Dira Diphetogo Gore o Kgone go Kolobediwa

1. (a) Go kolobediwa go ka tokafatsa botshelo jwa gago jang? (b) Re tlile go tlotla ka eng mo setlhogong seno?

A O INEETSE mo go Jehofa e bile o kolobeditswe? Fa o ne o dira jalo, o ne o kopa segakolodi se se siameng mo Modimong. (1 Pet. 3:21) Gape fa e le gore o kolobeditswe, o tlhomela ba ba iseng ba kolobediwe sekao se se molemo mo phuthegong. Ka jalo, o berekile! Mme go tweng fa e le gore ga o ise o kolobediwe? Ga go pelaelo gore o rata Jehofa e bile o batla go dira thato ya gagwe. O a itse gore go botlhokwa gore o kolobediwe gore Jehofa a go itshwarele maleo le gore a go amogele. (Dit. 2:38-40) Mme gone, o ka tswa o sa ntse o okaoka go kolobediwa. Ke eng se se ka go thusang? Mo setlhogong seno, re tlile go bona gore (1) ke eng fa bangwe ba okaoka go kolobediwa, (2) goreng go le botlhokwa gore re nne re akantse gore bokhutlo bo gaufi le gore (3) go dira diphetogo gone jaanong gore o kgone go kolobediwa go ka go tswela mosola jang.

GORENG BANGWE BA OKAOKA?

2. Goreng bangwe ba okaoka go kolobediwa?

² Bangwe ba okaoka go kolobediwa ka ntlha ya poifo. Ka sekai, le fa ba ka tswa ba batla go direla Jehofa, ba tshaba gore ga ba ka ke ba kgona go mo itumedisa. Fa e le gore o ikutlwa jalo, bala ditemana tse di tla go tlhomamisetsang gore Jehofa ga a lebelela gore o itshware jaaka e kete ga o na boleo le gore fa o mo direla ka pelo yotlhe o itumela tota. (Pes. 103:13, 14; Bakol. 3:23) Fa e le gore o tshaba gore batho ba bangwe ga ba ka ke ba go tshwara sentle fa o kolobediwa, kopa Jehofa gore a go thuse go nna pelokgale jaaka mopesalema. O ne a re: “Jehofa o ka fa letlhakoreng la me; ga nkitla ke boifa. Motho a ka ntira eng?”​—Pes. 118:6.

3. Ke eng gape se se ka tswang se dira gore bangwe ba okaoke go kolobediwa? (Bona le setshwantsho.)

³ Bangwe ba ba ratang Jehofa ba okaoka go kolobediwa ka gonne ba akanya gore ba kitso potlana. Mme gone, a o tshwanetse go itse sengwe le sengwe mo Baebeleng gore o kolobediwe? Nnyaa. Akanya ka se se ileng sa diragalela modisa wa kgolegelo le ba lelapa la gagwe. Bosigo bongwe Jehofa o ile a dira gore go nne le thoromo ya lefatshe gore a golole moaposetoloi Paulo le Silase kwa kgolegong. Seo se ile sa ba thusa gore ba kgone go ruta modisa yoo wa kgolegelo le ba lelapa la gagwe ka Jesu. Ga go pelaelo gore monna yoo le ba lelapa la gagwe ba ne ba dumela gore Jehofa ke ene a golotseng batlhanka ba gagwe kwa kgolegelong ka kgakgamatso eo. Gape ba ile ba ithuta dithuto tse dingwe tsa botlhokwa ka Jehofa le Jesu mo bosigong joo. Se ba ileng ba se ithuta se ile sa ba tlhotlheletsa gore ba ‘kolobediwe kwantle ga go diega.’ (Dit. 16:25-33) Fa e le gore o itse Jehofa, o mo rata ka pelo yotlhe, o ithutile dithuto tsa motheo tsa Baebele, o ikwatlhaetse maleo a o a dirileng e bile o ikemiseditse go tswelela o tshela ka melao ya gagwe, o siametse go kolobediwa.​—Mar. 12:30.

