Pego ya Baboledi ba Bogosi

“RURI RE itumetela go nna le lona. Ga re kitla re go lebala!”

“Mo go kopaneleng ga me gotlhe le batho ba Modimo, ga ke ise ke bone mo go tshwanang le mo.”

“Go ne go ntse jaaka ekete re ne re ipelela letsatsi la mo tsamaisong e ntšha ya dilō.”

Tseno e ne e le dikakgelo dingwe tsa baemedi ba mafatshe a mangwe ba ba neng ba le teng fa go kgakotwa ntlo-kgolo ya lekala la Watch Tower Bible and Tract Society mo New Zealand, ka November 29, 1986. Batho bano ba ne ba kukilwe maikutlo ke eng? Ke ka gonne ruri e ne e le letsatsi le le sa lebalesegeng. Mma re abalane le wena mabaka a go bo ba ne ba kukegile maikutlo jalo.

Santlha, didirisiwa tse dintle tse di neng di kgakolwa di ne tsa dira gore letsatsi leo le seka la lebalesega. John E. Barr, wa Setlhopha se se Laolang sa Basupi ba ga Jehofa, o ne a tihalosa Holo ya Bogosi e e sa tswang go agiwa bosheng le didirisiwa tse dingwe tsa lekala tse di bapileng nayo jaaka tse “dintle thata, tse di tlhomologileng, tse di kgatihang . . . tiro e e feditsweng eno e supa go dira, le go kgabisa ka matsetseleko a magolo. Gotlhe go lebega go tshwanelelana.”

Bokaulengwe jwa Bokeresete

Go tswa foo, go ne go sa lebalesege go bona bagologolo ba bantsi mo go kalo, Basupi ba ba sa belong go direla Jehofa ka boikanyegi mo dingwageng tse dintsintsi. Ebile tota, bano e ne e le bone ba bantsi thata gareng ga balalediwa ba ba 658. Fa ba ne ba kopana le ditsala tsa bogologolo, bangwe ba bao ba neng ba ba bone masomesome a dingwaga a a fetileng, ba ne ba ikutlwa jaaka Paulo, fa, morago ga loeto lo loleele, a ne a kopana le bakaulengwe ba ba tswang kwa Roma: “Ba e rileñ Paulo a ba bōna [bakaulengwe ba gagwe], a leboga Modimo, me a nametsèga.” (Ditihō 28:15) Go bona dikao tse di ntseng jalo tsa go itshoka ka boikanyegi​—bangwe ba bao ba neng ba le teng go sa kgathalesege bokoa jwa bone—​go ne go kgothatsa ebile go lebosega.

Gape, letsatsi leo le ne le sa lebalesege ka baka la bokaulengwe jwa merafe yotlhe jo bo tletseng lorato jo bo neng jwa itemogelelwa. Basupi ba ga Jehofa ke batho ba bokaulengwe jwa lefatshe ka bophara, mme seno se ne sa supiwa ke balalediwa ba ba neng ba tswa bokgakaleng jo bo etsang Australia, United States, Canada, Brithane, le Taiwan, gammogo le go tswa kwa Papua New Guinea, Samoa, le ditlhaketlhake tse dingwe tsa South Pacific. Bontsi jwa bao ba neng ba sa kgona go nna teng ka namana ba ne ba romela megala, go akareletsa le ditumediso tse di tswang kwa Setlhopheng se se Laolang, maloko a lelapa la Bethele ya Brooklyn, le setlhopha sa bo-82 sa sekolo sa barongwa sa Gilead. Tota, go ne go nonotsha tumelo go lemoga go kgatlhegela kgakolo ya didirisiwa tsa lekala la New Zealand ga bakaulengwe ba bantsi mo go kalo mo mafatsheng a a kalo-kalo.

