Jehova i Givim Yupela ‘Ol Pikinini Olsem Presen’

YU TINGIM wanem samting taim yu harim dispela tok “presen”? Yu inap tingim mani, wanpela hap graun o haus, o wanpela samting i dia tumas em wanpela long famili i givim yu. Maski em wanem samting, presen em samting i dia tumas na yu laik lukautim gut.

Baibel i tok ‘Jehova i givim yupela ol pikinini olsem presen.’ (Sng. 127:3) Tru tumas, ol papamama Kristen i tingim ol pikinini bilong ol olsem ol presen i kam long gutpela Papa bilong ol long heven na ol i laik wok strong long lukautim ol gut long ol samting bilong skin, bel na tingting, na ol samting bilong bilip.

Tasol sori tru olsem sampela papamama long nau i no tingim ol pikinini bilong ol olsem presen i kam long God. (Ais. 49:15; 2 Tim. 3:1-3) Ol narapela i laik lukautim gut ol pikinini bilong ol, tasol i gat ol hatwok i mekim na dispela i putim presa long ol. Jehova i laik bai ol papamama i mekim wanem? Na olsem wanem ol papamama Kristen i ken mekim gut wok bilong ol long mekim bikpela long ol pikinini?

OL HATWOK

Presa long komiuniti na famili. Long sampela kantri, taim ol papamama i gat planti pikinini ol manmeri long komiuniti i save rispektim ol. Long kain kantri olsem, ol wanfamili na ol neiba inap putim presa long ol marit long kamapim planti pikinini, winim namba bilong ol pikinini we ol i ken lukautim gut.
Wari long bihain. Long ol kantri we planti pikinini i save dai taim ol i bebi yet bikos ol i sot long kaikai, sik, na i no gat gutpela helt sevis; sampela papamama i wokim disisen long kamapim planti pikinini na bai sampela pikinini i ken stap laip yet na kamap bikpela man o meri. Sampela papamama i gat planti pikinini na bai i gat man bilong lukautim ol taim ol i kamap lapun. Dispela em i tru long ol kantri we gavman i no save lukautim ol lapun.
Famili plening. Long sampela kantri, ol marit i no gat rot bilong kisim famili plening bilong pasim bel. Ol narapela i pret long ol samting nogut em ol samting bilong famili plening i save kamapim so ol i no kisim famili plening. Tasol sampela marit i no inap long kisim famili plening bikos pe bilong en i antap tumas.a

JEHOVA I LAIK BAI OL PAPAMAMA I MAS MEKIM WANEM?

Wanpela famili i amamas long stap long pak wantaim. Papa i putim gut yau long tineja pikinini meri bilong em taim mama i wok long pilai long bal wantaim liklik pikinini man bilong ol. — Lusim haptaim wantaim olgeta wan wan pikinini bilong yupela

Lukautim ol pikinini long ol samting ol i nidim. Jehova i givim wok long ol papamama long lukautim ol pikinini bilong ol long ol samting bilong skin ol i nidim. Em i laik bai ol papamama i wok strong na bai olgeta wan wan pikinini i gat kaikai, klos, na ples slip. Jehova i laik tu olsem ol papamama i mas putim ol pikinini bilong ol long skul. So ol papamama Kristen i no save larim tasol ol pikinini bilong ol i go long ol boding skul, nogat. Ol i larim ol pikinini bilong ol i stap wantaim ol na kamap bikpela na bai ol i ken skul gut, na ol i ken pilim tu pasin bilong papamama long laikim ol, na dispela bai mekim ol i pilim seif, pilim olsem i gat ol man bilong tingim ol, na pilim pasin laikim bilong ol. Maski i olsem, Jehova i no gat tingting olsem papamama i mas i gat planti mani kago bilong mekim olsem, nogat. Jehova i bin makim tupela man na meri em ol i save wok hat, tasol ol i stap rabis, long mekim bikpela long Pikinini bilong em.—Mat. 13:55, 56; Luk 2:24.

Stiatok bilong Baibel: “Tru tumas, sapos wanpela man i no lukautim lain bilong em stret, na moa yet ol wanhaus bilong em, orait em i givim baksait pinis long bilip na em i man nogut moa winim man i no gat bilip.”—1 Tim. 5:8.

Jehova i kliagut olsem taim papamama i kamap lapun i mas i gat man bilong lukautim ol. Na wanpela rot ol pikinini i ken onarim papamama bilong ol em long stretim rot bilong lukautim ol taim ol i kamap lapun. (Kis. 20:12; 1 Tim. 5:4) Tasol Jehova i save amamas taim papamama i putim tingting olgeta long lukautim gut ol pikinini bilong ol na ol i no tingim tumas hau pikinini bai lukautim ol long bihain.—2 Kor. 12:14.

