Go Bona Boipelo mo Lefatsheng le le Tletseng Matshwenyego

“ITUMELEÑ mo Moreneñ ka metlha eotlhe,” go ne ga laela jalo moaposetoloi Paulo. “Ke tla ba ke re, Itumeleñ.” (Bafilipi 4:4) Mme go bantsi, boipelo jo bo ntseng jalo go bonala bo le thata. ‘O ka ipela jang fa o tshwanetse go lepalepana le lehuma, go tlhoka mmereko, babereki ba ba senang maitseo, dithaelo tsa boitsholo jo bo maswe, kana dikgatelelo kwa sekolong?’ bangwe ba a ipotsa.

Ga go bonale go ka utlwala ka Modimo go lebelela batho ba gagwe go nna mo seemong sa boitumelo se se tsweletseng ruri. Modimo ka boene o ne a tlhotlheletsa Paulo go bolelela pele gore eno e tla nna ‘metlha e e tlhokofatsang.’ (2 Timotheo 3:1-5) Legale, Bibela e papamatsa ka botlalo go bontsha gore le eleng maemo a a maswe thata thata, motho a ka kgona gore bobotlana a nne le boipelo jo bo rileng. Jesu, ka sekai, o ne a ‘itshokela thupa ya tlhokofatso’ le ‘puo e e ganetsang ya baleofi.’ Eleruri go ne go se na boipelo jo bo kalo mo go utlweng botlhoko fa a kokotelwa mo koteng kana fa a ne a sotlwa ke matshwititshwiti. Paulo o bua le eleng ka mahumapelo a ga Keresete jaaka a a mahehe fela thata mo a neng a tshwanelwa ke go kokotlelela Modimo ka “selelō se se tona le dikeledi.” Lefa go le jalo Jesu o ne a kgona go itshokela seno sotlhe “ka [ntlha ya] boitumèlō yo o bo beecweñ pele.”​—Bahebera 12:2, 3; 5:7.

Bakeresete ba pele ka mo go tshwanang ba ne ba “bōna ntwa e kgolo ea ditlhokohaco . . . Ka ntlha e ñwe e le ka go ntshiwa segakgamalèlō ka dikgōbō le ka dipitlaganō.” Lefa go le jalo, Paulo o re, ba ne ba “ichōkèla go thopiwa ga dilō tsa [bone] ka boitumèlō.” (Bahebera 10:32-34) Mme seno se ne sa kgonega jang?

Boipelo​—Jo Bo Kwantle kana Moteng?

Boipelo ga se sengwe se se kwantle. Ke nonofo ya mo pelong. (Bapisa Diane 17:22.) Ka boammaaruri, dilo tse di kwantle jaaka lelapa, ditsala​—le eleng dijo tse di rategang—​go ya bokgakaleng jo bo rileng di ka tlisa boikutlo jwa boipelo. (Ditihō 14:16, 17) Aitsane, go solofela sengwe fela se se molemo go ka tlisa boipelo! (Bapisa Diane 10:28.) Lefa go le jalo, boipelo jo motho o bo bonang mo maemong a ka kwantle kana dilo tse di bonalang bo ka nna jwa lobaka lo lokhutshwane.

Mo letlhakoreng le lengwe, maemo a a ka kwantle ka dinako tse dingwe a lebega a re amoga boipelo. Ka sekai, lekawana le le bidiwang Jim le ne la bolela kafa tiro ya gagwe ya boitshediso e neng e mo ama ka teng: “Ke ne ke ila tiro ya me . . . ke ne ke sa bone go tlhokafala go senya botshelo jotlhe jwa me ke tsweledisa khamphane e go neng go lebega e sena sepe gotlhelele le nna jaaka motho. Mo godimo ga moo, bontsi jwa batho bao ke neng ke bereka le bone e ne e le maferefere, batho ba ba sa ikanyegeng.” Go leka go itirela boipelo ka dilo tse di itiretsweng ka mo go tshwanang go ne ga itshupa e le malele fela. Jim o bolela gore: “Ke ile ka kopanyelediwa mo diokobatsing tsa mefuta yotlhe fa ke ne ke le dingwaga tse di lesome. Mme ke ne ka felela ke le motho yo o tlhakatlhakaneng tota. Ke ne ke tenwa ke botshelo jo ke neng ke bo tshela: go nwa, go ja diokobatsi, le boitsholo jo bo maswe jwa dikobo. Botshelo bo ne bo sa reye sepe kana bo sena boikaelelo, ‘Ke ka bona kae sengwe se se botoka?’”

