“U Shwetsè Tihèlō Ea Gago”

“Kea gu laea mo ponoñ ea Modimo, le ea ga Keresete Yesu, eo o tla atlholañ batshedi le bashwi, . . . u shwetsè tihèlō ea gago.”—2 TIMOTHEO 4:1, 5.

1. Botsalano e ne e le bofe magareng ga Paulo le Timotheo?

FA MOAPOSETOLOI Paulo a ne a kwala lokwalo lwa gagwe lwa bobedi go Timotheo, Paulo o ne a lekela mokgele wa gagwe jaaka modihedi wa Modimo ka dingwaga tse di ka nnang 30. O ne a amogetse masego a mantsi go tswa go Jehofa. (2 Timotheo 1:2) Paulo o ne a ikgethela Timotheo go dira le ene mo botsalanong jo bo atamelaneng le ene mo tirong ya go eta, ba direla diphuthego. Ba ne ba ipelela dingwaga tsa maitemogelo a a ungwang mmogo.—Ditihō 16:1-5.

2. Bokao jwa mafoko a ga Paulo mo go 2 Timotheo 4:6-8 ke bofe?

² Jaanong nako e ne e gorogile ya gore bodihedi jwa ga Paulo bo fele. O kwadile jaana: “Gonne nna ke setse ke isiwa chupèlō le yana, le lobaka loa go tloga ga me lo hitlhile. Ke tlhabanye ntwa e e molemō, ke digetse sebaka sa tshianō, ke bolokile tumèlō: Go tloga hano ke setse ke beecwe serwalō sa tshiamō, se Morèna, moatlhodi oa tshiamō, o tla se nnaeañ mo tsatsiñ yeuō: me e señ nna nosi, e leñ le bōnè botlhe ba ba ratileñ go bōnatshèga ga gagwè.” (2 Timotheo 4:6-8) Seno se ne se akantsha gore loso Iwa ga Paulo lo ne lo atametse. Go tlhaloganyesega gore Paulo o ne a boga loso mo pusong ya ga Nero ka 66 C.E. Fa a ne a lebane le loso, ke megopolo efe e e neng ya haraka mo mogopolong wa ga Paulo? Ka gongwe eno: A ke dirile tirelo ya me sentle? A ke weditse bodihedi jwa me ka katlego? Ee, Paulo o ne a ka supa tlhatswego pelo ya gagwe gore o ne a dirile jalo! Tumelo ya gagwe e ne e nonofile thata, ebile o ne a na le tsholofelo ya gore o ne a tla bona tuelo ya piletso e e kwa godimo. Abo o tshwanetse a bo a ile a nna le kgotsofalo jang ne ka gobo le ka motlha a ise a ke a fapoge mo kabelong ya gagwe!

3. Ke selo sefe se se molemo se Paulo a neng a ka se direla Timotheo pele ga loso Iwa gagwe?

³ Paulo o ne a santse a na le nakonyana e potlana e e setseng go dira sengwe se se molemo. Pele ga fa a robala mo losong, ke selo sefe se se molemo se Paulo a neng a ka se direla Timotheo? Tlase ga tlhotlheletso o ne a neela kgakololo e e botlhokwa. Re bala megopolo ya gagwe le mafoko a gagwe mo Bukeng ya Bobedi ya ga Timotheo. Eno ke mekwalo ya gagwe ya bofelo mo Dikwalong tse le rona re solegelwang molemo ke tsone.

