Keresemose—Ba Bantsi ba Bona Boitumelo Eseng Kotsi
“GO BONALA ekete go na le motlholo mo leineng la Keresemose,” go kwadile jalo mosha Charles Dickens. “Mafufanyana le dikgaogano tse di sa tlhokafaleng di lebetswe . . . A Keresemose eo e ka nna ngwaga otlhe?” Go bonala ekete, Dickens, o ne a itumelela Keresemose thata, ebile o e bueletse go dimilione ka dibuka tse di jaaka A Christmas Carol. Letsatsi pele ga Keresemose, buka eno e santse e balelwa kwa godimo mo lelapeng (go begilwe gore Moperesidente wa pele wa United States Franklin Roosevelt o ne a latela mokgwa ono). Fa Charles Dickens a ne a swa, ngwana mongwe o ne a bolela jaana: “A Dickens o sule? A ‘Father Christmas’ le ene o tla swa?” Mme “Father Christmas” kana Santa Claus, o santse a tshela fela thata mo megopolong le mo dipelong tsa bana ba bantsi.
Ga se bana fela ba ba lebang mokete ono jaaka o o itumedisang, e seng o o kotsi. Mo-Australia mongwe yo o tletseng tlhotlheletso o ne a amiwa ke seo a se boneng ka letlhabaphefo leo le neng le butswe ka Letsatsi la pele ga Keresemose la 1937. Radio e ne e buletswe kwa tlase, mme go dutse mosadimogolo mongwe moo, a tshotse kerese ka letsogo, a reeditse dipina tsa Keresemose. Ka Keresemose e e latelang o ne a rulaganya setlhopha se se neng se kokoane mo lebaleng le le bidiwang “Carols by Candlelight.” E ne e tshwanela maitsiboa a selemo sa Australia sentle, mme tumo ya yona ya anama ka pele. Gompieno, go kgabaganya naga eo yotlhe, batho baa kokoana, ba tshuba kerese le go opela dipina tsa Keresemose.
Francis wa Assisi e ne e le mogaka wa mmatota mo tirong ya Keresemose. Ka 1224 o ne a tshwara tirelo ya Keresemose mo bojelong jwa tota ka kgomo le esele tse di tshelang, go itumedisa batho ba bantsi ba toropo. Ka pele pono ya bojelo ya tuma, mme ka nako ya Keresemose bo santse bo bontshwa mo matlong le mo dikerekeng tse dintsi tsa Makatoliki. Kereke ya Roma, Aracoeli, e na le pono ya bojelo ka ngwana yo o kgabisitsweng ka gauda le ka maje a botlhokwa. Basadi ba tlisa bana ba bone go tla go obamela “ngwana yo o boitshepo” yono. Go bapa le setshwantsho seno go mekowa ya makwalo go tswa lefatsheng lotlhe a kopa thuso le dikgakgamatso.
Mo Engelane, Kgosana Albert (wa Mojeremane) le mosadi wa gagwe, Kgosigadi Victoria, ba ne ba tumisa setlhare sa Keresemose ka go dirisa se le sengwe mo moletlong wa Keresemose wa 1841. Ka pele Weihnachtsbaum ya Sejeremane e ne ya tuma thata mo bathong ba Britani. Moragonyana, baruti ba babedi ba Anglican ba ne ba akantsha gore setlhare sa Keresemose le bojelo di dirisiwe mo Kerekeng e kgolo ya St. Paul, mo London. Seno sa ganediwa, ka jalo Kgosi George V o ne a kopiwa go neela Kereke e kgolo eno ditlhare tse pedi, a dira jalo. Fa e sale go tloga foo, bojelo le ditlhare di ne tsa nna karolo ya pono ya December koo, mme dikereke tse dingwe tsa Maprosetanta le tsone di dirisa matshwao ano.
Mekgwa ya Keresemose e ka farologana go ya ka dinaga, mme ka nako ya Keresemose, go tshubilwe mabone le ditlhare tse ditala, bojelo le dipina tsa Keresemose, diphathi le dimpho, ke dilo tseo bangwe ba sa kgoneng go di tila. “Ke ngwana ofe yoo Letsatsi la Keresemose le seng legolo go feta malatsi a mangwe otlhe mo ngwageng go ene?” go boditse jalo ra-ditiragalo Pimlott. Mme fa Keresemose e bonala e itumedisa mo go ba bantsi jaana, ke ka ntlhayang fa mogopolo wa kotsi o tsenngwa mo kgannyeng eno? Ntlha ke gore, tshimologo ya boammaaruri ya Keresemose ea feretlha, mme diphelelo tsa yone di ka gobatsa. Jang jalo?