Setlhopha sa bo101 sa Gileate—Se Tlhoafaletse Ditiro Tse di Molemo
MMOPI wa rona, Jehofa Modimo, o tlhoafaletse ditiro tse di molemo, mme le Morwawe, Jesu Keresete o ntse fela jalo. Jaaka motlhomasekao wa rona, Jesu o ne a bontsha tlhoafalo ka go dira kabelo e a neng a e filwe ke Modimo, e e neng e akaretsa go intshetsa ‘rona gore a . . . intlafaletse batho ba ba tlaa nnang boswa jwa gagwe, ba ba tlhoafaletseng ditiro tse di molemo.’ (Tito 2:14) Maloko a le 48 a setlhopha sa bo101 a Sekolo sa Baebele sa Watchtower sa Gileate eleruri a itshupile a tlhoafaletse ditiro tse di molemo. Thulaganyo ya go aloga ga barongwa bano e ne e tshwerwe ka September 7, 1996, kwa Lefelong la Thutelo la Watchtower kwa Patterson, New York.
Kgakololo e e Mosola ya go Nna ba Tlhoafetse
Modulasetulo wa thulaganyo ya kaloso e ne e le Carey Barber, e leng leloko la Setlhopha se se Laolang, yo o nang le dingwaga di le 70 mo bodireding jwa nako e e tletseng. Mo mafokong a ga Mokaulengwe Barber a a simololang, o ne a otlelela thata mo tirong ya go rera le ya go ruta ya ga Jesu, yo o neng a le “lesedi la lefatshe.” (Johane 8:12) O ne a tlhalosa gore Jesu ga a ka a ipeela seabe seo se se tlotlegang mme o ne a rotloetsa barutwa ba gagwe le bone gore ba phatsimise lesedi la bone. (Mathaio 5:14-16) Tshiamelo eno ya tirelo e nonotsha botshelo jwa Mokeresete mme gape e pega boikarabelo jo bogolo mo magetleng a batho botlhe ba ba “sepelang jaaka bana ba lesedi.”—Baefeso 5:8.
Morago ga mafoko ao a a bulang, go ne ga bidiwa Don Adams wa Diofisi Tsa Botsamaisi kwa ntlokgolong ya Brooklyn. O ne a bua ka setlhogo se se neng se re “Go Tswelela Pele, e Seng go Boela Kwa Morago.” Mokaulengwe Adams o ne a bua thata ka Sekolo sa Gileate ka bosone le boikaelelo jwa sone—jwa go atolosa go rerwa ga mafoko a a molemo kwa dinageng di sele. O ne a bua ka go gatela pele ga phuthego ya Modimo, e e gatisitseng dibuka tsa Baebele mo lefatsheng lotlhe ka dipuo tse di fetang 300. Buka ya Kitso E E Isang Botshelong Jo bo Sa Khutleng, e e gatisitsweng ka 1995, e setse e le gone ka dipuo di le 111 mme go rulagantswe gore e gatisiwe ka dipuo tse dingwe tse di oketsegileng. E setse e itshupile e le sedirisiwa sa go thusa barutwa ba basha ba ga Jesu gore ba bontshe boineelo le go kolobediwa mo dikgweding di le mmalwanyana fela. Ka jalo barongwa ba basha ba tla nna le didirisiwa tsa bosheng tsa go ithuta Baebele mo tirong ya bone.
Go ne ga latela Lyman Swingle, leloko la Setlhopha se se Laolang, yo o neng a bua ka setlhogo se se reng “Tswelelang Pele lo Direla Jehofa Tirelo ya Lona e e Boitshepo,” se se neng se theilwe mo go Tshenolo 7:15. E re ka Jehofa ka boene e le Modimo yo o itumetseng, go mo direla ka metlha go dira gore motho a itumele. (1 Timotheo 1:11) Ka ntlha ya tirelo eno e e itumedisang, boidiidi jo bogolo jwa batho ba ba tswang kwa dikarolong tsotlhe tsa lefatshe ba tlile go mo obamela. Ka dingwagangwaga, bao ba ileng ba thapisiwa kwa Sekolong sa Gileate ba ile ba nna le seabe mo go thuseng batho bano ba le bantsi gore ba nne le kitso e e tlhomameng ya boammaaruri. Ka gone, re na le lebaka le le utlwalang la go dumela gore Jehofa o tla tswelela pele a segofatsa ba jaanong ba romelwang go ya go phutha maloko a a oketsegileng a boidiidi jo bogolo jo bo ntseng bo oketsega.