4. Ke eng gape se se dirang gore bangwe ba okaoke go kolobediwa? (Bona le setshwantsho.)

⁴ Bangwe ba batla go dira diphetogo mo botshelong gore ba itumedise Jehofa le gore ba kolobediwe, mme ba akanya gore go dira jalo go thata. Gone ke boammaaruri gore go botlhokwa gore re akanye pele re dira ditshwetso tse di tla amang botshelo jwa rona. (Luke 14:27-30) Ba bangwe bone ba akanya thata ka dilo tse ba ka tshwanelwang ke go di tlogela gore ba direle Jehofa. Seo ke se se ileng sa diragalela Candace. Fa a sa le monnye o ile a rutiwa gore motho o tshwanetse go dira eng gore a itumedise Jehofa. Mme ga a ka a dirisa se a se ithutileng. Moragonyana fa a setse a godile, o ile a simolola go ithuta Baebele gape. A re: “Ke ne ke itse gore ke tshwanetse go direla Jehofa mme ke okaoka go dira jalo ka gonne ke ne ke rata tsela e ke neng ke tshela ka yone. Ke ne ke itse gore go ne go tla nna thata gore ke tlogele dilo dingwe.” Ba bangwe ba tshwenyegile ka gore ga ba ka ke ba kgona go tshela ka tsela e Jehofa a lebeletseng gore ba tshele ka yone. Ba akanya gore fa ba sena go kolobediwa ba tla dira boleo jo bo masisi ba bo ba tlosiwa mo phuthegong. Fa e le gore le wena o tshwenyegile ka dilo tseno, o ka thusiwa ke eng?

5. Re tshwanetse go akanya ka eng fa re ipotsa gore a re kolobediwe? (Mathaio 13:44-46)

⁵ Fa re batla go reka sengwe, ga re lebelele fela gore se ja bokae mme gape re akanya ka boleng jwa sone. Gantsi le fa selo seo se tura mme se na le boleng jo bo kwa godimo, ga re re kamoso, re se reka ka yone nako eo. Ka tsela e e tshwanang, fa re ipotsa gore a re kolobediwe, ga re a tshwanela go tlhoma mogopolo fela mo diphetogong tse re tlhokang go di dira. Gape re tshwanetse go akanya ka selo sa botlhokwa thata, e leng botsala jwa rona le Jehofa. Jesu o ile a dirisa ditshwantsho tse pedi go re ruta kgang eo ya botlhokwa. (Bala Mathaio 13:44-46.) Mo ditshwantshong tseo, banna ba go buiwang ka bone ba itumelela go rekisa dilo tsotlhe tse ba nang le tsone gore ba reke sengwe se se nang le boleng, e leng boammaaruri ka Bogosi Jwa Modimo. Fa e le gore o okaoka go dira diphetogo gore o kolobediwe, akanya ka kelotlhoko ka ditshwantsho tsa ga Jesu. O ka nna wa ipotsa go re: ‘A tota ke dumela gore dikgang tse di molemo tsa Bogosi Jwa Modimo ke selo se se botlhokwa fela thata? A ke tsaya botsala jwa me le Jehofa, tsholofelo ya go tshelela ruri le lelapa le a mphileng lone la bakaulengwe le bokgaitsadi di le botlhokwa thata?’ Tsela e o arabang dipotso tseno ka yone e tla bontsha gore o tshwanetse go dira diphetogo dife gore o kolobediwe.

6. Ke eng se se ka go thusang gore o dirise se o se ithutang?

⁶ Mo setshwantshong sa mojadi, Jesu o ile a tlhalosa gore se se mo pelong se ka thibela motho gore a gatele pele. Mme gape o ne a tlhalosa gore bangwe ba “pelo e e molemo le e e siameng” ba ne ba tla utlwa molaetsa wa Bogosi ba bo ba o amogela. (Luke 8:5-15) Fa e le gore o pelopedi, o se ka wa itlhoboga, Jehofa a ka go thusa gore ‘o fetole pelo ya gago’ mme o latele kaelo e a go nayang yone. Mo kope gore a nolofatse pelo ya gago gore o rate se o se ithutang le gore o se dirise mo botshelong.​—Esek. 18:31; 36:26.

7-8. Goreng basha bangwe ba okaoka go kolobediwa? (Bona le setshwantsho.)

⁷ Basha bangwe ba ba batlang go direla Jehofa, ba okaoka go kolobediwa ka ntlha ya tlhotlheletso ya ba bangwe. Ka sekai, barutabana bangwe kwa sekolong ba ka leka go dira gore baithuti ba akanye gore go itshwara ka tsela nngwe go siame, tota le fa Jehofa a re go phoso. Go ba reetsa go ka go tsenya mo kotsing. (Pes. 1:1, 2; Diane 7:1-5) Gore o se ka wa tsena mo mathateng ao, etsa mopesalema, o ile a raya Jehofa a re: “Ke na le temogo go gaisa barutisi ba me botlhe, ka gonne ke akanyetsa kwa teng ka dikgakololo tsa gago.”​—Pes. 119:99.

⁸ Go lebega batsadi bangwe ba e leng Basupi ba dira gore go nne thata gore bana ba bone ba kolobediwe. Batsadi bao, ba tshwenyega ka gore bana ba bone ba tla tsweletsa dithuto go fitlha kae le gore ba tla bona tiro e e ntseng jang. Kgotsa gongwe ga ba thuse bana ba bone go ipeela mekgele e e tla ba thusang go atamalana le Jehofa. A o akanya gore batsadi ba gago ba ka dira sengwe go go thusa gore o tshwanelege go kolobediwa? Goreng o sa bue le bone ka kgang eno? Tlhomamisega gore le fa o ka tswa o na le dingwaga di le kae, o ka kgona go atamalana le Jehofa.​—Diane 20:11.

