Go Lemoga Dikgang

Go Bolela Mafoko a a Molemo Ka Thelebishene​—A ke Tsela ya Modimo?

Fa Jesu Keresete a ne a le mo lefatsheng gompieno “o ne a tla tshwanelwa ke gore a nne mo thelebisheneng,” go ne ga bolela jalo moefangedi mong wa thelebishene ebong Jim Bakker. Thelebishene ka ntlha yang? Ka gonne, go ya ka Bakker, “eo e ne e tla nna yone fela tsela eo a neng a tla fitlhelela batho bao a ba ratang ka yone.” Jaaka Bakker, palo e e golang ya bareri bao ba otlelelang gore Bibela e tlhalosiwe fela jaaka e ntse kwa United States ba ikutlwa gore thelebishene ke motswedi wa dikgang o o botoka go gaisa wa go anamisa Lefoko la Modimo. Lefa go ntse jalo, patlisiso ya 1984 e bontshitse gore, gantsi, baefangedi ba thelebishene ba “nonotsha batho bao ba setseng ba ineetse mo bodumeding jwa efangedi.”

Se se kgatlhisang ke gore mo lekwalong leo le yang go mokwadi wa makasine wa Ministry, mmadi mongwe o kwadile jaana: “Lo boletse gore [dithelebishene] ke didirisiwa tsa kereke tse di maatla go gaisa tsa go jala efangedi, mme lefa go ntse jalo Modimo o bolela gore tiro e e botlhokwa go gaisa ke ya go eta ka ntlo le ntlo​—go tsoma mewa. . . . Mmoloki wa rona o ne a rata go tswa mo matshwititshwiting, A bo a ya ka tlo le ntlo-a tsoma mewa. O ne a ipelela moya wa moreetsi a le mongwe. . . . A re ka dira ka mo go tshwanang?”

Go ya ka Jesu Keresete, boikaelelo jwa bodihedi jwa Bokeresete e ne e se go ‘anamisa Lefoko’ fela mme e ne e le go “diha barutwa” (Mathaio 28:19, 20) O ne a laela balatedi ba gagwe gore ba ye kwa magaeng a batho (Mathaio 10:7, 11-13) Moaposetoloi Paulo o ne a amogela mokgwa ono wa go rera a bo a bolela jaana malebana le bodihedi jwa gagwe: “Kaha ke se kañ ka boiha ka gōna go lo bolèlèla señwe le señwe se se molemō, ke ruta mo ponoñ, le ka go nna ke tsamaea le matlo.” Bodihedi jwa ka ntlo le ntlo jwa motho ka namana jwa barutwa bo ne jwa ungwa maungo a a molemo.​—Ditihō 5:42; 20:20.

Fa Jesu a ne a otlelela mokgwa ono wa go rera thata jaana e le gore go dirwe barutwa, ke ka ntlhayang fa baefangedi ba le bantsi ba rata thelebishene jaaka motswedi wa bone wa dikgang? The Courier-Mail ya Brisbane, Australia, e bolela gore baefangedi ba thelebishene ba “dira dimilione tse di fitlhang go R120 ka ngwaga ba rekisa poloko. Ba tlhagelela ba tsenwe ke moya wa maatla le kgalalelo mo diteisheneng tsa thelebishene di le 300, mme ba obamelwa jaaka medimo ya disetwa. . . . Ka maano a bone otlhe, banna bano bao ba iphakang gore ebile ba laola le Modimo ka matsetseleko, kwa bofelong ba felela ba dira kgwebo ka tlhamalalo. Wena ba romelele R15 fela mme ba tla go romela legodimong.”

Boeteledipele jo bo Senang Tumelo

Jesu Keresete o boletse jaana: “Ke nna cogō le botshelō.” (Yohane 11:25) Lefa go ntse jalo, “borathuta-bomodimo ba le bantsi ba Katoliki bao eleng badirammogo kwa diunibesithing le kwa dikolong tsa baruti ga ba kake ba bolela gore ba dumela mo tsogong ya baswi, kana gore bobotlana ba e tsaya fela jaaka e ntse,” go bega jalo makasine wa dikgang wa Insight.

Ma-Roma Katoliki bao ba eletsang go latela dithuto tsa Bibela ka bopelo-e-phepa ba ka dira jang gore tumelo ya bone e nonotshiwe ke barutisi ba ba ntseng jalo? Ga ba kake, ka gonne moaposetoloi Paulo o kwadile jaana: “Me ha go sena cogō ea bashwi, le èna Keresete ga aa cosiwa: Me ha Keresete a sa cosiwa, hoñ thèrō ea rona ke lehèla; tumèlō ea lona le eōna ke lehèla.”​—1 Bakorintha 15:13, 14.

Koo Kagiso e Seong Gone

Ka October 24, 1985, Lekoko Kakaretso la Merafe e e Kopaneng le ile la bolela 1986 gore ke Ngwaga wa Boditšhabatshaba wa Kagiso. Maikano ao a ne a bolela gore ngwaga oo o ne o tla “dirisediwa go lebisa maiteko a Merafe e e Kopaneng le a Dinaga tse eleng Maloko a yone mo go godiseng le mo go fitlheleleng seo se batliwang ke kagiso ka bojotlhe ka mo go ka kgonagalang ka gone.” Ba ne ba solofetse go fitlhelela seno jang? Ka “kgato e e tswelang pele le e e tlhomameng ya Dinaga le batho di ikaeletswe go thibela ntwa.”

Jaanong ereka re atamela bokhutlo jwa ngwaga wa “Kagiso,” ke eng seo re se bonang? Maikaelelo a a molemo ao a ile a hubisiwa ka mo go gakgamatsang ke dintwa tsa sesole tseo di fagelang pele lefatshe ka bophara. “Botsuolodi jwa majelathoko kgatlhanong le puso, go ngangisanela dinaga, diphapaano tsa megopolo le tsa lotso le dintwa tse di ‘boitshepo’ di tlatseletsa bobotlana mo dintweng tse dikgolo di le 19, le tse dipotlana di le dintsi,” go begile jalo The West Australian. Setlhogwana sa lekwalo-dikgang leo se ile sa tlhalosa gore mo e ka nnang masole a le milione o le mongwe ga jaanong a nna le seabe mo ntweng e e tlhometseng ka dibetsa lefatshe ka bophara. Ka phepafalo, mo dimilioneng tseo di fetogang batswasetlhabelo ba dintwa tse di ntseng jalo, ga go na kagiso.

A baeteledipele ba batho ba ka solofela tharabololo ya mmatota ka dikitsiso tsa phatlalatsa tsa mo isagweng tse di ikuelang malebana le kagiso? Nnyaa, ka gonne Yeremia 10:23 e bolela jaana: “Yehofa, kea itse ha tsela ea motho e se mo go èna ka esi: ga goeō mo mothuñ eo o tsamaeañ ka dinaō go siamisa dikgatō tsa gagwè.” (Bapisa Yeremia 6:14.) Eleruri, kagiso ya boammaaruri e tla tswa kwa Modimong fela.