Ka Moo O Ka Itshokelang Tshotlego ka Gone
“LO TLA ipolokèla meōea ea lona ka bopelotelele yoa lona.” Jesu Keresete o ne a bua mafoko ao fa a ne a neela boperofeti jwa gagwe kaga ‘motlha wa bokhutlo.’ (Luke 21:19; Daniele 12:4) Mo polelong eno, dintlha tseno tse pedi di tlhagelela ka phepafalo. (1) Go itshoka go a tlhokafala mo go bolokeng botshelo jwa rona, ebile (2) go itshoka go a kgonega.
Mme o ka itshoka jang? Go araba potso eno, santlha re tshwanetse go itse lebaka la go bo Jehofa a dumelela tshotlego le pogiso go tla mo batlhankeng ba gagwe.
Matshwenyego le Pogiso—Ka ntlhayang?
Lebaka la konokono ke gore Satane o gwetlhile go tshwanela le go siama ga bolaodi jwa ga Jehofa. (Genesise 3:1-19) Jehofa o rulaganyeditse go lebana le kgwetlho eno ka ntlha ya leina la gagwe le ka ntlha ya ba bangwe.
Gape Modimo o dumeletse gore batho ba gagwe ba boge ka maikaelelo a a ka itshupang a le mosola thata mo go rona fa re leba patikego e e ntseng jalo ka tsela e e siameng. Ka sekai, fa re itshoka fa re le mo tekong kwantle ga go ngongoregela tshotlego ya rona, re supa gore tumelo ya rona ke ya mmatota, mofuta wa tumelo o o kgatlhang Modimo. (1 Petere 1:6, 7; Bahebera 11:6) Mme gape patiko e ka go bontsha makoa a botho a a jaaka boikgogomoso, bopelokhutshwane, le go rata go tshela motlhofo. Ka thuso ya moya wa Modimo, re ka dira gore re fenye dinonofo tse di ntseng jalo ‘mme re apare motho yo mosha ka botlalo ka mo go oketsegileng.’—Bakolosa 3:9-14.
Mopesalema o ne a re tlhagisetsa ntlha eno sentle thata, ka go re: “Go ntihetse molemō ha ke nntse ke patikwa; gore ke tlè ke ithutè ditaō tsa gago.” (Pesalema 119:71) Abo ke tsela e e molemo jang ne ya go leba patiko! Ga go na dingongorego. Ga go na kamego epe ya bogagapa ka tatlhegelo ya botho eo e ka neng e bakilwe ke patiko. Go na le moo, mo kgannyeng eno go na le kutlwisiso e e botlhale ya gore se Jehofa a neng a se dumeletse gore se wele mopesalema se ne se ka mo thusa gore a anaanele ditaolo tsa ga Jehofa ka botlalo ka mo go oketsegileng. A re letlelela tshotlego gore e nne le matswela a a tshwanang mo go rona?
Moaposetoloi Paulo o ne a solegelwa molemo ke pitlagano e o neng a e itemogela mo kgaolong ya Asia. Ka sekai, pitlagano eno e ne ya mo dira gore a ikaege ka Jehofa ka botlalo ka mo go oketsegileng. E ne gape ya otlelela tumelo ya moaposetoloi yono mo tsogong, ka gonne o ne a itshokela mathata a gagwe ka go ikanyega ka mo go feletseng go “Modimo o o cosañ bashwi.” (2 Bakorintha 1:8-10) Ee, Paulo o ne a ipelela melemo ka ntlha ya go itshoka ga gagwe mo tshotlegong.
Go ntse jalo le ka Bakeresete bao ba nang le pono e e siameng ka patiko gompieno. Kwa Zimbabwe, lefatshe le le kileng la patikiwa ke dintwa tsa majela-thoko, phuthego ya batho ba ga Jehofa e ne ya fudusediwa kwa motseng o o sireletsegileng. Ka ntlha ya maemo mo nakong ya ntwa mongwe le mongwe wa bagolwane ba bararo ba ba tlhophilweng mo phuthegong o ne a latlhegetswe ke ngwana ka loso. Go feta moo, batho ba lefelo leo ba ne ba gatelela batsadi bano ba Bakeresete thata gore ba ineele ka go didimatsa meya eo go neng go twe e ne e galefisitswe. Bagolwane ba ne ba ikutlwa jang ka seno? Fa a ne a ba buelela botlhe ka boraro jwa bone, mongwe wa bone o rile: “Lefa morafe o le mo ntweng, le rona re mo ntweng le meya e e boikepo. Re gaisa mmaba [masomosomo a meya e e boikepo] ka gonne re na le tsholofelo e e tshedileng. Jalo, lefa re ka swela mo ntweng, fa fela re swa ka boikanyegi mo go Jehofa re tla tsosiwa. Re tla bo re fentse mmaba.” Banna bano ba bararo ba ba ikanyegang le ka motlha ga baa ka ba latlhegelwa ke pono ya maatla a ga Jehofa go ba golola. Ka go lemoga go ema ga bone ba tlhomame, le rona, re tshwanetse go tlhatswega pelo gore re ka itshoka!
