Go Botswa Kaga Go Itima Dijo

GO SETSE go fetile mo e ka nnang ngwaga fa e sale Jesu a nnile gone kwa Tlolaganyong ya 30 C.E. Ka nako eno, Johane Mokolobetsi o setse a tshwerwe dikgwedi di le mmalwa. Lemororo a ne a batla gore barutwa ba gagwe ba nne balatedi ba ga Keresete, ga se botlhe ba ba nnileng bone.

Jaanong bangwe ba barutwa bano ba ga Johane yo o shwerweng ba tla mo go Jesu mme ba botsa jaana: “Ana rona le Bafarasai re tle re ikiletseñ go ya gantsi, me barutwa ba gago ga ba ikitse go ya?” Bafarasai ba itima dijo gabedi ka beke jaaka mokgwa wa bodumedi jwa bone. Mme gongwe barutwa ba ga Johane ba latela mokgwa o o tshwanang. Gape go ka diragala gore ba itima dijo go hutsafalela go tshwarwa ga ga Johane mme ba ipotsa gore ke ka ntlhayang fa barutwa ba ga Jesu ba sa kopanele le bone mo go hutsafaleng gono.

Jesu o tlhalosa jaana fa a ba araba: “A bagwè ba ka lela ha monyadi a santse a na nabō? me metlha e tla tla e monyadi o tla tlosiwañ mo go bōnè ka eōna, me ke gōna ba tla ikitsañ go ya.”

Barutwa ba ga Johane ba tshwanetse go gakologelwa gore Johane ka boene o ne a bua ka Jesu jaaka Monyadi. Jalo, fa Jesu a ne a ntse a le gone, Johane o ne a ka seka a go bona go tshwanetse go itima dijo, le barutwa ba ga Jesu ga ba dire jalo. Mme fa a tsosiwa le go tlhatlogela kwa legodimong, ga ba na lebaka le lengwe la go itima dijo ka khutsafalo.

Morago ga moo, Jesu o bolela ditshwantsho tseno: “Ga go opè eo o bitielañ seaparō se se onetseñ ka sebata se se kweletlanyeñ, se le magwata; gonne se se kaboñ se se bitièla, se tla se garola, me kgagogō ea galè e keketsège. Le gōna batho ga ba ke ba thèla boyalwa yo bosha yoa mofine mo mehaloñ e mesha.” Ditshwantsho tseno di amana jang le go itima dijo?

Jesu o ne a thusa barutwa ba ga Johane go lemoga gore ga go ope yo o tshwanetseng go lebelela gore balatedi ba gagwe ba dumalane le mekgwa ya bogologolo ya Bajuda, e e jaaka mokgwa wa go itima dijo. O ne a sa tla go bitiela le go oketsa ditsamaiso tsa bogologolo tse di senyegileng tsa kobamelo tseo di neng di setse di emetse go latlhwa. Bokeresete bo ne bo ka se dirwe gore bo dumalane le Bojuda jwa metlha eo le dingwao tsa jone tsa batho. Nnya, bo ne bo ka se nne jaaka sebata se sesha mo seaparong sa bogologolo kana jaaka bojalwa jo bosha mo makukeng a bogologolo. Mathaio 9:14-17; Mareko 2:18-22; Luke 5:33-39; Yohane 3:27-29.

◆ Ke bomang bao ba neng ba itima dijo, mme ka boikaelelo bofe?

◆ Ke ka ntlhayang fa barutwa ba ga Jesu ba ne ba sa itime dijo fa a ne a na le bone, mme morago ga moo lebaka la go itima dijo le ne la nyelela ka bonako jang?

◆ Ke ditshwantsho dife tseo Jesu a neng a di bolela, mme di rayang?

[Setshwantsho se se tletseng mo go tsebe 8]