Boperofeti Jwa ga Daniele​—Ditoro Tseo Di go Amang

“Nna ke nosi, ke gopola ka baperofeti ba lona ba bogologolo mo Testamenteng e Kgologolo le ditshupo tseo di bolelelang-pele ke Haramagedona, mme ke be ke ipotsa gore​—a jaana re se lona losika loo lo tla bonang seo se diragala. Ga ke itse gore a o setse o lemogile dingwe tsa dipolelelopele tseo bosheng jaana, mme ntumela, kwantle ga pelaelo di bolela ka metlha eo re tshelang mo go yone.”​—Tautona wa U.S. Ronald Reagan.

TAUTONA Reagan ga se ene motho fela yo o ipotsang gore a ruri metlha eo re tshelang mo go yone ga se yone eo e boleletsweng pele ke dipolelelopele tsa Bibela. Dimilione tsa ba bangwe le bone ba ile ba gakgamadiwa thata ke tsela eo maemo a lefatshe gompieno a tsamaelanang le dipolelelopele tsa Dikwalo. Lefa go ntse jalo, dipolelelopele tseno, ga di bolelelepele fela ka masetlapelo a a iseng a ke a nne mme e leng ka tsamaiso e ntšha ya dilo e e tla latelang ka bofefo.

Setlhogo se ke santlha mo go tse di tla latelanang mo ditokololong tse nne tsa Tora ya Tebelo, tseo di baakanyeditsweng go go tlwaelanya le mongwe wa baperofeti ba bogologolo, yo o neng a bidiwa Daniele. O ka nna wa tswa o mo itse. E ne e le Mojuda yo o tsaletsweng mo ntlung ya segosi. Bosheng jwa gagwe, Daniele o ne a isiwa kwa Babelona koo a neng a mtelwa mo ntlung ya segosi ya ga Nebukadenesare, yo o neng a le kgosi ya bobedi ya Mmuso-mogolo wa Babelona. Seno e ne e le kwa bokhutlong jwa lekgolo la bosupa lwa dingwaga B.C.E., pele ga tshenyego ya Jerusalema Daniele o ne a nna mo botshwarong go fitlhelela go wa ga Babelona ka 539 B.C.E., mme morago ga moo a direla babusi ba pele ba Bameda le Baperesia. Mo botshwarong jwa gagwe o ne a ranola ditoro e bile a nna le diponatshegelo tse di tlhotlheleditsweng tseo di amang motlha wa rona. Ee, wena le lelapa la gago le kopanyelediwa mo go seo Daniele a se boleletseng pele.

Ditoro tsa Boperofeti le Diponatshegelo

Tota, ditoro le diponatshegelo tsa buka ya ga Daniele, ke dipolelelopele tsa lobaka-lokhutshwane le tsa lobaka-loleele. Ke histori ya lefatshe e e kwadilweng pele ga nako. Di neela ponatshegelo ya go sa le gale ya go kgaratlhela taolo ga batho, tatelano ya dikgosi, le mebuso e megolo ya sepolotiki go tswa ka nako ya ga Daniele go ralala ditiragalo go tla go fitlha “lobaka loa kwa bokhutloñ.”​—Daniele 8:17, 19.

Tiragatso ya dipolelelopele tsa lobaka-lokhutshwane e tshwanetse go tlhotlheletsa tsholofelo ya rona mo dipolelelong pele tsa lobaka-loleele tseo di fitlhang mo motlheng wa rona. Dingwe tsa dipolelelopele tseno tsa lobaka-lokhutshwane ke dife?

E nngwe e ne e le ya toro ya setlhare se segolo se se ileng sa rengwa le go bofiwa ka mhiri ka lobaka lwa “metlha e shupa,” kana dingwaga, pele ga se letlelelwa go tlhoga gape. (Daniele 4:10-17) Mo tiragatsong ya yone ya lobaka-lokhutshwane polelelopele eno e ne ya dira mo go Kgosi Nebukadenesare, yo o ileng a lora. Ngwaga fela moragonyana, mmusi yono o ne a ‘rengwa,’ go lebega e le ka bolwetse jwa tlhaloganyo O ne a fetsa dingwaga di supa a itsaya jaaka phologolo ya naga. Jaanong he, “e rile metlha euō e sena go heta” eo e boleletsweng pele, Nebukadenesare a boelwa ke tlhaloganyo ya gagwe mme a kgona go busa. (Daniele 4:28-37) Go ya ka The International Standard Bible Encyclopedia, mekwalo ya bogologolo e bontsha gore Nebukadenesare o ne a lwala gaufi le bokhutlo jwa puso ya gagwe. Mme toro eno gape e ne e na le tiragatso ya lobaka-loleele, jaaka setlhogo se se tlang mo tatelanong eno se tla bontsha.

Polelelopele e nngwe e e lobaka-lokhutshwane mo bukeng eno ya ga Daniele e baakanyediwa ke mokwalo wa dikgakgamatso mo lobotaneng lwa Holo ya moletlo wa dijo koo setlogolwana sa ga Nebukadenesare ebong Beleshasare le bagolwane ba gagwe ba neng ba le mo moketeng wa dijo. (Daniele, kgaolo 5) Ba ne ba tlhapatsa dijana tse di boitshepo tseo di neng di tserwe mo tempeleng ya ga Jehofa mo Jerusalema Daniele ka tlhotlheletso, o ne a ranola molaetsa oo wa katlholo ya modimo. Mme tiragatsong ya seo, “mo bosigoñ youō hèla” Babelona o ne a wa mme “Beleshasare kgosi ea Sekaladea a bolawa,” jaaka raditiragalo wa Mogerika Xenophon a ne a tlhomamisa. (Daniele 5:30) Mme gompieno go na le mokwalo wa seatla mo lobotaneng o o kwaletsweng tsamaiso ya jaanong e e boikepo ya dilo. Mo, le gone, go tla tlhalosiwa mo setlhogong se se latelang sa tatelano eno.

Go Kanololwa kwa “Motlheñ wa Bokhutlō”

Go ya kwa bokhutlong jwa buka ya gagwe ya boperofeti, Daniele o ne a kwala molaetsa o a o neilweng ke moengele: “Wèna, Daniela, cwalèla mahoko, u kanèlè lokwalō, go ea go hitlha hèla kwa motlheñ oa bokhutlō: batho bantsi ba tla taboga tabogèla kwa le kwa, me kicō e tla totahala.”​—Daniele 12:4.

Gompieno “kicō” ya tirafatso ya polelelopele ya Bibela e totafetse tota. Go oketsega mo ga go tlhaloganya go tlhatswitse dimilione tsa diithuti tse di tlhagafetseng tsa Bibela pelo gore ka boammaaruri re tshela mo “motlheñ oa bokhutlō” le gore Bogosi jwa Modimo jwa tshiamo bo gaufi. (Daniele 2:44) Fa e bontsha go tlhomama ga buka ya ga Daniele mo kgannyeng e, Soncino Books of the Bible e re: “phenyo ya bofelo ya tshiamo, ka matswela a yone a go tlhoma Bogosi jwa Modimo, ke kgang ya motheo mo go Daniele.”

A o solofetse “phenyo ya bofelo ya tshiamo”? Fa go le jalo, ditoro tsa boperofeti le diponatshegelo tsa ga Daniele di go ama thata thata. Setlhogo se se latelang se tla go tlwaelanya le dingwe tsa tse le go go fa bosupi jwa gore Daniele ke buka ya boperofeti e e tlhomamisegang.