A O Ikanya Modimo kana Dikhumo?

“Mo dingwageng di le dintsi o ne a iphitlha mo ntlung ya gagwe e ntle e e dikologilweng ke legora la diketane mme le tswalwa ka ditswalo tse pedi tsa tshipi tse di lotlelwang.”

PEGO ya dikgang e ne ya tlhalosa jalo motlhologadi yo o neng a swetse mo diatleng tsa dikebekwa tseo di neng tsa utswa maje a a tlhokegang thata le didolora di le milione mo ntlong ya gagwe.a Morago ga gore setopo sa gagwe se bonwe, mapodisi a ne a dirisa karata ya korosari go tsaya didolara tse dingwe di le dimilione di le 5 tsa madi mo legaeng la gagwe. Gape mapodisi a ne a bona diketekete tsa “dimpho tsa matsalo” tse di kgomareditsweng dikarata tse di kwadilweng jaana “Go Jesu Keresete” le “Go Modimo.”

Morua-boswa yono wa mosadi go bonala a ne a sena ditsala dipe, mme o ne a tshelela mo poifong. Ipotse, Tota dimilione tseno tseo a neng a di leba di le botlhokwa go le kana-kana di ne di le botlhokwa go le kana kang? Go feta moo, o ne a humile go le kana-kang go Modimo? Kwantle ga pelaelo oa itse gore Modimo ga a kake a bapalwa ka “dimpho tsa matsalo,” le eleng gone gore kagiso ya Modimo e tswa mo go nneng le dikhumo. Seno se ka bonwa go tswa mo kgakololong ya Bibela gore re ‘se ipegele godimo, le go solofela mo bo senang tlhomamo jwa khumo, fa e se mo Modimong fela, o o re nayang dilo tsotlhe ka letlotlo gore re di je monate.​—1 Timotheo 6:17.

Ke ka ntlhayang fa dikhumo di sena tlhomamo jaana? O ka tswa o itse ka moo mafoko a ga Jesu a leng boammaaruri ka gone: “Se iphutheleñ dikhumō mo lehatshiñ, kwa motoutwana o senyañ gōna le morodu, le kwa magodu a phunyetsañ go ucwa gōna.” (Mathaio 6:19) Jaaka o lemoga, ka metlha go na le kotsi ya gore molelo o ka fisa legae. Batho ba bangwe ba boloka dilo tsa bone tsa botlhokwa mo dibankeng, mme a magodu ga a ka a utswa le mo go tsone? Le eleng koloi e ntšha ea rusa.

Go tweng ka itsholelo ya merafe? Mo mafatsheng a le mantsi go ya tlase ga maatla a madi go tshwana le legodu; go fokotsa dikhumo tsa motho. “Morago ga gore go ya tlase ga madi go gogolo go padimole Jeremane kwa tshimologong ya bo-1920, bareki ba ne ba tlhoka diroto tsa madi . . . go reka dikorosari . . . Ditlhotlhwa mo Jeremane di ne tsa oketsega go feta 1 lekgolong ya trilione go tloga ka August 1922 go fitlha ka November 1923.” (The World Book Encyclopedia) Abo go ikanya madi go ka swabisa jang ne!

Jesu ka botlhale o ne a gakolola jaana: “Se iphutheleñ dikhumō mo lehatshiñ, kwa motoutwana o senyañ gōna le morodu, le kwa magodu a phunyetsañ go ucwa gōna.” (Mathaio 6:20) “Dikhumō” tseno ke eng? Di akareletsa rekoto ya rona ya botho ya ditiro tse di molemo, go huma ga rona mo Modimong. O ka nna wa botsa jaana, ‘Seno se batla gore ke direng?’ Ka bokhutshwane, Bibela e araba ka gore go raya ‘go dira molemo, go huma ditiro tse di molemo, go iketleeletsa go aba, go itumelela go abalana.’​—1 Timotheo 6:18.