4. Ke tao efe e Paulo a neng a e neela Timotheo?

⁴ Timotheo o ne a ise a fetse kabelo ya gagwe mo bodiheding, jalo Paulo o ne a kwala jaana: “Kea gu laea mo ponoñ ea Modimo, le ea ga Keresete Yesu, eo o tla atlholañ batshedi le bashwi, le ka go bōnatshèga ga gagwè, le ka bogosi yoa gagwè, ka re, Rèra lehoko; u tlhōahale go le lobaka le go se lobaka; u tlhotlhomisè, u kgalemèlè, u laeè ka bopelotelele yotlhe le ka go ruta. Gonne motlha o tla tla o ba se ketlañ ba iteseletsa go utlwa thutō e e itekanetseñ ka ōna; me ereka ba le ditsèbè tse di babanyègañ, ba tla ikgobokanyegetsa baruti ba ba kaha dikgatlhegoñ tsa bōnè; Me ba tla icubula mo boamarureñ, ba hapogèla kwa mainaneñ. Me wèna u nnè tekanō mo diloñ cotlhe, u ichokèlè bothata, u dihè tihō ea motsamaisa Mahoko a a Molemō, u shwetsè tihèlō ea gago.”—2 Timotheo 4:1-5.

5. Ke ka ntlhayang fa kgakololo ya ga Paulo e le e e re kgatlhisang thata?

⁵ Kgakololo eo e e molemo e tshwanetse ya bo e ile ya solegela Timotheo molemo thata, a mme le rona, e tla re solegela molemo? Re tshela mo “metlheñ ea bohèlō” eo Paulo a kwadileng kaga yone. Batho ba bantsi gompieno ba na le ‘sebopego sa poifomodimo mme ba latotse maatla a yone.’ (2 Timotheo 3:1-5) Ba ba ntseng jalo ba sekametse mo go reetseng “baruti” bao ba tla babanyang ditsebe tsa bone. Lefa go le jalo, mo godimo ga go rera lefoko mo phuthegong, Bakeresete ba boammmaaruri ba na le tlamego ya go rerela botlhe phatlalatsa, go batla bao ba tla arabelang “lehoko.” Jalo kgakololo eno ea dira le gompieno go basupi ba ga Jehofa ba Bakeresete.

Kafa O ka Swetsang Bodihedi ka Botlalo ka Gone

6. (a) Ke ka ntlhayang fa re tshwanetse go “rera lehoko”? (b) Ke melemo efe e e nnang gone ka go tlhokomela ka kelotlhoko kafa re dirang bodihedi jwa rona ka teng?

⁶ Bodihedi bo na le dikarolo tse di farologaneng; go na le dilo tse dintsi tse modihedi a tshwanetseng go di dira. Santlha, Paulo o umakile, go “rèra lehoko.” Leno ke lefoko leo Jehofa a kgethileng go le senolela batlhanka ba gagwe. Ke lefoko la boammaaruri le Jesu a buileng ka lone. Jehofa o le letla go itsise gore molaetsa wa gagwe ke wa setho mo nakong e e beilweng, a nna le basupi ba gagwe ba ba mo godimo ga lefatshe go emela letlhakore la gagwe la kganetsano. Tsela ya ga Jehofa ke go neela molaetsa wa tlhagiso pele a tsaya kgato. (2 Ditihalō 36:15, 16; Isaia 42:9; 43:12; Yona 3:2-4) Molaetsa wa gagwe o tla felela ka molemo go bao ba o reetsang; ba ka bona lefelo la pabalesego. Bao ba sa batleng go o tsaya-tsia ba tla tshwanelwa ke go bona matswela a a bosula fa Jehofa a tsaya kgato go diragatsa katlholo ya gagwe. Ba tshwanelwa ke gore ba ikarabelele ka bobone. (Ditihō 20:20, 21, 26, 27) Lefa go le jalo, tsela e e botlhale ya modihedi wa Modimo ke: “U iponè, u bo u bōnè le go ruta ga gago. U nnèlè ruri mo diloñ tse; gonne ka go diha yalo u tla bo u ipoloka u ba u boloka ba ba gu utlwañ.”—1 Timotheo 4:16.