Boitemogelo jwa ga Jim malebana le seno bo re gakolola joo jwa ga Kgosi Solomone. Le ene gape, o ne a tla go lemoga boseng-sepe jwa go leka go bona boipelo ka boitlhapediso:

“Ka ithaea mo peduñ, ka re, A re eè koñ, ke tla gu leka ka mokete; me ke gōna u yè kgatlhègō monate: me bōnañ, mo le gōna, e ne e le boithamakō hèla. Ke buile kaga ditshègō, ka re, Ke botsènwa: le kaga mokete, ka re, O dihañ? Ka kheleisa mo peduñ ea me kaha nka itumedisañ nama ea me ka gōna ka boyalwa yoa mofine, pelo ea me ea bo e nntse e nkgōga ka botlhale, le kaha nka chwarañ bosilo ka gōna, go tsamaea ke tla ke bōna se se leñ molemō mo baneñ ba batho go se diha, tlhatse ga legodimo, ka metlha eotlhe ea botshelō yoa bōnè. Ka itihèla ditihō tse dikgolo; ka ikagèla matlo; ka itlhōmèla masimo a mafine; Ka itihèla masimo le maèmo a ditlhare . . . Me señwe le señwe se matlhō a me a na a se eletsa, ga kea ka ka a thiba mo go shōna . . . Hoñ ka leba ditihō cotlhe tse diatla tsa me di di dihileñ, le letsapa ye ke ne ke ineile letsapa ya go le diha: me bōnañ, gotlhe e ne e le boithamakō le go belebetlèla phehō hèla.”​—Moreri 2:1-5, 10, 11.

A go na le tsela nngwe ya botshelo eo e seng boithamako, e e ka tlisang boipelo le eleng tlaseng ga maemo a a bosula?

Motswedi wa Boipelo jwa Mmatota

“Gonne boitumèlō yoa ga Yehofa ke thata ea lona,” go ne ga rialo Nehemia. (Nehemia 8:10) Ee, boipelo bo tswa go Modimo Mothatayotlhe ka ntlha ya gore, selo se le sengwe, ke Mmopi wa dilo tsotlhe tse di molemo tseo di ka tlisang boipelo jwa ammaaruri “Thata le boitumèlō di mo heloñ ga gagwè,” go rialo Bibela. (1 Ditihalō 16:27) Tsela ya mmatota ya go bona boipelo ka gone ke go nna le botsala, kamano, le Mmopi ka sebele jaaka eo Aberahame a neng a e ipelela! (Yakobe 2:23) A botsala jo bo ntseng jalo bo ka tlisa boipelo? Akanyetsa se mopesalema a neng a se bolela: “Botsala jwa gago [Modimo] bo botoka go na le botshelo.” (Pesalema 63:3; The Bible in Living English) A e re le fa re feta go itsiwe gore Jim e ne ya re nako e ntse e ya a tla go anaanela mabaka ano. Gompieno ke Mokeresete yo o ipelang.

