Mmopi wa Rona Yo Mogolo le Ditiro tsa Gagwe
ABO di le dikgolo jang ne! Diphororo tse di phothoselang tsa Iguaçú kana tsa Niagara, megogoro e e botengteng e megolo ya kwa Arizona kana Hawaii, mekgatšha ya metsi a lewatle e e elelelang fa gare ga makgotlho a dithaba ya Norway kana ya New Zealand—abo dikgakgamatso tseno tsa tlhago di tsosa mokgosi wa kgatlhego mo bathong! A mme dilo tseno ke tse di dirilweng ka tshoganyetso fela ke Mmè wa Tlhago? Nnyaa, di kgakala fela thata le seo! Ke ditiro tse di jesang kgakge tsa Mmopi yo Mogolo, Rraarona yo o lorato wa selegodimo yoo Kgosi Solomone yo o botlhale a kwadileng jaana ka ene: “O dihile señwe le señwe go nna sentlè mo motlheñ oa shōna: le gōna o tlhomile go akanya kaga bosakhutleñ mo peduñ tsa bōnè, leha go nntse yalo e be e le ka mokgwa oa go re, motho ga a kake a lemogèla rure tihō e Modimo o e dihileñ go cwa tshimologoñ le go ea hèla kwa bokhutloñ.” (Moreri 3:11) Ke boammaaruri, go ne go tla tsaya batho nako e telele thata le go ya bosakhutleng go batlisisa ka ditiro tsotlhe tse di galalelang tseo Mmopi wa rona a ileng a di tlatsa mo lobopong.
Abo re na le Mmopi yo Mogolo jang ne! Mme ebile abo re itumela jang ne go bo Modimo yo o maatla otlhe yono “o buile le rona mo bokhutloñ yoa metlha eno ka Morwa ōna, eo o mmeileñ morui oa dilō cotlhe, eo o bileñ o no oa diha dipopō ka èna.” (Bahebera 1:2) Morwa yono, ebong Jesu Keresete, o ne a anaanela dilo tse di ntlentle tse Rraagwe a di bopileng. O ne a lebisa kwa go tsone nako le nako fa a ntse a tlhalosa kaga maikaelelo a ga Rraagwe le fa a ntse a bua mafoko a a kgothatsang batho ba ba mo reeditseng. (Mathaio 6:28-30; Yohane 4:35, 36) “Ka tumèlō” ba bantsi ba tlhalogantse gore dikgakgamatso tsa popo di “bopilwe ka lehoko ya Modimo.” (Bahebera 11:3) Matshelo a rona a letsatsi le letsatsi a tshwanetse go bontsha tumelo e e ntseng jalo.—Yakobe 2:14, 26.
Totatota, dipopo tsa Modimo wa rona di dikgolo. Di bontsha ka mo go gakgamatsang botlhale jwa gagwe, maatla a gagwe, tshiamo ya gagwe, le lorato lwa gagwe. Ka sekai, o ile a tsheka lefatshe le re leng mo go lone a le dira gore le dikologe letsatsi gore motho yo o neng a tla mmopa mo isagweng a tle a ipelele go tlhatlologana ga dipaka ka boitumelo. Modimo o ne a bolela jaana: “E tla re ka metlha eotlhe lehatshe le sa nntse le leeō, ga go ketla go khutla letsema le thōbō, serame le mogote, lotlhabula le mariga, motshegare le bosigo.” (Genesise 8:22) Mo godimo ga moo, Modimo o ne a tlatsa lefatshe ka dimenerala di le dintsintsi tse di tlhokegang. Segolobogolo, o ile a dira gore go nne le metsi a le mantsi fela thata ao, morago, a ileng a nna sedirisiwa se se molemo sa go tlamela botshelo jwa dilo tsotlhe tse di mo lefatsheng.
Ka tatelano e e rulaganeng sentle ya ‘malatsi a popo,’ a le marataro, lengwe le lengwe le le dingwaga di le sekete ka boleele, ‘maatla a Modimo a a dirang’ a ile a tswelela go baakanya lefatshe gore motho a nne mo go lone. Lesedi leo re bonang ka lone, moya o re o hemang, lefatshe le le omileng leo re nnang mo go lone, dimela, go latelana ga motshegare le bosigo, ditlhapi, dinonyane, diphologolo—tsotlhe di ne tsa dirwa ka thulaganyo ke Mmopi wa rona yo Mogolo go thusa motho le go dira gore a itumele. (Genesise 1:2-25) Kwantle ga pelaelo, re ka goeletsa mafoko ano mmogo le mopesalema: “Yehofa, ana ditihō tsa gago di methalethale yañ! u di dihile ka botlhale cotlhe hèla: lehatshe le tletse dikhumō tsa gago.”—Pesalema 104:24.
