Sephiri sa Boitumelo Ke Eng?

GO ITUMELA, o tshwanetse wa huma, wa nna montle le go tuma. O ka nna wa akanya jalo, fa e le gore dipapatso, difilimi le dibuka tsa batho di ne di ka dumelwa.

Mme, fa nako e ntse e tsamaya, a madi le dithoto tse dintsi di felela ka boitumelo jwa mmatota le jwa go ya go ile? A bokau le bontle jwa mmele di a tlhokafala gore o itumele? Bana ba ba tshamekang ka metlha ba lebega ba itumetse. Mme ele ruri sephiri sa boitumelo ke eng?

A Modimo O Ka Godisa Boitumelo jwa Rona?

O ka nna wa bolelelwa gore boitumelo tota bo ikaegile ka go nna le kamano e e molemo le Modimo. Lefa go le jalo bontsi jwa batho ba go fitlhela go le bokete go dumela go Mogodimodimo. Ga ba mmone, ga ba mo itse ebile ba akanya gore ba ōtshwanetse fela ba amogela go nna gone ga gagwe. Ka jalo ga ba bone kafa Modimo o ka godisang boitumelo jwa bone ka gone.

Go boammaaruri, ereka “Modimo [e le] Mōea” re ka se mmone ka matlho a rona. (Yohane 4:24) Lefa go le jalo, a ga go sepe seo se se sa bonaleng lefa gone re dumela gore se teng? Re ipelela botsala mme ga re bone seo rona le ditsala tsa rona eleruri re se ikutliwang. Re a akanya, a mme go na le mongwe yo o kileng a bona megopolo? Re a tshela, a mme re ka bona maatla a botshelo?

Sengwe le sengwe se se mo lefatsheng se se iseng se senngwe ke motho se sa ntse se supa thulaganyo, bontle le thelelo. Ka jalo go tshwanetse ga bo go na le mongwe yo ka kelotlhoko a ileng a akanyetsa le go rulaganya dilo, mongwe yo o nang le boikutlo jo bo kwa godimo jwa popego le bontle—ee, mongwe yo o itseng gore ke eng seo se tla re itumedisang. Mokwadi wa metlha ya bogologolo o ne a ela tlhoko ka mo go hakgamatsang gore dinonofo tsa Modimo tse di sa bonaleng di lemogiwa ka dilo tse A di dirileng. A motako kana go betla mo go ntle ga go senole mo go ntsi ka mmetli yo o go dirileng? Antsaana, se se tshwanang se boammaaruri ka Modimo. Go ka kgonagala go “mmona” mo popong le mo go sengwe le sengwe seo a se re direlang.—Baroma 1:20.

Modimo O Re Direlang?

Modimo o ka re thusa go itumela, le eleng fa re bona karolo ya maatla a gagwe fela, botlhale le lorato mo ditirong tsa gagwe tsa popo. Phapaanong le bontsi jwa babusi ba lefatshe, ga a emele kgakala ka go tlhokomologa bao a ba busang. Ka ntlha ya lorato Jehofa Modimo ka bopelontle o baakanyetsa dibopiwa tsa gagwe ka taelo e e ka ba thusang go tshela matshelo a a itumetseng. Tota, Bibela e tletse ka “dichupō” tsa Modimo tseo di godisang boitumelo.—Pesalema 25:8-10.

E rile a tsopola melao mengwe e e rileng e e re itsiseng kafa Modimo o lebang dilo tse di farologaneng ka teng Jesu Keresete o ne a re: “U se ka ua bolaea motho, U se ka diha boaka, U se ka ua ucwa, U se ka ua shupa maaka, Tlotla rrago le mmago: gapé, U raté oa ga eno yaka u ithata.” (Mathaio 19:18, 19) O akanya gore lefatshe le ne le tla nna jang fa ditaelo tse di ntseng jalo di ne dirisiwa? Ele ruri, fa go ne go se ope yo o leng mmolai, mogokahadi, legodu le ba ba tshwanang, setho se ka bo se itumetse thata-thata.

Dikwalo di re: “Go segō chaba e Modimo oa eōna e leñ Yehofa.” (Pesalema 144:15) Abo go le boammaaruri jang ne! Bantsi ba ile ba dirisa kgakololo ya Modimo, mme seno se ile sa ba fa thethebalo le tsholofelo tseo eleng tsone di gogelang boitumelong jwa boammaaruri. (Bafilipi 4:6, 7) A re tlhokomeleng di se kae tsa tsone gore di reng.

