Go Gatela Pele Le Phuthego ya Modimo

Jaaka go boletse Grant Suiter

KA 1922, fa ke ne ke le dingwaga tse 14, rre o ne a fudusa lelapa la rona go tswa Chicago, Illinois, go ya California. Fa re ntse re le mo tseleng re ne ra etela ditsala tsa rona kwa Idaho. Ba ne ba re itsise gore mo California go ne go na le batho ba ba neng ba bolela go re go ya ka Bibela, dimilione tsa batho ba ba neng ba tshela ka nako eo ba ne ba se ketla ba a swa.

Ka bokhutshwanyane fela morago ga go fitlha mo California re ne ra bona kitsiso mo koranteng ya dikgang e e reng “Didikadike tse ga Jaanong Di Tshelang ga Di Ketla Di Swa.” E ne e le setlhogo sa puo ya phatlalatsa e e neng e tla neelwa kwa San Jose. Ka tsela eno rre o ne a kgona go bona Diithuti tsa Bibela (jaaka Basupi ba ga Jehofa ba ne ba itsiwe ka nako eo), mme a simolola go re isa kwa dipokanong tsa bone tsa phatlalatsa.

Mmè o ne a batla gore ke tsenelele mo sekolong sengwe sa Sontaga sa kereke. Lefa rre a ne a sa tseisanye molelo le bareri ba ditumelo tsotlhe, o ne a dumalana gore ka gongwe seno se ne se ka ntswela molemo. Ka jalo ke ne ka nna wa ka metlha mo sekolong sa Sontaga sa Methodist. Ya re kgabagare ka nna ramadi wa sekolo mme ka tshameka mo setlhopheng sa “basketball” sa sone. Ka nako e e tshwanang, lelapa la rona le ne le nna gone dipuong tsa phatlalatsa tse di neng di tshwarwa ke Diithuti tsa Bibela mo San Jose, dimmaele di sekae fela go tloga fa legaeng la rona mo Santa Clara.

Rre o ne a batla go bona maemo a tokafadiwa mme ya re ka ntlha ya sone seo a buelelela bontlhopheng ba dipolotiki ba ba farologaneng, le e leng go kwala leina la mongwe wa bone mo galaseng e e fa pele ya koloi ya rona ya Model T Ford. Kwa dipokanong Diithuti tsa Bibela ba ne ka bonolo ba mmolelela gore tsholofelo ya mmatota ya setho e ne e se mo maitekong a sepolotiki mme mo Bogosing jwa Modimo ka Keresete Jesu. Rre o ne ka tsela nngwe ekete o a dumalana mme a nne a bolele gore, lefa seo se ka tswa sotlhe se ne se siametse isagwe, mo nakonyaneng eno o ne a tla rata go dira gore dilo di nne botoka ka mo go ka kgonegang ka ditsela tsa sepolotiki. Lefa go ntse jalo, fa go ntse go ya, lelapa lotlhe la ga etsho​—mmè, rre, kgaitsadiake le nna​—re ne ra nna le temogo e kgolwane ya boammaaruri jwa Bibela le dipatlafalo tsa Lefoko la Modimo.

Kgolo ya Semoya

Kgabagare, ka ntlha ya segakolodi, ke ne ka bona ke ka se kgone go tswelela mo sekolong sa Sontaga sa ba Methodist, ka jalo ke ne ka se tlogela. Ka 1923 lelapa la rona le ne la ya go aga dimmaele di sekaenyana kwa Oakland, koo rre o neng a nna le lebenkelenyana le le nyenyane la dijo mme nna ka ya sekolong se segolwane. Ya re ka go lemoga gore Diithuti tsa Bibela di ne di sa goge, ke ne ka leka go kgothaletsa Rre go tlogela go rekisa disekerete mo lebenkeleng la gagwe. O ne a sa dumalane le nna mme legale a buisana kgang le mongwe wa Diithuti tsa Bibela, Robert Craig.

Morago ga puisano ya bone rre o ne a fetsa ka gore a rekise kgwebo yotlhe mme a tlogele Oakland. Phetso ya gagwe e ne ya tlhotlhelediwa gape ke maiteko a setlhopha se se neng se batla go mo tsenya mo kgwebong ya tsietso, eo a neng a lemoga gore e ne e sa dumalane le seo a neng a se ithuta ka Oakland Ecclesia (Phuthego) ya Diithuti tsa Bibela. Mo e ka batlang e nna ka nako eno, ka tumelelo ya batsadi ba me, ke ne ka tlogela sekolo se segolwane morago fela ga ngwaga le sephatlo ka ntlha ya tlhotlheletso ya boitsholo jo bo sa siamang mo dikolong.

