efesus 4:32. (Ritim.) Sapos yu traim bes bilong yu long mekim yet gutpela pasin na pasin sori, yu bai abrusim pasin bilong kros pait wantaim ol narapela. Tingting strong long redi long fogivim ol narapela long ol rong ol i bin mekim long yu. Wanem samting i ken helpim yu long mekim olsem? Tingim hamas taim yu bin askim Jehova long fogivim ol rong yu bin mekim, na pasin bilong em long redi oltaim long mekim olsem. (Mat. 6:12) Taim yu tingim tingim gutpela pasin bilong Jehova long redi long fogivim yu, dispela bai helpim yu long redi long fogivim ol narapela.

5. Wanem stiatok bilong Baibel i ken helpim yumi taim wanpela i rongim yumi? (Provep 19:11) (Lukim tu ol piksa.)

⁵ Ritim Provep 19:11. Baibel i tok taim wanpela i rongim yumi, gutpela tingtingc i ken helpim yumi long no ken belhat kwik. Dispela stiatok i bin helpim Rima, em i baptais inap sampela yia i go pinis. Em i tok: “Taim mi lukim ol brata na ol sista i mekim ol pasin we i mekim mi bel hevi o i mekim na mi pilim nogut, pastaim mi save tingim tok bilong Provep 19:11. Mi tingim sindaun na bekgraun bilong ol na mi traim long tingim wanem risen na ol i mekim kain pasin olsem. Na tu, mi save wok wantaim ol long wok autim tok. Long dispela rot, mi inap save gut moa long ol.” Dispela em i gutpela edvais. Yu ken mekim ol samting bilong save gut moa long ol bratasista bilong yu long nau. Taim yu kliagut moa long ol, em bai isi moa long yu inap fogivim ol taim ol i mekim pasin we i mekim yu bel hevi.

6. Wanem samting i ken helpim yumi long i gat ol gutpela pren insait long kongrigesen?

⁶ Yu ken mekim wanem bilong pas gut wantaim olgeta insait long kongrigesen? Taim yu wok long kisim save long ol bratasista bilong yu, traim long tingim ol gutpela pasin bilong ol. (Skelim Provep 10:12; Rom 12:10; Fili. 2:​2, 3) Luksave long olsem wanem wanpela nupela baptais brata nem bilong em Mak i bin mekim olsem na dispela i helpim em. Taim em i spendim bikpela haptaim moa wantaim ol bratasista long kongrigesen bilong em, em i stat long luksave long ol pasin kranki bilong ol. Wanem samting i helpim Mak long no ken larim ol pasin kranki bilong ol i pundaunim em? Em i tok: “Mi luksave olsem mi wok long tingim tumas ol liklik pasin kranki bilong ol, tasol taim mi skelim dispela wantaim ol pasin nogut bilong ol man bilong graun, ol pasin kranki bilong ol bratasista i liklik samting tasol. Mi luksave olsem mi no ken tingim tumas ol pasin kranki bilong ol wanbilip bilong mi. So mi senisim tingting bilong mi na traim long tingim ol gutpela pasin bilong ol.” Sapos yu mekim olsem tu, yu bai amamas long i gat ol gutpela pren insait long kongrigesen.

