Katisa Segakolodi sa Gago ka Melaometheo ya Baebele

1-2. (a) Adame le Efa ba ne ba neilwe mpho efe? (b) Ba ne ba tshwanetse go dira eng go bontsha gore ba a e lebogela?

DIPHOLOGOLO ga di akanye fa di dira dilo. Metšhine e le mentsi e kgona go dira dilo dingwe ka gonne mongwe a ile a dira thulaganyo ya khomputara e e bolelelang metšhine eo se e tshwanetseng go se dira. Mme ga go a nna jalo ka batho. Fa Jehofa a ne a bopa batho, o ile a ba naya mpho nngwe e e tlhwatlhwakgolo, mme Bakeresete ba boammaaruri ba e tsaya e le botlhokwa thata. Mpho eo ke bokgoni jwa go itirela ditshwetso. Baebele e re bolelela gore monna wa ntlha e bong Adame, o ne a bopilwe mo setshwanong sa Modimo. (Gen. 1:26, 27) Jehofa o ne a bopa Adame le Efa ba na le bokgoni jwa go itirela ditshwetso.

² Jehofa ga a ka a naya Adame le Efa melao e mentsintsi. O ile a ba laela gore ba tlhokomele lefatshe, ba nne le bana mme ba tlale mo go lone le gore ba ikobele ditshwetso tse a di dirileng tsa se a ba letleletseng go se dira. (Gen. 1:28; 2:16, 17) Adame le Efa ba ne ba tshwanetse go dira eng go bontsha gore ba lebogela mpho e Jehofa a ba neileng yone ya go itirela ditshwetso? E re ka Jehofa a ne a ba neile dilo di le dintsi, ba ne ba tshwanetse go ikobela ditaelo tseo tse di motlhofo. Seo se ne se tla bo se bontsha gore ba a mo rata le gore ba batla go mo itumedisa.​—Diane 23:15.

3. Adame le Efa ba ile ba dirisa jang mpho e Jehofa a neng a ba neile yone?

³ Baebele e a re Adame le Efa ga ba a ka ba dirisa mpho eo sentle. Go na le moo, ba ne ba dira tshwetso ya gore ba se ka ba ikobela Jehofa. Tshwetso eo e ne e bontsha gore ga ba rate Jehofa, mme ba ikakanyetsa ba le bosi. (Gen. 3:1-7) Re sa ntse re boga ka ntlha ya tshwetso eo e e sa siamang e ba neng ba e dira.​—Bar. 5:12.

4. (a) Go ya ka Bagalatia 6:5, ke eng se re tshwanetseng go se dira? (b) Re tla tlotla ka mpho efe gape mo setlhogong seno?

⁴ Botshelo bo thata tota. Letsatsi le letsatsi re tshwanelwa ke go dira ditshwetso tse dintsi. (Bala Bagalatia 6:5.) Go motlhofo go dira ditshwetso dingwe, mme go thata go dira tse dingwe. Ke eng se se ka re thusang go dira ditshwetso tse di tla itumedisang Jehofa? Re tshwanetse go amogela gore re tlhoka thuso ya gagwe. (Diane 16:3; Jer. 10:23) Le fa gone Jesu a ne a se na boleo, o ne a itse gore o tlhoka thuso ya ga Jehofa. (Baheb. 5:7) E re ka re na le boleo, re tlhoka thuso ya ga Jehofa le go feta. A jaanong re tlotleng ka mpho e nngwe e Jehofa a re neileng yone, e e tla re thusang go dira ditshwetso tse di siameng. Mpho eo ke segakolodi.

SEGAKOLODI KE ENG?

5. (a) Segakolodi ke eng? (b) Segakolodi se ka re thusa jang? (Baroma 2:14, 15)

⁵ Jehofa o re bopile re na le segakolodi se se re thusang go itse se se siameng le se se sa siamang. Tota le motho yo o sa itseng melao ya Modimo, o na le segakolodi. (2 Bakor. 4:2) Segakolodi se ka tshwantshiwa le moatlhodi yo o re bolelelang gore a se re se akanyang kgotsa se re se dirang se siame kgotsa ga se a siama. (Bala Baroma 2:14, 15.) Segakolodi sa rona se ka re tlhagisa gore re se ka ra dira selo se se sa siamang. (1 Sam. 26:8-11) Kgotsa se ka re thusa go dira sengwe se se siameng. Le fa gone re na le mpho ya go itlhophela, seno ga se reye gore Jehofa o amogela tshwetso nngwe le nngwe e re e dirang. Segakolodi se tshwanetse go re thusa go lemoga gore a tshwetso e re batlang go e dira e siame kgotsa ga e a siama.