Botsalano le Modimo bo ka lere boipelo jang? Selo se le sengwe ke gore, Modimo ke “moduedi oa ba ba o batlañ.” (Bahebera 11:6) Mo go direleng Modimo, motho ga a tshwanela go boifa maiteko a gagwe gore e tla nna lefela kana a tsamaya a sa lemogiwa. Ditiro tse dipotlanyana tsa boineelo di anaanelwa fela thata ke ene. (Bapisa Mareko 12:41-44.) Mme fa Jehofa a segofatsa ditsala tsa gagwe tse di ikanyegang, tshegofatso ya gagwe “ea humisa, me ga a ke a e oketsa ka bohutsana.” (Diane 10:22) Tota, barati ba Modimo ba lebelela pele go iponela tuelo ya botshelo jo bo sa khutleng mo Thulaganyong e Ntšha ya gagwe koo “go tla agañ tshiamō mo go aōna.” (2 Petere 3:13) Tsholofelo e e ntseng jalo ke tsela ya mmatota ya boipelo go Bakeresete!

Selo se sengwe go se akanyetsa ke gore “boitumèlō” ke loungo lwa moya wa Modimo. Lefa go le jalo Modimo ka bopelotshweu o neela moya wa gagwe go ditsala tsa gagwe fa ba o kopa. (Bagalatia 5:22; Luke 11:13) Matswela e ne ya nna eng? Mopesalema o boletse jaana, “Go segō chaba e Modimo oa eōna e leñ Yehofa.”​—Pesalema 144:15.

Go Boloka Boipelo jwa Rona

Legale, le eleng Bakeresete ba ba tloditsweng mo motlheng wa ga Paulo ba ne ba ikutlwa ba le kwa tlase ka dinako dingwe. (1 Bathesalonia 5:14) Mme gompieno ditlalelo le dikgagamalo tsa botshelo di ka tlisa mathata a magolo fela thata. Mme ereka boipelo e le nonofo eo e agileng kwa teng ga pelo ya mongwe, dikgatelelo tseno ga di tlhoke gore di go latlhele boipelo jwa gago. Akanyetsa, ka sekai, Jesu Keresete. Re ne ra bolela go le pele gore ka “boitumèlō yo o bo beecweñ pele a ichokèla mokgōrō.” (Bahebera 12:2) Lemororo go bapolwa eleruri e ne e le boitemogelo jo bo maswe, kamano ya ga Jesu le Rraagwe e ne e nonofile thata thata go ka mo letlelela gore a nwetse megopolo ya gagwe mo boitlhobogong. Kgang e e neng e rena mo mogopolong wa ga Jesu ka phepafalo e ne e le “boitumèlō yo o bo beecweñ pele”: tshiamelo ya go tlotlomatsa leina la ga Jehofa, tebelelo ya go golola lotso lotlhe la setho mo boleong, tlotlo ya go direla jaaka Kgosi ya Bogosi jwa Modimo! Le eleng mo dipakeng tse di fifetseng tsa gagwe, Keresete o ne a ka akanyetsa dilo tseno mme a nna le maikutlo a boipelo jo bogolo!

Bakeresete ba pele ka mo go tshwanang ba ne ba ka itshokela pogiso, le eleng ‘ka boipelo ba itshokela go thopiwa ga dilo tsa bone,’ eseng gore ba ne ba ja monate mongwe wa boitsholo jo bo boatla jwa pogo jwa matlhabisa ditlhong, mme ka ntlha ya go bo megopolo ya bone e ne e nwetse mo goreng ke ka baka lang ba ne ba tshwanelwa ke go itshokela dilo tseno. Ba ne ba ka ipela “ka ba kailwe chwanèlō ea go tlotlololwa ka ntlha ea Leina [ja Modimo].” Ba ne ba ka ipela ka ntlha ya ‘tsholofelo ya botshelo jo bosakhutleng’ e e neng e tlhomilwe pele ga bone.​—Ditihō 5:41; Tito 1:2.

