Letsogo la Ga Jehofa Le Nnile le Rona

Jaaka go boletse Simon Kraker

“RRE, ke tsela efe ya botshelo e ke tshwanetseng go e latela?”

“Mme kana, Simon, akanyetsa kgang eno ka kelotlhoko ka go bo ke ka se go direle phetso.”

“Ee, Rre, mme ka maitemogelo a gago o ka itse botoka!”

“Ee gongwe, Simon. Go na le mafelo a le mantsi go a akanyetsa, mme go bonala otlhe e le a a kgatlhisang, mme ke lefe le le ka go itumedisang thata?”

“Go siame, he, Rre. Ke akantse ka mmino, balete, acrobatics, bongaka jwa kalafi, le boruti. Ke kgatlhegela nngwe le nngwe ya tsone.”

Jaanong, wena o ka bo o ile wa tlhopha eng? Ke tsela efe e o ka bong o ile wa e tsamaya? Moragorago kwa masimologong a bo-1920, sengwe se ne sa diragala mo lelapeng la ga etsho seo se neng sa ikarabela mo go tlhopheng tsela ya me ya botshelo. Mma ke lo lotlegeleng ka sone.

Batsadi ba me, ebong Mary le Joseph, ba tsaletswe mo Austria boo-babedi, mme ba ne ba kopana le go nyalana mo United States. Pele ga ba fudugela mo United States, Rre o ne a ile a tsamaya thata go ralala Yuropa jaaka moletsi yo o sethakga wa terompeta. Ka gone, o ne a tlhomamisa gore rona rotlhe bana ba gagwe ba ba herang bobedi re seka ra nna le thutego fela ya dikwalo mme gape re nne le ya mmino. Ke ne ka thusa ka go letsa bayolene mo kwaereng ya lelapa la ga etsho.

Jaaka Maroma Katoliki, Mmè le Rre ba ne ba batla gore rotlhe re nne le kgodiso e e molemo ya sedumedi. Ke gakologelwa Bibela ya Roma Katoliki eo re neng re na nayo mo tlung. E ne e le kgolo, mme e tshwantshitswe setshwantsho sa sefapaano ka gouta mo khabareng ya yone e kima, mme e kwadilwe ka mokwalo wa Sejeremane sa bogologolo. Ke ne ke tlwaelanye nayo thata mo ke neng ka tsaya Bibela ka masisi jaaka Lefoko la Modimo.

Masimologong a bo-1920, go ne go abiwa dipampitshana tsa mahala tsa Bibela ke bodumedi jo bongwe fa pele ga Kereke ya rona ya Tharo-nngwe e e Boitshepo mo motseng wa Cleveland, mo Ohio. Rotlhe re ne re tsamaya ka tsone go ya kwa gae mme re fete re di tlhatlhobise ka Bibela ya rona. Di ne di gatisiwa ke Baithuti ba Bibela, jaaka Basupi ba ga Jehofa ba ne ba itsiwe ka nako eo. Pampitshana nngwe eo ke e gakologelwang segolo ka go bo e ile ya itumedisa Mmè e ne e le ka setlhogo sa boemo jwa baswi. O ne a ile a latlhegelwa ke bomorwawe ba babedi ba sa le masea. Go tswa pampitshaneng eno, o ne a ithuta gore ba ne e se gore baa tshela mo moleteng kana gore baa boga mo pakatoring kana mo diheleng mme ba ne ba sa itse sepe mo lebitleng, ba letetse tsogo fela. (Moreri 9:5, 10; Yohane 11:24, 25) Abo seo se ile sa lere kgomotso jang ne e seng fela go Mmè mme go rona rotlhe!