6. Ke eng se se ka dirang gore ka dinako dingwe segakolodi se se ka sa bereka sentle?

⁶ Ka maswabi, e re ka re na le boleo, ka dinako tse dingwe digakolodi tsa rona di ka nna tsa se ka tsa bereka sentle. Tsela e re godileng ka yone, lefelo le re nnang mo go lone kgotsa dilo tse di sa siamang tse re eletsang go di dira, di ka nna tsa koafatsa digakolodi tsa rona. Baebele e a re segakolodi se ka nna “bokoa,” ‘sa leswafala,’ sa nna ‘jaaka e kete se fisitswe ka tshipi e e molelo’ kgotsa sa nna “bosula.” (1 Bakor. 8:12; Tito 1:15; 1 Tim. 4:2; Baheb. 10:22) Segakolodi se se ntseng jalo, ga se ka ke sa re thusa go dira ditshwetso tse di siameng. Re ka se tshwantsha le sekale se se senyegileng, se se tlhokang go baakanngwa. Ka jalo, re tshwanetse go dira ka natla gore re nne le segakolodi se se berekang sentle. (1 Pet. 3:16) Re ka dira seo jang?

SE SE KA RE THUSANG GO KATISA DIGAKOLODI TSA RONA

7-8. (a) Ke eng se se ka re thusang go katisa digakolodi tsa rona? (b) Melaometheo ya Baebele e ka re kaela jang? Naya sekai. (Bona le setshwantsho.)

⁷ Re ka katisa digakolodi tsa rona jang? Re tshwanetse go bala Baebele ka metlha le go ithuta gore ke eng se Jehofa a reng se siame le se a reng ga se a siama. Go ithuta melao ya Modimo go tla re thusa go tlhaloganya tsela e Jehofa a akanyang ka yone. Mme gone, fela jaaka re bone mo setlhogong se se fetileng, melao mengwe e ne e kwaletswe maemo mangwe a a rileng. Ke lone lebaka la go bo re tshwanetse go batla melaometheo mo melaong ya Modimo, gore e re thuse go tlhaloganya tsela e Jehofa a akanyang ka yone le e a ikutlwang ka yone mo maemong a a farologaneng.​—Isa. 55:9.

⁸ Botshelo bo ka tshwantshiwa le go tsamaya mo nageng e ditsela tsa yone di sa bonaleng sentle e bile go se na matshwao a tsela. Re ka kgona go itse gore a re tsamaya mo tseleng e e siameng fa re leba letsatsi kgotsa dinaledi. Mme go ka nna botoka thata fa re dirisa mmapa o o bontshang dilo tse re ka kgonang go di bona mo tikologong e re tsamayang mo go yone, tse di jaaka dithaba le dinoka. Mmapa oo o ka re thusa go bona gore a re mo tseleng e e siameng kgotsa ga re tsamaye ka tsela e e siameng. Maikaelelo a rona ke go itumedisa Jehofa. Baebele e tshwana le mmapa o o re bontshang tsela e re tshwanetseng go tsamaya mo go yone. Melaometheo ya Baebele yone e tshwana le dithaba le dinoka tse re di bonang fa re ntse re tsamaya. Fa re e dirisa, re ka tlhatswega pelo gore re tsamaya mo tseleng e e siameng le gore re tla fitlhelela maikaelelo a rona.

9. Baroma 9:1 e a re ke eng gape se re ka se dirang go katisa digakolodi tsa rona?

⁹ Gore re kgone go katisa digakolodi tsa rona sentle, re tlhoka moya wa Modimo o o boitshepo. (Bala Baroma 9:1.) Moya o o boitshepo o tla re thusa go tlhaloganya tsela e Jehofa a akanyang ka yone mo dikgannyeng dingwe. Gape o tla re rotloetsa le go re naya maatla a go dira dilo ka tsela e e itumedisang Jehofa. (Bafil. 2:13) Mme gone, re ka dira eng gore Jehofa a re neye moya wa gagwe o o boitshepo?