Re ne ra fudugela dimmaele di sekaenyana kwa Mountain View, gautshwanyane le San Jose go nna gone gape mo dipokanong tsa phuthego teng koo. Rre o ne a nna le lebenkelenyana le lengwe, mme ke ne ka dira mo go lone ka nako e e tletseng, ke sa amogele le fa e le madinyana ape mme ke ne ke mo thusa fela. Rre o ne a beeletsa Tora ya Tebelo le The Golden Age (e jaanong e bidiwang Awake!), mme abo ke ne ka ipelela jang segolo bogolo The Golden Age! Ke ne ke ikutlwa go re ke ne ke bona boikitsiso jo bo oketsegileng go na le joo ke ka bong ke ile ka bo amogela fa ke ka bo ke ile ka nna fela mo sekolong se segolwane.

Dipokano tsa phuthego di ne di simolola go nkgatlha fela thata mo go oketsegileng. Ke ne ka bona setlhogo se se kgatlhisang segolo bogolo go tokololo ya Tora ya Tebelo ya March 1, 1925 ka setlhogo “Birth of the Nation.” Boikitsiso koo bo ne bo tshwaya kgatelo pele e kgolo mo kutlwisisong ya Diithuti tsa Bibela mabapi le Bogosi jwa ga Jehofa ka Keresete Jesu, e leng, gore bo ne jwa tlhongwa kana jwa theiwa kwa legodimong ka ngwaga wa 1914. Ka nako eno lelapa la rona le ne le simolola go nna ditsala tse di atamalaneng le Diithuti tsa Bibela mo Mountain View, le senya nako e ntsinyana le bone mo malapeng a bone.

Kgabagare re ne ra ithuta gore thapelo e ne e se karolo fela ya dipokano tsa phuthego mme ditsala di ne di rapela gape mo magaeng a bone kwa bothokong, go akareletsa le go bontsha malebogo ka nako ya dijo. Gore dilo di siame sentle rre o ne a batla gore a bone thapelo e dirwa ka tsela e e tshwanetseng. Ga ntsi o ne a e leba fela jaaka boitimokanyi. Ke gakologelwa fa ke ne ke le teng fa a ne a buisana le mongwe wa Diithuti tsa Bibela ka thapelo yo a neng a etile kwa lebenkeleng la gagwe. Moeti o ne a supela kafa re tshwanetseng ra bontsha malebogo go Jehofa Modimo ka masego a rona ka teng. Mme rre o ne a mmotsa gore go ka nna jang gore re lebogele Jehofa masego otlhe a rona fela mme gone e le ruri re sa mo tshwae phoso ka ntlha ya mathata otlhe a rona. Lefa go ntse jalo, kgabagare, jaaka lelapa, re ne ra utlwisisa thapelo sentle mme ra solegelwa molemo ke paakanyetso eno e e lorato ka botlalo.

Paakanyetso ya phuthego eo e neng ya ntsholegela molemo segolo bogolo e ne e le Sekolo sa Baperofiti. Eno e ne e le pokano ya bagolwane le batho ba bangwe ba senna ka boikaelelo jwa go amogela thapiso ya go bua phatlalatsa. Moithuti o ne a tle a neele polelo eo a neng a e baakanyeditse mo setlhogong se a neng a se abetswe, mme ba bangwe ba mo neele kgakololo e e thusang. Lefa go le jalo, go nyadiwa mo go utlwalang mo ke neng ka go amogela mo sekolong go ne go sa bapisege le seo ke neng ka se amogela mo go rre ka sebele morago ga go re a nne gone go nngwe ya dithulaganyo tsa go nkutlwa ke leka go neela puo.

Lelapa la gaetsho le nna re ne ra thusiwa fela thata ke baeti, bao e neng e le baemedi ba ba kgethegileng ba Watch Tower Society. Diphuthego di ne di dira dikopo ngwaga le ngwaga kwa Mokgatlhong go re ba ba etele. J. A. Bohnet o ne a nkgatlha fela thata-thata mme o ne a nthusa ka mo go kgethegileng. E ne e le monna yo o neng a na le dinonofo tse di neng di dira gore a ratege mo bathong ba bangwe mme fa mo go ba bangwe di ne di nna le matswela a sele. O ne a rata Jehofa ebile ka phepafalo a le boikobo, mme o ne a boloka nonofo eno e fitlhilwe ke bokafantle jo bo makgwakgwa.

Kolobetso le Bodihedi jwa Bokeresete

E ne e le polelo ka Mokaulengwe Bohnet mo legaeng la Moithuti wa Bibela mongwe mo Mountain View e e neng ya ama botshelo jwa me thata. Jaaka ke ne ke mo reeditse a bua ka ditshiamelo tsa go direla Jehofa le ka boikarabelo jwa go dira jalo, ke ne ka lemoga se ke tshwanetseng go se dira le seo ke neng ke batla go se dira. Ka gone ke ne ka dira boineelo jwa botho go Jehofa, mme ka nako e e tshwanang maloko a mangwe a lelapa la gaetsho a ne a dira jalo le one. Ka Phalane 10, 1926, mo San Jose, California, rotlhe re le mmogo re ne ra supa boineelo jwa rona go Jehofa Modimo ka go tsenngwa mo metsing.

