GO NWA—A O Na Le Pono ya Bibela Ka Gone?

E NE e le Mokeresete yo o kolobeditsweng. E ne ya re fa bagolwane ba phuthego ya ga bone, bao ba neng ba amegile kaga go nwa ga gagwe ba mmotsa dipotso, a dumela gore o ne a nwa dibiri di se kae le marothodinyana a wisiki. “Mme ke ne ke sa tagwa,” a bolela jalo.

Lekawana leno le ne le na le boikutlo jwa gore fa fela o sa tagwe, ga go kgathalege gore o nwa go le kae. A o a dumalana? Re maswabi go bolela gore, dipego di bontsha gore kakanyo e e ntseng jalo e gone gareng ga bangwe ba batho ba Modimo. A mme ke ga Dikwalo? Tota Bibela e reng ka ga go nwa?

Dino tsa tagi eleruri ke dingwe tsa dimpho tseo re di amogetseng go Mmopi wa rona, Jehofa Modimo. Ka gone, Bibela e re bolelela gore Modimo o siela bojalwa jo bo “ipedisañ pelo ea motho”; le gore bojalwa ke jo bo “itumedisañ Modimo le motho”; le gore bo baya pelo mo ‘lethamong.’ (Pesalema 104:15; Baatlhodi 9:13; Esethere 1:10) Bojalwa, jo bo tshwantshediwang ke “mofine,” bo dirisiwa mo Dikwalong go supa tlhogonolofalo le pabalesego.—Mika 4:4: Sakaria 3:10.

Lefa go ntse jalo, mpho e ka dirisiwa kana ya seka ya dirisiwa sentle. Bibela e tshotse ditlhagiso tse di ntsi mabapi le go sa dirise sentle tagi.

Go sa Nwe ka Tekano

Go tweng ka pono e e reng, ‘Fa fela o sa tagwe, ga go kgathalege gore o nwa go le kae’? Eleruri Bibela e kgala botagwa, e re bolelela gore matagwa ga a ketla a “rua bogosi yoa Modimo.” (1 Bakorintha 6:9, 10) A mme re tlhagisiwa kgatlhanong le botagwa fela? Go tweng ka go nwa thata kwantle ga gore gone o tagwe?

Re bala mo go 1 Timotheo 3:2, 3, gore molebedi ga a tshwanela fela go tila ‘borumolang’ mme o tshwanetse a bo “a le mogopolō o o lekalekanyeñ.” Seo se raya mo mekgweng yotlhe. Lefa go le jalo lefoko la Segerika le le ranoletsweng “mogopolo o o lekalekanyeñ” (ne.phaʹli.on) tota-tota le raya “go sa tagwa, tshisibalo; go ithiba mo bojalweng, ekane gotlhelele kana bobotlana mo go sa dirisiweng sentle ga jone.” (Mokwalo o o sekameng ke wa rona.)—Thayer’s Greek-English Lexicon of the New Testament.

E ne ya re a tlhatlhamisa ditshwanelego tsa batlhanka ba bodihedi, kana badiakona, Paulo a bolela gape gore ba tshwanetse ba bo “ba sa lemalele boyalwa [“ba sa nwe beine e ntsi,” Today’s English Version; ba “nne tekano mo selakanyong sa beine e ba e nwang,” The Jerusalem Bible].”—1 Timotheo 3:8.

Ee, gore a hakelwe kana a tswelele a ntse a direla jaaka molebedi kana motlhanka wa bodihedi, Mokeresete o tshwanetse a nna sekao sa yo ka tlwaelo a leng tekano mo tirisong ya dino tsa tagi. Dingwaganyana di se kae tse di fetileng, mo nageng nngwe ya Latin-America, moletlo wa lenyalo o ne wa tswelela go fitlhelela gare ga mpa ya bosigo go lala go nowa bosigo jotlhe. Seo se ne sa felela ka go tlosiwa ga setlhopha sotlhe sa bagolwane le batlhanka ba bodihedi ba phuthego nngwe!

A mme tekano e tlhokwa fela mo balebeding le batlhanka ba bodihedi? Ga go a nna jalo gotlhelele, ka go bo mo go Tito 2:2, banna bagolo ba gakololwa go nna “mogopolō o o lekalekanyeñ.” Basadi mo phuthegong ba fiwa kgakololo e e tshwanang ya go nna “masisi yalo, ba se bapateletsi, ba le mogopolō o o lekalekanyeñ.” (1 Timotheo 3:11) Mme le basadi bagolo ba bolelelwa go nna “masisi mo mokgweñ oa bōnè, e sa bapateletsi, ba sa lemalèla boyalwa.”—Tito 2:3.