YU KIRAP LONG LAIKIM GEN OL SAMTING EM YU BIN LUSIM

7. Wanem samting inap kirapim yumi long laikim gen ol samting yumi bin lusim pinis?

⁷ Taim yu lainim tok i tru long festaim, ating yu bin amamas tru long lusim ol pasin na tingting bilong ol man bilong dispela graun em Satan i bosim. Yu inap ting olsem, ‘Hau na wanpela inap misim ol dispela samting?’ Tasol taim yu karim ol bikpela hevi tru, yu inap kirap gen long tingim o laikim sampela samting em yu bin lusim taim yu kirap long lotuim Jehova. (Skelim Namba 11:​4-6.) Olsem, sampela brata i wokim disisen long lusim gutpela wok mani we i pulim bikpela haptaim bilong ol. Ating ol narapela Kristen i bin gat ol gutpela pren, tasol ol dispela pren i no laik poroman moa wantaim ol taim ol i kirap stadi long Baibel. Na ol narapela i mas wok strong tru long daunim sampela pasin doti em ol i bin kalabus long en, maski ol i laikim tru ol dispela pasin. Sapos wanpela Kristen i larim ol samting em i bin lusim pinis i kirapim em long i go longwe long Jehova, dispela inap putim bikpela hevi long em! Maski wanem hevi i painim yu, yu ken mekim wanem long nau na bai yu no tingting long kisim bek ol samting em yu bin lusim pinis?

8. Yumi kisim wanem skul long eksampel bilong Abraham na Sara?

⁸ Baibel i gat planti eksampel bilong ol manmeri em ol i stap gut long lotuim Jehova na ol i no bin misim ol samting ol i bin lusim pinis. Tingim stori bilong Abraham na Sara. Ol i bihainim tok bilong Jehova na ol i lusim gutpela taun Ur na ol i go stap long ol haus sel. (Hib. 11:​8, 9) Ating sampela taim ol i save tingim gutpela sindaun bilong ol long Ur. Tasol “sapos ol i bin tingting yet” o laikim gen ol dispela samting ol i bin lusim pinis, orait traim inap painim ol long i go bek long gutpela sindaun bilong ol. Tasol ol i no bin mekim olsem, ol i putim tingting olgeta long ol samting bai kamap long bihain.—Hib. 11:​15, 16.

9. Aposel Pol i gat wanem tingting long ol samting em i bin lusim pinis? (Filipai 3:​7, 8, 13)

⁹ Aposel Pol i bin lusim sampela samting long laip bilong em na bai em i ken mekim wok bilong Jehova. Paslain long em i kamap Kristen, em i stap sumatin bilong Gamaliel em wanpela tisa bilong Lo husat i gat biknem. (Apo. 22:3) Pol i wok long winim ol mak bilong kisim wok i gat namba insait long lotu Juda. (Gal. 1:​13, 14) Tasol taim em i kisim save long gutnius na bilip, em i lusim olgeta dispela samting. Yu ting laip bilong em i isi bihain long em i mekim ol dispela senis? Nogat. Ol man i paitim em, kalabusim em, na ol lain bilong em yet i heitim em. (2 Kor. 11:​23-26) Sapos em i bin putim tingting tasol long ol hevi i painim em na em i skelim laip bilong em long dispela taim wantaim laip bilong em long bipo, ating em inap ting olsem laip bilong em long bipo i gutpela moa. Tasol Pol i no mekim olsem, em i putim tingting olgeta long gutpela blesing em i kisim long mekim wok bilong Krais Jisas na em i lukluk long gutpela prais em bai kisim bihain. Pol i bilip tru olsem ol kain gutpela blesing olsem i winim tru ol samting em i bin lusim pinis!—Ritim Filipai 3:​7, 8, 13.

10. Oltaim yumi mas tingim tingim wanem ol samting? (Mak 10:​29, 30) (Lukim tu ol piksa.)

¹⁰ Yumi inap kisim wanem skul long dispela? Sapos yu kirap gen long tingim ol samting yu bin lusim pinis taim yu kamap wanpela Kristen, orait i gutpela long tingim wai yu bin lusim ol dispela samting. (Ekl. 7:10) Skelim ol samting yu bin lusim pinis wantaim ol blesing yu kisim taim yu kam insait long tok i tru. Yu pas gut wantaim King bilong heven na graun. (Prov. 3:32) Yu stap insait long bikpela lain famili bilong ol bratasista em ol i laikim yu tru. (Ritim Mak 10:​29, 30.) Na yu bilip na wet long gutpela samting tru bai painim yu long bihain! (Ais. 65:​21-23) Sapos planti taim yu tingim tingim ol blesing yu kisim taim yu mekim wok bilong Jehova, dispela bai mekim na yu bai i no inap misim ol samting em yu bin lusim pinis.