Dikolobetso ka nako eo di ne di dirwa ka tsela nngwe e e farologaneng le gompieno. Mogolwane yo o neng a nkolobetsa o ne a re: “Mokaulengwe Grant, mo leineng la ga Rara le la Morwa le la moya o o boitshepo, jaanong ke go kolobetsa mo go Keresete.” Mongwe le mongwe wa rona yo o neng a kolobediwa o ne a apara seaparo se seleele se se matsogo makhutshwane se sentsho, se se neng se tswa mo molaleng se ya go fitlha mo magwejaneng. Go tlhomamisa gore seaparo se ne se sa tsholetsege se bile se apesitse mokolobediwa sentle se ne se dirwa bokete thata kwa tlase kwa lekojeng ka bompolokwane ba menoso.

Morago ga kolobetso, le morago ga re sena go apara, rre a raya mogolwane yo a neng a okametse kolobetso a re: “Lona batho ke lona le tshola dibuka, a gago jalo? Re batla go dira tiro eo le rona gape jaanong.” Ka jalo lelapa la rona la simolola mo bodiheding jwa tshimo.

Go tsena ga me ga ntlha mo tirelong ya tshimo e ne e le fa mogolwane, H. O. Lawrence, a ne a rulaganyetsa go ntsaya. O ne a ntlhomelela ka dingwe tsa dibukana mme a nkgweeletsa kwa tirelong mo San Jose. Ke ne ke gopotse gore o ne a tla dira le nna ka ntlo le ntlo, mme o ne a mpolelela gore ke fologe mo kareng mme a re, “Jaanong o ka tsamaya mo tlhakoreng je ja matlo.” Mme he a tsamaya. Ka jalo ke ne ka tsamaya mo letlhakoreng jeo ja matlo mme ka tsamaisa dibukana di le tharo ka moneelo wa disente tse 25 mme ke ne ke itumetse fela thata. Ka ntlha ya go abalana mo bodiheding jwa Bokeresete jalo, eleruri ke ne ka ikutlwa ke le karolo ya phuthego ya Modimo.

Ka nako yone eno re ne ra amogela ditaelo mo kaelong ya Rona ya kgwedi le kgwedi ya tirelo ya The Bulletin (e jaanong e bidiwang Tirelo ya Rona ya Bogosi) go bolelela mungwantlo sengwe ka ga phuthego ya ga Diabolo. Ka jalo fa batho ba ne ba nkoba ka go mpolelela go re ba ne ba sa kgatlhegele ke ne ke nna ke ganelela fela mo go tsweleleng ke ba bolelela ka go nna gone ga phuthego ya ga Diabolo le tshenyego ya yone e e tlang. Seno se ne se fapaane ele ruri le neelano ya rona ya ka metlha kaga tebelelo ya go tshelela ruri mo lefatsheng la Paradaise kwantle ga go swa.

Phuthego ya San Jose e ne e tsamaya dikgala tse dileele go fitlhelela batho ka molaetsa wa Bogosi. Seo se neng se bitswa ditlhopha tsa go etela batho di ne di tswela kwantle ka metlha go ya Santa Clara Valley le dithabeng tse di tikologong. Ke sa ntse ke gakologelwa go sena fa o ka lebang teng fa lefatshe le sa apesiwang ka masimo a ditlhare tsa maungo tse di thuntseng. Re ne re tsamaya re itsholetse mofago re be re tlhola letsatsi lotlhe koo, ka dinako tse dingwe re tsamaya dimmaele tse 75 (121 km) kana go feta go ya ko kgaolong eo re neng re ya go neela bosupi go yone.

Radio Station KFWM mo Oakland e ne ya dirisiwa ka dingwaga tse dintsi go anamisa molaetsa wa Bogosi, mme diphuthego tse di farologaneng mo kgaolong e e tikologong di ne di fapaanela ka go baakanyetsa ka dithulaganyo tsa seromamowa mo mafelo-bekeng. Ke ne ka nna le tshiamelo ya go bala dithuto tsa Bibela ka didirisiwa tsa KFWM, jaaka e nngwe ka Phukwi 24, 1927. Go bidiwa ga ditlhaka tsa seromamowa seno go ne ga itshwanelegisa go emela ‘Kingdom For World of Mankind.’

Go Atolosa Tirelo ya Me

Letsatsi lengwe fa re ne re pagame koloi ya rona go tswa dipokanong re ya gae, Mokaulengwe Lawrence, yo o neng ya re Iwantlha a nkisa tirelong ya tshimo, o ne a nneela fomo ya ikopelo go direla kwa ntlo-kgolo ya Mokgatlho mo Brooklyn, New York. Nako nngwe pele ga seno, moragonyana fela ga kolobetso ya rona, ke ne ka utlwa rre a tlhaeletsa mmè go re fa a ne a le mo boemong jwa me o ne a ka dira tirelo ya ga Jehofa tiro ya botshelo jwa gagwe. Seno ke se ke neng ke se batla le nna, mme ka ikutlwa gore ka go dira ikopelo mo Bethele ke ne ka fiwa sebaka sa go dira seno.