Go Itlhophela

Boammaaruri jwa Dikwalo bo ne bo ntse bo phepafala sentle jaaka fa Baithuti ba Bibela (Bibelforscher) ba ba buang Sejeremane ba etela legae la rona. Fa re ntse re amogela kitso e e oketsegileng ya Bibela, re ne ra iphitlhela re katogela kgakala le tlholego ya rona ya Katoliki. Seno se ne sa ntebanya le nkodiaboga. Fa ke tsalwa ke ne ke bidiwa Simon, Petere fa ke sena go kolobediwa, mme Josefa fa ke sena go tlhomamisiwa. Ke ne ke thusa mo aletareng, ke ithutile dithapelo ka Selatine le Mmisa, mme ke ile ka dira ditiro tse di farologaneng tsa sedumedi. Batsadi ba me ba ne ba solofetse gore ke ka nna ka fetoga moruti, mme boikemisetso jwa me e ne e le go arola thata thata mo botshelong jwa sedumedi.

Lefa go ntse jalo, ke ne ke ntse ke ipona ke felelwa ke kgatlhego mo ditsholofetsong tsa me tsa pele tsa tsela ya botshelo. E ne e sa tlhole jaanong e le kgang ya gore ke ka tlosa batho bodutu jang, go nna motshameki wa jimenase yo o tumileng, kana go ithuta bongaka jwa kalafi. Go na le moo, ke ne ke ka dirang go thusa ba bangwe kafa semoyeng? Ke ne ke sa tlhole ke bona fa go nna moruti wa Roma Katoliki e le yone karabo ya me.

Kgatlhego ya batsadi ba me le ditiro di ne tsa leba mo ‘mafokong a a molemo a Bogosi jwa Modimo’ jaaka fa a ne a bolelwa ke Baithuti ba Bibela, mme le nna ga nna jalo. (Mathaio 24:14) Ka 1924 Mmè le Rre ba ne ba simolola go rera “Mahoko a a Molemō” ka ntlo le ntlo, mme ke ne ke tsamaya le bone. Dingwaga tse pedi moragonyana, fa ke ne ke le dingwaga tse 12, Rre a lemoga gore ke ne ke ka rera ke le nosi. Jalo a mpha Bibela e potlana gore ke e dirise mo tirong ya me ya boefangedi. Pele ga ke digela sekolo se segolwane ka 1929, ke ne ka dira phetso ya gore ke ineele go Modimo.

Dikgatelo-pele Tsa Bolegodimo

Fa ke leba kwa morago mo dingwageng tse 60 tse di fetileng fa e sale lelapa la ga etsho le simolola go arola mo go rereng ka Bogosi, ke lemoga gore re ile ra kgabaganya dikgatelopele di le dintsi fa re ntse re tsamaela kwa pele le phuthego e e bonalang ya Modimo. Ka sekai, ka 1925 The Watch Tower e ne ya gatisa setlhogo se se reng “Birth of the Nation.” Ke ne ka itumelela go itse gore Jehofa o phutha batho ba ba pelontle go tswa merafeng yotlhe go nna batho ba gagwe. Ntlha eo ya Dikwalo e ne ya nkgatlha tota tota! Ka baka lang? Ka go bo ka nako eo, mo tikologong ya rona, letlhoo kgatlhanong le Bajuda le bantsho le ne le nonofile. Mme morafe wa Modimo o gololesegile mo dilong tsotlhe tse di kgaoganyang​—tsa lotso, sepolotiki, papadi, sesole, le makoko. (Ditihō 10:34, 35) Abo go ne go itumedisa jang ne go bala kaga tlhaloso ya boperofeti jwa ga Isaia kgaolo 66 le go bona tiragatso ya yone mo motlheng wa me!

Kopano ya 1928, mo Detroit, Michigan, e ne e le kgatelo-pele e nngwe gape ya bolegodimo mo lelapeng la ga etsho. Seo se ne se ntse jalo ka mabaka a mabedi. E ne e le kopano ya ntlha e batsadi ba me ba kileng ba tla mo go yone. Mme fa ba boela gae, rona bana re ne ra amiwa thata fa boipelo jwa bone jo bo tlhagafetseng kaga go dira mo go oketsegileng mo tirelong ya ga Jehofa bo le bontsi.​—Baroma 12:11.

