Dipotso tse di Tswang Go Babadi
◼ A Mokeresete yo o solofetseng go tshela mo lefatsheng o ka kaiwa e le mongwe wa ba “boidiidi yo bogolo” gone jaanong fa re tsaya lebaka la gore ga a ise a falole “sepitla se segolo”?—Tshenolō 7:9, 14.
Ee, seno se tshwanetse ka ntlha ya ditebelelo tsa gagwe.
Tshenolō kgaolo 7 e umaka ditlhopha tse pedi. Sa ntlha ba ba 144 000 ba “locō loñwe le loñwe loa bana ba Iseraela.” (Tshenolō 7:4) Fa re bapisa seno le Tshenolō 14:1-5 go supega gore ba ba 144 000 ba tswa “go rèkwa mo lehatshiñ,” go nna “mabucwèla pele a Modimo.” Ka gone, bano ke ba ba tla busang kwa legodimong le Keresete. (Bagalatia 6:16; 2 Timotheo 4:18) Setlhopha sa bobedi ke “boidiidi yo bogolo yoa batho, yo go señ motho opè eo o ka bo balañ,” “ba ba cwañ mo pitlaganoñ e kgolo.”
Mo tlhalosong ya yone, Tshenolō 7:9-17 e bua ka bafalodi ba ba mo lefatsheng ba Sepitla se se tlang. Jalo mongwe yo o ka batlang go ntsha tlhaloso e e gagametseng o ka nna a dirisetsa lereo “boidiidi yo bogolo” mo bathong bao ba falolang sepitla seo. A mme go a tlhokafala go gagamatsa jalo? Ga re dumele jalo. Ka phepafalo, ba ba tla falolang e tshwanetse ya bo e le ba ba phuthilweng pele ga “sepitla se segolo” gore ba tle ba tshwanelegele phalolo. Ka gone re ile ra dirisa lereo “boidiidi yo bogolo” mo Bakereseteng ba ba ikanyegang bao ka nako eno ba direlang Jehofa Modimo ka tebelelo ya go falola le go ‘gogelwa kwa metsweding ya metsi a botshelo, mo lefatsheng ga bone. (Tshenolō 7:17) Fa mongwe wa ba “boidiidi yo bogolo” a ka swa gone jaanong, pele fela ga “sepitla se segolo,” go utlwala sentlentle gore re ka solofela gore o tla tsosediwa botshelong mo lefatsheng.
Dintlha tse di tshwanang di ka bolelwa kaga lereo “dinku di sele.” Go Yohane 10:7-16, Jesu o ne a bua lantlha kaga “dinku“ tsa gagwe, bao re tlhaloganyang gore ke ba “lecomanyane” ba ba yang kwa botshelong jwa selegodimo. Go tswa foo Jesu o ne a re: “Ke bile ke na le dinku di sele, tse e señ tsa saka ye [la selegodimo]; le cōna ke na le go di lere, me di tla utlwa lencwe ya me; me di tla nna lecomane le le leñwe hèla, le modisa a le moñwe hèla.” Re nnile ra neelana ka bosupi jwa kafa Dikwalong jo bo kgethololang “dinku di sele” gore ke bao ba nang le tebelelo ya go tshela mo lefatsheng.—Luke 12:32.
Mongwe o ka nna a akanya ka gore: Jesu o ne a lebisitse mo go phuthiweng ga isagwe ga “dinku di sele,” jalo he lereo le dira fela mo go bao, morago ga fa Jesu a sena go bua, ba tla amogelang tsholofelo ya Bibela ya botshelo jo bo sa khutleng mo lefatsheng. Lefa go ntse jalo, go bonala go sa tlhokafale go tsaya gore lereo leo le raya tatelano, jaaka ekete Jesu o ne a tlhalosa dikgang go ya kafa tlhatlhamanong ya metlha kana ka tlhomagano. Re dumela gore o ne a otlelela gore o ne a le modisa wa dinku tse di kopaneng. Batho bangwe ba seka-dinku ba tsena mo lesakeng gore ba ye legodimong. Go na le dinku tse dingwe gape tse di tla mo amogelang jaaka modisa; bano ba tla nna kutlwanong le ba ba umakilweng pele. Go ya kafa ponong eno, lereo “dinku di sele” le akareletsa batho ba tumelo ba ba neng ba swa pele ga ga Jesu a ka simolodisa tsela ya go ya legodimong, jaaka Noa, Aberahame, Jobe, Dafide, le Johane Mokolobetsi. (Mathaio 11:11; Ditihō 2:29; Bahebera 10:19, 20) Fa bano ba tsosediwa mo tsamaisong e ntšha ya dilo, ba ka amogela Modisa yo o Molemo mme ba nne le tebelelo ya botshelo jo bo sa khutleng mo lefatsheng le “dinku di sele” tsa ga Jesu.