Singapore E Kgatlhanong le go Obamela ka Kgololesego

KA MAITSEBOA a February 24, 1995, mapodise a ne a gatlhamela mo magaeng a le mane kwa toropokgolong ya Singapore. Go ne ga tshwarwa batho ba le 69.a Mo go bone go ne go na le mosadi wa dingwaga tse 71 le basetsana ba le babedi ba dingwaga tse 15. Ka ntlha yang? A e ne e le ka ntlha ya tiro nngwe ya bokebekwa kana ya go senya? Nnyaa. Ga go na ope wa bone yo o neng a dira sepe se go ka tweng se kotsi ka tsela epe, ga se bontshe maitsholo a mantle, kana ga se thuse go agisa batho. Ba ne ba se kotsi gotlhelele mo bangweng ka bone ba kwa Singapore malebana le mekgwa e mentle ya boitsholo, tshireletsego, kana go tshela sentle ga bone. Lefa go ntse jalo, fa mapodise a sena go phuruputsha magae ao a mane, a ne a tsaya batho ba le 69, bao ba neng ba kopane mmogo go tla go ithuta Baebele le go itisa mmogo, ba ba isa kwa kampeng ya mapodise. Ba ne ba ladiwa koo, ba thamathamisiwa ka dipotso, ba tsewa menwana, ba bo ba tsewa dinepe—ee, ba tshwarwa jaaka dikebekwa fela tse di tlwaelegileng! Ka nako eo—lobaka lwa diura di le 18 ba le maemong a a sa itumediseng—ba ne ba kganelwa go bona thuso ya molao ba bo ba kganelwa le gone go leletsa ba malapa a bone go ba bolelela kwa ba leng teng. O ka akanya fela gore baagi bano ba ba ratang kagiso, ba ba utlwang molao ba ne ba ikutlwa jang fa ba phamolwa fela jalo!

Ditiragalo tseno di ka gopotsa motho maemo a metlha e e bosula ya Jeremane wa Bo-Nazi le motlha wa Bokomonise wa kwa Soviet Union le kwa Yuropa Botlhaba. Motho yo o etelang fela kwa Singapore a ka seka a solofela go fitlhela seemo seo mo motseng oo wa toropokgolo ya segompieno o o humileng e bile o le phepa tota. Singapore e itiretse leina la gore ke naga e e gakgamaditseng thata mo lekgolong la bo20 la dingwaga mo go tsa ikonomi le go gatela pele mo go tsa loago. Ke naga e e ipoletseng gore ke ya temokerasi e bile e na le molaotheo o o tlhomamisetsang baagi ba yone ditshwanelo tsa motheo tsa setho, tse di akaretsang go bua ka kgololesego, go obamela ka kgololesego, le go kopana mmogo ka kgololesego.

Lefa go ntse jalo, batho ba ba tshwerweng ka February ba ne ba tshwarwa fela ka gonne e ne e le Basupi ba ga Jehofa ba kopane mmogo go tla go ithuta Baebele le go nna mmogo jaaka Bakeresete. Ba ne ba pegwa molato wa gore ba “tsene pokano ya mokgatlho o o seng kafa molaong.”

E bile tota, Basupi ba ga Jehofa ba ntse ba sa amogelwe ke molao kwa Singapore fa e sale ka 1972 fa Phuthego ya kwa Singapore e ne e phimolwa mo rejisetareng mme dibuka tse di gatisitsweng ke Watch Tower Bible and Tract Society di ne tsa thibelwa, go akaretsa le Dibaebele. Ga ba a ka ba neelwa sebaka sa go ipuelela malebana le mabaka a a akanyeditsweng a kgato eo e tserweng ka one. Bosheng jaana, go kgethololwa jalo ke molao go ne ga gwetlhiwa mo dikgotleng tsa Singapore ka kgang ya Basupi ba le bane ba ba neng ba tshwerwe ka February 1994 ka gonne ba na le dibuka tsa Baebele tse di thibetsweng. Boikuelo kgatlhanong le go tshwarwa jalo bo ne jwa reediwa ka August 1994 mme jwa tshololwa ka bonako fela. Moatlhodimogolo Yong Pung How wa Kgotlatshekelokgolo o ne a ntsha maikutlo a gagwe kgwedi e e latelang. O ne a dumela gore ba ne ba se kgatlhanong le go obamela ka kgololesego le gore batho bao ba ne ba tshwerwe sentle ka gonne Basupi ba ga Jehofa ba tsenya tshireletsego ya setšhaba mo kotsing ka gonne maloko a bone a gana go tsena mo bosoleng. Ka February 17, 1995, Basupi ba bane bao ba ne ba ikopa gore ba ye go ikuela malebana le tshwetso eno e e kgatlhanong le bone kwa Kgotleng ya Singapore ya Boikuelo. Kopo eo e ne ya ganwa.

