Go Lemoga Dikgang
Ke Ka Ntlhayang Fa go Tshwanetswe ga Rerwa Efangele?
Balaodi bangwe ba ile ba bolela gore lebaka la go bo batsamayakereke ba sa rere efangele ke lone le dirang gore palo ya maloko a kereke mo madumeding a magolo e ngotlege. Ereka United Church of Christ e amegile ka bothata jono seo se ile sa e tlhotlheletsa gore ka 1988 e dire kgang ya “go dira gore go rerwa ga efangele go gole mmogo le palo ya maloko” gore e nne yone selo se se tlang pele mo dingwageng di le nne.
St. Petersburg Times e bega gore dikereke tse dingwe tse dikgolo tsa kwa United States, go akaretsa le Kereke ya Presbyterian le Kereke ya Episcopal, di ile tsa dira se se tshwanang. Lefa go le jalo, patlisiso ya bosheng jaana ya mo diphuthegong di le 200 tsa United Church of Christ e ne ya senola gore ba le bantsi ba maloko a yone a le dimilione di le 1,6 ba ne ba bontsha go sa nne le kgatlhego e e kalo mo go bueng le ba bangwe ka tumelo ya bone. Leloko lengwe le ne la botsa jaana: “Ke ka ntlhayang fa re tshwanetse go bolelela ba bangwe fa re dira se se siameng?” Yo mongwe o ne a bolela jaana: “Fa o tshela ka tumelo ya gago, ga o a tshwanela go bua ka yone.”
Lefa go le jalo, mo bukeng ya gagwe ya American Mainline Religion, mokwadimmogo ebong Wade Clark Roof o ne a dumalana gore “tsela eo batho ba buang ka yone ka matshelo a bone a bodumedi le a semoya e amana thata le gore tumelo e seka ya nyelela.”
Fa e le gore go “dira molemo” le go nna le “tumelo” go lekane go ka itumedisa Modimo, ke ka ntlhayang fa moaposetoloi Paulo a ne a kwala jaana: “Go ka bo go latlhèga nna, ha ke sa rere Mahoko a a Molemō”? O ne a tlhalosetsa badumedi ka ene ba kwa Roma jaana: “Ha u tla ipolèla ka molomo ha Yesu e le Morèna, u ba u dumèla mo peduñ ea gago ha Modimo o mo cositse mo loshuñ, u tla bolokwa: Gonne motho o dumèla ka pelo go isa tshiamoñ; me boipolèlō bo dihwa ka molomo go isa polokoñ.”—1 Bakorintha 9:16; Baroma 10:9, 10.
Go Tlhakanela Dikobo ka Tsela E E Sa Tshwanelang
Go feta halofo ya dikgang di le 1 100 tsa dibuka tsa metlae tseo di neng tsa tlhagelela mo dikgatisong di le mmalwa tsa kwa Japane, go akaretsa le tsa bana, di ne di na le ditshwantsho tsa batho ba ba tlhakanelang dikobo, go ne ga rialo Moporofesara Mamoru Fukutomi. O ne a eteletse patlisiso nngwe pele kwa Tokyo e e neng e dirwa mo dimakasineng tse di fetang 390 le mo dikgatisong tse dingwe tseo di neng tsa rekwa mo kgweding e le nngwe.
Moporofesara Fukutomi o bolela gore ‘ditshwantsho di le dintsi tsa batho ba ba tlhakanelang dikobo, ke tsa banna ba pateletsa basadi [gore ba tlhakanele dikobo le bone] lefa basadi bao ba sa batle mme e re kgabagare basadi bao le bone ba bo ba feleletsa ba dumalane go dira jalo.’ Mo e ka nnang 80 lekgolong ya ditshwantsho di le 6 861 tse di leng mo dibukeng tse di rategang thata kwa Japane tseo di neng tsa tlhatlhobiwa “di ne di bontsha basadi bao ba neng ba le mo maemong ao a tlhotlheletsang tlhakanelodikobo,” go bega jalo The Daily Yomiuri. Lemororo basadi ba le bantsi ba ba mo ditshwantshong tseno ba ne ba apere “diaparo tsa kafa teng fela, diaparo tsa go thuma kana ba sa apara sepe” mme e le 40 lekgolong fela ba bone bao ba neng ba apere, 75 lekgolong ya banna ba ba mo ditshwantshong tseo go neng ga dirwa patlisiso mo go tsone ba ne ba apere.
Go dirisa tlhakanelodikobo ka tsela e e sa tshwanelang go go ntseng jalo go tla ama jang basha? Buka ya Bibela ya Diane e tlhalosa lekawana lengwe leo le “senañ tlhaloganyō” le gogelwa kwa ntlong ya seaka. (Diane 7:7) Mme seaka seno sone? “Yana o mo mebileñ, kgantele o mo dipatleloñ, me a lalèle ha marakaneloñ aotlhe. Yalo a mo chwara a mo atla.” (Diane 7:8-13) Mo metlheng ya gompieno tota esita le dikgatiso di ‘laletse gore di tshware’ mosha. Lefa go le jalo, Bibela e tlhagisa jaana: “A pelo ea gago e se ka ea hapogèla kwa tseleñ ea gagwè, u se ka ua timèlèla mo ditselaneñ tsa gagwè.”—Diane 7:25.
Mokeresete Yo O “Botoka” Ke Ofe?
“Go sa kgathalesege gore Mokeresete o dira tshwetso efe, e ka tswa e le ya gore a nne lesole kana ya gore a gane go dira jalo ka ntlha ya segakolodi sa gagwe, go tla bo go sa siama gore a ipolele gore ene ke Mokeresete yo o botoka go gaisa yo mongwe, kana esita le go belaela go nna Mokeresete ga yo mongwe, a dira jalo gore a tshegetse boemo jo bo farologaneng le jwa gagwe ka namana.”
Polelo eno e ne ya gololwa ke Lekgotla la Jeremane la Boefangele la Kereke ya Lutere ka July 1989. Ka ntlhayang? Batlhankela ba lone ba bolela gore e ne e le go fedisa boemo jo bo tserweng ke batho bangwe mo kerekeng jwa gore go gana go tsenela bosole ka ntlha ya segakolodi ke “bosupi jo bo molemo” jwa gore motho ke Mokeresete go gaisa jwa go tsenela bosole. Lemororo Lekgotla leno la Kereke le ne le dumalana gore Bakeresete ba ka fedisa ntwa ka go “tlogela thubakanyo ka bobone,” le ne la bolela gore seno gape se ka dirwa ka go lwantsha thubakanyo ka maatla a sesole e le gore go tlhomamisiwe gore go nne le kagiso.
Mo bukeng ya gagwe ya History of Christianity, Edward Gibbon o ne a kwala gore Bakeresete ba lekgolo la ntlha la dingwaga “ba ne ba gana go nna le seabe ka gope mo pusong ya selegae kana mo go sireletseng pusokgolo ka sesole,” le gore “go ne go sa kgonagale gore Bakeresete e nne masole, bomagisiterata, kana dikgosana, mme ba dira jalo ba sa tswe mo tirong e e boitshepo.”
Ka jalo, ga se kgang ya gore Mokeresete yo o “botoka” ke ofe mme go na le moo ke ya gore a motho yo o latelelang tsela e e leng kgatlhanong le ya Bokeresete jwa pele a sa kgaotse ke Mokeresete tota. Paulo o ne a kwala jaana: “Leha re sepela mo nameñ, ga re tlhabane kaha nameñ;—Gonne dibolaō tsa ntwa ea rona ga se tsa nama.”—2 Bakorintha 10:3, 4.