Ke eng se se neng se ka itumedisa motshwakgofi wa diokobatsi yo o nnang mo ditakaneng e seng kafa molaong? O ne a itlhophela botshelo jwa boitsholo jo bo sa siamang, go nwa bobe, go kgatlhegela meletlo ya “boitlhapediso” le go lwa. Mme kana, o ne a ka bona gore batho bao a neng a ba tlhoile ba ne ba se ka ba fetolwa ke dilo tseo a neng a di dira. O ne a ikutlwa gore sotlhe se se mo saletseng, e ne e le go iipedisa le go dira boratwa-e-pelo. Mme batsadi ba mosetsana yo o neng a mo nyala ba ne ba mmontsha tsela ya mokgatlho o mosha o jaanong o neng o gola. O re: “Fa ke sena go nyala, ke ka re ke ne ka patelesega gore ke bone gore botshelo jo ke neng ke le mo go jone go fitlha ka nako eo bo ne bo ka fela fela ka kotsi. Ke na jaanong le temogo e e tebileng thata gore go latela kgakololo ya Bibela go ka tlisa diphetogo tse dikgolo tse di molemo mo botshelong jwa motho. Nna le mosadi wa me le bana ba babedi, ke direla Modimo jaaka mosupi yo o kolobeditsweng wa ga Jehofa.” Monna yono o bone boitumelo jwa boammaaruri jaaka Mokeresete.

Tswee-tswee akanyetsa kgang e nngwe gape. Mme pele ipotse: Ke ne ke ka itumela jang fa e le gore ke ne ke satswa go arelwa kankere, ke ne ke sa ntse ke bona kalafelo ya bolwetsi jono mme ebile gongwe ke ne ke sa ntse ke tla ariwa lwa bobedi? Mosadi mongwe yo o raletseng boitemogelo jono jo bo boitshegang nako nngwe o ne a itsiwe ke ba gabone jaaka seaka. Go ne ga mo tsaya nako e telele pele a ne a ka kgona go dirisa kgakololo yotlhe ya Dikwalo e a e amogetseng. Mme go ikaega ka Modimo go ne ga mo kgonisa go dira diphetogo tse dikgolo mo botshelong jwa gagwe. Mo motseng wa ga gabo mo Netherlands, koo mongwe le mongwe a itseng ka boitshwaro jwa gagwe jwa pele, jaanong o tsamaya ka ntlo le ntlo ele gore a bolele “mahoko a a molemō” le go thusa ba bangwe go bona boitumelo jwa mmatota. Lefa mosadi yono a na le mathata a a masisi a botsogo, o re: “Ke beile ikanyo yotlhe ya me mo go Jehofa Modimo, mme o tla nthusa.” Le ene gape, o itse boitumelo jwa mmaatota.

Boitemogelo jwa mosadi mogolo mongwe mo Amsterdam bo supa gore motho o ka se latlhegelwe ke boitumelo jwa boammaaruri go sa kgathalege go swabisa ga lefatshe leno le le sa itumelang. Mosadi yono o ne a feditse dingwaga tse 57 a ntse a nyetswe ka boitumelo, mme mo dikgweding di se kae morago ga go nna motlholagadi o ne a ka re: “Ke itumetse tota, ke ikutlwa ke babalesegile mo ntlong ya me mme ga ke boife.” Sephiri sa boitumelo jwa gagwe ke eng? O re: “Fa o utlwa melao ya Modimo, he o a itumela.”

O ka Bona Boitumelo

Ka jalo go ka bonala ekete thethebalo ya moteng le boipelo ga di a ikaega mo go kalo mo maemong a botsogo, lohumo, tlotlo, jalo le jalo. Boitumelo jo bo nnetseng ruri bo ikaegile ka segakolodi se se molemo, boitlotlo, ditsala tsa boammaaruri—mme godimo ga tsotlhe, botsalano le Modimo. Ke ka ntlha yang o sa leke go “mmona” ka go lebelela popo ya gagwe ka kutlwisiso e kgolwane mme bogolo ka go ithuta Bibela? Ke mang yo o ka itseng gore o itumetse go le kae ka go bo o ile wa tsenya mo pelong se o se badileng mo Lefokong la Modimo le le tlhotlheleditsweng?

A mme batho ba ba nnang basupi ba ga Jehofa ka metlha ba itumetse gotlhelele? Fa re bua boammaaruri, Nnyaa. Jaaka setlhogo se se latelang se bontsha, batho botlhe ba ba sa itekanelang ba na le mathata ebile ba tlhoka thuso mo go emelaneng le one. Lefa go le jalo Lefoko la Modimo, Bibela, le thusa Bakeresete ba ba pelo e phepa go tswelela ba sepela mo tseleng e e sa feleng ya boitumelo.