11. Yu kisim wanem skul long stori bilong Rosemary?

¹¹ Wanpela sista nem bilong em Rosemary i kisim baptais taim em i gat 50 krismas samting. Luksave long samting em i mekim na bai em i no ken laikim gen ol samting em i bin lusim pinis. Em i tok: “Pastaim, mi save misim Krismas, long wanem, em taim we mi save amamas long bung wantaim famili bilong mi. Mi save amamas tru long givim ol presen long ol lain mi laikim. Mi laik bai ol pikinini i bung raunim krismas diwai na pes bilong ol i amamas taim ol i opim ol presen bilong ol.” Wanem samting i bin helpim em? Rosemary i tok: “Mi painim narapela rot bilong senisim Krismas. Long olgeta yia long narapela narapela de, mi save bungim famili bilong mi, givim ol presen long ol, na tokim ol long risen na mi laikim ol.” Rosemary i bungim narapela hevi tu. Em i tok: “Taim mi lainim tok i tru, ol olpela pren bilong mi i lusim mi. Sampela taim mi save misim ol na mi pilim wanpis.”d Wanem samting i bin helpim em? Em i stretim rot long autim tok wantaim ol narapela narapela sista. Em i tok: “Mi mekim olsem na nau mi gat planti nupela pren em mi laikim ol tru na ol i dia tumas long mi.” Yu inap kisim wanem skul long stori bilong em? Ating yu misim wanpela samting em yu save amamas long en paslain long yu lainim tok i tru, tasol i gutpela yu senisim dispela samting wantaim wanpela samting i gutpela moa winim samting yu bin lusim. (Fili. 4:​8, 9) Na tingim dispela: Taim yu pas gut wantaim Jehova, oltaim yu bai kisim planti samting moa winim ol samting yu bin lusim.

OL NARAPELA I LUSIM JEHOVA

12. Wanem samting inap kamap insait long kongrigesen na dispela inap putim bikpela hevi long yumi?

¹² Taim yu kamap wanpela Witnes, ating yu amamas tru long lusim ol pasin nogut bilong dispela graun na joinim ol manmeri em ol i bihainim stretpela pasin na skulim ol man long tok i tru bilong Baibel. (Ais. 65:14) Tasol ating yu harim olsem wanpela long kongrigesen i mekim bikpela rong. O ating wanpela i seperet long kongrigesen. (1 Kor. 5:13) Lukim olsem wanem kain samting i bin kamap i mekim sampela samting long wanpela sista, nem bilong em Samar. Em i tok: “I no longtaim bihain long mi kisim baptais, wanpela elda i mekim wanpela bikpela sin na ol i seperetim em long kongrigesen. Klostu mi lusim bilip bikos mi no bin ting olsem wanpela elda inap mekim sin long Jehova na long kongrigesen.” Em tru olsem oltaim yumi mas bilip olsem ol bratasista bilong yumi i laikim Jehova na ol i laik stap gut long em. (1 Kor. 13:​4, 7) Tasol long wankain taim, yumi mas holim stretpela tingting. Long olgeta yia, sampela i save seperet long kongrigesen. Na dispela inap putim bikpela hevi long yu sapos wanpela yu save pas gut wantaim em o yu save tingim em olsem gutpela eksampel i mekim disisen long bihainim rot nogut.

13. Yumi ken mekim wanem long nau bilong strongim bilip na bai yumi no ken pundaun taim wanpela pren bilong yumi i lusim Jehova?

¹³ Yu ken mekim wanem long nau bilong redim yu yet na bai yu no ken pundaun taim wanpela pren bilong yu i lusim Jehova? Wok yet long strongim pasin pren bilong yu wantaim Jehova. (Jems 4:8) Pasin pren bilong yu wantaim God em samting yu yet i mas wok strong long lukautim, em i no wok bilong narapela long mekim. Olsem, maski yumi save lotu wantaim olsem wanpela famili na olsem wanpela kongrigesen long olgeta taim, yumi wan wan yet i mas mekim samting bilong strongim bilip bilong yumi olsem oltaim beten na ritim Baibel.—Sng. 1:2; 62:8.