Skulim ol long ol tok bilong God. Ol papamama Kristen i gat wok long trenim ol pikinini bilong ol long laikim na lotuim Jehova. Em i tingim pasin bilong papamama long skulim ol pikinini long tok bilong em olsem bikpela samting tru taim pikinini i wok long kamap bikpela.—Lo 6:6, 7.

Stiatok bilong Baibel: “Oltaim yupela i mas mekim bikpela long ol na trenim ol olsem Jehova i makim, na putim tingting bilong em long bel bilong ol.”—Efe. 6:4.

JEHOVA I LAIK BAI WOK BILONG YU I KAMAP GUT

Tupela marit i wok long toktok insait long haus bilong ol. Baibel i op i stap antap long tebol long fran bilong tupela. — Mekim gut plen long hamas pikinini yupela i laik kamapim

Plenim gut ol samting. Sapos yu gat tingting long kamapim pikinini, orait skelim gut ol samting long sindaun bilong yu. Olsem, yu gat rot bilong givim kaikai, klos, na ediukesen long planti pikinini? Sapos nogat, orait toktok gut wantaim poroman marit bilong yu na bai yupela i gat ol pikinini inap tasol long yu ken lukautim ol gut olsem Jehova i laik yu mekim. Tru Jehova i kliagut olsem i no olgeta samting long laip em yu ken plenim gut. (Ekl. 9:11) Tasol em bai blesim ol hatwok bilong yu long mekim gut wok papamama.

Ol stiatok bilong Baibel: “Ol plen bilong man i save wok strong bai kamapim gutpela samting, tasol ol man husat i save hariap long mekim samting, ol bai kamap rabisman.”—Prov. 21:5.

“Sapos wanpela bilong yupela i laik wokim wanpela taua, orait husat bilong yupela bai i no sindaun pastaim na skelim gut pe bilong dispela samting, na bai em i ken save olsem em i gat ol samting inap long pinisim dispela wok o nogat?”—Luk 14:28.

Putim Jehova i stap nambawan samting insait long famili bilong yu. Putim pasin bilong lotuim Jehova i stap nambawan samting insait long famili bilong yu. Sapos yu gat ol pikinini, orait tingting strong long skulim olgeta wan wan bilong ol long laikim Jehova. Helpim ol long putim gut yau na lainim ol samting i kamap long ol miting bilong kongrigesen. Oltaim mekim Famili Lotu long olgeta wik. Trenim ol pikinini long mekim wok autim tok. No ken givim wok bilong yu olsem papamama long ol bikpela pikinini bilong yu o long ol narapela wanblut. Em tru yu bai lusim bikpela haptaim na strong long mekim bikpela long ol pikinini long laikim Jehova, tasol gutpela samting em yu bai amamas tru taim yu lukim ol i mekim laik bilong Jehova.

Stiatok bilong Baibel: “Taim mi harim olsem ol pikinini bilong mi i wokabaut yet long tok i tru, dispela i save givim bikpela amamas tru long mi.”—3 Jon 4.b

Trastim Jehova. Sapos yu gat tingting long kamapim pikinini o yu gat ol pikinini pinis, yu ken bilip tru olsem ol lo bilong Jehova i bikpela samting moa winim ol kalsa na ol kastam bilong ples.

Ol piksa: 1. Tupela papamama i sindaun wantaim pikinini man bilong ol long miting bilong kongrigesen. Pikinini man i putim han bilong bekim tok. 2. Wanpela famili i wok autim tok wantaim. Papa i wok autim tok wantaim tineja pikinini meri na mama i wok wantaim tupela liklik pikinini bilong ol. — Yu mas tromoi bikpela haptaim na strong bilong lukautim ol pikinini long sait bilong bilip

Sapos yu wokim disisen olsem yu bai no gat planti pikinini, orait yu ken bilip tru olsem Jehova bai lukautim yu long ol samting yu nidim taim yu kamap lapun. No ken tingim pikinini olsem wanpela kain ritaiamen plen. Yu no ken tingting planti o wari olsem bai i no gat man bilong lukautim yu. Jehova i promis long lukautim yu, na oltaim em bai truim ol promis bilong em.—Jos. 23:14.

Ol stiatok bilong Baibel: “Trastim Jehova long bel olgeta bilong yu, na no ken bilip long save bilong yu yet. Long olgeta samting yu mekim, yu mas tingim em, na em bai mekim ol rot bilong yu i kamap stret.”—Prov. 3:5, 6.

“Bipo mi yangpela na nau mi lapun pinis, Tasol mi no bin lukim God i givim baksait long stretpela man, Na mi no bin lukim ol pikinini bilong em i sot long kaikai.”—Sng. 37:25.

“Wok yet long painim Kingdom pastaim na stretpela pasin bilong God na em bai givim olgeta dispela samting long yupela.”—Mat. 6:33.