Tokololo ya Motsheganong 15, 1928, ya Tora ya Tebelo e ne ya itsise gore go tloga Phukwi 30 go fitlha go Phatwe 6 go ne go tla nna le kopano ya merafe-rafe ya Diithuti tsa Bibela mo Detroit, Michigan. Ke ne ke batla ka matlho a mahibidu go nna teng, mme lelapa la gaetsho le ditsala di ne tsa dira gore go kgonege go re ke dire jalo. Ka nako ya kopano Donald Haslett, mokwaledi wa ga J. F. Rutherford, mookamedi wa Mokgatlho, o ne a itsise go tloga seraleng gore bakaulengwe ba ne ba tlhokafalela tirelo ya Bethele. O ne a bolela gore bao ba neng ba eletsa go ka ikopela ba ne ba ka botsolotsiwa ke Mokaulengwe Rutherford. Ke ne ka arabela, ka tlatsa fomo e nngwe ya ikopelo ya Bethele, mme Mokaulengwe Rutherford a mpolelela gore ke ipege kwa Bethele ka Phatwe 13, 1928.

Botlhe ba re neng ra ya go ipegela tirelo ya Bethele ka Phatwe 13, beke fela morago ga kopano ya Detroit, re ne re le 13. Ka nako eo maloko a le 95 a lelapa la Bethele a ne a dira mo kgatisong le thomelong ya dibuka tsa Bibela mo feketiring e e sa tswang go fediwa ya 117 Adams Street, mme mo e neng e ka nna palo e potlana e ne e dira mo legaeng la Bethele le mo diofising tse di farologaneng tsa Mokgatlho. Tiro ya me ya ntlha kwa Bethele e ne e le go ntsha dibukana mo motšhineng o o neng o dirisiwa go mena dibukana morago ga dikhabara di sena go tlapisiwa ka diwaitshana tse di kgomaretsang. Ke ne ka dira mo magatisetsong kafa tlase fela ga beke tse pedi fa ke ne ke fudusediwa kwa ofising, ebong ya Lephata la Tirelo. Go abalana mo tirong eno eleruri go ne ga ntira gore ke ikutlwe gore ke gatela pele le phuthego ya Modimo.

Ereka go se gope ko ke neng ke ka ya teng ka maitapoloso a me a ntlha, ka 1929, ke ne ka a senyetsa mo Bethele. Ka jalo ke ne ke le gone fa Mokaulengwe Rutherford a ne a neela polelo ya gagwe kwa Masonic Temple mo Brooklyn kaga tumelelo ya ga Jehofa boikepo le tlotlomatso ya leina la Gagwe. Pele ga nako eno re ne re sa tlhaloganye kgang eno, mme ka jalo puo ya ga Mokaulengwe Rutherford e ne e le tlhaloso e e kgatlhisang ya kgang e e botlhokwa-tlhokwa ya konokono.

Go Gatela Pele ka bo-1930

Se se kwa godimo ga tsotlhe ka 1931 e ne ya nna go amogela leina Basupi ba ga Jehofa, ka gone go baakanyediwa ka leina le le kitlanyang la batho botlhe ba Modimo. Ngwaga e e latelang lereo la go kgetholola phuthego ya batho ba Modimo le ne la fetolelwa go tsweng go “ecclesia” go ya go “company,” phetogo e e neng e theilwe mo kakanyetsong ya Pesalema 68:11 (Authorized Version). Ka jalo go kgabaganya lefatshe re ne re na le “dikhampane” tsa Basupi ba ga Jehofa mme e seng “ditlelase” kana “diekelesiasete.”

Ka 1932 rre o ne a rekisa bisinese ya gagwe mo California, mme ene, mmè le kgaitsadiake ba tsenelela tirelo ya bobulatsela. Ba ne ba ikagela koloi ya sekantlo, mme mo dingwageng tse di latelang tse 20 e ne ya direla jaaka legae la babulatsela la batsadi ba me. Kgaitsadiake, Grace, o ne a direla le bone go fitlhelela ka 1939 fa a ne a lalelediwa go nna leloko la lelapa la Bethele la Brooklyn. O santse a ntse a direla fano, mme fa e sale ka 1959 jaaka mosadi wa ga Simon Kraker.

Mookamedi wa feketeri, Robert J. Martin, o ne a tlhokafala ka Lwetse 23, 1932, mme Nathan H. Knorr a tlhomeIwa mo boemong jwa gagwe ke Mokaulengwe Rutherford. Mokaulengwe Knorr e ne ya re go le pele a bo a le ko thomelong ya dibuka.

