A O A Gakologelwa?

A o ile wa sekaseka ditokololo tsa bosheng tsa Tora ya Tebelo ka kelotlhoko? Fa go le jalo, gongwe o ka fitlhela go kgatlha thata go gakologelwa dintlha tse di latelang:

▫ “Seshupō se se kaeañ molemō” seo Jehofa a se nayang balatedi ba ga Jesu bao ba gatang mo dikgatong tsa gagwe ke eng? (Pesalema 86:17)

Ke “boitumèlō yoa Mōea o o Boitshèpō” jo bo ileng jwa nonotsha Bakeresete ba pele go kgona go itshokela mefuta e e farologaneng ya pogiso e e neng e ba wela. (1 Bathesalonia 1:6) Go ntse jalo le gompieno, ebile Jehofa, Monei wa “nèō ñwe le ñwe e e molemō, le se se molemō señwe le señwe se se tletseñ,” o itumelela go “naea ba ba mo lōpañ Mōea o o Boitshèpō.” (Yakobe 1:17; Luke 11:13) Ka gone boitumelo jwa moya o o boitshepo ke jone bo nayang balatedi ba ga Jesu “seshupō se se kaeañ molemō.”—12/15, ditsebe 18-19.

▫ Ke ka ntlha yang fa go le botlhokwa gore re lebe go bua maaka ka tsela e Modimo a go lebang ka yone?

Pesalema 5:6 ya re Modimo “u tla senya ba ba buañ maaka.” Tshenolō 21:8 e oketsa ka gore kabelo ya botlhe ba ba buang maaka ke “losho loa bobedi.” Ke gone ka moo go leba go bua maaka ka tsela eo Modimo a go lebang ka yone go re nayang lebaka le le nonofileng la gore re bue boammaaruri mme ka go dira jalo re ka kgona go amogela mpho e e tswang mo go ene ya botshelo.—12/15, tsebe 23.

▫ Kobamelo ya Basamaria e ne e ntse jang? (Yohane 4:20)

Mo kobamelong ya bone e e tswakaneng, Basamaria ba ne ba amogela dibuka tsa ntlha tse tlhano tsa ga Moshe tse di bidiwang Pentateuch e le tsone fela Dikwalo. Mo e ka nnang mo lekgolong la bonè la dingwaga B.C.E., ba ne ba ikagela tempele kwa Thabeng ya Geresima, e le gore ba nne le sengwe se se tshwanang le tempele ya Modimo kwa Jerusalema. Le mororo tempele ya Basamaria e ile ya senngwa, le go fitlha gompieno ba santse ba tshwarela moletlo wa ngwaga le ngwaga wa Tlolaganyo kwa Geresima.—1/1, tsebe 25.

▫ A Bakeresete ba tshwanetse go tsenela matsholo a go nna kgatlhanong le go kgotlhelwa ga lefatshe kana a go le phepafatsa?

Fa a ne a le mo lefatsheng, Jesu ga a ka a batla go rarabolola mathata otlhe a loago a motlha oo. E tla re fa Jehofa ka Bogosi jwa gagwe jwa Bomesia a simolola go dirisa melaometheo ya gagwe ya tshiamo mo lefatsheng lotlhe, mathata a a amang tikologo a tla bo a rarabologetse ruri. Ke gone ka moo Basupi ba ga Jehofa ba lebang kgang eno ka tsela e e lekalekaneng. Lorato loo ba nang nalo mo baagisaning lo ba tlhotlheletsa go bontsha tlotlo mo dilong tsa batho ba bangwe, lefa go le jalo ka tsela e e tshwanetseng ba baya go rera molaetsa wa Bogosi jwa Modimo kwa pele ga dilo tsotlhe. (Mathaio 6:33)—1/1, tsebe 31.

▫ Ke ka ditsela dife Jesu a ileng a direla jaaka motshodi wa lesedi? (Yohane 8:12)

Jesu o ne a ineela thata mo go rereng mafoko a a molemo a Bogosi jwa Modimo. (Luke 4:43; Yohane 18:37) O ne gape a senola maaka a badumedi mme ka go dira jalo a leretse bao ba neng ba le mo bokgobeng jwa bodumedi kgololesego ya semoya. (Mathaio 15:3-9) O ile a itshupa ka tsela e e ka bonwang ke mang le mang gore ke lesedi la lefatshe ka go ntsha botshelo jwa gagwe jo bo itekanetseng go nna thekololo. (Mathaio 20:28; Yohane 3:16)—1/15, ditsebe 10-11.

▫ Ke mabaka afe a a re pateletsang go ikobela Jehofa Modimo?

Jehofa ke Molaodi wa Lobopo Lotlhe, mme ke ka lone lebaka leno re tshwanelwang ke go mo ikobela. Gape, ereka a na le maatla otlhe ga go na motho ope yo o ka mo ganetsang, ka gone ga re ka ke ra tila go mo ikobela. Dibopiwa tsotlhe tse di botlhale di bopetswe go diragatsa maikaelelo a Modiri wa tsone, mme ka jalo seno se dira gore di patelesege go ikobela Modimo.—2/1, ditsebe 10-11.

▫ Ke eng se se thusitseng Josefa go gana go dira kgokafalo le mosadi wa ga Potifaro?

Tllhaloganyo ya ga Josefa e ne e tlhotlhelediwa ke maatla mangwe a a nonofileng. O ne a amegile thata ka kamano ya gagwe le Jehofa ebile a tlhaloganya sentle gore go dira kgokafalo e ne e se fela gore o ne a tla leofela monna wa gagwe, mme se se botlhokwa le e leng go feta ke gore o ne a tla bo a leofela Modimo.—2/15, tsebe 21.

▫ Jesu o ne a bolelang fa a ne a re: “Ke nna . . . boamarure”? (Yohane 14:6)

E ne e se fela gore Jesu o ne a bua boammaaruri le go bo ruta; o ne a tshelela boammaaruri le go bo emela. Ka gone, Bokeresete ga se selo fela se se ikakanyeditsweng; ke tsela eo motho a tshwanetseng go tshela ka yone.—3/1, tsebe 15.

▫ Ke thuto efe e e gomotsang e e fitlhelwang mo go Pesalema 51?

Pesalema eno e re thusa go lemoga gore fa re ka wela mo boleong mme gone eleruri re ikwatlhaela seo, Rre wa rona yo o lorato wa selegodimo o tla sekegela tsebe selelo sa rona sa gore re tlhomogela pelo le go re dira gore re se ka ra ikutlwa re latlhegile. Lefa go ntse jalo, re tshwanetse gore re tshwenyege thata ka kgobo epe fela eo e ka lerweng mo leineng la ga Jehofa.—3/15, tsebe 18.

▫ Ke eng se se tshwantshediwang ke kolobetso ya metsi?

Kolobetso ke sesupo sa phatlhalatsa sa gore motho o ineetse mo go Jehofa Modimo. Go nwediwa mo metsing go supa gore ba ba kolobediwang ba sule mo tseleng ya botshelo ya go tlhola ba itshelela. Go ntshiwa mo metsing go tshwantshetsa gore jaanong ba tshelela go tla go dira thato ya Modimo, ba dira gore e nne yone selo sa botlhokwa mo matshelong a bone. (Mathaio 16:24)—4/1, ditsebe 5-6.