14. Yumi kisim wanem skul long eksampel bilong aposel Pita? (Jon 6:​66-68)

¹⁴ Yumi inap kisim skul tu long pasin em aposel Pita i bin mekim taim planti disaipel i no moa bihainim Jisas. Ating Pita tu i bin paul long tok Jisas i mekim. Tasol lukim tok em i mekim long Jon 6:​66-68. (Ritim.) Pita i no tingim samting ol narapela i mekim, nogat, em i tingim ol tok i tru bilong laip em Jisas i bin skulim em long en. Em as na Pita i no bin pundaun long bilip. Olsem tasol, long nau pasin em ol narapela i mekim i no senisim gutpela tok i tru em oganaisesen bilong God i bin skulim yu long en. Yu mas holimpas tok i tru! Samar em yumi stori pinis long em, em i tok: “Oltaim mi save tokim mi yet olsem, ol pasin nogut em wanpela insait long kongrigesen i mekim i no makim olsem kongrigesen olgeta o oganaisesen i gat dispela pasin. Na tu, pasin em i mekim em i no pasin bilong Jehova.”

15. Yu kisim wanem skul long ekspiriens bilong Emily?

¹⁵ Tingim eksampel bilong Emily. Wanpela wik tasol bihain long Emily i kisim baptais, mama bilong em i lusim famili bilong ol na em i seperet long kongrigesen. Emily i tok: “Mi no ting kain samting olsem inap kamap long mipela. Dispela em wanpela bikpela hevi tru mi bin bungim, na mi misim tru mama bilong mi.” Wanem samting i bin helpim Emily? Em i tok: “Mi no stap wanpis. Papa bilong mi i helpim mi, na tu, ol narapela long kongrigesen em ol i olsem famili bilong mi i bin helpim mi tru. Yumi olgeta i wok long karim ol hevi. Olsem na em i bikpela samting long yumi pas gut wantaim na strongim narapela narapela.” (1 Pita 5:9) I no olsem yu mas wet long wanpela hevi i kamap paslain long yu strongim pasin pren bilong yu wantaim ol bratasista, nogat. Wok yet long mekim olsem long nau. Long dispela rot, maski wanem samting i kamap, yu no inap pilim olsem yu stap wanpis.

16. Yumi mas tingim wanem samting? (Lukim tu piksa.)

¹⁶ Tingim tu olsem Jehova i save stretim ol man em i laikim ol. (Hib. 12:6) Em i laik bai olgeta manmeri husat i seperet long kongrigesen i kam bek long em. (2 Pita 3:9) So sapos wanpela yu pas gut wantaim i seperet long kongrigesen, yu ken bilip tru olsem ol elda bai mekim olgeta samting bilong helpim em long kam bek long Jehova.—2 Tim. 2:​24, 25.

17. Yumi ken bilip tru long wanem samting?

¹⁷ Yumi bin stori tasol long sampela hevi yu inap bungim bihain long yu kisim baptais. Em tru olsem yu inap pret long karim ol dispela hevi, tasol i no gat wok long yu pret na tingting planti. I gat planti samting yu ken mekim bilong redim yu yet. Na no ken lusim tingting olsem God Jehova bai helpim yu long karim ol dispela hevi. Em i bin helpim yu pinis, na em i laik helpim yu inap oltaim oltaim! (1 Pita 5:10) Oltaim em bai strongim yu na helpim yu karim olgeta kain hevi i painim yu. Maski yu karim wanem ol hevi, sapos yu wok yet long larim Jehova i helpim yu long nau, orait yu bai pas gut wantaim em inap oltaim oltaim!—Sng. 119:165; Rom 8:​38, 39.