Jehofa O Segofatsa Tlhoafalo ya Bomodimo

JESU o ne a na le tlhoafalo ya bomodimo. Ka go bona tlhoafalo ya gagwe ya bomodimo. barutwa ba gagwe ba ne ba gopola boperofeti jono malebana le ene: “Tlhōafalèlō ea ntlo ea gago e tla nnya.” (Yohane 2:17) Tlhoafalo eno e ne ya bonala mo bodiheding jwa gagwe: “Me a nna a tsamaea a ralala metse le metsana, a ruta,” mme o ne a bolelela barutwa ba gagwe go ‘iteka ka natla thata.’ (Luke 13:22-24) Jehofa o ne a segofatsa tlhoafalo ya bomodimo ya barutwa ba ga Jesu ka nako eo mme o dira jalo gompieno, jaaka maitemogelo a a latelang a a tswang Uruguay a bontsha.

◻ Basadi ba babedi ba e neng e le Basupi ba ga Jehofa ba ne ba nna dimmaele tse di ka nnang 46 (70 km) go tloga phuthegong e e gautshwane Ereka ba ne ba le kwa bothokong thata, ba ne ba fetsa ka gore ba tshwarele dipokano tsa beke le beke mo legaeng la bone, tseo ba neng ba tla di laleletsa batho ba ba kgatlhegang Ba ne ba na le tlhoafalo fela thata go sa kgathalesege bo kwa bothokong jwa bone. Yo mongwe o ne a tsamaisa dithuto tse thataro tsa Bibela, fa yo mongwe a ne a tsamaisa tse supa. Fa molebedi wa potologo a ne a ba etetse, bagodi ba ba 36 ba ne ba tla polelong ya gagwe. Mongwe wa bokgaitsadi o ne a godisetsa bana ba ba tlhano mo boammaaruring, mme gompieno botlhe ba tlhoafetse ba dira ka natla mo phuthegong ya ga Jehofa. Eleruri, Jehofa o segofaditse tlhoafalo ya bomodimo ya bokgaitsadi bano ba babedi.

◻ Kgaitsadi mongwe o ne a bontsha tlhoafalo ya bomodimo ka go tsamaya ka metlha le bana ba gagwe dimmaele tse supa (11 km) go ya dipokanong tsa phuthego, gantsi a goroga oura pele ga nako. Le ka motlha ga ise a ke a ikutlwe gore ereka thuto ya buka e tsaya oura fela, ga go na mosola ope wa go tsamaya sekgala se se leele fa gone a ne a ka ipalela buka fela kwa lapeng la gagwe. Gompieno o akanyetsa masego a gagwe. Sekao sa gagwe se se molemo sa go intsha setlhabelo, boitshoko le boikemisetso jaaka mosadi le mmabana se ile sa nna le tlhotlheletso e e molemo mo baneng ba gagwe. Bana botlhe ba gagwe ba barataro ba mo boammaaruring Morwa yo mongwe yoo e leng mmulatsela o bontsha tlhagafalo e e tshwanang ka go pagama baesekele dimmaele tse 36 (58 km) go tlhokomela setlhopha se se kwa bothokong. Go dira seno o tshwanelwa ke gore a ralale noka ka baesekele ya gagwe. Jehofa o segofatsa tlhoafalo ya gagwe ya bomodimo le ene.

◻ Ka 1982 setlhopha sengwe sa bakaulengwe se ne sa dira tshimo nngwe e e kwa bothokong e e rileng mme ba tsamaisa dibuka tse dintsi. Ngwaga e e tlang ba ne ba boela go dira tshimo e e tshwanang. Kwa legaeng lengwe ba ne ba thulana le kganetso ya mofuta o sele fela. Morago ga go utlwa polelwana ya bone ya Bibela, mong wa ntlo o ne a bolela gore o ne a sa bone go tlhokafala go fetola bodumedi jwa gagwe ereka a ne a setse a ikutlwa gore o bone boammaaruri. O ne a re: “Wa bona, ke mongwe wa Basupi ba ga Jehofa.” O ne a ipedisiwa thata ke go utlwa fa baeti ba gagwe le bone e ne le Basupi ba ga Jehofa.

O ne a tlhalosa gore o ne a le kgakala le legae fa bakaulengwe ba gagwe ba ne ba tla mo tshimong, mme lelapa la gagwe le ne la amogela dibuka. O ne a di bala, a lemoga gore di ruta boammaaruri jwa Bibela mme a simolola go bolelela bangwe ka ene se a neng a se ithuta. Bakaulengwe ba ne ba dira dithulaganyo tsa go thusa “nku” eno e ntsha go tswelela go ya bogoding mme eleruri a nne mongwe wa batho ba ga Jehofa.

Ee, Jehofa o segofatsa tlhoafalo ya bomodimo ya kobamelo ya boammaaruri. Re itumelelela go bo re le karolo ya phuthego ya ga Jehofa ya bakaulengwe lefatshe ka bophara, mme re batla go bontsha tlhoafalo eno ya bomodimo mo bodiheding. Ka go gololwa mo tsamaisong e e boikepo ya ga Satane le go phepafadiwa ke boammaaruri jwa Bibela re tshwanetse go kgothatsega go ‘tlhoafalela ditiro tse di molemo.’​—Tito 2:14.