7. Ke ka ntlhayang fa tiro eno e le e e potlakileng le eleng fa maemo a lebega a sa siama?

⁷ Tiro ya go rera e dirwa tlase ga maemo a a farologaneng, mme e tshwanetse ya tswelela. “U tlhōahalè go le lobaka le go se lobaka,” Paulo o ne a kwala jalo. Molaetsa o ka raya botshelo mo bathong. Ka gone, go sa kgathalesege gore ke maemo afe ao modihedi yo o ikanyegang o iphitlhelang go one, o tsaya molaetsa e le o o potlakileng mme o bona ditsela tsa go dira gore lefoko leno le utlwiwe, le eleng fa kganetso mo tirong ya go rera e tsoga. Re ka bona seno ka phepafalo ka sekao sa ga Jesu le pego e e mo bukeng ya Bibela ya Ditihō.

8. (a) Ke eng se se ka thusang modihedi go rera lefoko? (b) Ke ka ntlhayang fa go laya e le karolo ya bodihedi?

⁸ Gore modihedi a tle a rere lefoko, go sa kgathalesege gore ke mo teng kana ka kwantle ga phuthego, o tshwanetse a tlwaelana le Lefoko la Modimo, a nne seithuti sa lone. O tshwanetse a ipha nako go ithuta, go akanya le go tlhatlhanya, a batla go le tlhaloganya sentle. Go rera go tshwanetse ga nna mo motheong wa go tlwaelana le dithuto tsa boammaaruri. Paulo o ne a bolelela Tito gore molebedi o tshwanetse a ngaparela “lehoko ye le ikanyègañ ye le leñ kaha thutoñ, gore a tlè a nonohè go laea ka thutō e e itekanetseñ, le go henya baganetsi.” (Tito 1:9) Lefoko la Modimo le direla jaaka leo ka lone go ka kgalemelwang bao ba duleng mo tseleng ya seo Jehofa a se batlang, go baakanya mosinyi ka molemo wa gagwe. Seno sotlhe ke karolo ya go swetsa bodihedi ka botlalo.

Tao E A Tlhokafala

9. Ke ka ntlhayang fa tao ya Bokeresete e tlhokafala?

⁹ Ka dinako tse dingwe dikgakololo dia tlhokafala go bao ba ka tswang ba sa dire sengwe le sengwe jaaka ba tshwanetse kana bao ba tlhaelang kanaanelo le tlhoafalo mo kobamelong ya ga Jehofa. Tao ya Bokeresete e anaanelwa thata ke bao ba ratang Jehofa. Ba itumelela go utlwa seo Jehofa a se buang mme ba se tseye jaaka dijo tse di humileng tsa semoya. (Isaia 55:3; Bahebera 12:5, 6) Jalo ke tirelo e e molemo go badiri ka rona—mme gape le go batho bao ba sekametseng mo go obameleng Jehofa—go ba laya ka Lefoko la Modimo. Paulo ka boene o ne a laya thata.—Baroma 15:30; 16:17; 1 Bakorintha 1:10, 11; 1 Timotheo 4:13; 6:11, 12; Bahebera 10:24.

10. Ke ka ntlhayang fa bopelotelele bo tlhokafala malebana le go neela tao?

¹⁰ Modihedi yo o ineetseng o tshwanetse go itse gape kafa a ka tlhagolelang loungo Iwa moya wa Modimo ka gone. Go ka nna ga tlhoka bopelotelele le boitshoko tse di kgolo go leka go laya bao ba sa arabeleng ka pele. Bangwe ba ka nna ba bontsha le eleng tlhaelo ya kanaanelo ya maiteko ao a dirwang go ba neela tao le kgothatso. Lefa go ntse jalo, go tshwanetswe ga dirwa, segolo-bogolo ke bagolwane botlhe ba Bakeresete. Botswerere jwa go ruta bo a dira. Fa motho a dirisa Lefoko la ga Jehofa thata, o tla kgona go nna bobebe segolo mo go le diriseng. Fa morutisi a itse seithuti, o tshwanetse go kgona go fetisetsa boikitsiso go ene. Paulo o tlhalosa sentle mokgwa o o tshwanetseng go 1 Bathesalonia 5:14: “Rea lo laea, ba ga echo, rea re, tlhagisañ ba ba huduañ, nametsañ ba ba lapañ pelo, pepetletsañ ba ba bokōa, lo nnè pelotelele mo go botlhe.”