Ngwaga e e latelang batho ba Modimo ba ne ba tsogelwa ke matshwenyego eleruri. Ka Ferikgong 30, 1933, Adolf Hitler o ne a nna Moetapele wa Jeremane, mme ka Seetebosigo 28, 1933, lekala la Jeremane la Watch Tower Society mo Magdeburg le ne la thopiwa mme la tswalelwa. Mopapa Pius XI o ne a bolela ngwaga wa 1933 e le “Ngwaga e e Boitshepo,” mme Mokaulengwe Rutherford ka bofefo fela moragonyana ga foo a bua mo diromamoweng di feta 55 ka ga setlhogo se se reng “Matswela a Ngwaga e e Boitshepo mo Kagisong le Tlhogonolofalong.” Ke ne ka nna le tshiamelo ya go nna moanamisi wa thulaganyo eo.

Kwa ditshimologong tsa bo-1930, kganetso e kgolo mo tirong ya rona e ne ya gola mme go ne go na le pogiso e e anameng. Basupi ba ga Jehofa ba ne ba rulaganyediwa ka “makgotlana” ka boikaelelo jwa go neela bosupi jo bo gagametseng jo bo popota mo dikgaolong tse di tsogetsweng ke matshwenyego. Mo Jeremane pogiso e ne ya oketsega go ya bokgakaleng jo e ne ya re ka Phalane 7, 1934, dikhampane tsa batho ba Modimo mo mafatsheng a mantsi tsa romela dithelekeramo kwa go Hitler di mo tlhagisa gore a khutlele go dira jalo.

Mo e ka nnang ka nako eno go ne go na le dipuisano tse dintsi gareng ga batho ba Modimo mabapi le gore “bontsintsi jo bogolo” jwa ga Tshenolō 7:9, Authorized Version, ke bomang. Go ne go dumelwa ka kakaretso ka nako eo gore e ne e le setlhopha sa bobedi se se sa ikanyegeng mo go kalo sa selegodimo. Ka nako ya thuto nngwe mo Bethele, e e neng e tsamaisiwa ke Mokaulengwe T. J. Sullivan, ke ne ka botsa: “Ereka bontsi-ntsi jo bogolo bo bona botshelo jo bo sa khutleng, a bao ba bopang setlhopha seo ba boloka bothokgami?” Go ne ga nna le dikakgelo tse dintsi mme go sena karabo e e popota. Fa go supiwa nna gore ke akgele ke ne ka bolela gore ke ne ke leka fela gore ke bone karabo e e reng ee kana nnyaa.

Mme legale, ka Motsheganong 31, 1935, kwa kopanong ya Washington, D.C., Mokaulengwe Rutherford o ne a bua ka sone setlhogo se. Ke ne ke ntse mo mathuding a ntlo a a kwa godimo ke lebile kwa tlase kwa matshutitshuting, mme abo go ne go kgatlha jang jaaka polelo ya gagwe e ne e simolola go sinosa! Bontsi-ntsi jo bogolo bo ne ka tlhamalalo jwa kgethololwa mo Dikwalong go nna bao ba falolang Hara-Magedona ka tebelelo ya go tshelela ruri mo lefatsheng. Ee, boikitsiso jo bongwe e ne e le jono jo bo oketsegileng ka ga ‘dimilione tse ga jaanong di tshelang tse di se ketlang di swa.’

Ka Phukwi 12, 1937, ke ne ka tlhomiwa ke Mokaulengwe Rutherford jaaka motlhanka wa Bethele. Mo dingwageng tsa bofelo tse nne le sephatlo tsa botshelo jwa ga Mokaulengwe Rutherford ke ne ka nna le tshiamelo ya go dira katamalanong thata le ene. Boaphelong jwa 1937 leina la The Golden Age le ne la fetoleIwa go Consolation, seno sa dira gore Mokaulengwe Rutherford a mpolaise ditshego fa ke ntse ke mo kgweetsa re raletse Scranton, Pennsylvania, gaufi le toropo ya legae la ga C. J. Woodworth, morulaganyi wa makasine o. Go ne go le bokete go ralala ka koloi mo malatsing ao go ya Scranton, mme ya re ka Mokaulengwe Woodworth a ne a retwa gotwe “Woody,” Rutherford a re: “Ga go gakgamatse go bo Woody a batla kgomotso (Consolation), a nna mo lefelong le le jaaka le.”

Ntwa ya Lefatshe II Lobaka lo lo Lekang

Ka Lwetse 1939 Ntwa ya Lefatshe II e ne ya tlhagoga. Ka Phalane ofisi ya lekala la rona mo Paris e ne ya tswalwa mme tiro ya rona e ne ya thibelwa mo Fora. Ngwaga e e latelang Canada e ne ya thibela tiro ya rona. Mo selemong seo sa 1940 Mokaulengwe Rutherford o ne a lwala, mme re ne re sa itse gore bo o tla kgona go nna teng mo kopanong e e neng e rulagantswe mo Detroit, Michigan. O ne a nna gone, mme ka nako ya puo ya gagwe ya phatlalatsa o ne a nthomelela molaetsa ka mongwe o bolela gore o tla bo a boela ka bofefo kwa Bethele mme ke mo direle dithulaganyo tsa seno.