10. Re ka dira eng gore Jehofa a re neye moya o o boitshepo? (Luke 11:10, 13)

¹⁰ Rapelela moya o o boitshepo. (Bala Luke 11:10, 13.) Re ka tlhatswega pelo gore Jehofa o batla go re naya moya wa gagwe o o boitshepo. (Joh. 3:34) O abela batho ba ba mo ikobelang moya o o boitshepo a le pelotshweu. (Diane 1:23; Jak. 1:5) Mme gone, ke eng gape se se ka re thusang go katisa digakolodi tsa rona?

11. (a) Ke eng se se tshwanetseng go nna botlhokwa thata mo go rona? (b) Goreng re tshwanetse go netefatsa gore digakolodi tsa rona di katisitswe sentle le gore di bereka sentle?

¹¹ Ka metlha dira dilo tse di itumedisang Jehofa. (Diane 8:34, 35) Seo se tshwanetse go nna selo sa botlhokwa thata mo matshelong a rona. Fa re gopola gore boikaelelo jwa rona ke go dira ditshwetso tse di itumedisang Jehofa, seo se tla re thusa go katisa digakolodi tsa rona. Re tla nna le digakolodi tse di berekang sentle fa re akanya ka tsela e Jehofa a akanyang ka yone e bile re amega ka gore o ikutlwa jang. Fa re akanya kafa botshelo bo leng thata ka gone, re kgona go lemoga gore go botlhokwa thata gore re nne le digakolodi tse di katisitsweng sentle. Gantsi re tshwanelwa ke go dira ditshwetso ka dilo tse go sa buiweng sepe ka tsone mo Baebeleng. Dilo tseno di ka akaretsa boitlosobodutu, tiro, thuto e re e tlhophang kgotsa batho ba re itsalanyang le bone. Ke eng se se ka re tlhatswang pelo gore Jehofa o amogela ditshwetso tse re di dirang mo dikgannyeng tseno?​—2 Bakor. 1:12.

12. Re ka itse jang gore digakolodi tsa rona di re kaela ka tsela e e siameng? (Baefeso 5:10)

¹² Akanyetsa kwa teng ka se o se balang mo Lefokong la Modimo. (Pes. 49:3) Fa re bala Baebele, re tshwanetse go batla melaometheo e e tla re thusang go tlhaloganya kafa Jehofa a akanyang ka gone. (Bala Baefeso 5:10.) Seo se tla dira gore re itse gore a digakolodi tsa rona di re thusa go dira ditshwetso tse di siameng fa re na le mathata. (Diane 2:4-9, 11-13) Melaometheo eo e tla re thusa go katisa digakolodi tsa rona le go dira se Jehofa a batlang gore re se dire.​—Baheb. 5:14.

13. Ga re a tshwanela go dira eng? Naya sekai.

¹³ O se ka wa dira tshwetso e bo e le gone o batlang melaometheo e e tla tsamaisang le yone. Ga re batle go tshwana le Baiseraele ba ba neng ba sala kwa Juda fa Jerusalema e sena go senngwa ka 607 B.C.E. Ba ile ba raya Jeremia ba re: “E kete Jehofa, Modimo wa gago a ka re bolelela tsela e re tshwanetseng go tsamaya ka yone le se re tshwanetseng go se dira.” (Jer. 42:3-6) Ba ne ba setse ba dirile tshwetso ya gore ba ne ba tlile go dira eng. Ga ba a ka ba itumelela se Jehofa a ileng a ba laela gore ba se dire, e bile ga ba a ka ba mo ikobela. Go na le moo, ba ile ba dira se bone ba neng ba batla go se dira. Seo se ile sa dira gore ba diragalelwe ke dilo tse dintsi tse di bosula. (Jer. 42:19-22; 43:1, 2, 4) Ka jalo, pele re dira tshwetso, re tshwanetse go batla melaometheo e e ka re thusang go itse gore Jehofa o ikutlwa jang ka kgang eo re bo re dira se a se amogelang.