Hularela Batenegi

11. Ke eng seo re tshwanetseng go se dira ka batenegi?

¹¹ Paulo o ne a batla gore Timotheo a boloke tekatekano ya gagwe, kana gore a ikgape mo dilong tsotlhe. Gaa tshwanela go itetlelela go nna jaaka bao ba sa tsamaisaneng le thuto e e itekanetseng le bao ba itsubulang mo boammaaruring. Modihedi wa boammaaruri wa Modimo gompieno gaa tshwanela go tshwenyega ka mo go sa tlhokafaleng le go fuduega mo ditirong tsa gagwe fa a fitlhela gore bangwe ba tlogela Lefoko la Modimo le thuto e e itekanetseng ya lone. Re ile ra tlhagisiwa go sa le pele gore go tla nna le batenegi le batho bao ba tla batlang gore ditsebe tsa bone di babanngwe. Kgakololo e e tshwanang le e e mo go 2 Yohane 9-11, 1 Bakorintha 5:11-13 le 2 Timotheo 3:5 ga e neele sebaka sa go kopanela le bao ba tlogelang boammaaruri. Lefa e le gone go reka kana go bala dikwalo tsa bone. Go na le ba bantsi ba ba ratang go utlwa boammaaruri, mme ke ka bone re nang le bolekane jwa Bokeresete.—1 Timotheo 6:20, 21.

12. Ke ka ntlhayang fa modihedi wa Mokeresete a tsaya kemo eno e e tsepameng?

¹² Paulo o ne a gakolola ka gore: “Me batho ba ba boshula le batsietsi ba tla nna ba shulahalèla pele hèla ba tsietsa, ba bile ba tsiediwa.” (2 Timotheo 3:13) Mo leseding la tlhagiso eo ya go sa le pele, modihedi wa Mokeresete gaa tsamaisanye ka gope le ba ba ntseng jalo. O tsaya-tsia tlhagiso e e molemo ya ga moaposetoloi Paulo: “Me wèna u nnèlè ruri mo diloñ tse u di ithutileñ le tse u di tlhomamisedicweñ, ka u itse ba u di ithutileñ mo go bōnè; Le yaka dikwalō tse di boitshèpō u sa le u di itse mo bonyaneñ yoa gago, e le tse di nonohileñ go gu tlhalehisetsa polokoñ ka tumèlō e e mo go Keresete Yesu. Lokwalō loñwe le loñwe lo lo kwadilweñ ka tlhotlheleco ea Modimo, lo bile lo molemō go ruta, le go kgalemèla, le go shokolola, le go kaèla ka tshiamō: Gore motho oa Modimo a tlè a nnè boitèkanèlō, a iketleeleletse rure tihō ñwe le ñwe e e molemō.” (2 Timotheo 3:14-17) Thuto ya ka metlha ya Lefoko la Modimo ke lesego go bao ba batlang go swetsa bodihedi jwa bone.

