Jakobe O Kgothaletsa Kobamelo e e Itshekileng le e e Tlhoafetseng

OLEBA jang kgakololo e e tswang mo mogolwaneng? Go tweng fa e le gore ke e e utlwalang semoyeng ebile e tlhamalatse sentle? A o tla e latela?

Lokwalo lwa ga Jakobe, lo lo kwadilweng pele ga 62 C.E., lo tshotse kgakololo e e ntseng jalo e e tlhamaletseng. Mokwadi wa lone e ne e le mogolwane—yo o neng a na le dingwaga tse 30 tsa boitemogelo jwa go dirisana le mathata a badumedi-ka-ene. Ee, mogolwane wa Mokeresete Jakobe, monnawe Jesu Keresete ka mmè, o ne a ka kwala ka tlhamalalo ka boitemogelo jo a bo ikamogeletseng mo go ene. (Mareko 6:3) Se se ileng sa thatafatsa tsela ya gagwe ya go kwala e e nonofileng e ne e le ditshwantsho tse di tlhamaletseng le dipotso tse di gwetlhang tse di neng di phepafatsa gore bodumedi jo bo seng phepa, jo bo tsididi ga bo itumedise Jehofa.

Jaaka a ne a kaelwa ke Modimo, Jakobe o ne a neela tao e e utlwalang e e dirang mo motlheng wa rona jaaka e ne e ntse mo lekgolong la ntlha la dingwaga. Ka go akanya ka kgakololo ya gagwe e e tlhotlheleditsweng ya bomodimo, re ka bona dikarabo mo dipotsong dingwe tsa botlhokwa. Mme mafoko a gagwe a tshwanetse go re gotetsa go re re gatele pele ka kobamelo e e itshekileng le e e tlhoafetseng.

Re Tshwanetse go Leba Diteko Jang?

Jakobe o ne a kwalela “dichaba tse di shomè le mecō mebedi” tsa Iseraele wa semoya tse di neng di halaletse le lefatshe le le neng le itsiwe ka nako eo. Mme kgakololo eno gape e a dira go ba “boidiidi yo bogolo.” (Tshenolo 7:4-9; Bagalatia 6:16) O ne a kgothaletsa badumedika-ene go leba diteko ka boipelo ka go bo boitumelo jwa go ya go ile bo tla nna gone fa re di itshokela ka tumelo. Re tshwanetse ka tsholofelo re kope Modimo botlhale go tshela ele gore re tle re mo itumedise, bogolo jang fa re thulane le diteko. Balatedi ba ba tloditsweng ba ga Jesu bao ka boikanyego ba itshokelang teko ba tla amogela “serwalō sa botshelō,” bosasweng kwa legodimong. Go itshoka ka boikanyego ga “boidiidi yo bogolo” go tla felela ka botshelo jo bo sa feleng mo Paradaiseng ya lefatshe.—Yakobe 1:1-12; Luke 23:43.

Fa re thulane le teko, ga re a tshwanela go fetsa ka gore Modimo o a re leka gore re dire sebe, ka go bo a ka se dire seno. Go na le moo, keletso e e phoso e e mo go rona e direla jaaka thaelo ya sebe. Jehofa ga se motswedi wa bosula mme ke wa sengwe le sengwe se se molemo go kopanyeletsa le mpho e e gakgamatsang ya botsalo jwa semoya.—Yakobe 1:13-18; Baefesia 1:13, 14.

Bodumedi jwa Boammaaruri Ke Eng?

Go nna badiri ba bodumedi jwa boammaaruri, re tshwanetse go nna bofefo go arabela lefokong la Modimo ka kutlo. Re tshwanetse gape ra nna bonya go galefa ebile re tshwanetse go itlosa sotlhe se Modimo o se lebang se le leswe. Go tlosa leswe mo pelong le mo mogopolong go letlelela lefoko la boammaaruri go totahala moo, mme ga re a tshwanela fela go nna bautlwi fela ba lefoko mme re tshwanetse go nna badiri ba lone, eleruri re letlelela Dikwalo go nna mokaedi wa rona. Akanyetsa seno: Morago ga go leba sefatlhogo sa gagwe mo seiponeng, motho o a tsamaya a bo a lebala gore ke motho wa mofuta ofe. Lefa go ntse jalo, go obamela Jehofa kafa go amogelesegang, re ka se nne bautlwi ba ba lebalang. Go na le moo, re tshwanetse go leba mo “molaon o o itekanetseñ,” o o kopanyeletsang sengwe le sengwe se se batlegang mo Bakereseteng, mme re tshwanetse go dira tumalanong le one.—Yakobe 1:19-25.

