Jesu le Balepa-dinaledi

GO TSWA banna ba le mmalwa kwa Botlhabatsatsi. Ke balepa-dinaledi​—batho ba ba neng ba ka tlhalosa seemo sa dinaledi. E ne ya re ba sa ntse ba le kwa gae kwa Botlhabatsatsi, ba bona naledi e ntšha, mme ba e sala morago dimmaele di le makgolo go ya Jerusalema.

Fa balepa-dinaledi ba goroga kwa Jerusalema, ba a botsa: ‘O fa kae ngwana yo o tsetsweng go nna kgosi ya bajuda? Re ne ra bona naledi ya gagwe mme ra tla go mo obamela.’

Fa Kgosi Herode kwa Jerusalema a ne a utlwa kaga se, o ne a kgopega thata. Ka jalo a bitsa ditlhogo tsa baperisiti le go ba botsa: ‘O kae Keresete yo gotweng o tla tsalwa?’ Fa ba araba go ya kafa Dikwalong, ba araba ka gore: ‘Mo Bethelehema.’ Ya re a utlwa seo Herode a re balepa-dinaledi ba tlisiwe kwa go ene mme a ba bolelela: ‘Yang lo batle ngwana, mme fa lo mmone, lo tle ka nna lo mpolelele gore le nna ke tle ke ye koo ke mo obamele.’ Mme, mo pelong, Herode o batla go bona ngwana gore a tle a mmolae!

Morago ga gore ba tsamaye, go diragala sengwe se se gakgamatsang, naledi e ba neng ba e bona kwa Botlhabatsatsi e ba etelela pele. Ka mo go phepafetseng, eno ga se naledi fela, mme e ile ya baakanyediwa ka mo go kgethegileng go ba kaela. Balepa-dinaledi ba tswelela go e sala morago go fitlhelela e ema mo godimo ga ntlo koo Josefe le Maria ba leng gone.

Fa balepa-dinaledi ba tsena mo ntlong ba fitlhela Maria le losea lwa gagwe, Jesu. Mme ba mo obamela botlhe. Mme ba ntsha mo dikgetsing tsa bone dimpho tsa gouta, lebano, le mera. Morago ga moo, fa ba ne ba le gaufi le go boa le go ya go bolelela Herode kwa ngwana a leng gone, ba ne ba tlhagisiwa ke Modimo mo torong gore ba se dire jalo. Ka jalo ba ya kwa nageng ya bone ka tsela e sele.

O akanya gore ke mang yo o neng a baakanyetsa ka naledi e e neng ya tswelela mo marung go kaela balepa-dinaledi? Gakologelwa, gore naledi e ne ya se ka ya ba kaela kwa go Jesu kwa Bethelehema. Go na le moo, ba ne ba isiwa kwa Jerusalema kwa ba neng ba kopana le Kgosi Herode, yo o neng a batla go bolaya Jesu. Mme o ka bo a ile a dira jalo fa e ne e se gore Modimo o ne a tsenelela kgang mme a tlhagisa balepa-dinaledi go se bolelele Herode. E ne e le mmaba wa Modimo, Satane Diabolo, yo o neng a batla gore Jesu a bolawe, mme o ne a dirisa naledi, go leka go fitlhelela boikaelelo jwa gagwe. Mathaio 2:1-12; Mika 5:2.

◆ Ke eng se se bontshang gore naledi e balepa-dinaledi ba neng ba e bona e ne e se naledi fela?

◆ Jesu o ne a le kae fa balepa-dinaledi ba ne ba mmona?

◆ Re itse jang gore Satane o ne a baakanyetsa ka naledi go kaela balepa-dinaledi?