Tshwetso eno ya bofelo e ne ya gatisiwa thata mo metsweding ya dikgang e e laolwang ke puso ya kwa Singapore. Kwantle ga pelaelo tshwetso ya kgotlatshekelo eno le go bolelwa phatlalatsa ga yone go ne go bontsha go sale pele ditiragalo tse di neng tsa latela. E rile beke e ise e fele Basupi bao ba ba 69 ba bo ba tshwarwa. Ditatofatso tsa ba le bane mo go bone—e le baagi ba kwa Boritane, Fora, le Luxembourg—di ne tsa tshololwa moragonyana. Lefa go ntse jalo, se se neng se ba diragaletse se ne se le botlhoko. Rre mongwe mo go bone o ne a tshedile dingwagangwaga mo Singapore e bile a bereka teng le mosadi wa gagwe. Ba ne ba ntshiwa mo ditirong tsa bone ba ntshiwa le mo ntlong e ba neng ba e hirisitse mme ba ne ba tshwanelwa ke go sadisa ditsala tsa bone tse dintsi sentle tse ba neng ba atamalane le tsone.

Bagolo ba bangwe ba ba 63 ba ne ba latofadiwa ka gore ba mo mokgatlhong o o thibetsweng, mme bangwe ba bone ba ne ba latofadiwa gape ka gore ba na le dibuka tse di thibetsweng. Ba atlholetswe dingwaga tse tharo mo kgolegelong kana S$3 000 (R7 600) kana ka bobedi jwa tsone. Basetsana ba babedi ba dingwaga tse 15 ba ne ba isiwa kwa kgotlatshekelong ya bana ka dinako tse di farologaneng.

Ga ba Tsenye Setšhaba le Kutlwano ya Sone mo Kotsing

Mo lefatsheng lotlhe, mo dinageng di feta 200 tse Basupi ba ga Jehofa ba leng kwa go tsone, ba itsiwe e le batho ba ba siameng, ba ba ikanyegang, ba ba utlwang molao. Ba itsiwe ka gore ba gana gotlhelele go dira tiro epe ya go senya, e e kgatlhanong le puso—e leng tiro e e seng ya Bokeresete e e ka felelang ka gore ba kgaolwe, kana ba tlosiwe mo phuthegong. Eleruri, puso ya Singapore ga e a tshwanela go ba tshaba sepe. Ga ba kotsi ka gope mo tshireletsegong ya setšhaba sa Singapore lefa e le mo leineng la setšhaba le kutlwano ya sone. (Baroma 13:1-7) Seno se ne sa tlhalosiwa ka phepafalo mo lekwalong la March 21, 1995, le le neng le tswa kwa go Milton G. Henschel, poresidente wa Watch Tower Bible and Tract Society, le ya kwa go Tonakgolo Goh Chok Tong wa kwa Singapore. Lekwalo leo le kwadilwe fano gape go solegela babadi ba rona molemo.

Batho ba ba ratang kgololesego ba ba mo kgwebong, mo pusong le ba e leng batho fela ba tla bo ba lebeletse ka kgatlhego gore boemo jwa kwa Singapore bo tla felela jang. A puso ya Singapore e tla dira go dumalana le ditshwanelo tsa motheo tsa batho le kgololesego e e tshegediwang ke molaotheo wa yone le ditšhaba tse dingwe tse di farologaneng? Eleruri, Basupi ba ga Jehofa mo lefatsheng lotlhe ba amegile thata ka baobamedikabone ba kwa Singapore. Ba ba umaka mo dithapelong tsa bone e bile ba nna ba gakologetswe kgothatso eno e e fitlhelwang mo Baebeleng: “Jehofa o rata katlholo; ga a latlhe baitshepi ba gagwe.”—Pesalema 37:28.