Go dikologa lefatshe gompieno, go na le dimilione tsa Basupi ba ga Jehofa bao ka boikanyegi ba ka supang gore go abalana le ba bangwe dilo tsa semoya le tse di bonalang, segolo-bogolo go thusa batho go ithuta tsholofelo ya Bogosi ka go kopanela mo ditirong tsa go rera, go ruta, le go dira barutwa-ke ditiro tse di molemo tse di amogelwang ke Jehofa mme di ka tlisa kgotsafalo ya mmatota. Le eleng loso ga le kake la kgona go amoga motho dituelo tseo go phutha matlotlo kwa legodimong go di tlisang. Ke ka ntlhayang fa go ntse jalo? Jesu o ne a solofetsa jaana: “Ke nna cogō le botshelō; eo o dumèlañ mo go nna, leha a shwa, leha go nntse yalo o tla tshela.”​—Yohane 11:25.

Matlotlo a a Botlhokwa-tlhokwa Ao Re Ka A Itumelelang Jaanong

Morago ga go bolela gore re tshwanetse go tlhoma tsholofelo ya rona go “Modimo,” Paulo o tswelela ka gore ‘Modimo o re naya dilo tsotlhe ka letlotlo, gore re di je monate.’ (1 Timotheo 6:17) Kwantle ga ditlhokafalo tsa rona tsa letsatsi le letsatsi tsa botshelo, Mogodimodimo ka lorato o neela batho bao a ba amogelang matlotlo a botlhokwa-tlhokwa. Matlotlo a a ntseng jalo ke eng?

Tlhokomela seo Diane 3:13-18 e se bolelang: “Go tlhōgōnōlō motho eo o bōnañ botlhale, le motho eo o bapalañ tlhaloganyō. Gonne tlhōtlhwa ea yōna e gaisa tlhōtlhwa ea selefera, le papadi ea yōna e gaisa papadi ea gouda e e itshekileñ. O tlhōkèga bogolo go diperela: me mo diloñ cotlhe tse u ka di eletsañ ga go na sepè se se ka chwantshiwañ naè. Bolele yoa malatsi bo mo seatleñ sa gagwè se se siameñ; mo seatleñ sa gagwè sa molèma go dikhumō le tlotlō . . . O setlhare sa botshelō mo go ba ba mo chwarañ: me go tlhōgōnōlō moñwe le moñwe eo o mo itshadisetsañ.” Jalo “botlhale” ke letlotlo le le fetang tlhotlhwa ya dikhumo tsotlhe tsa lefatshe.

Botlhale ke go dirisa kitso ka tsela e e siameng. Ke kgono ya go dirisa kitso le tlhaloganyo ka katlego go rarabolola mathata, go tila kana go fapoga dikotsi, go fitlhelela mekgele e e rileng kana go thusa ba bangwe go dira jalo. A ga o dumele gore gompieno re tlhoka botlhale jo bo ntseng jalo gore re kgone go lebana le diteko tsa botshelo ka katlego le go boloka boemo jo bo siameng le Modimo?

Fa Diane 3:13-18 e tlhalosa botlhale, e tlotlomatsa boitumelo. A boitumelo ga se letlotlo leo re le eletsang rotlhe? Botlhale jwa Modimo bo tla re neela boitumelo jono gonne boitumelo jwa boammaaruri bo ka tla fela go tswa mo Motsweding wa jone, Jehofa Modimo. Boitemogelo bo supile gore boitumelo jwa boammaaruri bo ka se bonwe kwantle ga go utlwa Mogodimodimo le go ikobela go dira ga moya wa gagwe. Boitumelo jo bo solofeditsweng mo Bibeleng bo ikaegile mo kamanong e e tshwanetseng, kana boemo jo bo amogelesegang le Rrarona wa selegodimo. (Mathaio 5:3-10) Ka gone, ka go dirisa se re se ithutang mo thutong ya Bibela, re tla bo re bontsha “botlhale yo bo cwañ kwa godimo” jo bo tla re neelang boitumelo jo dikhumo tsotlhe mo lefatsheng di ka se keng tsa bo fitlhelela.