Masego A Bolekane jwa Bokeresete

13. Go dira mo bodiheding le Paulo go ne ga solegela Timotheo molemo jang, mme go ka re solegela molemo jang?

¹³ E ne e le lesego la mmatota go Timotheo go bo a ile a nna le dingwaga tsa bolekane le Paulo, ka a ne a kgona go lebelela kafa modihedi yo o ikanyegang, yo o godileng wa Modimo a itshwarang ka teng. Paulo o ne a dirisa maitemogelo a bone jaaka kgakololo e e molemo go Timotheo: “Me wèna u latetse thutō ea me, le mokgwa, le boikaèlèlō, le tumèlō, le bopelotelele, le loratō, le boichōkō, Le dipogishō, le dibotlhoko; eboñ dilō tse di nkwetseñ mo Atioka, le mo Ikonio, le mo Lusetera; eboñ dipogishō tse ke di bogileñ: me Morèna o nkgolotse mo go cōna cotlhe hèla. E, le botlhe ba ba ratañ go tshela ka poihōmodimo mo go Keresete Yesu ba tla bōna pogishō.” (2 Timotheo 3:10-12) Lemororo gompieno re sa lebagana ka tlhamalalo le Paulo, pego e e atlabetseng ya ditsela tsa gagwe e e fitlhelwang mo Bibeleng le rona e ka re thusa.

14. Ke ka ntlhayang fa re tshwanetse go ipaakanyetsa go itshokela bothata?

¹⁴ Paulo o ne a umaka dipogiso le dipogo tsa gagwe, mme kgakololo ya gagwe go modihedi wa Mokeresete ke go iketleeleletsa go itshokela bothata. (2 Timotheo 4:5) Gantsi goa tlhokafala go feta mo pogisong nngwe ya mofuta o o rileng mo go swetseng ka botlalo bodihedi jwa rona. Ke tshiamelo go boloka bothokgami tlase ga teko le go dira gore pelo ya ga Jehofa e ipele. (Diane 27:11) Bosupi bo ka felela ka kgalaletso ya ga Jehofa!

Tiro ya Moefangele

15. Ke ka ntlhayang fa go tshwanetswe ga abalanwa mo boefangeleng jaaka re diragatsa ka botlalo bodihedi jwa rona?

¹⁵ Boefangele bo tsaya karolo e kgolo ya nako ya modihedi yo o ikanyegang wa Mokeresete. Jesu o ne a re: “Me Mahoko a a Molemō a na le go rèrèlwa merahe eotlhe pele.” (Mareko 13:10) O ne a go phepafatsa gore bokhutlo bo ne bo se kitla bo tla go fitlhela mafoko a a molemo a rerwa sentle ka botlalo. Paulo o ne a na le tshiamelo ya go nna le seabe mo mafokong a a molemo le badumedi ba bantsi go ralala Mmuso wa Roma. Seno se ne sa felela ka go bopiwa ga diphuthego tse disha le go tlhongwa ga balebedi. E ne ya re go tswa foo, ba abalana le bakaulengwe le bokgaitsadi ba bone ba Bakeresete mo tirong ya boefangele le mo go atolosetseng tiro ya go rera kgakala le go ralala naga. Bogolo jwa tiro bo dirwa fela jaaka Paulo a ne a e tlhalosa, ‘go ruta phatlalatsa le go tsamaya ka ntlo le ntlo.’ (Ditihō 20:20) Go ne go na le matswela a a molemo ka nako eo, mme go na le matswela a a molemo thata gompieno fa go rerwa ga Bokeresete go dirwa lefatshe ka bophara.—Yohane 14:12.

16. Ke bosupi bofe jo bo bontshang gore ba bantsi ba dirisa kgakololo ya ga Paulo mo go 2 Timotheo 4:5?

¹⁶ Ba bantsi ka tumelo ba itseela dipaka tsa go atolosa ditiro tsa bone tsa tiro ya boefangele. Diketekete di ile tsa tsenela karolo ya borongwa, mme makgolo a a diketekete a nna le seabe mo dibopegong tsa tirelo ya bobulatsela. Mo mafatsheng a a 205 go na le baefangele ba ba fetang 2 650 000 ba ba direlang mo diphuthegong tse di fetang 46 000, mme dipalo di ntse di oketsega. Dilo tseno tse di gakgamatsang ke tshupo ya gore batlhanka ba ba ineetseng ba ga Jehofa ba isa pelong thomo ya bomodimo go bone le go ‘swetsa ka botlalo’ bodihedi jwa bone.