Go phepafetse he, gore Bakeresete ba tshwanetse ba nna kelotlhoko go sa tile fela botagwa—bofelo jwa matswela a go nwa go feta selekanyo—mme le gape tiriso e e sa lekanelang ya tagi.

Se se Tsalang Go Nwa ka Tekano Ke Eng?

Go ka se tlhomelwe batho botlhe molelwane ka jaana mabaka a motho-kamongwe, a a jaaka botsogo le bokete jwa mmele, di ka tlhomamisa matswela a tagi mo tsamaisong ya gago. Lefa go ntse jalo, go na le dilo di le mmalwa tseo o tshwanetseng go di gakologelwa fa o akanyetsa gore ke eng se se tsalang go nwa ka tekano.

Selo sa ntlha ke—tila go dira diipato! Go motlhofo go feleletsa ka gore kgakololo e e sa batlegeng e dira go ba bangwe mme eseng mo go rona. Mme fa e le gore mongwe le mongwe o ne a ka akanya ka tsela e e ntseng jalo kgakololo e ne e se ketla e dira go ope!

Se se latelang, akanyetsa gore mmele wa gago o ka tshola selekanyo se se kae sa tagi ka pabalesego. Mo e ka nnang mogolo mongwe le mongwe (154lb/70kg) a ka dirisa tagi e e batlileng e nna 13 ml ka oura-nngwe le nngwe (mo e ka nnang 30ml [1oz] ya 80-proof spirits kana 100 ml [3.5 oz] ya beine e e nowang fa go jewa). Fa selekanyo seno se tlolwa, selekanyo sa tagi e e mo mading a gago se a oketsega. Gantsi go tsaya fela dino tse pedi tsa selekanyo se se tlwaelegilenga mo metsotswaneng e se mekae mo e ka nnang mogolong mongwe le mongwe go fitlhelela selekanyo sa tagi sa diperesente tse 0.05, seo se tsalang go sa kgweetse sentle mo bathong ba le bantsi.

Lebaka la boraro go le akanyetsa ke pono ya Bakeresete-ka-wena. Mo go Baroma 14:21 re bala jaana: “Go le go ya nama, go le go nwa boyalwa yoa mofine, le gotlhe mo oa ga eno o kgopiwañ ka gōna, go molemō go kgaogana nagō.” Ka jalo mo go tlhomamiseng gore a go nwa ga gago ke ga tekano kana nnyaa, ipotse: A ka metlha ke nwa go feta ba bangwe? A ba bangwe—maloko a lelapa kana bakaulengwe kana bokgaitsadi ba Bokeresete—ba simolotse go tshwenyega ka selekanyo se ke se nwang? A ke itsege jaaka “senwi,” se tota se rayang gore ke nwa bobe? Le eleng fa o ka re, ‘Mme gone nna ke kgona go itshegetsa go feta ba bangwe,’ a mafoko a ga Paulo ga a bontshe gore re tshwanetse go amega ka pono ya bakaulengwe ba rona? Gakologelwa mafoko a ga Jesu mo go Luke 17:1, ebong: “Go retetse gore dipogishō di se ka tsa tla; me go latlhèga èna eo di tlañ ka èna.”

Tota, go tshwanetse ga lemogwa gore ga go na ope wa rona yo o nang le tshwanelo ya go subelela segakolodi sa gagwe mo go ba bangwe. Re tshwanetse ra nna kelotlhoko go tila go amega-amega ka mo go sa tshwanelang ka selekane se ba bangwe ba nwang ka sone. Jaaka moaposetoloi Paulo a ne a re: “Ga o na tshwanelo ya go nyatsa mokaulengwe wa gago kana go mo atlhola. Gakologelwa, mongwe le mongwe wa rona o tla ema ka sebele fa pele ga Setulo sa Katlholo sa Modimo.”—Baroma 14:10, The Living Bible.