14. Goreng re tlhoka go dirisa melaometheo ya Baebele fa re dira ditshwetso?

¹⁴ Dira ditshwetso tse di dumalanang le melaometheo ya Baebele. (Math. 7:24-29; Jak. 1:23-25) Fa re dira ditshwetso tse di dumalanang le melaometheo ya Baebele, re letla moya o o boitshepo gore o re kaele. Mme seo se tla dira gore Jehofa a tswelele a re naya moya o o boitshepo. (Dit. 5:32) Mme gone, fa re sa letle moya o o boitshepo gore o re kaele, re ka o “hutsafatsa” kgotsa ra nna kgatlhanong le one. (Baef. 4:30; Isa. 63:10; Dit. 7:51) Tota e bile, Jehofa a ka tlogela go re naya moya wa gagwe o o boitshepo. (Pes. 51:11; 1 Bathes. 5:19) Ruri seo e tla nna selo se se utlwisang botlhoko ka gonne re tlhoka moya o o boitshepo gore o re neye maatla.​—Baef. 3:16.

RE KA BONA JANG MELAOMETHEO E E KA RE THUSANG?

15-16. (a) Re ka bona jang melaometheo e e ka re thusang? (b) Ke melaometheo efe e e ka thusang motho yo o mo rutang Baebele gore a tlogele go goga motsoko?

¹⁵ Dirisa dithulusu tsa go ithuta. Gore re kgone go dirisa melaometheo ya Baebele, re tshwanetse go itse gore re ka e bona kae mo Baebeleng. Ka sekai, motho yo o mo rutang Baebele a ka tswa a okaoka go tlogela go goga. A ka nna a re: “Baebele ga e bue sepe ka go goga, jaanong re itse jang gore go phoso?” O ka bona kae melaometheo ya Baebele e e ka mo thusang mo kgannyeng eno? Thulusu nngwe ya botlhokwa e o ka e dirisang ke Kaedi ya go Dira Dipatlisiso ya Basupi ba ga Jehofa. O ka mo isa mo setlhogong se se reng, “Motsoko” mme fa a le mo go sone o tla bona setlhogo se se reng, “Modimo o Leba Jang go Goga Motsoko?” (Bona Tora ya Tebelo ya June 1, 2014.) Fa a bala setlhogo seo, o tla bona ditemana le melaometheo efe?

¹⁶ Setlhogo seo se na le melaometheo eno e metlhano. (1) Ga re a tshwanela go nna makgoba a sengwe se se ka re bolayang. (Bar. 6:16) (2) Re tshwanetse go tila sepe fela se se ka utlwisang mebele ya rona botlhoko. (2 Bakor. 7:1) (3) Jehofa o batla gore re mo direle ka pelo yotlhe. (Math. 22:37) (4) Ga re a tshwanela go dira dilo tse di tla utlwisang ba bangwe botlhoko. (Math. 22:39; 1 Bakor. 10:24) (5) Jehofa o tla re naya maatla a go dira se se siameng. (Bafil. 4:13) Tota le fa Baebele e sa bue ka tlhamalalo ka go goga, melaometheo e e mo go yone e tla thusa motho yo o ithutang Baebele go lemoga gore Jehofa o ikutlwa jang ka kgang eo.

