Leitlho la ga Jehofa “Le Ne le le Mo Bagolwaneñ”

BAGOLWANE gompieno ke gantsi ba nang le go dira diphetso tseo di bonalang di feta selekanyo sa bone sa kitso le boitemogelo. Lefa go ntse jalo, akanyetsa boemo bongwe jo bo neng bo lebanye le bagolwane ba Bajuda mo motlheng wa ga Esere.

Morago ga go boa ga masalela a Bajuda mo Babelona, go ne ga feta lobaka lwa dingwaga di le 16 go sa dirwe sepe. Bomoperofeti Hagai le Sekaria ba ne ba kgona go tlhagafatsa Bajuda mo tlhokomologong ya bone, mme tiro ya go aga tempele seshae ne ya simololwa. Lefa go ntse jalo, ka bonakonyana, tiro eno e ne ya gwetlhiwa ke basimegi ba Bapersia. “Eman eo o lo neileñ taolō ea go aga ntlo e?” ga botsa baganetsi.​—Esere 5:1-3.

Go araba potso eno go ne go le masisi. Fa bagolwane ba ka bo ba iteseleditse go boifisiwa, tsosoloso ya tempele e ne e tla ema ka bofefo. Fa bagolwane ba ka bo ba gakaditse basimegi bano, thibelo e e bofefo mo tirong e ne e ka dirwa. Jalo bagolwane (kwantle ga pelaelo ba eteletswe pele ke Molaodi Serubabele le Moperisiti yo mogolo Joshua) ba ne ba ntsha karabo e e bonolo mme e le e e nang le maduo. Ba ne ba gakolola basimegi kaga taolo e e neng e sale e lebetswe bogologolo ya ga Kuruse yo a neng a neetse Bajuda tumelelo ya segosi go tswelela pele ka tiro eno. Ka go itse tsamaiso ya Seperesia ya go sa fetole molao o o tlhomilweng, basimegi bano ka botlhale ba lemoga gore ba tshwanetse go tila go ganetsa taolo eno ya segosi. Ka gone tiro e ne ya dumelelwa go tswelela pele go fitlhelela Dario moragonyana a rebola gore go ka tswelelwa pele!​—Esere 5:11-17; 6:6-12.

A phelelo eno e e molemo-lemo e ne e le ka ntlha ya botlhale jwa batho? Phapaanong le seo, polelo ya ga Esere e bolela gore “leitlhō ya Modimo oa bōnè le ne le le mo bagolwaneñ ba Bayuda.” (Esere 5:5) Ka mo go phepafetseng, Jehofa o ne a dira gore go nne karabo eo le karabelo e e molemo go tswa kgosing ya Peresia. Bagolwane ba Bakeresete gompieno ka mo go tshwanang ba ka leba kaelo go Jehofa le kgogo fa ba lebane le diphetso tse di bokete kana ba dirisana le baganetsi. Jehofa o tlhomamisetsa jaana go Pesalema 32:8: “Ke tla gu laea ke gu ruta tsela e u tla tsamaeañ ka eōna; ke tla gu gakolola leitlhō ya me le nntse le le mo go wèna.”