Ditiro tse di Botswerere tsa Popo ya Modimo
Fa “letsatsi” la borataro la popo le ntse le atamela kwa bofelong jwa lone, Modimo o ile a dira monna mme morago ga moo a mo direla mothusi ebong mosadi. Abo e ne e le tiro e e manontlhotlho jang ne e e neng e konela dipopo tse di mo lefatsheng, e e neng e le molemo thata go feta dipopo tsotlhe tse di bonalang tseo di nnileng teng pele! Pesalema 115:16 e re bolelela jaana: “Magodimo ke magodimo a ga Yehofa; me lehatshe o le neile bana ba batho.” Ka tsela e e tshwanetseng, Jehofa o re bopile rona batho gore re tle re itumelele re bo re dirise dipopo tsa gagwe tse a di bopileng pele mo lefatsheng. Abo re tshwanetse ra lebogela matlho a rona jang ne—a a raraaneng go feta setsayaditshwantsho sa maemo a a kwa godimo—e le ao a ka kgonang go kapa mmala o o bonalang sentle wa lefatshe le le re dikologileng! Re na le ditsebe—tse di botoka fela thata go gaisa didirisiwa dipe tsa mantswe tse di dirilweng ke motho—go re thusa go ipelela puisano, mmino, le melodi ya dinonyane e e monate. Re na le sedirisiwa se se mo teng ga rona sa go bua, go akaretsa le loleme lo lo kgonang go dira dilo di le dintsi. Meutlwalo ya lolemo ya tatso, e kopanngwa le kgono ya rona ya go dupa, di re thusa gape go ipelela mefutafuta e e farologaneng ya dijo. Abo re anaanela jang ne fa mongwe a re ama ka seatla sa gagwe ka lorato! Kwantle ga pelaelo re ka leboga Mmopi wa rona, jaaka go dirile mopesalema yo o neng a re: “Ke tla gu ntshetsa malebogō; gonne ke dihilwe ka mo go boitshègañ le ka mo go gakgamatsañ: dia gakgamatsa, ditihō tsa gago: me go mo, mōea oa me oa go itse sentlè.”—Pesalema 139:14.
Boutlwelo Botlhoko jwa Mmopi wa Rona
Mopesalema o kwadile jaana: “A lo ko lo ntshetseñ Yehofa malebogō: gonne o molemō; . . . Èna eo o dihañ dikgakgamaco a le esi; gonne boutlwèlō botlhoko yoa gagwè bo eme ka bosakhutleñ.” (Pesalema 136:1-4) Boutlwelo botlhoko jono bo mo dira gore a dire ditiro tse di gakgamatsang tse di fetang kgakala popo ya gagwe eo re setseng re e tlhalositse. Ee, le eleng lefa a ikhuditse mo dilong tsa popo tse di bonalang, o santse a bopa tsa semoya. Seno o se dira go araba kgwetlho e e bosula eo e neng e lebisitswe kwa go ene. Ka tsela efe?
Monna wa ntlha le mosadi ba ne ba beilwe mo paradaiseng e ntle eleng Edena. Lefa go ntse jalo, moengele yo o seganana, ebong Satane, o ne a itira jaaka modimo mme o ne a dira gore bobedi jono bo tsuologele Jehofa. Ka tsela e e tshwanetseng, Modimo o ne a ba atlholela loso, mme seo se felela ka gore bana ba bone, ebong lotso lotlhe lwa motho, ba tsalwe ba na le boleo ebile ba le mo seemong sa loso. (Pesalema 51:5) Pego ya Bibela e e malebana le Jobe e re bolelela gore Satane o ne a gwetlha Modimo, a iphaka gore ga go na motho ope yo o ka bolokang bothokgami go Ene fa a lekwa. Mme Jobe o ne a tiisetsa Satane gore ke moaki yo o tlhabisang ditlhong, fela jaaka go dirile bontsi jwa batlhanka ba ba ikanyegang ba Modimo ba metlheng ya Bibela le mo nakong ya rona. (Yobe 1:7-12; 2:2-5, 9, 10; 27:5) Jesu jaaka monna yo o itekanetseng, o ne a re beela sekao se se ka se keng sa lekanngwa le sepe sa go boloka bothokgami.—1 Petere 2:21-23.
Ka jalo, Jesu o ne a ka bolela jaana, “Kgōsana ea lehatshe [Satane] ga e na sepè mo go nna.” (Yohane 14:30) Lefa go le jalo go tla go fitlha gompieno “lehatshe yeotlhe le namaletse ha tlhatse ga eo o boshula.” (1 Yohane 5:19) Ka ntlha ya go bo a ile a gwetlha bolaodi jo bo molemo jwa ga Jehofa, Satane o ile a fiwa dingwaga di le 6 000 go bontsha gore a bolaodi jwa gagwe ka puso ya batho bo tla atlega. Abo a ile a palelwa ka mo go utlwisang botlhoko jang ne, fela jaaka fa maemo a lefatshe a a ntseng a tswelela go nna maswe le go feta a supa! Modimo wa rona yo o lorato, ebong Jehofa, o tla tloga a fedisa batho ba ba bosula ba ba mo lefatsheng, a tlhoma bolaodi jwa gagwe jo bo siameng gore bo buse mo lefatsheng. Abo se se tla tlisa namolo e e itumedisang jang ne mo bathong ba ba eletsang go busiwa ke mmuso o o kagiso le o o tshiamo!—Pesalema 37:9-11; 83:17, 18.
Lefa go ntse jalo, seo ga se sone fela! Boutlwelo botlhoko jwa Modimo bo tla tswelela bo bontshiwa mo motheong wa mafoko a ga Jesu a a mo go Yohane 3:16: “Modimo o ratile lehatshe [ebong batho] mo go kalo kalo, oa ntsha Morwa ōna eo o tsecweñ a le esi, gore leha e le mañ eo o dumelañ mo go èna a se ka a nyèlèla, me a bōnè botshelō yo bo sa khutleñ.” Tsosoloso eno ya gore batho ba nne ba lebeletse botshelo jo bo sa khutleng mo lefatsheng e akaretsa go tlholwa ga dilo tse disha. Ke dife tseo? Di solegela batho ba ba bokolelang molemo jang? Setlhogo sa rona se se latelang se tla bolela.