“Bontsha Boitumelo Jwa ga Jehofa” e ne e le setlhogo se se neng se gatelelwa ke Daniel Sydlik, yo le ene e leng leloko la Setlhopha se se Laolang. O ne a bontsha gore batlhanka botlhe ba Modimo, go akaretsa le barongwa ba basha, ba na le tshiamelo ya go ruta batho tsela ya botshelo jo bo sa khutleng le tsela ya go iponela molemo mo botshelong gone jaanong. Mokaulengwe Sydlik o ne a bolela jaana: “Go ruta ke tiro e e go ntshetsang maduo. E bonala mo difatlhegong tsa batho ba ba rutang le mo difatlhegong tsa batho ba ba ithutang.” (Pesalema 16:8-11) O ne a nopola morongwa mongwe kwa Estonia yo o neng a re, “Re na le molaetsa o mogolo mo lefatsheng lotlhe, mme o bonala mo difatlhegong tsa rona.” Tsela e re lebegang ka yone mo sefatlhegong e ka nna ya dira gore batho ba le bantsi ba reetse le go tsosa kgatlhego. Batho ba batla go itse gore ke eng se se dirang gore batlhanka ba ga Jehofa ba itumele. Mokaulengwe Sydlik o ne a gakolola jaana: “Ka jalo ela tlhoko tsela e o lebegang ka yone mo sefatlhegong. Batho ba itumelela go bona batho ba ba itumetseng.”
Ulysses Glass, yo o saleng a nna le seabe sa go ruta baithuti ba Gileate fa e sale ka setlhopha sa bo12 ka 1949, o ne a bua le bareetsi ka setlhogo se se reng “Disang Meya ya Lona ka Bopelotelele.” Bopelotelele ke eng? Bo dira gore re akanye ka go letela sengwe o ritibetse, o bontsha bopelotelele kafa tlase ga maemo a a gwetlhang kana a a lapisang. Motho yo o pelotelele o nna a ritibetse; yo o seng pelotelele o fela pelo ka bonako e bile o betwa ke pelo ka bonako. Mokaulengwe Glass o ne a bolela jaana: “Batho ba le bantsi ba akanya gore go nna pelotelele go raya gore o bokoa kana gore ga o a tlhomama,” mme “Jehofa o go tsaya gore go bontsha nonofo le boikaelelo.” (Diane 16:32) Maduo a go nna pelotelele ke afe? “Go nna pelotelele fa o galefile go tla go golola mo tlalelong ka malatsi a le lekgolo,” go bolela jalo seane sengwe sa Se-China. Mokaulengwe Glass o ne a akgela jaana: “Bopelotelele bo tokafatsa botho jwa motho. Tota e bile, bo bipa dinonofo tse dingwe tse di molemo ka pente e e tla nnelang ruri. Bo dira gore motho a eletse go nna le tumelo, a nne le kagiso e e tla nnelang ruri le lorato lo lo sa tshikinyegeng.”
“Ke tshiamelo go amogela kabelo e e tswang kwa go Jehofa Modimo ka phuthego ya gagwe,” go ne ga bolela jalo Mark Noumair, yo o neng a direla e le morongwa kwa Kenya ka dingwaga di le 11 mme yo gone jaanong a setseng a ruta kwa Gileate. Fa a ntse a bua ka setlhogo se se reng “O ka Kgona go Itshoka fa Fela O na Le Tumelo,” Mokaulengwe Noumair o ne a otlelela thata ka sekai sa ga Kgosi Ahase wa Juta. Isaia o ne a tlhomamisetsa kgosi gore Jehofa o ne a tla mo ema nokeng mo kabelong ya gagwe, mme Ahase o ne a tswelela a palelwa ke go Mo ikanya. (Isaia 7:2-9) Go tswa foo Mokaulengwe Noumair o ne a tlhalosa gore barongwa—tota, rotlhe—ba tlhoka go nna le tumelo mo go Jehofa e le gore ba kgone go itshoka mo dikabelong tsa bone tse di direlwang puso ya Modimo. Dikgwetlho tsa kabelo ya borongwa ka botsone di tlhoka tumelo e e nonofileng. Mokaulengwe Noumair o ne a bolela jaana: “Ka metlha nna o gakologetswe gore ga go na boemo jo bo itekanetseng mo tsamaisong eno ya dilo.”