Lefa go ntse jalo, gakologelwa gape gore Diane 3:16 ea re: “Bolele yoa malatsi bo mo seatleñ sa gagwe se se siameñ.” Seno se tlhaloganngwa go bo se lebisa go seatla sa moja sa tshireletso, seatla se se iketleeleditseng go thusa le go femela motho mo dinakong tsa kotsi. Gompieno ba le bantsi ba kopanela mo botshelong jwa go itaola, boitsholo jo bo maswe jwa kafa dikobong, go dirisa diokobatsi ka mo go feteletseng, jalo le jalo. Gongwe o badile gore AIDS (Acquired Immune Deficiency Syndrome) e tsamaisana le ditiro tse di ntseng jalo. Mo go seo o se lemogileng, a batho ba ba dirang dilo tseno ba itumetse eletota? Kana a ba itlisetsa le go tlisetsa ba bangwe khutsafalo le botlhoko tse di oketsegileng, le eleng loso?

Go fapaana le seno, go dirisa kgakololo e e botlhale e e tswang mo Lefokong la Modimo ka metlha go tla nna mo “seatleñ sa rona se se siameñ” go re sireletsa mo dikotsing tse di ntseng jalo. Ka gone, botlhale bo ka oketsa botshelo jwa rona, bo re dibela mo tseleng eo e ka bakang loso lwa pele ga nako. Ka gone, botlhale jwa Modimo ka tlhomamo bo ka dira botshelo jwa rona jwa jaanong go nna jo bo itumedisang thata.

Tsamaya ka Botlhale Jaanong

Bosupi jotlhe jo bo re dikologileng bo bontsha gore re tshela mo “metlheñ ya bohèlō” ya tsamaiso eno ya dilo. (2 Timotheo 3:1-5) Ka ntlha ya moo, go botlhokwa gore re ntshe matlho dinameng kgatlhanong le go ineela mo moyeng wa lefatshe leno. Moya o o ntseng jalo o otlelela dilo tse di bonalang ka go tlhotlheletsa dikeletso tsa bogagapa. Tatofatso e nngwe eo e neng ya tsosiwa malebana le Jobe, monna yo o ikanyegang wa pego ya Bibela, e ne e le gore monna yono o ne a direla Modimo ka ntlha ya dikakanyo tsa bogagapa, go bapala dilo tse di bonalang (Yobe 1:9-11) A tatofatso e e ntseng jalo e ka tsosiwa kgatlhanong le rona ka boammaaruri?

Fa re araba ka nnya, re ka bo re ganana le go rata dilo tse di bonalang tsa gompieno ka katlego. Mme kotsi eno ya go rata dilo tse di bonalang, ke nngwe ya tse di boferefere thata tseo re lebanang le tsone. Jesu Keresete o ne a bolela gore ‘go bapalwa ke lefatshe le tsietso ya mahumo, di hupetsa lefoko.’ (Mathaio 13:22) Ka phepafalo, re tshwanetse go nna re ntshitse matlho dinameng kgatlhanong le “tsieco ya mahumo,” gonne tota ga a botlhokwa.

Re tshwanetse go ikgopotsa ka botlhokwa jwa dilo tse di bonalang fa go bapiswa. Lefoko la Modimo le re: “Khumō ea mohumi ke eōna motse oa gagwè, o o thata, e bile ke lorakō lo lo godileñ mo kgopoloñ ea gagwè.” (Diane 18:11) Ee, tshireletso e dikhumo di ka e neelang ke kgopolo fela e e phepa, tsietso. Ga go reye gore dilo tse di bonalang ka bo tsone ga di a siama. Se se leng phoso ke go tlhoma matshelo a rona mo go tsone go na le mo go bapaleng kamogelo ya Modimo. Jesu, yo o amogelwang jaaka mongwe wa barutisi ba ba botlhale thata mo historing, o ne a bua jaana ka tlhamalalo: “Botshelō yoa motho ga boa èma mo letlotloñ ya dithoto tse o nañ nacō.”​—Luke 12:15.

Jalo a re lateleleng tsela mo botshelong eo e tla re dirang gore re ‘humele Modimo.’ (Luke 12:21) Ga go na sepe se se botlhokwa go gaisa boemo jo bo amogelesegang mo Mmoping. Maiteko otlhe a go bo boloka a tlatseletsa mo go ‘ipeeleng motlha o o tlang motheo o o molemo, gore re tle re tshware botshelo jo eleng botshelo ruri’ ga rona.​—1 Timotheo 6:19.

[Dintlha tse di kwa tlase]