9. Goreng bangwe ba diega go kolobediwa?

⁹ Bangwe ba ba tshwanelegang go kolobediwa ba ka nna ba okaoka go dira jalo ka gonne ba batla go kolobediwa ka letsatsi le le lengwe le tsala ya bone kgotsa le mongwe wa losika. Gone ke boammaaruri gore ga go phoso go kolobediwa le batho ba o ba ratang ka letsatsi le le lengwe. A mme gone leo e tshwanetse go nna lone lebaka le le dirang gore o diege go kolobediwa? Gopola gore go ineela ke kgang ya gago le Jehofa. Ga o a tshwanela go ikaega ka ope gore o kolobediwe.​—Bar. 14:12.

GOPOLA GORE BOKHUTLO BO GAUFI

10. Goreng bangwe ba okaoka go kolobediwa?

¹⁰ Mo godimo ga mabaka a re tlotlileng ka one, bangwe ba ka nna ba okaoka go kolobediwa ka gonne ba tsaya gore go setse nako e ntsi pele bokhutlo bo ka tla. A go akanya jalo go a utlwala? Jesu o ile a raya barutwa ba gagwe a re: “Nnang lo ipaakantse, ka gonne Morwa motho o tla tla ka nako e lo sa e lebelelang.”​—Luke 12:40.

11. Go ithuta mo go oketsegileng ka Jehofa go tla re tlhotlheletsa gore re dire eng, mme ka ntlha eng? (Pesalema 119:60)

¹¹ Re tshwanetse go ineela mo go Jehofa ka gonne re mo rata. Fa re ithuta mo go oketsegileng ka ene, re tla lemoga gore o re rata fela thata le gore ditaelo tsa gagwe di re tswela mosola. (Bala Pesalema 119:60.) Morutwa Jakobe o ile a umaka lebaka le lengwe la botlhokwa la gore re nne bonako go ikobela ditaelo tsa ga Jehofa: Ga go na ope wa rona yo o itseng gore la kamoso le mo tshwaretse eng. Gongwe re ka se tsoge re nnile le tshono e nngwe ya go ‘dira se se siameng,’ ka jalo re tshwanetse go dira se re itseng gore Jehofa o batla gore re se dire gone jaanong.​—Jak. 4:13-17.

12. Re ithuta eng mo setshwantsho sa ga Jesu sa tshimo ya morara?

¹² Gape akanya ka setshwantsho sa ga Jesu sa tshimo ya morara. O ile a tlhalosa gore bangwe ba ile ba bereka ura e le nngwe fela mme ba newa tuelo e e lekanang le ya ba ba berekileng letsatsi lotlhe. Mme gone, goreng batho bao ba ba berekileng ura e le nngwe ba sa simolola tiro pelenyana ga foo. Ba ne ba re: “Ka gonne ga go na ope yo o re thapileng.” Badiri bao e ne e se ditshwakga, ba ka bo ba ile ba bereka letsatsi lotlhe fa go ne go na le mongwe yo o ba thapileng. Fela fa ba sena go thapiwa, ba ile ba tsena mo tirong. (Math. 20:1-16) Gompieno, Jesu o kopa gore re nne balatedi ba gagwe le gore re rere dikgang tse di molemo tsa Bogosi. Fela fa re utlwa taelo eo re tshwanetse go dira jalo.

13. Re ithuta eng mo mosading wa ga Lote?

¹³ Bangwe ba diega go dira diphetogo gore ba direle Jehofa ka gonne ba akanya gore ba tla dira jalo ka motsotso wa bofelo. Mme gone, go leta ngwedi ke go leta lefifi e bile fa o diega go tla nna thata le go feta gore o dire diphetogo. Jesu o ne a itse seo e bile o ile a tlhagisa barutwa ba gagwe. O ile a re: “Gakologelwang mosadi wa ga Lote.” (Luke 17:31-35) Mosadi wa ga Lote o ne a itse gore mo bogautshwaneng Jehofa o ne a tlile go fedisa Sodoma le Gomora. Mme gone, o ne a sa ikemisetsa go tlogela dilo tse a neng a na le tsone. (Gen. 19:23-26) Gape pego eno e re gopotsa gore bopelotelele jwa ga Jehofa bo tlile go nna le mo bo felelang gone. Ka nako eo, go tla bo go le thari gore o dire diphetogo.​—Luke 13:24, 25.

