A O Ikutlwa O Bolokesegile?
Ke Kgololo Efe e e Ka Kgonagalang Jaanong?
KE GO ya bokgakaleng bofe o ka ikutlwang o bolokesegile ka mathata a a neng a tlhagisiwa mo tsebeng 3? Kgosi ya mmoki Dafide o neela ka lebaka la motheo la go ikutlwa o bolokesegile tota le eleng jaanong. O ne a kwala ka gore: “Ke nntse ke tlhomile Yehofa ha pele ga me ka galè: ereka a le kaha cogoñ ya me ye legolo, ga nketla ke tshikinyèga. . . . Nama ea me le eōna e tla nna mo polokegoñ.”—Pesalema 16:8, 9.
Go ‘tlhoma Jehofa fa pele ga gago’ go na le mosola ofe mo mathateng le dipoifong tse di go tshwenyang? A re boeletseng ka bokhutshwane dipotso tse di neng tsa tlhagisiwa go le pele mme re bone gore kgakololo ya ga Jehofa e ka thusa jang.
Go dirisa melao-metheo ya Bibela letsatsi le letsatsi go ka ama dipaka tsa gago tsa go bona tiro. Tiriso ya yone e ka dira modiri yo segakolodi sa gagwe se dirang, a ikanyega, a le senatla, ka go bo Lefoko la Modimo le ya tlhagisa: “Eo o ucwileñ a a se tlhole a ucwa: me bogolo a a dihè, a dihè se se molemō ka diatla tsa gagwè.” (Baefesia 4:28) Ka tlwaelo, bahiri ba ba botlhale ba batla modiri yo o ikanyegang. Ka gone bothata jwa tiro, le fa bo le teng, ga bo a tshwanela go nna bogolo mo go kalo mo modiring wa mmannete wa Mokeresete.
Tsela ya botshelo ya Mokeresete e ka nna ya nolofatsa matswela a tlhatlogo-ditlhotlhwa, Ka ntlha yang? Ka go bo Mokeresete o dirisa ka botlhale meamuso ya gagwe e e lekanyeditsweng. Ga go karolo epe ya madi a gagwe e e dirisediwang ka botlhaswa mo go betšheng, go goga kana mo kgobololong ya tagi le diokobatsi. O tila maitlhapediso a a jang madi, mo eleng tsela ya boithamako, “Gonne cotlhe tse di mo lehatshiñ, eboñ thatō ea nama, le kgatlhègō ea matlhō, le mabela a botshelō, ga se ga Rara [Modimo], me ke ga lehatshe.”—1 Yohane 2:16, 17.
Ke jang pono ya Mokeresete wa boammaaruri e ka thusang mo bothateng jwa bokebekwa jo bo leng gone ka metlha? Bibela e gakolola e re: “U seka ua tsèna mo tseleñ ea baikepi, u se ka ua tsamaea mo mekgweñ ea batho ba ba boshula. E thibogèlè, u se ka ua heta ka eōna.” (Diane 4:14, 15) Mo motheong wa kgakololo e e ntseng jalo Mokeresete o itisa ka botlhale mo dikgaolong tseo le maemong ao bokebekwa bo diragalang ga ntsi. O tila bokopano le batho ba ba sekametseng mo bokebekweng.
Lefa Bakeresete ba bantsi, ka mabaka a itsholelo, ba tshwanela go nna mo matlong a a sa itekanelang, melao-metheo ya bone e e theilweng mo Bibeleng e ba kaela go nna le magae a a phepa, a a itumedisang go feta a baagelani ba bone ka kakaretso. Ba itse gore bophepa jwa tebego ke karolo ya kobamelo ya boammaaruri ya Modimo o o boitshepo, Jehofa. Moperofeti Isaia o ne a gakolola ka gore: “Lo nnè bantlè.”—Isaia 52:11.