Ol pikinini em ol gutpela presen Jehova i givim long ol papamama. Jehova i save amamas taim ol papamama i mekim gut wok em i givim long ol bilong lukautim gut ol pikinini! Ol i lukautim gut pikinini long sait bilong skin, bel na tingting, na long sait bilong bilip; ol i plenim gut hamas pikinini ol i laik kamapim; na ol i putim ol lo bilong God i go pas long ol kalsa na kastam bilong ples. Taim ol papamama Kristen i mekim olsem, ol i soim olsem ‘Jehova i givim ol pikinini olsem presen’ na ol i samting i dia tumas.

Ol i No Rigret

Yu ting ol papamama i save bungim planti hatwok taim ol i makim olsem ol bai i no kamapim planti pikinini? Planti papamama i stap long ol kantri we i gat hevi bilong mani, ol i save tingim dispela askim. Skelim tok em sampela het bilong famili long sampela bilong ol dispela kantri i mekim long dispela samting.

Yu bin pilim presa long kamapim planti pikinini?

“Yes, sampela long kongrigesen tu i putim presa long mipela. Tupela marit i bin tokim mipela, ‘Wai na yupela gat wanpela pikinini man tasol? Hia long Afrika, sapos yupela gat wanpela pikinini man tasol, i olsem yupela no gat pikinini. Sapos yupela gat tupela, i olsem yupela gat wanpela tasol.’ Maski mipela i kamapim namba 2 pikinini meri bilong mipela, ol narapela i putim presa yet long mipela.”—Jeremias

Yupela i bin bungim sampela hevi long laip o long sait bilong bilip taim yupela i no gat planti pikinini?

“Nogat. Nogat tru. Mipela i wokim disisen long i gat liklik famili, olsem na mitupela meri bilong mi inap lukautim gut famili long sait bilong skin na bikpela samting moa long sait bilong bilip. Mi kamap bikpela insait long wanpela bikpela famili, na mi lukim planti hatwok tru em papa na mama bilong mipela i mas mekim bilong mipela i ken i gat ol samting mipela i nidim, na tu, long i go long skul.”—Jeremias

Ol pikinini bilong yupela i pilim olsem wanem long disisen bilong yupela?

“Ol pikinini bilong mipela i amamas bikos ol i no bungim ol wankain hatwok olsem ol pikinini long famili we papamama i gat planti pikinini tru na ol i hatwok long lukautim gut olgeta.”—Filipe

“Taim ol pikinini bilong mipela i kamap bikpela, ol i amamas bikos ol i pilim seif na pilim olsem ol i kamap bikpela long haus we ol i pilim olsem mipela i laikim ol. Olgeta taim mipela i save singautim ol bratasista husat i laikim tru Jehova na ol i stap gutpela eksampel na ol i strongim mipela long mekim bikpela wok moa bilong Jehova. Long nau, mipela i lukim ol pikinini i bihainim pasin bilong ol na stap gutpela eksampel.”—Carlos

Wanem gutpela samting i kamap long disisen bilong yu long i gat liklik famili tasol?

“Mipela inap lukautim gut famili bilong mipela long ol samting bilong skin bikos long disisen bilong mipela. Mi bin gat wok mani we mi save kisim bikpela pe, tasol nau inap 3-pela yia mi no wok moa. Dispela senis long sindaun bilong mipela i no putim hevi long mipela bikos famili bilong mipela i liklik na mipela i no nidim planti samting bilong skin long lukautim mipela olgeta.”—Jeremias

“Disisen bilong mipela i mekim na nau mipela i gat rot bilong lukautim gut ol pikinini long sait bilong skin na long sait bilong bilip. Mipela i save go helpim wok long ol ples we i sot long ol pablisa bilong autim tok. Em i isi long mipela inap givim ol samting em wan wan pikinini i nidim. Olgeta pikinini bilong mipela i mekim wok bilong Jehova na ol i putim na winim ol mak bilong bilip.”—Lenadi

Yu laik mekim wanem tok long ol narapela papamama?

“Mi bin lukim truim bilong Buk Song 34:10b, em i tok: ‘Ol man i wok long painim Jehova, ol bai i no sot long wanpela gutpela samting.’ Jehova i lukautim mi na famili bilong mi long olgeta samting mipela i nidim.”—Rafael

a Olgeta marit yet i ken makim hamas pikinini ol bai i gat, wanem taim ol bai kamapim pikinini, na wanem famili plening ol i ken yusim—em ol kain famili plening we i no rausim bebi i kamap pinis long bel. I no gat man bai skelim ol long ol pesenel disisen ol i mekim. (Rom 14:4, 10-13) Na tu, ol marit Kristen i ken tingim gut tok kaunsel i stap long 1 Korin 7:3-5.

b Ol pikinini em dispela ves bilong Baibel i stori long ol i makim ol disaipel Kristen em Jon i bin skulim ol long tok i tru, tasol dispela tok i stret tu long ol papamama, ol inap pilim wankain olsem long ol pikinini bilong ol taim ol pikinini i mekim wok bilong Jehova.