Botshelo le Bodihedi tsa ga Jesu

Lentswe la Modimo Le Utlwala Lekgetlo la Boraro

FA A le kwa tempeleng, Jesu o ne a ntse a akanya ka kutlobotlhoko ka loso loo a tla tlogang a lebana le lone. O amegile segolo ka moo leina le lentle la ga Rraagwe le tlileng go amega ka gone, ka jalo o rapela jaana: “Rara, galaletsa leina ya gago.”

Fa a santse a rialo, go utlwala lentswe le legolo go tswa legodimong le bua jaana: “Ke le galaleditse, me ke tla ba ke le galaletsa gapè.”

Bontsintsi jwa batho joo bo emeng foo bo gakgametse. “Moengele o buile naè,” ba bangwe ba simolola go rialo. Ba bangwe ba bolela gore e ne e le tumo ya maru. Mme, eleruri, e ne e le Jehofa Modimo yo o neng a bua! Lefa go ntse jalo, ga se lantlha lentswe la Modimo le utlwala malebana le Jesu.

Fa Jesu a ne a kolobediwa dingwaga di le tharo le sephatlo pelenyana, Johane Mokolobetsi o ne a utlwa Modimo o bua jaana ka Jesu: “Eo ke morwake eo o ratègañ, eo ke itumèlañ thata mo go èna.” Morago ga foo, nakonyana morago ga Tlolaganyo e e fetileng, fa Jesu a ne a fetoga mo ponong ya bone, Jakobe, Johane, le Petere ba ne ba utlwa Modimo o re: “Eo ke morwaake eo o ratègañ, eo ke kgatlhègañ thata mo go èna; lo utlweñ èna.” Mme jaanong, ka Nisane 10, malatsi a le manè pele ga loso lwa ga Jesu, batho ba utlwa lentswe la Modimo gape la boraro. Mme ka nako eno Jehofa o bua gore bontsintsi jwa batho bo kgone go utlwa!

Jesu o tlhalosa jaana: “Lencwe ye ga lea tla ka ntlha ea me, me e le ka ntlha ea lona.” Le naya bosupi jwa gore eleruri Jesu ke Morwa Modimo, Mesia yo o solofeditsweng. “Yanoñ go tshekishō ea lehatshe yeno,” Jesu o a tswelela, “yanoñ kgōsana ea lehatshe yeno e tla kgoromelediwa kwa ntlè.” Eleruri go ikanyega ga ga Jesu mo botshelong, go tlhomamisa gore Satane Diabolo, mmusi wa lefatshe leno, o tshwanetse go “kgoromelediwa kwa ntlè,” a bolawe.

Fa a bua ka seo loso lwa gagwe lo lo atamelang lo tla felelang ka sone, Jesu o bua jaana: “Me nna, ha ke tlhatlosiwa mo lehatshiñ, ke tla gōgèla batho botlhe kwa go nna.” Loso lwa gagwe eleruri ga se go fenngwa, ka go bo ka lone o tla kgona go gogela batho botlhe ba bangwe kwa go ene gore ba ipelele botshelo jo bo sa khutleng.

Mme bontsintsi jwa batho bo a ganetsa: “Re utlwile mo molaoñ ha Keresete a nnèla rure ka bosakhutleñ: me u bua yañ, ua re, Morwa Motho o na le go tlhatlosiwa? Morwa Motho eo ke mañ?”

Go sa kgathalesege bosupi jotlhe, go akareletsa le go utlwa lentswe le eleng la Modimo, bontsi ga bo dumele gore ka eleruri Jesu ke Morwa Motho, Mesia yo o solofeditsweng. Lefa go le jalo, jaaka a dirile dikgwedi di le thataro pelenyana kwa Moletlong wa Diobo, gape Jesu o ipolela fa e le “lesedi” mme o kgothatsa bareetsi ba gagwe jaana: “E re lo sa nntse lo na le lesedi, dumèlañ mo lesediñ, gore lo tlo lo nnè bana ba lesedi.” Morago ga go bua dilo tse, Jesu o a tsamaya go ya go iphitlha, go lebega e le ka ntlha ya gore botshelo jwa gagwe bo le mo kotsing.

Go palelwa ga Bajuda go dumela mo go Jesu go diragatsa mafoko a ga Isaia kaga ‘go foufadiwa ga matlho a batho le dipelo tsa bone tse di thatafaditsweng gore ba seka ba sokologa mme ba fodisiwa.’ Isaia o ne a bona bonno jwa ga Jehofa jwa selegodimo mo ponatshegelong, go akareletsa le Jesu fa a santse a le mo kgalalelong ya pele ga a nna motho gammogo le Jehofa. Lefa go le jalo, Bajuda, ka go diragatsa seo Isaia a se kwadileng, ba gana bosupi jwa gore Yono ke ene Mogolodi wa bone yo o solofeditsweng.

Kafa letlhakoreng le lengwe, ba le bantsi le eleng babusi (go lebega e le maloko a kgotla e kgolo ya Sejuda, ya Sanehederine) ba dumela mo go Jesu. Nikodemo le Josefa wa Arimathea ke ba le babedi ba babusi bano. Mme babusi, jaanong, ba palelwa ke go bolela tumelo ya bone, ka go bo ba tshaba gore ba ka kobiwa mo maemong a bone kwa sinagogeng. Abo ba ne ba latlhegelwa jang ne!

Jesu o tswelela ka go bua jaana: “Eo o dumèlañ mo go nna, ga a dumele mo go nna, ha e se mo go eo o nthomileñ. Me eo o mpōnañ, o bona eo o nthomileñ . . . Me ha moñwe leha e le mañ a utlwa mahoko a me, me a sa a tshegetse, ga ke mo sekise: gonne ga kea tla go sekisa lehatshe, ha e se go boloka lehatshe . . . lehoko ye ke le buileñ, ke yeōna ye le tla mo sekisañ mo letsatsiñ ya bohèlō.”

Jehofa o ne a tlhotlhelediwa ke lorato lwa gagwe mo bathong ba ba mo lefatsheng go romela Jesu gore bao ba dumelang mo go ene ba bolokiwe. Go re batho ba tla bolokega go tla tlhomamisiwa ke gore a ba reetsa dilo tseo Modimo o laetseng Jesu go di bua. Katlholo e tla nna gone “mo letsatsiñ ya bohèlō,” mo Pusong ya Dingwaga tse di Sekete ya ga Keresete.

Jesu o konela ka go bua jaana: “Gonne ga kea ipuisa hèla; me Rara eo o nthomileñ, ke èna eo o nneileñ taolō ea se ke tla se bolèlañ le ea se ke tla se buañ. Me kea itse ha taolō ea gagwè e le botshelō yo bo sa khutleñ: me ke gōna dilō tse ke di buañ, ke di bua hèla yaka Rara a di mpoleletse.” Yohane 12:28-50; 19:38, 39; Mathaio 3:17; 17:5; Isaia 6:1, 8-10.

◆ Ke mo makgetlong afe a mararo ao lentswe la Modimo le neng la utlwiwa malebana le Jesu?

◆ Moperofeti Isaia o ne a bona kgalalelo ya ga Jesu jang?

◆ Ke babusi bafe bao ba dumelang mo go Jesu, mme ke ka ntlhayang fa ba sa ipolele?

◆ ‘Letsatsi la bofelo’ ke eng, mme batho ba tla atlholwa ka eng?