Go Thaile Basupi ba ba Ikanyegang

Go gakololwa tiro ya go rera e e sa belong go simololwa mo New Zealand e e dirileng gore go agiwe didirisiwa tseno tsa bosheng tsa lekala go ne go itumedisa tota ga ba ga dira gore letsatsi leo le seka la lebalesega. (Bapisa Bahebera 10:32.) Jaaka go ne ga bolela sebui sengwe jaana: “Fela jaaka metheo ya kago eno e ntle ya Bethele e ntšha e le botlhokwa, metheo e e bileng e le botlhokwa go feta eo ke ya tshwantshetso e e neng ya thaiwa ke bakaulengwe le bokgaitsadi ba ba ikanyegang, ba ba neng ba intsha setlhabelo ba bogologolo jwa tshimologo ya lekgolo leno la dingwaga.”

Seno se ne sa latelwa ke go botsolotswa ga banna le basadi ba ba ikanyegang ba le 11 bao dingwaga tsa bone tsotlhe tsa go ineela mo tirelong fa di kopanngwa di neng di le 680. Ba ne ba bolela ka dikopano tsa ntiha-ntiha mo New Zealand, tsa 1913. Ba ne ba gakologelwa ka dikgwetlho tsa go bulatsela mo South Island ka bo-1930, mathata a dingwaga tsa Ntwa ya Lefatshe II fa phuthego e ne e thibetswe, go tlhomiwa ga lekala la New Zealand ka 1947, go goroga ga barongwa ba ntlha ba Gilead, le go agiwa ga Holo ya Bogosi ya ntlha mo nageng eo ka 1950. Boikutlo jwa bao ba neng ba botsolotswa e ne e le: “Abo re leboga jang ne go bo re le fano le go iponela ka matlho tshupo ya koketsego eo, mo metlheng ya pele, re ka bong re ne ra seka ra bona e ka kgonega!

Tshegofatso ya ga Jehofa

Gongwe selo se segolo se se neng sa dira gore letsatsi leo le seka la lebalesega e ne e le go lemoga gore tshegofatso ya ga Jehofa e ne e kaetse tiro ya kago eo go fitlhelela e be e wediwa. Ka tshwanelo, karolo e nngwe ya thulaganyo ya letsatsi leo e ne e na le setlhogo se se reng: “Seatla se se Molemo sa Modimo wa Rona se Ntse mo go Rona.”​—Nehemia 2:8.

Seatla se se molemo sa ga Jehofa se ne sa bonwa mo thusong le mo tirisanong-mmogo ya borakgwebo ba lefelo leo le balaodi, gammogo le mo dinonofong tsa Bokeresete tseo di neng di bontshiwa ke badiri ka bobone mo lefelong leo la kago. Ra-kgwebo mongwe, yo o neng a etetse lefelo la kago, o ne a tlhokomedisa jaana: “Ga ke ise ke ko ke ikutlwe ke na le boikutlo jwa kagiso le thethebalo gope go feta jaaka ke ikutlwa ke na najo fa ke le mono.”

Tshegofatso ya ga Jehofa e ne ya bonwa mo bopelotshweung jwa Basupi ba ba sa humang mo go kalo ba naga eo yotlhe bao ba neng ba thusa mo tirong eo ka madi. Gape e ne ya lemotshega mo go direng ka go rata ga bao ba neng ba itere ka bobone go tla go dira tiro eo. Botlhe bao ba neng ba ikopela go tla go dira tiro ya boithaopo, ba ne ba le 1 237. bangwe ba ya kwa lefelong la kago ba tswa mafatsheng a a kgakala ka ditshenyegelo tsa bone go ya go nna dibeke di sekae kana dikgwedi ba thusa mo tirong ya kago. Mongwe wa bakaulengwe o ne a re: “Go thusa kwa lefelong la kago e ne ya nna phetogo e kgolo mo botshelong jwa me.”

Jaaka Mokaulengwe Barr a ne a umaka mo puong ya kgakolo, didirisiwa tse disha tsa lekala di tshwanetse go tsewa jaaka “bosupi jo bo bonalang sentle, jo bo utlwalang jwa Bogosi jwa Modimo jwa Bomesia joo jaanong bo tlhomilweng.” Ee, ruri e ne e le letsatsi le le sa lebalesegeng mo New Zealand. Kwa bokhutlong, bareetsi botlhe ba ne ba arabela go tswa pelong tshwetsong e e neng e tlhomamisa “go tshegetsa phuthego ya ga Jehofa ka botlalo jaaka go emelwa ke lekala la rona.”