Go tswa foo ka 1931 phuthego ya Modimo e ne ya re tlisetsa mafoko a a itumedisang thata. Re ne ra nna le leina le lesha​—Basupi ba ga Jehofa. Abo e le tshiamelo ya mofuta wa yone fela, go sikara leina la Modimo fa pele ga batho le baengele!​—Isaia 43:10-12.

Ga ke kitla ke lebala ngwaga wa 1935, fa go phepafadiwa gore “dinku di sele” le “boidiidi yo bogolo” ke bomang. (Yohane 10:16; Tshenolō 7:9) Seno se ne sa thusa batho ba le bantsi​—le nna ke le moteng—​go tsaya kgato ya go kolobediwa. Kolobetso e ne e sa otlelelwe thata mo malatsing a fa ke simolola go tsena mo boammaaruring. Ereka ke ne ke setse ke ineetse botshelo jwa me go Jehofa Modimo, ke ne ka bona jaanong go tshwanetse gore ke ka tshwantshetsa boineelo joo jwa me ka kolobetso ya metsing.

Ngwaga wa 1938 e ne e le wa dipaakanyo tsa bolegodimo. Pele ga nako eo, go ne go na le lefelo le le lengwe fela la bokopanelo jwa Basupi ba ga Jehofa mo Cleveland​—Engineer’s Auditorium, e dirisediwa Sejeremane, Sepolishi, Sekgoa, le dipuo tse dingwe. Morago ga 1938 phuthego ya Modimo e ne ya rulaganyetsa gore go tlhongwe diphuthego mo dikarolong tse di farologaneng tsa motse. Rre le bangwe ba bomorwa-rre ba ne ba tlhophiwa jaaka batlhanka mo phuthegong. Nna ke ne ka abelwa mo lephateng la dimakasine.

Ngwaga wa 1939 o ne wa lere tiragalo e nngwe e e tshwaegang eo e neng ya thusa go tiisa tumelo ya me mo go Jehofa le mo phuthegong ya gagwe e e bonalang. Fa matshosetsi a ntwa a ntse a bonala, The Watchtower e ne ya gatisa setlhogo se se reng “Boitlhaodi.” Go tswa setlhogong seno, ke ne ka ithuta go lemoga gore batho ba Modimo ba ne ba tshwanetse go agisanya le mongwe le mongwe, le e leng gareng ga matshosetsi a ntwa. Ka boitumelo, seno se ne sa ntlhokoletsa dipaka tse di thata tse ke neng ke tloga ke lebana natso.

Gape ka 1939 ke ne ka ya kwa Motseng wa New York e le lwantlha. Fa ke tsena koo ka feta ka utlwa mookamedi wa bobedi wa Mokgatlho wa Watch Tower, ebong J. F. Rutherford, a bua mo Madison Square Garden. Baba ba bodumedi, ba ba ka nnang 500, ba ne ba leka go phatlalatsa pokano eo ka go tsosa modumo fa Mokaulengwe Rutherford a ntse a bua. Mme seno sotlhe se ne sa seka sa thusa sepe. O ne a bua fela go ya bofelong, mme bareetsi ba arabela ka go opa legofi ka tlhagafalo.

Kopano e e neng ya ntsena mo pelong ebile ke santse ke e gakologelwa ke ya 1942 ya merafe yotlhe e e neng ya tshwarelwa mo ga etsho, mo Cleveland. Puo e e neng ya anamisiwa thata ya phatlalatsa e ne e le “Kagiso​—A E Ka Nnela Ruri?” Go ne ga ntshiwa bosupi jwa Dikwalo go bontsha gore kagiso lefa e ka nna efe e e itiretsweng ke motho e ka se nnele ruri.

