Keresemose—Motlha wa Meletlo ya Ba-Botlhabatsatsi
DITLHARE tse dikgolo tsa Keresemose, dipone tse di phatsimang, dikhai tse di mebalabaladi bonwa mo lefelong lengwe le lengwe la borekisetso le mo mabenkeleng a magolo. Digodisa-mantswe di galabetlega ka dipina tse di itsegeng tsa Keresemose, mme dikitsiso di kgothaletsa batho go reka thata. Banna le basadi ba ba apereng diaparo tsa Santa Claus ba tsamaya-tsamaya mo mibileng ba aba dimpho tsa go oka bareki. A ponalo e e mo lefatsheng la “Bokeresete”? Nnyaa, mo ke mo Japane, kwa e leng gore batho ba ba kwa tlase ga bongwe mo lekgolong ba iphaka go nna Bakeresete.
Ka mo go tshwanang, mo setlhake-tlhakeng se se fa gaufi sa Taiwan, “Bakeresete” le ba e seng Bakeresete ba keteka Keresemose ka ngwao ya bone ya go aba dimpho. Mme mo merafeng ya Se-China mo Malaysia, dikirikete di oketsa bogolo jwa meletlo ya letsatsi la boikhutso la “Bokeresete.”
Ke eng fa batho bano ba keteka Keresemose? A ba dumela mo Keresemoseng? Kana mo meletlong ya Keresemose? Bosupi bo bontsha gore “o je, o nwe, o bo o itumele” ke sone se se ba gogelang mo diketekong tsa Keresemose. Ba le bantsi ba dirisa “Bokeresete” ka December 24 le 25 mme ka letsatsi le le latelang—ba boela kwa mekgweng ya bone—Bobuda, Boshinto, Botao, kana sengwe fela. Lefa go le jalo, batho ba bodumedi jo bo nang le metheo e e farologaneng jono ba ka tsenelela jang mo letsatsing la boikhutso la “Bokeresete”?
Fa mosimanyana mongwe mo Japane a ne a bodiwa gore a o ne a dumela mo go Santa Claus, o ne a araba ka gore, ‘ke dumela mo go Santa ka gore o mphile ditshamekisi di le dintsi.’ Karabo ya gagwe e supa kakanyo ya bontsi mo Botlhabatsatsi ya gore: ‘Bula pelo ya gago. O seka wa gana bodumedi gotlhelele. Fa o ka boelwa ke sengwe mo go jona, bo itumelele. Mme o bo beye mo lefelong la jona gore bo seka jwa ama dilo tse dingwe tsa botlhokwa mo botshelong jwa gago.’
Mokgwa o o ntseng jaana wa go akanya o bonala sentle mo patlisisong e e neng ya dirwa ke koranta nngwe e kgolo ya Japane. Nngwe ya dipotso tse di neng tsa bodiwa e ne e le gore: “Mo Janane, go tlwaelesegile gore motho a le mongwe a tseye karolo mo ditirafalong tse di farologaneng tsa bodumedi jaaka omiyamairi [e leng tirafalo ya Boshinto ya go keteka go gola ga bana], ohigan [tirelo ya bogare jwa ngwaga ya Sebuda ya go gopola baswi], le Keresemose. A o gopola gore mo ga go a siama?” Ke 19 mo lekgolong fela e e neng ya araba ka gore “ga go a siama.” Le e leng gareng ga bao ba iphakang go nna Bakeresete, 60 mo lekgolong ba ne ba ikutlwa gore go ne go sena molato ope mo go ketekeng meletlo ya bodumedi jo bo farologaneng.
Go akanya mo go ntseng jaana go felela ka tirafalo ya bodumedi e e sa tlwaelesegang—ba le bantsi ba iphaka go nna balatedi ba bodumedi jo bo fetang bongwe. Go ya ka Lekala la tsa Ngwao, palo-kakaretso ya balatedi ba ditlhopha tsa bodumedi mo Japane e ne e le 207 080 000 kwa bokhutlong jwa 1982, lefa gone batho ba Japane ba ne ba fopholediwa go nna 118 600 000 fela ka 1982. Mo go rayang gore palo-kakaretso ya maloko a bodumedi mo Japane e ne ya tsholetsegela kwa go 170 mo lekgolong ya palo-kakaretso ya batho!
“Ga go ka ke ga nna jalo!” batho ba ba dumelang mo modimong o le mongwe fela ba ka nna ba rialo. Mme mogopolo o o tshwanang wa go tlhakanela mo bodumeding jo bo farologaneng o teng le mo tseleng ya Bophirima ya go keteka Keresemose. Mo go ne go ka nna jang? Mme fa e le gore go ntse jalo, a o tshwanetse go keteka Keresemose?
[Setshwantsho mo go tsebe 3]
Palo-kakaretso ya maloko a budumedi mo Japane: 207 080 000
Palo-kakaretso ya batho ba Japane: 118 600 000