Selemo se se latelang e ne e le kopano e kgolo mo St. Louis, Missouri, e le e kgolo ya tse di kileng tsa tshwarwa ke Basupi ba ga Jehofa go tla go fitlhelela nakong eo. Ke ne ke abetswe go amogela dithoto tsa lephata la dijo mme ya re fela ke tsena mo holong e kgolo go nna gone thulaganyong ya letsatsi la bofelo, buka Children e ne ya gololwa. Ka nako ya kopano eno bukana Jehovah’s Servants Defended le yone gape ya gololwa, e baakanyetsa ka boikitsiso jwa go re thusa go tlhabantsha kgato ya mapodisi e e tlhotlheleditsweng ke bodumedi e e kgatlhanong le bodihedi jwa rona jwa ntlo le ntlo.

Kgatiso eno e ne e le mo nakong tota. Moragonyana mo ngwageng oo rre o ne a tshwarwa mme a latlhelwa mo kgolegelong ka ntlha ya go abalana mo bodiheding. Mmè, yoo ka gone a neng a tlogelwa a le nosi mo koloing ya seka-ntlo, o ne a tlhaselwa. Lefa a ne a sa gobadiwa mo mmeleng, dirukutlhi di ne tsa thubaka koloi ya seka-ntlo, mme mmè o ne a patelesega go itshukunyetsa mo Basuping ba kgaolo eo.

Ka Phalane 1, 1941, ke ne ka nna le tshiamelo ya go okamela pokano ya ngwaga le ngwaga ya Watch Tower Bible and Tract Society of Pennsylvania nakong ya fa Mokaulengwe Rutherford a ne a seyo. E ne e le mo pokanong eo ke neng ka tlhophiwa jaaka mokaedi wa lekgotla la Mokgatlho la Pennsylvania.

Dikgwedi tse pedi moragonyana, ka Sontaga, Morule 7, 1941, N. H. Knorr, G. E. Hannan le nna re ne re bowa ka koloi go tswa tirelong ya tshimo mo kgaolong nngwe e e gautshwane ya Long Island. Re ne re ntse re reeditse seromamowa sa kara ya rona fa re tla utlwa kitsiso e e tsitsibanyang gore Majapane ba thuthuntshitse Pearl Harbor ka dibomo. Seno ka tsela nngwe se ne se na le bokao jo bogolo fela thata go batho ba ga Jehofa​—United States e ne e le mo ntweng, mookamedi wa Mokgatlho o ne a Iwala fela thata ebile go ne go na le baba ba ba neng ba gatelela go tswa matlhakoreng otlhe go khutlisa tiro ya rona ya go rera.

Lefa Mokaulengwe Rutherford a ne a tlhokafala kgwedi e le nngwe le letsatsi le le lengwe morago ga foo, tiro ya Bogosi e ne ya gatela pele kwantle go go kokobela. Mokaulengwe Knorr o ne a tlhophiwa mookamedi, mme ngwaga moragonyana ka Tlhakole 1, 1943, a itsise ka go bulwa ga Sekolo sa Bibela sa Gileade sa Watchtower, seo se neng se tla thapisa barongwa.

Ka Motsheganong 8, 1945, Tautona ya U.S. Harry S. Truman o ne a itsise gore Jeremane e ineetse. Ka Phatwe United States ya latlhela dibomo tsa atomiki mo ditoropong dikgolo tsa Japane tsa Hiroshima le Nagasaki, mme lobaka lwa morago ga ntwa Iwa bo lo le mo go rona.

Ditiragalo tsa Morago ga Ntwa

Toropo kgolo ya New York e ne ya ntsha kitsiso ya gore ba ne ba tla tsaya bokafa-morago jwa legae la rona la Bethele la Columbia Heights le le neng le fitlha kwa Furman Street go aga tsela ya boitlhabisa phefo le mheru o mogolo wa dikoloi. Lefa go ntse jalo, Mokgatlho, o ne wa kgona go reka didirisiwa tsa Columbia Heights go oketsa legae la Bethele, mme tumelelo ya puso e ne ya amogelwa ka Phalane 11, 1946, gore kago e tswelele. Ka jalo ka Ferikgong 27, 1947, go thujwa go ne ga simolola ga kago ya rona ka ko morago mo Furman Street, mme ya re ka 1948 le 1949 koketso ya Bethele e ntšha ya simololwa go agiwa, koketso eno e ntle e ntšha e ne ya kgakolwa ka 1950. Koketso ya matlhatlaganyane a a robang bongwe a magolo ya feketiri ya 117 Adams Street le yone gape e ne ya fediwa mo e batlileng e nna ka nako e le nngwe e e tshwanang.