17. Mokaulengwe le kgaitsadi ba ba dirang dithulaganyo tsa lenyalo ba ka bona kae melaometheo e e ka ba thusang?

¹⁷ Mokaulengwe le kgaitsadi ba ba dirang dithulaganyo tsa lenyalo ba ka bona kae melaometheo e e ka ba thusang go dira ditshwetso tse di siameng? Le bone Kaedi ya go Dira Dipatlisiso e ka ba thusa. Mo setlhogong se se reng “Manyalo le Meletlo ya Lenyalo,” go na le ditlhogo tse di farologaneng tse di nang le melaometheo ya Baebele. Akanya ka melaometheo eno e le merataro e ba ka e dirisang. (1) Sengwe le sengwe se se diregang kwa lenyalong se tshwanetse go bontsha gore re tlotla Jehofa. (1 Bakor. 10:31, 32) (2) Re tshwanetse go apara diaparo tse di rulagantsweng sentle e bile di sa kgopise ba bangwe. (1 Tim. 2:9; 1 Pet. 3:3, 4) (3) Ga re a tshwanela go ikgantsha ka se re nang le sone jaaka batho ba ba sa direleng Jehofa ba tlwaetse go dira ka malatsi a bone a manyalo. (Joh. 17:14; Jak. 1:27; 1 Joh. 2:15, 16) (4) Sengwe le sengwe se tshwanetse go dirwa ka thulaganyo le ka tlotlo. (1 Bakor. 14:40) (5) Meletlo ya manyalo ga e a tshwanela go nna diphathi tse kwa go tsone batho ba nwang bojalwa thata. (Bagal. 5:21) (6) Go tshwanetse ga nna le mongwe yo o tla tlhomamisang gore sengwe le sengwe se dirwa ka tsela e e itumedisang Jehofa.​—Joh. 2:8, 9.

18-19. (a) Ke thulusu efe gape e e ka re thusang? (b) O ka dirisa jang thulusu eno go bona melaometheo e e ka go thusang go dira ditshwetso tse di siameng ka meletlo? (Bona lebokoso le le reng, “A o Ka Kgona go Lemoga Melaometheo?”)

¹⁸ Thulusu e nngwe e e thusitseng batho ba le bantsi ke buka ya Bakeresete ba Kaelwa ke Baebele. Kgatiso eno e na le ditlhogo tse di farologaneng tse mo go tsone go nang le ditemana. Fa o sena go tlhopha setlhogo, o tla bona dipotso le ditemana tse di ka go thusang go bona melaometheo. Ka sekai, Mokeresete a ka nna a ipotsa gore a go siame gore a ye kwa moletlong mongwe. Fa a ya mo setlhogong se se reng, “Meletlo le Malatsi a a Ketekiwang,” o tla bona setlhogwana se se reng, “Meletlo e Bakeresete ba sa tshwanelang go nna teng kwa go yone.”

¹⁹ Nngwe ya dintlha tse di mo setlhogong seo ke e e reng: “Goreng go le phoso go nna le seabe mo meletlong e e amanang le bodumedi jwa maaka? (1 Bakor. 10:21; 2 Bakor. 6:14-18; Baef. 5:10, 11).” Go tswa foo e umaka mengwe ya meletlo eo. Mo setlhogwaneng se se reng, “Meletlo ya naga” go na le melaometheo e e ka thusang Mokeresete fa a ipotsa gore a go siame go keteka meletlo e e amanang le ditiragalo tsa sepolotiki tse naga e di fitlheletseng, go nna le seabe mo meletlong ya go gopola dintwa dingwe, kgotsa go nna le seabe mo meletlong e e tlotlomatsang batho ba ba tlotlegang. Ruri re itumelela go bo phuthego ya ga Jehofa e re naya dithulusu tseno tse di re thusang go katisa digakolodi tsa rona!

BONTSHA GORE SEGAKOLODI SA GAGO SE KATISITSWE SENTLE

20. Re tla itse jang gore digakolodi tsa rona di katisitswe sentle?

²⁰ Re lebogela mpho ya go itlhophela e Jehofa a re fileng yone. Mme re a lemoga gore re tshwanetse go katisa digakolodi tsa rona gore re kgone go dirisa mpho eo sentle. Segakolodi se se katisitsweng sentle se tla re thusa go dira ditshwetso tse di tla dirang gore Jehofa a tlotliwe, e bile di dumalana le thato ya gagwe. Gore seo se kgonege, re tlhoka moya wa ga Jehofa o o boitshepo. Ka jalo, re tshwanetse go nna re mo kopa gore a re o neye, go tswa foo re bo re o letla gore o re kaele. Melaometheo ya Baebele le yone e tla re thusa go katisa digakolodi tsa rona. E kete re ka leka thata go dirisa dimpho tseno tse Jehofa re nayang tsone. Fa re dira jalo, re tla bona kafa Baebele e tla re thusang ka gone mo botshelong.​—2 Tim. 3:16, 17; Baheb. 4:12.