Bakeresete ba rutwa go rapela jaana: “Re neè gompiyeno seyō sa rona sa letsatsi.” (Mathaio 6:11) Topo eo e supa boikutlo tebang le ditlhokafalo tsa dijo tsa letsatsi le letsatsi go amogela se se lekaneng sa letsatsi kwa ntle go go itshwenya ka mo go sa tlhokafaleng ka ditlhokafalo tsa ka moso. Fa modumedi a dira karolo ya gagwe, ka gone o itse gore ga a ketla a tlogelelwa a sa neelwa ditlhokafalo tsa letsatsi le letsatsi tsa gagwe tsa botshelo, fela jaaka mopesalema Dafide a ile a kwala ka gore: “Nkile ka ne ke le lekau, me yana ke cohetse; leha go nntse yalo, ga ke e se nke ke bone mosiami a latlhilwe, leha e le bana ba gagwè ba lègalègèla diyō.”—Pesalema 37:25.
A go ka kgonagala go tila kana go fokotsa tshukatshukano ya mo gae? Bibela e gakolola ka gore: “Eo o bonya go galeha o kokobetsa komanō.” (Diane 15:18) Gape ya re: “A go latlhwè mañadiñadi, le kgakalō, le bogale, le kōmañ, le go kgala, le kilō eotlhe: Lo nnè pelonomi moñwe go eo moñwe, . . . lo ichwarèlanè.” (Baefesia 4:31, 32) A manyalo otlhe a ne a se ketla a solegelwa molemo ka go bontsha moya o o ntseng jalo wa Bokeresete?
Batsadi ba bantsi ba amegile thata ka bana ba bone mme bogolo ka kgatelelo ya balekane ya boitsholo jo bomaswe e ba lebaneng le yone kwa sekolong. Mo malapeng a Bokeresete boikanyegi go melao-metheo le lelapeng di tshwanetswe go jalwa kwa teng ka maiteko a go thusa basha go tlhabantsha dithaelo tsa segompieno. Bibela e gakolola go tlhagolela bolekane jo bo atamalaneng le bana ba bone, ba lekalekanya lorato le kotlhao. Kotlhao e raya go kopana, thuto, go akantshana le go baya mo tseleng.—Baefesia 6:4; Diane 1:8.
Mokeresete yo nang le tsholofelo e e tlhomameng ka isagwe ga a ne a amega thata ka ga maemo a a tlisang khutsafalo le tlalelo. Diokobatsi tse di tshwakgolang, le go okobatsa ga di ketla di nna seikokotlelo sa gagwe sa botshelo jwa letsatsi le letsatsi. Fela jaaka mopesalema a ile a bolela ka gore: “Ke tla rapama, ke ba ke rōbala mo kagishoñ: gonne, Yehofa, ke wèna wesi eo u nkagisañ mo polokegoñ.”—Pesalema 4:8.
Lefa Bakeresete ba itse go re ntwa e nngwe gape fa gare ga merafe e ka kgonagala, ba lemoga gape gore mong wa lefatshe ke Modimo, eseng motho. Ba itse gore Modimo ga o ketla o letlelela batho go senya lefa e le lefatshe kana lotso lwa motho gotlhelele ka ntwa ya lefatshe ya “nuclear” ka go bo ke ene “o bopileñ lehatshe oa le diha; . . . o no o se ka oa le tlhōlèla lehèla.” (Isaia 45:18) Ke ka gone a ileng a solofetsa le go tlhomamisetsa ka “magodimo a masha, le lehatshe ye lesha” go batho ba ba utlwang. E seng polanete le loapi lo losha mme tsamaiso e ntšha gotlhelele ya dilo tse di theilweng mo thutong e e sekametseng mo bomoyeng jwa botlhe. Se se tumalanong le boperofeti jo bo tlhotlheleditsweng jwa ga Isaia: “Gonne lehatshe le tla bo le tletse kicō ea go itse Yehofa, yaka metse a khurumeditse lewatlè.”—Isaia 65:17; 11:9.
Ke jang le ka ntlha yang phetogo eno e tla tlisiwang? A Modimo o tla dirisa baeteledi pele ba lefatshe go tlisa polokesego? A o tla nna le seabe mo isagweng e e tlhomamisegang? Setlhogo sa bofelo sa ditlhogo tseno se tla araba dipotso tseo.
[Setshwantsho mo go tsebe 7]
Go dirisa kgakololo ya Bibela go gogela kwa magaeng a phepa, go sa kgathalesege ditikologo