Tumelo E A Lekiwa

E ne e le ka nako yone eo fa tumelo ya me e lekiwa mo kgannyeng ya boitlhaodi. Ke ne ke le mmenenjara mo lephateng la ditshipi le didirisiwa mo khampaneng ya dikoloi ya General Motors. Ba ne ba nthebotse gore ke ka bereka tiro e e sa tseyeng nako yotlhe, ka gone e nkgonisa go tswelelapele jaaka modihedi yo o tlhagafetseng wa bodumedi jaaka selo sa ntlha. Mme fa matsubutsubu a ntwa a ntse a befa mme jaanong e kopanyeletsa United States, a ke ne ke tla nna le seabe mo tlhaselanong eo kana ke leke go ikgolola mo go yone ka ntlha ya tiro ya me ya boitshediso? Ke ne ka seka ka kgetha epe mo go tsone. Ke ne ke le modihedi yo o tshwailweng mme ebile ke na le tshwanelo ya kafa molaong go nteelwa kwantle mo tirelong ya sesole mo motheong oo. Lefa go le jalo, Lekgotla le le Biletsang Sesoleng le ne la seka la dumalana.

Lekgotla le ne la akantsha jaana: “O ka tsenelela mo bosoleng mme o fete o direle jaaka moruti.” “Nnya,” ka araba. “Lebaka la me la segakolodi ke gore ke modihedi wa efangele, mme ke neetse botshelo jwa me tiro eo.” “Mme o ka nna wa dira seo le mo bosoleng.”

“Nnya,” ka bolela. “Ke ka direla bagaetsho fela ka ‘mafoko a a molemo’ jaaka a fitlhelwa mo Bibeleng.”

Kgetsi ya me ene ya isiwa kwa kgotla-kgolo ya ditsheko. Mo kgotleng-kgolo ya Ditsheko ya Federal ke ne ka supa fa rre a ile a tshaba kwa Austria a tla mo United States ka ntlha ya go bo tumelo ya gagwe ya sedumedi e le kgatlhanong le go tsaya dibetsa le go nna le seabe mo bosoleng.

“Mme ga go tlhokafale gore o tlhabane,” moatlhodi a bolela. “Lekau ka tsela ya gago ya botshelo le thapiso, o ka nna moruti yo o molemo.”

“Motlotlegi, ke ka dira seo jang? Fa e le gore segakolodi ga se ntetle go tsaya dibetsa, go ka nna jang gore ke kgothaletse ba bangwe go dira jalo?”

Botshelo mo Kgolegelong

Go sa kgathalesege bosupi jo bo kwadilweng jwa gore ke modihedi wa efangele, ka letlhabula la 1943 ke ne ka atlholelwa dingwaga tse tlhano mo kgolegelong kwa Lewisburg, Pennsylvania. Lefa go le jalo, e ne e se nna fela mosupi mo Lewisburg, ka jaana go ne go na le bakaulengwe ba bangwe ba ka nna 50 koo. Ka nako ya fa ke gololwa, palo e ne e tlhatlogetse go ba ba ka nnang 200.

Kgolegelo e ne e akareletsa setsha se se ka nnang diekere di le sekete (400 ha). Moteng ga yone go ne go na le dikago tseo go neng go na le dikebekwa tse di kotsi, kampa ya temo ya magolegwa a a ikanyegang, le motsana oo go neng go nna modisa-kgolegelo, badisa, le babereki ba bangwe ba kgolegelo. Basupi gantsi ba ne ba abelwa tiro ya mo kampeng ya temo. Tiro ya me e ne e le go romela magolegwa a kampa ya temo mo mafelong a tiro le go boa teng.