Go Swetsa Tiro

17. Jehofa o eletsa go bona batlhanka ba gagwe ba dirang malebana le tiro e ba e abetsweng gompieno?

¹⁷ Jehofa o abetse batlodiwa ba gagwe bodihedi, mme “boidiidi yo bogolo” bo dira mmogo le bone. Ka boperofeti, mo go Esekiele kgaolo ya 9, tiro e tshwantshiwa le go tshwaya mo diphatleng tsa bao ba fegeIwang le go sonelelwa. Re itse go tswa mo boperofeting joo gore nako e tla tla fa monna yo o tshotseng inka ya mokwaledi a tla reng: “Ke dihile hèla yaka u ntaotse.” Jehofa o itumelela batlhanka ba gagwe fa ba dira jaaka a ba laotse.—Esekile 9:4, 11; Genesise 6:22; 1 Bakorintha 4:2.

18, 19. Dingwe tsa ditsela tseo jaanong o ka dirisang tao ya ga Paulo e e mo go 2 Timotheo 4:1-5 ke dife?

¹⁸ Jaaka re lebelela maemo a lefatshe a diragala tumalanong le dipolelelo-pele tse di mabapi le metlha eno ya bofelo, re go bona sentle-ntle fela gore go potlakile go le kanakang ka tiro ya go rera e re e abetsweng. Matshelo a a kopanyelediwa. Go phuthwa go a diragala mme Jehofa o go akofisa ka nako e e leng ya gona. (Isaia 60:22) Ka gone, lefa boikarabelo jwa gago e ka nna bofe jaaka motlhanka yo o ineetseng wa ga Jehofa, bo dire go mo itumedisa ka botlalo. (Bakolosa 1:10; 3:23, 24) Gakologelwa tiro e o e neiIweng go e dira mme o leke go e swetsa ka botlalo. Fa e le gore o lebeletse ditiro dingwe mo Holong ya Bogosi, dira tiro eo ka botlalo. Fa o abetswe ditiro dingwe go setlhopha sa Thuto ya Buka ya Phuthego, dira ka katamelano o bo o laye le go kgothatsa ba bangwe. Fa e le gore o mmulatsela kana morongwa, tlhomamisega gore o dira ka natla go fitlhelela mekgele ya gago ya tirelo.—Baroma 12:6-9.

¹⁹ O ka nna wa ipotsa gape gore, A ke dira sengwe se se oketsegileng go thusa Bakeresete ba bangwe, segolo-bogolo ba basha mo phuthegong, go ba agelela? Fa e le gore karolo ya bodihedi jwa gago ke go nna mogolwane mo phuthegong, itse ponalo ya “lecomane” mme o tlhokomele ka manontlhotlho bao o kopanelang le bone. Tlhokomela thata gore go se nne le bape ba ba tla tsidifalang kana ba ba sa ungweng mabapi le kitso ya boammaaruri ya Morena wa rona Jesu Keresete. (2 Petere 1:5-8) Godimo ga tsotlhe, tsoga maroko go seo o se dirang mo tirong ya boefangele gore e re kwa bokhutlong o “shwetsè tihèlō ea gago.”

A O A Gakologelwa?

◻ Boemo jwa ga Paulo fa a ne a kwala 2 Timotheo e ne e le bofe?

◻ Ke ka ntlhayang fa go le botlhokwa-tlhokwa go rera lefoko?

◻ Ke ka ntlhayang fa tao e le botlhokwa?

◻ Baruti ba maaka go tshwanetswe ga dirisanwa le bone jang?

◻ Ke ka ntlhayang fa boefangele bo le botlhokwa mo go kalo gompieno?

[Setshwantsho mo go tsebe 16, 17]

Lekwalo la bobedi la ga Paulo go Timotheo le mo thusitse ‘go swetsa tirelo ya gagwe ka botlalo’