14. Se Baebele e se bolelelang pele ka bokhutlo se tshwanetse sa go ama jang?

¹⁴ Se se diregang mo lefatsheng letsatsi le letsatsi se bontsha gore se Baebele e se boleletseng pele se boammaaruri. Tota le fa dilo dingwe tse Baebele e di boleletseng pele di sa direge mo lefelong le o nnang mo go lone, go di bona di direga mo mafelong a mangwe go tshwanetse go go tlhotlheletsa go dira diphetogo tse di tlhokegang gore o kolobediwe ka bonako jo bo kgonegang. Akanya ka se moaposetoloi Petere a ileng a se bolelela Bakeresete bangwe. O ile a ba kgothaletsa gore ba ‘dire ditshwetso tse di botlhale’ ka gonne “bokhutlo jwa dilo tsotlhe [bo ne] bo atametse.” (1 Pet. 4:7) Go lebega “bokhutlo” bo ne bo kaya nako ya fa Jerusalema le tempele ya yone di fedisiwa. (1 Pet. 1:1) Mme gone, fa Bakeresete ba bona boporofeti joo bo diragadiwa ba ile ba tshepa gore dilo tse dingwe tse Jehofa a ba solofetsang gore o tla di dira di ne di tla direga. Ka tsela e e tshwanang, le wena fa o bona dilo tse Baebele e di boleletseng pele ka bokhutlo di direga, o tla tlhotlheletsega go dira diphetogo tse di tlhokegang gore o kolobediwe.

15. Re ka ipaakanyetsa letsatsi la ga Jehofa jang? (2 Petere 3:10-13)

¹⁵ Mo lekwalong la bobedi le Petere a ileng a le kwala, o ne a tlhalosa gore re ka ipaakanyetsa jang letsatsi la ga Jehofa, e leng bokhutlo jwa lefatshe leno. Fa Petere a kwalela Bakeresete ba bogologolo lekwalo leno, letsatsi la ga Jehofa le ne le sa ntse le le kgakala thata. Mme gone, o ile a ba bolelela gore ba ‘tswelele ba akantse thata ka lone’ kgotsa gore ba ‘eletse ka tlhoafalo gore le tle.’ (Bala 2 Petere 3:10-13; ntlh.) Le rona re ka bontsha gore re tswelela re akantse thata ka letsatsi la ga Jehofa e bile re eletsa ka tlhoafalo gore le tle. Re ka dira seo ka go dira ‘ditiro tse di boitshepo le go itshwara ka tsela e e bontshang gore re ineetse mo Modimong.’ Ruri Jehofa o tla itumela tota, fa o dira dilo tseno! Ga go pelaelo gore o tla itumelela go go bona o ineela mo go ene o bo o kolobediwa!

GORENG GO LE BOTLHOKWA GORE O KOLOBEDIWE GONE JAANONG?

16. Nako e e siameng ya go kolobediwa ke efe? (2 Bakorintha 6:1, 2) (Bona le ditshwantsho.)

¹⁶ Eno ke nako e e siameng ya gore o kolobediwe. (Bala 2 Bakorintha 6:1, 2.) Moopafadiwa wa Moethiopia yo Filipo a ileng a kopana le ene o ile a lemoga gore o tshwanetse go kolobediwa ka yone nako eo. Fa a sena go tlhaloganya dikgang tse di molemo mme a bona lefelo le a ka kolobediwang mo go lone, ga a ka a ipolelela go re, ‘Ke tshwanetse go ithuta mo go oketsegileng pele. Ke tla bona metsi a mangwe mo tseleng ke bo ke kolobediwa.’ Go na le moo, o ile a botsa Filipo go re: “Ke eng se se nthibelang go kolobediwa?” (Dit. 8:26, 27, 35-39) Ruri moopafadiwa yoo o re tlhometse sekao se se molemo! Fa a sena go kolobediwa “o ne a tsamaya a itumetse thata.”

17. O ka tlhomamisega ka eng?

¹⁷ Fa e le gore o okaoka go kolobediwa, tlhomamisega gore Jehofa o ikemiseditse go go thusa gore o atamalane le ene. (Bar. 2:4) O tla go thusa gore o fenye dilo dipe fela tse di dirang gore o boife le tse di go tshwenyang kgotsa fa go se na ope yo o go kgothaletsang gore o kolobediwe. Fa o sena go kolobediwa o tla bo o na le segakolodi se se siameng e bile “dilo tse di kwa morago” ga di ka ke tsa tlhola di nna botlhokwa mo go wena. (Bafil. 3:8, 13) Go tswa foo, o tla leba kwa ‘dilong tse di kwa pele’ e leng dilo tse Jehofa a di solofetsang batho ba ba ineetseng mo go ene e bile ba kolobeditswe.​—Dit. 3:19.