Fa ke santse ke goroga, dipokano tsa rona tsa bodumedi le dibuka di ne di sa letlelelwe. Lefa go le jalo re ne re amogela makasine wa Tora ya Tebelo ka metlha. Seno se ne se kgonega jang? Baeti bangwe ba ba neng ba feta ka dikarolo tse di fa sekgwanyaneng se se fa motsaneng le dikagong tsa kgolegelo e ne e re ka botlhale ba latlhele dimakasine mo tseleng di le mo kgetsaneng ya pampiri. Nna kana mokaulengwe yo mongwe re ne re tla mme re fitlhele kgetsana eo mme go tswa foo re bo re fetisetsa tse di moteng ga yone go bakaulengwe ba bangwe. Tsela e nngwe e re neng re bona dibuka ka yone e ne e le ka bopelonomi jwa modisa yo o neng a nna mo motsaneng. O ne a tlogela dikoranta tse dikgologolo mo mathuding a ntlo ya gagwe. Fa nako ya go tla go tsaya dikoranta e goroga, gantsi re ne re fitlhela dimakasine tsa rona le tsone di le mo dikoranteng tse dikgologolo tseo. Moragonyana, modisa-kgolegelo o ne a dumela kopo ya rona go tshwara dipokano tsa ka metlha le go amogela dibuka tsa Bibela.

Letsatsi lengwe fa ke sena go romela badiri mo tirong mo tshingwaneng ya modisa-kgolegelo, ke ne ka tsenwa ke letshogo. Mo diaparong tsa me, ke ne ke subile buka ya Mokgatlho ebong The Truth Shall Make You Free. Fa magolegwa a ntse a tlhagola le go kgaola ditlhatshana, ke ne ka nna mo koloing mme ka botlhale ka ntsha buka. Mme a ko o akanye kafa ke neng ka garoga pelo ka gone fa mosetsanyana wa modisa-kgolegelo ka bofefo a tlola kafa morago ga me mme a re, “Ahee! O balang?”

Ereka jaana a ne a ntshwere ka tshoganetso ka buka eo ke neng ke tshwanetse go bo ke ne ke e tlogetse mo ntlwaneng ya kgolegelo, ke ne ka mmolelela gore e ne e le buka eo e tlhalosang Bibela. O ne a kgatlhega go feta fa ke mmontsha sengwe sa ditshwantsho tse di mo bukeng. E ne e le monna yo o inameng, yo o ipofololang keetane mo leotong la gagwe. “Batho ba le bantsi ba ntse jalo,” ka bolela. “Ba bofeletswe mo megopolong ya bodumedi jwa maaka, mme Jesu o batla go ba golola ka go bo a ile a re: ‘Boammaaruri bo tla lo golola.’”​—Yohane 8:32, King James Version.

Mo letsatsing le le latelang mmaagwe mosetsanyana o ne a re: “Simon, morwadiake o ne a mpolelela gotlhe kaga motlotlo o lo neng lwa nna le one malebana le Bibela le buka e o neng wa e mmontsha. O ne a kgatlhega thata thata, mme le nna e ne ya utlwala e nkgatlha.” Ka boitumelo, tiragalo ya tshoganetso e ne ya seka ya lere diphelelo tse di seng molemo.

Ke ne ka nna mo kgolegelong lebaka le le kwa tlase ga sephatlo sa katlholelo ya me ya kgolegelo. Fa ke sena go gololwa ka 1946, ke ne ka akofa ka tsenelela mephato ya badihedi ba nako e e tletseng ba babulatsela gape.

Tirelo ya Bethele

Kopano ya Bolegodimo ya Merafe E E Itumetseng, e e neng ya tshwarelwa kwa Cleveland ka 1946, e ne ya nna karolo e nngwe e e botlhokwa mo botshelong jwa me. Ke gone koo ke neng ka ikopela go ya Bethele​—tirelo ya nako e e tletseng kwa ntlong-kgolo ya lefatshe lotlhe ya Mokgatlho wa Watchtower mo Brooklyn, New York.