Mokwaledi le motlhokomela madi wa Mokgatlho, W. E. Van Amburgh, o ne a sa tlhole a kgona ka ntlha ya botsofe le bolwetse mme ka jalo a tlogela boemo jwa gagwe. Ke ne ka tlhophelwa go mo tlhatlhama ka Tlhakole 6, 1947, mme Mokaulengwe Van Amburgh a tlhokafala letsatsi le le latelang.

Ka bokhutshwanyane morago fela ga foo, ka dikgakologo tsa 1947, ke ne ka romelwa ke Mokgatlho go etela mafatshe a a farologaneng a Yuropa a a neng a kgautlhantswe ke Ntwa ya Lefatshe II. Eleruri e ne e le tshiamelo go kopanela le batlhanka ba ba ikanyegang ba ga Jehofa bao bosheng jaana ba neng ba sa tswa go gololwa morago ga dingwaga tse dintsi mo dikampeng tsa kgolegelo tsa Nazi. E ne e le boipelo mo go nna go ba baakanyetsa ka kgothatso ya semoya jaaka sebui segolo ka nako ya dikopano tse di neng tsa tshwarwa ka nako eo.

Fa e sale ke tla mo Bethele ka 1928 ke ne ke ise ke ke ke boele morago kwa California. Batsadi ba me ba ne ba bulatsela bogolo mo Botlhaba, ka jalo ke ne ke kgona go ba bona ka nako le nako, segolo bogolo kwa dikopanong tse dikgolo. Mme ka selemo sa 1947 sebaka se ne sa intlhagisetsa go ka etela gape kwa California. Kopano e ne ya rulaganyediwa kwa Los Angeles, Phatwe 13 go ya go 17, mme Mokgatlho o ne wa baakanyetsa ka tsa mesepele go bao ba neng ba le maloko a lelapa la Bethele dingwaga tse 15 kana go feta. A loeto lo lo monate le kopano!

Ditshiamelo tse di Kgethegileng tsa Tirelo

Go kgabaganya dingwaga ke ne ka ipelela gape ditshiamelo tse e leng tsa mofuta wa tsone fela mabapi le katologo ya phuthego e e bonalang ya Modimo. Ya bosheng fela thata jaana mo dithotong tse dintsi tsa Mokgatlho wa Watchtower tseo ke neng ka thusa mo puisanong ya tsone go di reka kwa tshimologong ya ngogola e ne ya nna didirisiwa tse disha kwa 175 Pearl Street le 360 Furman Street mo Brooklyn. Ke tsholofelo ya pelo ya me gore didirisiwa tseno tse disha tse dikgolo di tla dirisediwa go atolosa gape gape ka mo go golo kanamiso ya Bogosi mo lefatsheng lotlhe.

Ke tsamaile makgolo-kgolo a a dikete a dimmaele e seng fela mo United States mme le mo mafatsheng a mantsi a mangwe, ke neela dipolelo mo bareetsing ba le bantsi ba batho ba Modimo go ba kgothaletsa bodihedi jwa bone jwa Bokeresete. Ka sekai, ka nako ya loeto la kopano ya lefatshe ka bophara ya “Everlasting Good News” ka 1963, ke ne ka direla jaaka mongwe wa baemedi ba ba rometsweng ba Mokgatlho, e nngwe fela ya ditshiamelo tse dintsi tseo ke di lebogelang Jehofa thata. Go direla jaaka sebui ka nako ya dikopano tse dintsi tse di sa lebalesegeng tsa Basupi ba ga Jehofa mo Yankee Stadium, jaaka go ne go ntse ka 1958 fa ba ba fetang kotara ya mmilione ba ne ba le teng, le gone gape e ne e le tshiamelo e e kgethegileng.

Phuthego E E Gatelang Pele

Mo boitemogelong jwa rona jwa botho dingwaga di tlisa diphetogo, ka dinako tse dingwe di lere boitumologo jo bogolo, jaaka ka loso Iwa ga rre ka Morule 31, 1954, mo Illinois, kgaolo ya kabelo ya gagwe ya bofelo ya bobulatsela. Ngwaga e e latelang kgaitsadiake, Grace, le nna re ne ra tsaya mmè go tswa kwa Illinois go ya New York, koo o neng a nna teng go fitlhelela loso Iwa gagwe ka Motsheganong 6, 1962. Mme phetogo e e itumedisang thata go nna e ne e le fa Edith Rettos, mmulatsela yo o tlhaga, a ne a nna mosadi wa me ka Motsheganong 12, 1956. Fa e sale o diretse le nna ka boikanyegi mono Bethele.