Maitemogelo a a Kgothaletsang Tiro e e Tlhoafetseng
Ka nako ya fa baithuti ba thapisiwa kwa Gileate, beke nngwe le nngwe ba ne ba dirisa nako nngwe ba le mo bodireding jwa phatlalatsa, jo gape e tla bong e le tiro e kgolo mo dikabelong tsa bone tsa borongwa. Wallace Liverance, yo e leng leloko la thuto le tsamaiso ya Gileate, o ne a botsolotsa baithuti ba le 15, ba ba neng ba bolela maitemogelo a bone. Leon Weaver yo o mo Komiting ya Lephata la Tirelo le Lon Schilling yo o mo Komiting e e Emelang Bethele, go tswa foo ba ne ba botsolotsa maloko a komiti ya lekala a a tswang kwa Afrika le Latin America, a a neng a bolela maitemogelo a tshimo ya borongwa le go fa barongwa ba ba neng ba aloga kgakololo e e molemo. Kwa Sierra Leone, go ne ga tlhalosiwa gore, mo e ka nnang diperesente di le 90 tsa batho ba ba kolobeditsweng ka 1995 ba ile ba thusiwa ke barongwa. A bo e le pego e ntle jang ne ya tiro e e tlhoafetseng!
Kwa bofelong, Milton Henschel, e leng poresidente ya Mokgatlho, o ne a bua le bareetsi ba le 2 734 ka setlhogo se se reng “Phuthego ya ga Jehofa e e Bonalang ga e Tshwane le Epe.” Ke eng se se dirang gore phuthego ya Modimo e se ka ya lekana le epe? Ga e lekanngwe ka bogolo jwa yone kana ka maatla a yone mme ke ka go bo e kaelwa ka ditao tse di siameng tsa Modimo le ditshwetso tsa katlholelo. Mo metlheng ya bogologolo e ne e le batho ba ga Jehofa, e leng setšhaba sa Iseraele, ba ba neng ba neetswe mafoko a gagwe a a boitshepo, a a neng a dira gore setšhaba seo se se ka sa tshwana le sepe gape. (Baroma 3:1, 2) Gompieno, phuthego ya ga Jehofa e a utlwana fa e ntse e dira kafa tlase ga kaelo ya ga Jesu Keresete. (Mathaio 28:19, 20) E gatetse pele, e bile e a gola. A go na le mokgatlho mongwe mo lefatsheng o Setlhopha sa one se se Laolang se yang kwa Lefokong la Modimo, Baebele, pele ba dira ditshwetso tse di botlhokwa? Mo dintlheng tseno le mo ditseleng tse dingwe, phuthego ya ga Jehofa e e bonalang tota ga e tshwane le epe.
Thulaganyo eno e e itumedisang e ne ya konelwa ka go ntshiwa ga ditlankana tsa dipoloma le go balwa ga lekwalo le le neng le kwadilwe ke setlhopha seno se bontsha gore se anaanetse thapiso eno e e kgethegileng.
[Lebokoso mo go tsebe 22]
Dipalo Tsa Setlhopha
Palo ya dinaga tse di emetsweng: 9
Palo ya dinaga tse ba abetsweng kwa go tsone: 12
Palo ya baithuti: 48
Palogare ya dingwaga tsa bone tsa bogodi: 31,7
Palogare ya dingwaga tsa bone ba le mo boammaaruring: 13,8
Palogare ya dingwaga tsa bone ba le mo bodireding jwa nako e e tletseng: 9,8
[Setshwantsho mo go tsebe 23]
Setlhopha se se Alogang sa Bo101 sa Sekolo sa Baebele sa Watchtower sa Gileate
Mo lenaaneng le le fa tlase leno, dinomoro tsa mela eno di kwadilwe di balwa go tswa kwa pele go ya kwa morago, mme maina a thathamisitswe go tswa kafa molemeng go ya kafa mojeng wa mola mongwe le mongwe.
(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.