[Ntlha e e kwa tlase]

[Lebokoso mo go tsebe 30]

March 21, 1995

Goh Chok Tong

Prime Minister

Istana Annexe

Singapore 0923

Republic of Singapore

Lee Kuan Yew

Senior Minister

Prime Minister’s Office

460 Alexandra Road

37-00 PSA Bldg

Singapore 0511

Republic of Singapore

Borre ba ba rategang:

Pego ya Reuters ya bosheng jaana go tswa kwa Singapore e e kwadilweng ka February 25, 1995, e ne e utlwisa botlhoko fela thata. E ne e bega gore dipokano tse Basupi ba ga Jehofa ba neng ba ithuta Baebele mo go tsone di ne tsa tsenwa gare ke mapodise mme ga tshwarwa batho ba le 69. Pego eno e dirile gore lefatshe le tlhome leitlho mo seemong sa Basupi ba ga Jehofa kwa Singapore, koo ditiro tsa bone le dibuka tsa bone di ntseng di thibetswe ka dingwaga di feta 20.

Go thata go tlhaloganya gore ke ka ntlha yang fa mokgatlho wa bodumedi o o dirang o sa iphitlhe e bile o sireleditswe ka mo go feletseng ke molao kwa dinageng di feta 200 o bo o thibetswe kwa Singapore, naga e e dirisang melaometheo ya temokerasi. Go utlwisa botlhoko thata e bile fa o akanya gore Singapore mo molaotheong wa yone e solofetsa baagi ba yone gore ba ka obamela ka kgololesego.

Basupi ba ga Jehofa ga ba ise ba ko ba nne kotsi ka gope mo pabalesegong ya setšhaba gope fela. Eleruri, mo lefatsheng lotlhe ba itsege e le batho ba ba ratang kagiso, ba ba dirang ka thata, ba ba maitsholomantle, e bile ba utlwa molao—dinonofo tse ke tlhomamisang gore lo a di rotloetsa mo nageng ya lona.

Ke boammaaruri gore fa Basupi ba ga Jehofa ba ntse ba ngaparetse ditaolo tsa Baebele tse di beetsweng Bakeresete, ka dinako dingwe boemo jwa bone bo ile jwa se ka jwa tlhaloganngwa sentle kana jwa se ka jwa tlhalosiwa sentle. A mme go ne go sa nna jalo ka mothei wa Bokeresete yo le ene a neng a sa tlhalosiwa sentle go twe o kgatlhanong le “Kaesare,” puso ya motlha wa gagwe? Se Basupi ba ga Jehofa ba se dirang fela ke go latela sekao sa ga Jesu le Bakeresete ba bogologolo. Ba tlotla puso ya kwa ba nnang teng, ba duela makgetho, e bile ba rotloetsa batho go nna le maitsholo a a siameng. Ke baagi ba ba kelotlhoko ba ba siameng. Le ka motlha Basupi ba ga Jehofa ga ba ise ba ko ba tsenye letsogo mo tirong epe ya bosenyi mo nageng epe fela mme nka lo tlhomamisetsa gore go nna teng ga bone kwa Singapore ga go kotsi gotlhelele mo nageng ya lona.

Ka ntlha ya dipego tsa bosheng tsa metswedi ya dikgang, dikgato tse di gatelelang tse di tserweng kgatlhanong le Basupi ba ga Jehofa kwa Singapore ke puso ya lona jaanong di itsiwe gotlhe. Mme di tshwentse segolobogolo bangwekabone ba ba dimilione tse 12 mo lefatsheng lotlhe. Ke kopa gore lo dirise maemo a lona a a siameng go baakanya seemo le go dira gore Basupi ba ga Jehofa mo nageng ya lona ba kgone go obamela le go dirisa segakolodi ka kgololesego fela jaaka Molaotheo o solofetsa.

Ke dumela gore fa lo ne lo ka buisana ka tlhamalalo le baemedi ba Basupi ba ga Jehofa seo se ne se ka fedisa dilo dipe tse lo sa di tlhaloganyeng kaga mokgatlho wa rona le tiro ya one gape se ne se tla tlhomamisetsa puso ya Singapore gore ga e tlhoke go boifa Basupi ba ga Jehofa ka sepe. Nka itumelela go rulaganyetsa kopano e e ntseng jalo.

Ke tla nna ke emetse phetolo ya lona.

Weno ka tlotlo,

Milton G. Henschel

Poresidente

[Motswedi wa Setshwantsho mo go tsebe 31]

Nik Wheeler/H. Armstrong Roberts