Jaaka ke ntse ke gola mo dingwageng tsa tirelo mono mo ntlong-kgolo ya phuthego e e bonalang ya ga Jehofa, seo bogolo segolo se ntlisetsang boipelo mo pelong ke bosupi jo bo tswelelang jwa lesego la Modimo mo godimo ga tiro e a laoletseng batho ba gagwe go e dira, e leng, go rera mafoko ano a a molemo a Bogosi mo lefatsheng lotlhe pele ga bokhutlo bo tla. (Mathaio 24:14) Ke ne ka iponela ka matlho go godisiwa ga Setlhopha se se Laolang ka 1971, mme gape leka 1974, mme fa e sale go tloga foo ke abalane mo bontsing jwa diphetso tse di botlhokwa tseo di ileng tsa dirwa tseo di neng di ama makala le tiro ya go rera lefatshe ka bophara. Ke ile gape ka bona palo ya baboledi ba Bogosi e gola go tloga go 44 080 lefatshe ka bophara fa ke ne ke tla mo Bethele ka 1928 go fitlha mo e ka nnang 2 500 000 ya ba ba abalanang mo tirong eo gompieno. Eleruri phuthego ya Modimo e ile ya gatela pele, mme ke lebogela ditshiamelo tse dintsi tsa tirelo tseo ke ileng ka di neelwa go di dira mabapi le go neela bosupi jo bogolo jwa makgaola-kgang jwa bofelo.

Tumelo ya me mo ditsholofetsong tsa Bibela tsa puso ya tshiamo ya Modimo le masego ao e tla a tlisetsang lefatshe e nonofile le go feta le e leng pele. Fa e ne e le gore ke ne ke ka boa ka tshela botshelo jwa me gape, ga go se sengwe gape se ke neng ke ka se itlhophela go se tshelela. Abo e nnile boipelo le tshiamelo go bo ke ile ka direla mono mo Bethele dingwaga tseno tse 55 tse di fetileng le lelapa le legolo thata la Bokeresete le le gakgamatsang mo lefatsheng!

Ka May 30, 1983, Mokaulengwe Suiter o ne a tlhagelwa ke kotsi, e e neng ya felela ka kgobalo e e tlhobaetsang mo mokwatleng. Lefa Mokaulengwe Suiter a batlile a golofetse gotlhelele, o ne a lwela go tshela mo dikgweding tse di ka nnang thataro. Ereka a ne a gobetse mo go botlhoko, mme ebile a sena maatla a go bua, o ne a tswelela go bontsha kgatlhego e kgolo mo kgatelong pele ya phuthego ya ga Jehofa mo lefatsheng, eo a e diretseng jaaka mokwaledi le ramatlotlo ka dingwaga di le 36. Lefa go ntse jalo, o weditse tirelo ya gagwe ya mo lefatsheng ka November 22 mo mosong, mme lelapa la Bethele le la Polase ya Watchtower kwa Brooklyn di ne tsa itsisiwe ka letsatsi le le latelang morago ga kobamelo le dijo tsa mo mosong.

Ka Laboraro maitseboa, ka November 23, tirelo ya phitlho e ne ya tshwarelwa kwa Holong ya Bogosi ya Bethele ya Brooklyn, e e neng e neelwa ka thelebishene e e golagantsweng ka mathale go ya kwa matlong a bojelo mme ba golagana le Dipolase tsa Watchtower ka mogala. Ka gone bontsi jwa maloko a a 3 123 a lelapa la Bethele, go kopanyeletsa le diithuti tsa Gilead, mmogo le baeti ba bantsi, ba ne ba kgona go utlwa dipuo ka maloko a a mmalwa a lelapa. Tseno e ne e se tsa go baka moswi. Go na le moo, e ne e le tsa go kgothaletsa botlhe ba ba neng ba le teng go bona molemo ka tsela ya botshelo jo bo ikanyegang jwa Mokaulengwe Suiter, yo tota a itshupileng e le ‘setlhare se segolo sa tshiamo’ le mofenyi mo go lweleng dikgatlhego tsa Bogosi. (Isaia 61:3; Tshenolō 14:13) Gape go ne ga anaanelwa tshegetso e e ikanyegang eo a neng a e neelwa ke mosadi wa gagwe, Edith, mo bokhutlong jwa malatsi a tirelo ya gagwe ya boineelo mo lefatsheng.

[Setshwantsho mo go tsebe 11]

J. A. Bohnet o ne a tlhotlheletsa botshelo jwa me fela thata

[Setshwantsho mo go tsebe 13]

Nna le kgaitsadiake le batsadi ba me

[Setshwantsho mo go tsebe 14]

Batsadi ba me ba ne ba bulatsela ka dingwaga tse 20 mo koloing eno ya bone ya seka-ntlo

[Setshwantsho mo go tsebe 15]

W. E. Van Amburgh yo ke neng ka mo tlhatlhama jaaka mokwaledi le motlhokomela madi a Watch Tower Society ka 1947

[Setshwantsho mo go tsebe 16]

Ke ile ka bua gantsi-ntsi kwa dikopanong tse dikgolo​—jaaka fano kwa Yankee Stadium ka 1958

[Setshwantsho mo go tsebe 17]

Edith o ile a nna molekane wa me yo o ikanyegang fa e sale ka 1956