Gompieno gape re ka boloka boipelo jwa rona, le eleng fa re thulane le mathata a a masisi. Go na le gore re itlhoboge le go ganelela mo mathateng a rona, re ka leka go ikgakolola ka masego a go nna le botsala le Jehofa le tshegetso ya bakaulengwe ba ba lorato le bokgaitsadi Gantsi seno se lekanetse fela go dira gore pogo ya rona e nne selonyana fela. Jesu o ne a tshwantshetsa kgang eno ka tsela eno: “Mosadi o na le bohutsana a le mo go belegeñ, ka go bo lobaka loa gagwè lo tsile: me ea re a sena go bèlèga ñwana, oa ba a sa tlhole a gakologèlwa botlhoko, ka boitumèlō yoa go re, motho o tsalecwe mo lehatshiñ.”​—Yohane 16:21.

Mo phuthegong ya Bokeresete gompieno go na le dikao tse di molemo tse dintsi tsa batho ka bongwe bao ba ileng ba letlelela boipelo go khurumetsa mathata a bone. Mosadi mongwe wa Mokeresete yo o bidiwang Evelyn, ka sekai, o ne a boga mo go botlhoko malwetsi a mefuta-futa, go akareletsa le kankere. O tsamaya ka bothata ebile gantsi o khikhianngwa ke botlhoko tota. Lefa go le jalo ke wa ka metlha kwa dipokanong mme ebile o na le go rumaruma mo go tsabakelang mo sefatlhegong sa gagwe. Sephiri sa boitumelo jwa gagwe? “Go ikaega ka Jehofa,” o ile a bolela jalo ka boitumelo. Ee, go na le go nwela mo matlhomoleng a gagwe, o dira boiteko gore a nwetse mogopolo wa gagwe mo mabakeng ao a nang le one a go ipela. Seno se mo neela nonofo ya go itshokela matlhoko a gagwe.

Tota, re ka latlhegelwa ke boipelo jwa rona motlhofo. Bangwe ba hupediwa ke keletso ya dilo tse di bonalang kana boitapoloso. Ba tlhokomologa dipokano tsa Bokeresete, thuto ya botho, le tirelo ya tshimo. Go na le gore a itlisetse boipelo mo botshelong jwa gagwe, yo o meletsang mathe mahumo a dilo tse di bonalang ‘o itlhaba mmele otlhe wa gagwe ka mahutsana a mantsi.’​—1 Timotheo 6:10.

Go lelekisa “ditihō tsa nama” tse di bogaa gapa ke tsela e nngwe ya go senya boipelo jwa mongwe. Boaka, boleswe, kana boitshwaro jo bo repileng bo ka tlisa monatenyana wa lobakanyana, mme di kgatlhanong gotlhelele le moya wa Modimo, o o tlisang boipelo. (Bagalatia 5:19-23) Yo o itlhapedisang mo go direng phoso o ipaya mo kotsing ya go ikgaola mo Motsweding wa boipelo​—Jehofa!

Ka gone he, abo go le botlhokwa jang ne, gore Mokeresete a dibele boipelo jwa gagwe ka lefufa. Fa, ka lebaka lengwe, o iphitlhela o latlhegelwa ke boipelo, bona gore o ka dirang gore o bo bone gape. Ka gongwe go na le tlhokafalo ya gore o ithute gape le go tlhatlhanya ka Bibela. Ke fela ka go ikgakolola ka metlha ka tsholofelo ya rona re ka ‘ipelang mo tsholofelong’ e e kwa pele, le eleng fa re boga mathata. (Baroma 12:12) Kana ka gongwe go na le tlhokafalo ya go tlhakanela ga golwanyane mo go rereng “Mahoko a a Molemō a, a bogosi.” (Mathaio 24:14) “Go aba” ka tsela eno eleruri go tla tlisa boipelo jo bo ka se tilweng ka selekane se segolwane thata!​—Ditihō 13:48, 52; 20:35.

Lefatshe la rona le le tletseng ka matshwenyego le tla tswelela pele go re kgobera. Mme ka go atamela gautshwane le Tsala ya rona ya selegodimo re ka ngaparela boipelo jwa rona le go bona kgoro mo Thulaganyong e Ntšha ya Modimo koo dikgoreletsi tsotlhe tsa boipelo di tla bong di tloseditswe ruri!​—Tshenolō 21:3, 4.