Baemedi bale babedi ba Mokgatlho, ebong Mokaulengwe Milton Henschel le Robert Morgan, ba ne ba tlhalosa ka bokhutshwane kaga tirelo ya Bethele go tswa foo ba bo ba botsolotsa ba ba neng bale gone. Ke ne ka ba atamela ka go okaoka. Lefa go ntse jalo, fa potsolotso e sena go simolola, ke ne ka lemoga fa e le batho ba ba pelonomi le ba ba bonolo.

“Ke ka ntlha yang fa o batla go direla kwa Bethele?” mongwe wa bakaulengwe a botsa.

“Ke dira gotlhe mo ke ka go kgonang mo tirelong ya ga Jehofa jaaka mmulatsela,” ka araba. “Mme fa ke ka ya kwa Bethele, ke tlhomamisa gore ke ka dira mo go oketsegileng.”

“Fa o ka tla kwa Bethele, ruri o ka dira mo go oketsegileng,” yo mongwe a bolela.

Tota o ne a bolelela ruri! Fa e sale go tloga letsatsing la me la ntlha kwa Bethele, ebong Tlhakole 18, 1947, ke ile ka fitlhela tirelo fano e le e e kgatlhisang thata le e e duelang. Ke leboga Jehofa ka malatsi otlhe go bo seatla sa gagwe se ile sa nkisa tshiamelong eno ya tirelo e e phepa.​—2 Bathesalonia 3:5.

Bosupi jo Re bo Boneng jwa Moya wa Modimo

Morago ga dingwaga tse 45 ke le motho yo o sa nyalang ka ntlha ya Bogosi, ke ne ka bona “mosadi eo o mokgwa o o iphaphileñ,” ebong Grace Suiter, gone mono mo Bethele ya Brooklyn. (Diane 31:10) O ne a tla mono Bethele a tswa kwa Midwest ka 1939, lemororo ene le ba lelapa la ga bone ba ile ba ithuta boammaaruri mo California.a Fa e sale re sena go nyalana ka 1959, re ile ra bona gore letsogo la ga Jehofa le mo go bao ba mo ratang le go mo direla ka boikanyego.

Ka ditsela di le dintsi nna le Grace wa me yo o rategang re na le tsela ya botshelo e e tshwanang. Rotlhe re ne ra tsalwa ka 1914, malapa a ga rona oo-mabedi a ne a senka boammaaruri jwa bodumedi, mme rotlhe re ne ra simolola go abalana ka tlhoafalo le batsadi ba rona mo tirong ya go rera ka ntlo le ntlo re le dingwaga tse di tshwanang​—12. Gape, jaaka banyalani ba ba mo tirelong ya Bethele, abo e le boipelo jang ne go itemogela mmogo boiteko jo bo pelokgale jo bo neng jwa tsewa ke phuthego ya Modimo mo go anamiseng tiro ya go neela bosupi “go ea hèla kwa sekhutloñ sa lehatshe”!​—Ditihō 1:8.

A re na le boikwatlhao bope go bo re tsenye kafa tlase ga letsogo la Modimo? E seng Grace! “Ga re a huma ka gope dithoto tsa lefatshe ka go direla mono Bethele,” o a bolela. “Lefa go le jalo botshelo jwa rona bo ile jwa huma ka tsela e e nnetseng ruri. Lemororo re sena bana ba rona ba sebele, tota ruri re na le ba le bantsi ba semoya.”

Le nna tota ga ke ikwatlhae! Tlhopho ya rona go baka Jehofa mo tirelong ya nako e e tletseng ke e e molemo thata. Re ile ra tshela botshelo jo bo tletseng ka boikaelelo jo bo tlotlegang, re leboga go bo re ile ra nna “tlhatse ga lecōgō ye le nonohileñ ya Modimo.”​—1 Petere 5:6.

[Ntlha e e kwa tlase]

[Setshwantsho mo go tsebe 23]

Batsadi ba me, Joseph le Mary

[Setshwantsho mo go tsebe 25]

Simon le Grace, mosadi wa gagwe