Dipotso tse di Tswang go Babadi
◼ Jerusalema on a le mo “kgolegoñ le bana ba gagwè” jang jaaka moaposetoloi Paulo a kwadile go Bagalatia 4:25?
Kwa tshimologong, Jerusalema le batho ba gagwe ba motlha wa ga Paulo ba ne ba le mo kgolegong ya Molao wa ga Moshe.
Go Bagalatia kgaolo 4 moaposetoloi o ne a bontsha gore Bakeresete ba ba mo kgolaganong e ntšha ba ne ba rekilwe ke Keresete mme ka jalo ba ne ba gololesegile. Seno se ne se farologane le boemo jwa Bajuda kafa tlase ga kgolagano ya Molao. Paulo o ne a tshwantsha seno le mosadi wa ga Aberahame (Sara) le mogadingwane wa gagwe (Hagare), ka go re: “Basadi ba, ke dikgōlaganō di le pedi; e ñwe e cwa thabeñ ea Sinai, me bana e ba tsalèla kgolegoñ; ke eōna Hagare. Me yana Hagare eo, ke thaba ea Sinai mo lehatshiñ ya Arabia [koo Jehofa a neetseng Iseraele molao ka Moshe gone], me o mo chwanoñ ea Yerusalema oa gompiyeno: gonne o mo kgolegoñ le bana ba gagwè. Me Yerusalema o o kwa godimo, o e leñ mma echo, ke mogololesegi hèla.”—Bagalatia 4:24-26.
Fa Paulo a ne a bolela “gore basadi ba, ke dikgolaganō di le pedi,” o ne a bua fela ka mokgwa wa go khutsafatsa. Jehofa ka tshwantshetso ga a nyala kgolagano e e sa tsheleng mme batho ba ba rulagantsweng mo kgolaganong eo. Pele o ne a kile a tsaya Iseraele o o neng a le kafa tlase ga kgolagano ya Molao o o neng a ntse jaaka mosadi wa gagwe. (Bapisa Isaia 54:1, 6.) Lefa go ntse jalo, mosadi yo o gololesegileng (Sara) o ne a emela Jerusalema yo o kwa godimo, phuthego ya ga Jehofa ya lobopo, eo e ntseng jaaka mosadi mo go ene.
Mme Bajuda ba ne ba ka tsewa jang ba le mo kgolegong go Molao, ereka o ne o itekanetse ebile o neetswe ke Modimo ka boene?
Ke boammaaruri gore ka boone ‘molao o ne o le boitshepo, mme taolo e ne e le boitshepo, e siame, e le molemo.’ (Baroma 7:12) Mme Baiseraele ba ba sa itekanelang bao ba neng ba le kafa tlase ga Molao ga baa ka ba o boloka ka botlalo, ka natla ka moo ba neng ba ka leka ka gone. (Baroma 7:14-16) Moaposetoloi Petere o lebisitse go ntlha eo fa a ne a botsa potso e e latelang fa pele ga setlhopha se se laolang sa Bokeresete: “Lo lekèlañ Modimo, ha e bo ne ne lo baea mo thamuñ tsa barutwa yokwe e e reteletseñ borra echo le rona go e rwala?” (Ditihō 15:10) Ka mo go tshwanang, mo go Bagalatia 4:4, 5 Paulo o boletse gore Keresete o tlile “gore a rèkololè ba ba mo molaoñ.” Lefa e le mang yo o neng a ka tatalalela gore Bakeresete ba ne ba patelesega go ‘tlhokomela malatsi, le dikgwedi, le metlha, le dingwaga,’ jaaka di boletswe ke Molao, o ne a tla baka bokgoba gape-gape.—Bagalatia 4:9, 10.
Tota, jaaka go tlhalositswe mo tsebeng 11 ya Tora ya Tebelo ya March 15, 1985, Bajuda ba lekgolo la ntlha la dingwaga e ne e le makgoba ka ditsela di le mmalwa. Ba ne ba le mo bokgobeng go Baroma go ya ka dipolotiki. E ne e le makgoba a sebe. (Yohane 8:34) Mme go ne go na le dipono tse di phoso tsa bodumedi tseo ba neng ba golegilwe mo go tsone. Mme bokgoba jwa konokono joo Paulo a neng a lebisitse go jone go Bagalatia 4:25 e ne e le bokgoba jwa Bajuda go kgolagano ya Molao wa ga Moshe, eo e neng e neetswe kwa Senai mme e emetswe ke mogadingwane wa ga Aborahame wa lelata ebong Hagare.