Fa Pogiso e le Makgwakgwa
‘Mme go tweng fa pogiso e le makgwakgwa, go dirisiwa mekgwa e e setlhogo ya go tlhokofatsa?’ o ka botsa jalo. ‘A re ka itshoka le e leng fa go ntse jalo mme re sa itatole tumelo ya rona?’ Mme gone, Bakeresete ba pele ba ne ba kgona go itshokela go tshwarwa makgwakgwa ba sa itatole tumelo ya bone.
Ka mo go tshwanang, tumelo e e feletseng mo go Jehofa e ne ya bontshiwa ke Mokeresete mongwe wa motlha wa segompieno yo o nnang mo lefelong la selegae le le kwa thoko la Zimbabwe. Ka nako nngwe o ne a setse a le esi ka gonne mosadi wa gagwe o ne a jetse morwadiabone yo o nyetsweng nala. Ka tshoganyetso, o ne a atamelwa ke banna bangwe ba ba neng ba tlhometse ka dibetsa bao ba neng ba dira ditatofatso tsa maaka ka ntlha ya boemo jwa gagwe jwa Bokeresete. Morago ga ba sena go mmetsa botlhoko, banna bano ba ne ba bofelela ditena tse di neng di gotetse ebile di le dikhibidu mo gare ga maoto a gagwe gape ba mo dira gore a tsamaye mo diteneng tseo. Morago o ne a tlogelwa a le esi gore a swe. Ereka go fetoga ka tshoganyetso ga maemo mo lefelong leo go ne go dirile gore go sepela go seka ga kgonega, mosadi wa monna yono o ne a sa itse boemo jwa monna wa gagwe. Baagelani ba ne ba laetswe gore fa ba ka mo thusa ba ne ba tla bolawa. Jalo o ne a nna a le esi mo boemong jono ka dikgwedi di le tharo tse di tletseng, a lebeletse go swa letsatsi lengwe le lengwe.
Monna yono wa Mokeresete yo o neng a boga o ne a kgona go itlamela ka metsi le bopi jwa mmopo mo legaeng la gagwe. Mme ka ntlha ya go tshwarwa makgwakgwa go a neng a go amogetse, o ne a sa kgone go tsamaya. Ka gone, fa dikgong tsa molelo tse di neng di le fa gaufi di fela, o ne a tshwanelwa ke go roba fenitšhara ya gagwe le go e dirisetsa go gotsa molelo wa go apaya. Metsi a ne a rusa le go tlala diboko. Dintho tsa gagwe tsa molelo di ne tsa tswelela ka go tutela.
Jono e ne e le boemo jwa mokaulengwe yono fa kwa bofelong mosadi wa gagwe a ne a kgona go boela gae morago ga dikgwedi di le tharo. Akanya fela gore o ne a ikutlwa jang fa a mmona! O ne a baakanyetsa go mo isa kokelong ka bonako. Go dira seno, o ne a tshwanetse go mo isa kwa boemela-beseng jo bo gaufi ka kereibane mme go tloga foo a mo ise kwa toropong koo go neng go na le kokelo gone. Morago ga dibeke di le tharo, o ne a gololwa go tswa mo kokelong mme a ya kwa ntlong ya ga morwadie, koo a neng a amogela thuso ya semoya le kgothatso gone go tswa go maloko a phuthego ya Basupi ba ga Jehofa mo lefelong leo.
Ke eng se se thusitseng motshegetsi yono yo o ikanyegang wa Bogosi jwa Modimo gore a itshokele go tshwarwa makgwakgwa? O ne a setse a le esi fela ka dikgwedi di le tharo. O ne a letetse go swa ka botlalo. Mme lefa go ntse jalo, fa a ne a bodiwa gore o ne a ikutlwa jang ka nako ya boitemogelo joo jo bo setlhogo karabo ya gagwe e ne ya nna, “Ke ne ke ikutlwa gore Jehofa o ne a na le nna ka dinako tsotlhe.” Go ne go sena dingongorego kgatlhanong le babogisi ba gagwe kana go hutsafalela se se neng se mo diragaletse—tumelo e e tlhomameng ya gore Jehofa le ka motlha ga a latlhe batlhanka ba gagwe ba ba ikanyegang.—Pesalema 37:28.
Ee, Bakeresete ba ka itshoka. Ba itse gore fa Jehofa a letlelela pitlagano, ke ka lebaka le le molemo mme go itshoka go a kgonega. Lefoko la Modimo le maitemogelo a ba bangwe di re tlhomamisetsa ntlha eno. (Mathaio 24:13) Lefa go ntse jalo, fa re itshokela diteko gantsi re tlhoka go gomodiwa, a ga go jalo? Mme re tshwanetse ra retologela kae go bona kgomotso eo?