Lebaka le lengwe la go le sekaseka ke le: Ke ka ntlha yang ke nwa? A ke fela go itlosa motsapa, go intsha lenyora kana go oketsa monate wa dijo? Kana a ke go itebatsa matshwenyego, tlhobaelo, tlalelo, go mpha bopelokgale kana go nthusa go falola botshelo jaaka bo ntse tota? Mabapi le ntlha ya bofelo, ngaka ya tlhaloganyo Dr. Stanley Gitlow o tlhalosa ka gore: “Re tshela mo gareng ga batho bao, e reng dilo di ketefala, o tseye seno; fa o sa wela dibete sentle, o leba go khemikhale nngwe ya maselamose. Ga go ope yo o reng, ‘Heela tlhe, emelana le khutsafalo mme o ithute go itshoka.’” Ke eng seo se tshwanetseng go thusa Mokeresete go re a emelane le ditlhobaelo tsa botshelo? “Khemikhale nngwe ya maselamose” kana kamano ya gagwe le Modimo?—Pesalema 4:8.

Go Ithiba Ka Dinako Tse Dingwe?

Ee! Go letlhapelwa, go botlhokwa gore a ithibe gotlhelele go sa nneng jalo tlhotlheletso ya go feteletsa e ka mo hekeetsa. Seno se tlisa mogopolong mafoko a ga Jesu mo go Mareko 9:43: “Ha seatla sa gago se gu kgopa, u se kgaolè; go ka nna molemō mo go wèna go tsèna mo botsheloñ u le segōlè, bogolo go go tsèna u le diatla coopedi mo moletiñ [mo go tshwantshetsang tshenyego].” Ka jalo, fa go nwa go go tsoseditse mathata, ka ntlha yang o sa go “kgaolè”? Kana mme gone, “go ka nna molemō mo go wèna go tsèna mo botsheloñ”! Jaaka mogolwane mongwe wa Mokeresete, yo eleng mookamedi wa lenaneo la thulaganyo ya tlhabantsho botlhapelwa, a ne a e baya jaana: “Go ithiba gotlhelele ga se tlhotlhwa e e kwa godimo-dimo go e duela go na le go latlhegelwa ke botshelo mo Thulaganyong e Ntšha ya Modimo.”

Lefa go le jalo go ithiba ga se ga matlhapelwa fela; go na le dinako tse dingwe tseo go tlhokafalang gore re ithibe. Mo Iseraeleng wa bogologolo baperisiti le Balefi fa ba ne ba le mo tirong kwa motlaaganeng kana tempeleng ba ne ba idiwa go nwa tagi ka sebopego sefe fela, ka katlholelo ya loso. (Lefitiko 10:8, 9; Esekiele 44:21) Dikgosi le tsone gape, di ne tsa tlhagisiwa gore di se ka tsa nwa beine kana bojalwa jo bo tagang fa ba le mo tirong. Ka ntlha yang go le jalo? “Gonne ba ka tla ba nwa, me ba lebala molaō, me ba shōkamisa tshiamishō ea bañwe ba ba pitlagancweñ.”—Diane 31:4, 5.

Go tweng ka gompieno? Tota, a o ka wela dibete fela ntswa o itse gore mokgweetsa sefofane seo o neng o tsamaya ka sone o ne a a nwa? Legoka! Matshelo a a kopanyelediwa. Ka jalo, Mokeresete o tshwanetse go nna kelotlhoko kaga go nwa pele ga a kgweetsa koloi. Mme go tla bo go sa tshwanela bogolo segolo ka Mokeresete go nwa dino tsa tagi pele fela kana fa a tseneletse mo ditirong tse di boitshepo tsa bodihedi jwa tshimo, go nna gone dipokanong le fa a neela kgakololo ya Bibela le kaelo go ba bangwe. Goreng go sa tshwanela? Botshelo jo bosakhutleng fano bo a kopanyelediwa!

Ka jalo a o na le pono ya Bibela ka ga go nwa? Ekane o a dira kana ga o dire. Botshelo jwa gago bo kotsing, ga mmogo le jwa ba bangwe ba ba ka kgopisiwang ke mekgwa ya gago ya tlhoka-kakanyetso ya go nwa. Go feta seo, re batla gore matshelo a rona a itumedise Modimo wa rona, Jehofa. Ee, dino tsa tagi ke mpho ya Modimo—fa di dirisiwa ka tekano!

Mme fa e le gore go ka nna botoka ka wena go ithiba gotlhelele, he dira gotlhe go ithiba. Gakologelwa, “go ka nna molemō mo go wèna go tsèna mo botsheloñ”!

[Dintlha tse di kwa tlase]

[Setshwantsho mo go tsebe 29]

Tsotlhe ka boraro di tshotse selekanyo se se tshwanang sa tagi