‘Go Bapala Kitso Kaga Modimo le Jesu’
“BOTSHELO jo bo sa khutleng ke jo, gore ba bapale kitso kaga gago, wena Modimo o o esi wa boammaarure, le ene yo o mo romileng, Jesu Keresete.” (Yohane 17:3, NW) Jesu o ne a rialo fa a ne a rapela Rraagwe wa selegodimo, mme ka go rialo o ne a bontsha sengwe sa botlhokwa se se tlhokegang gore motho a bone botshelo jo bo sa khutleng. Lefa go ntse jalo, ke ka ntlha yang fa New World Translation mo temaneng eno e re “ba bapale kitso kaga . . . Modimo” go na le go re “ba itse . . . Modimo,” jaaka bontsi jwa dithanolo tse dingwe tsa Bibela di e ranola?—Bona gape le ntlhanyana e e kwa tlase ya Yohane 17:3, NW.
Lefoko la Segerika le fano le ranotsweng go nna ‘go bapala kitso’ kana “itse” ke mofuta wa lediri gi·noʹsko. Mme tsela e le ranotsweng ka yone go New World Translation e diretswe gore bokao jwa lefoko leno bo tlhage ka botlalo ka mo go ka kgonegang ka gone. Bokao jwa motheo jwa gi·noʹsko ke go “itse,” mme lefa go ntse jalo lefoko la Segerika le na le bokao jo bo farologaneng. Ela tlhoko ditlhaloso tse di latelang:
“GINŌSKŌ (γινώσκω) e raya go bapala kitso, go simolola go itse, go lemoga, go tlhaloganya, kana go tlhaloganya ka botlalo.” (Expository Dictionary of New Testament Words, e e kwadilweng ke W. E. Vine) Ka jalo, go ranola gi·noʹsko jaaka ‘go bapala kitso’ ga se ‘go fetola Bibela,’ jaaka batshwayadiphoso ba New World Translation ba ile ba bolela. Fa a bua ka dipharologanyo tse dinnye tse bokao jwa lefoko leno bo ka nnang le tsone, mokwadi yo o itsegeng wa dibuka tse di tlhalosang mantswe ebong James Hope Moulton o bolela jaana: “Lefoko leno le le motlhofo, γινώσκειν, le kaya tiro e e tsayang nako, ‘go bapala kitso.’”—A Grammar of New Testament Greek.
Buka ya A Grammatical Analysis of the Greek New Testament e tlhalosa lefoko gi·noʹsko jaaka fa le bonala go Yohane 17:3 le “kaya tiragalo e e tswelelang pele.” Kakgelo e nngwe gape ka lefoko leno la Segerika e fitlhelwa mo go Word Studies in the New Testament, e e kwadilweng ke Marvin R. Vincent. Yone e bolela jaana: “Botshelo jo bo sa khutleng bo bonwa ka kitso, kana go na le moo ka go batla kitso, ereka paka jaanong e neela kgopolo ya sengwe se se tswelelang pele, kgato ka kgato.” (Ditlhaka tse di sekameng ke tsa gagwe.) Buka ya ga A. T. Robertson ya Word Pictures in the New Testament e akantsha gore lefoko leno le ranolwe jaaka “tshwanetse go tswelela pele o itse.”
Ka jalo, mo Segerikeng sa ntlhantlha, mafoko a ga Jesu a a mo go Yohane 17:3 a kaya boiteko jo bo tswelelang pele jwa go itse Modimo wa boammaaruri le Morwawe, Jesu Keresete, mme seno se bontshiwa sentle mo thanolong ya New World Translation. Re bapala kitso eno ka go ithuta Lefoko la Modimo ka tlhoafalo le ka go dumalanya matshelo a rona le melao ya lone ka kutlo. (Bapisa Hosea 4:1, 2; 8:2; 2 Timotheo 3:16, 17.) Bao ba dirang gore ba itse botho jwa Modimo le jwa ga Morwawe ba bo ba leka go ba etsa ba emetswe ke tuelo efe e e molemo? Botshelo jo bo sa khutleng!