Tshenolo Ke Eng?

“TSHENOLO!” Ke eng se o se akanyang fa o utlwa ka tlhaloso eo? A ke letsatsi la katlholo? Matlhotlhapelo? Ntwa ya Lefatshe III? Bokhutlo jwa lefatshe? Fa o nna le dipono tseno mo mogopolong, ga o nosi mo ntlheng eo. Boitseanape le metswedi ya dikgang di supa fa isagwe ya motho e le e e letobo. Jalo a ke mo go gakgamatsang go bo ba le bantsi ba golaganya tshenolo le go nyelela ga batho mo tiragalong nngwe e e kotsi?

“Tshenolo gompieno ga se fela selo se se tlhalosiwang ke Bibela mme e ile ya nna kgonego ya mmannete,” ga tlhalosa Mokwaledi-Mogolo wa UN ebong Javier Pérez de Cuéllar mo puong ya gagwe fa a tlhongwa mo maemong. “Ga go ise go ko go diragale lefa e le leng pele mo boitemogelong jwa motho go bo re le fa gare ga kudumedi le phalolo.” O ne a lebisitse go eng? E ne e le go thulano ya nuklea e e nnang gone ka ntlha ya go gakala ga kgaisano ya dibetsa ya jaanong. Fa a ne a tiisetsa tlhagiso ya gagwe go Merafe e e Kopaneng, o ne tlhalosa gore “Baitseanape bangwe ba ka nna 500 000 mo lefatsheng lotlhe ba ntse ba dirisa kitso ya bone ka botlalo mo patlisisong ya dibetsa tse di tlhabologileng thata di bile di le diphatsa.”

Ba bangwe le bone, ba lemoga seemo sa gompieno. Hans Jonas, yo pele e neng e le moporofesa wa botlhalefimo New School for Social Research, o bolela gore se a se boifang thata ke “tshenolo eo e tshosetsang go tswa maatleng a a sa laolweng a tlhabologo ya boranyane.” O golaganya tshenolo le ‘nyelelo, kgotlelo, tshwafalo ya polanete, gammogo le matshosetsi a tshenyego ya tshoganyetso ka bomo ya atomo.’

Ka mo go tshwanang, raditiragalo ebong Golo Mann o anetse jaana: “Ga re kake ra nna le ntwa e nngwe gape ya lefatshe. Ntwa ke lefoko le le fosagetseng. Re tshwanetse go phimola lereo ‘Ntwa ya Lefatshe III’ mme mo boemong jwa lone re re tshenolo kana go lailwa.”​—Die Zeit ya Hamburg, August 30, 1985.

Ee, motho o lemoga gore o gaufi thata le go ka itshenya. A mme o tla simolola tshenolo? E seng go ya kafa Bibeleng, eo e tlhalosang gore “[Jehofa] Modimo, Mothataeotlhe”​—e seng motho—​ke ene yo ‘o tla senyang ba ba senyang lefatshe.’ (Tshenolō 11:17, 18) Ka gone, go tlhaloganya seo tshenolo e leng sone go ya kafa ponong ya Bibela go tla go neela pono e e farologanyeng, e le e ntšha ka mo go feletseng le go galalela.

Seo Tota E Leng Sone

Tshenolo e tlhalosiwa mo lekwalong lwa Bathesalonia. Koo moaposetoloi Paulo o tlhalosa a re: “[Ke] mo go siameñ mo Modimoñ go lehetsa pitlaganyo ea ba ba lo pitlaganyañ, Le go naea lona ba lo pitlagañwañ tapologō le rona, mo motlheñ oa tshenolō ea Morèna Yesu ha a cwa legodimoñ, a na le baengele ba thata ea gagwè, a tla A le mo moleloñ o o tutumañ, a itehetsa mo go ba ba sa itseñ Modimo, le mo go ba ba sa ineeleñ go utlwa Mahoko a a Molemō a Morèna oa rona Yesu: E le ba ba tla utlwañ thupa, eboñ tshenyègō e e sa khutleñ.”​—2 Bathesalonia 1:6-10.

Ka gone, tshenolo, ke go senoga ga ga Jesu mo lobakeng lwa “sepitla se segolo.” (Mathaio 24:21) Go ya ka An Expository Dictionary of New Testament Words, ka W. E. Vine, lefoko la Segerika ebong a·po·kaʹly·psis (tshenolo) le lebisa go “Morena Jesu Keresete fa A tla go diragatsa dikatlholo tsa Modimo.” Golo gongwe gape, Bibela e lebisa tshenolong eno, jaaka ‘ntwa ya letsatsi je legolo ja Modimo Mothatayotlhe’ ka Hara-Magedona.​—Tshenolō 16:14, 16; 19:11-21.a

Ke boammaaruri, mabapi le tshenolo, re ile ra bona gore Bibela e bua ka ‘pitlagano,’ ‘tehetso,’ le “thupa.” Lefa go le jalo, e bua gape le ka “tapologō” mo go ba ba senang molato ba ba bogileng ka ntlha ya pitlagano. Lefoko la Modimo le re solofetsa gore “e tla re kwa pelenyana, moikepi a bo a sa tlhole a le gōna.” (Pesalema 37:10) Jalo tshenolo e tla golola setho mo ditlhotlheletsong tse di boikepo. E tla bo e le boemo joo batho ba ba pelo di ikanyegang ba tla bong ba fetogela maemong a a botoka​—e seng tiragalo ya gore ba e boife.

Ka gone, go na le gore e bo e le go nyelediwa ga batho botlhe, kana phediso, tshenolo e tla bo e le tharabololo e e tshiamo mo mathateng a batho. A mogopolo wa go tshela mo motlheng o mosha​—motlha wa tshiamo, kagiso, le boiketlo​—ga o ikuele go wena le go lelapa la gago?

A mme re atamela tshenolo ya Bibela? Fa go ntse jalo, a go na le tsela eo re ka itseng nako ya yone tota tota?

[Ntlha e e kwa tlase]