Marea Magadalena E ne E le Mang?

Karabo ya Baebele

Marea Magadalena e ne e le molatedi yo o ikanyegang wa ga Jesu Keresete. Leina la gagwe e bong Magadalena le ka tswa le tswa mo leineng la toropo nngwe e e bidiwang Magadala (gongwe Magadana), e e neng e le gaufi le Lewatle la Galalea. Gongwe Marea o kile a bo a nna koo.

Marea Magadalena e ne e le mongwe wa basadi ba ba neng ba tsamaya le Jesu le barutwa ba gagwe mme basadi bao ba ne ba ba tlhokomela ka dilo tse ba di tlhokang. (Luke 8:1-3) O ile a bona fa Jesu a ne a bolawa mme ke mongwe wa batho ba ntlha go bona Jesu morago ga gore a tsosiwe.—Mareko 15:40; Johane 20:11-18.

• A Marea Magadalena e ne e le mogwebakammele?

• A Marea Magadalena e ne e le moaposetoloi?

• A Marea Magadalena e ne le mosadi wa ga Jesu Keresete?

• Go buiwa ka BoMarea ba le kae mo Baebeleng?

A Marea Magadalena e ne e le mogwebakammele?

Baebele ga e re Marea Magadalena e ne le mogwebakammele. Go na le moo, se e se buang ka botshelo jwa gagwe jwa pele ke gore Jesu o ne a leleka madimona a le supa mo go ene.—Luke 8:2.

Kgopolo ya gore e ne e le mogwebakammele pele a nna molatedi wa ga Jesu e tswa kae? Makgolo a dingwaga morago ga loso la ga Marea Magadalena, batho bangwe ba ne ba re ke ene mosadi (e ka tswa e ne e le mogwebakammele) yo go neng go buiwa ka ene yo o neng a tlhapisa Jesu dinao ka dikeledi a bo a di phimola ka moriri wa gagwe. (Luke 7:36-38) Le fa go ntse jalo, kgopolo eno ga e a thaiwa mo Dikwalong.

A Marea Magadalena e ne e le moaposetoloi?

Nnyaa. Kereke ya Katoliki e bitsa Marea “Moitshepi Marea Magadalena” gape e mmitsa “moaposetoloi go baaposetoloi,” ka gonne e ne e le mongwe wa batho ba ntlha go bolelela baaposetoloi ka ga tsogo ya ga Jesu. (Johane 20:18) Le fa go ntse jalo, seno ga se mo dire moaposetoloi e bile gape Baebele ga e mmitse moaposetoloi.—Luke 6:12-16.

Baebele e ile ya wediwa fa lekgolo la ntlha le dingwaga  C.E. le tloga le fela. Morago ga makgolo a dingwaga Baebele e sena go wediwa, baeteledipele ba kereke ba ile ba tlhopha go simolola go tlotlomatsa Marea Magadalena. Go na le mekwalo e e neng ya kwalwa ka dingwaga tsa bo100 go ya go 300, e e bontshang gore barutwa bangwe ba ga Jesu ba ne ba fufegela Marea Magadalena, le fa go ntse jalo, mekwalo eo ga se karolo ya Baebele. Ditlhamane tseno ga di a thaiwa mo Baebeleng.

A Marea Magadalena e ne le mosadi wa ga Jesu Keresete?

Nnyaa. Tota e bile Baebele e bontsha gore Jesu ga a ise a ko a nyale.a