Fa e le gore Modimo o tla re leba jaaka baobamedi ba boammaaruri, re tshwanetse gape ra laola loleme, re lo kganela mo tshebong, go lomatsebe le tse di tshwanang. Gape, go tswa ponong ya ga Jehofa, kobamelo e e “itshekileñ” (boitshepo, phepa) le “e e sa leshwèhalañ” (e e sa mathegelwang ke leswe) e kopanyeletsa kamego e tlhoafetseng ka ba ba tlhokang. Se se tlhokafalang gape ke ‘go ikilela gore re se mathegelwe gope ke leswe la lefatshe’ la batho bao ba sa direleng Modimo. Re ka se itumedise Jehofa fa re dira dilo tse di sa siamang tse lefatshe le di dirang. Mme kana, Jakobe ga a ka a tlhatlhamisa dipatlafalo tsotlhe tsa kobamelo ya boammaaruri. Mme o ile a bontsha gore tirelo ya mmannete ya ga Jehofa e itshekile ebile e tlhoafetse.—Yakobe 1:26, 27.

A Go na le Phoso Nngwe ka Go Tlhaola Batho?

Jakobe o ne a bontsha gore kobamelo e e itshekileng gape e biletsa go sa tlhaole batho fa go dirisanngwa le bahumi le bahumanegi ka go tshwana. Bangwe ba ba neng ba ipolela gore ke Bakeresete ba ne ba neela diphetso tse di boikepo ka go rekegela bahumi mme ka gone ba bontsha go tlhaola batho. Ekete le ka motlha re ka se nne molato wa go tlhaola batho mo go ntseng jalo mo e seng ga bomodimo!—Yakobe 2:1-4.

Ele ruri, Bakeresete ba tshwanetse go dumela gore, jaaka setlhopha, bahumi ba ne ba rogakile leina la ga Keresete ka go bogisa balatedi ba gagwe. Ka gone, go na le go leofa ka go nna le go tlhaola batho le go rekegela bahumi, re tshwanetse go latela “molaō o e leñ oa segosi” ka go bontsha lorato go baagelani botlhe ba rona. Re ka lebelela jang go ipelela boutlwelo botlhoko jwa Modimo fa e le gore ga re kutlwelo botlhoko le lorato tebang le bahumanegi? Eleruri, go tlhaola batho mo phuthegong ga go ne go dumalana le kobamelo e e itshekileng.—Yakobe 2:5-13; Mathaio 22:39; Ditihō 10:34, 35.

Re Ka Supa Jang Gore Re Na le Tumelo?

Moaposetoloi Paulo o bontshitse gore e ne e se ka ditiro tsa Molao wa ga Moshe mme e ne e le ka ntlha ya tumelo ya bone mo go Jesu Keresete go bo batho ba balelwa e le basiami ke Jehofa Modimo. (Baroma 3:19-28) Jakobe o ne a dumalana le seno, mme o ne a supela gore tumelo ya rona e tshwanetse go supiwa gore e a tshela ka ditiro tsa bomodimo tse e re suteletsang go di dira. Tumelo e e sa re tlhotlheletseng go dira ditiro tse di molemo ga se ya sebele ebile ga e ne e felela ka poloko ya rona. Go tshwantsha: Fa modumedi-ka-rona a sena diaparo tse di lekaneng ebile a tlhaelelwa ke dijo, mafoko a le nosi fela ga ketla a mo thusa ka sepe; go tshwanetse go nna le thuso e e bonalang. Le eleng badimona ba a dumela gore go na le Modimo o le mongwe, mme ga ba dire ditiro dipe tse di bonalang. Ka jalo tumelo e e ipolelwang e sena ditiro tse di molemo go e tshegetsa ga e tshele, ga e na tswelelo epe mabapi le go bona poloko. Aberahame, “rra echo” wa botlhe bao ba nang le tumelo ya boammaaruri, o ne a bontsha tumelo ya gagwe ka ditiro fa a na a ntsha Isake setlhabelo. Rahabe gape o ne a na le tumelo e e tlhagafetseng, ka go bo a ne a “siamisiwa ka ditihō” ka go sireletsa ditlhola tsa Baiseraele. Ka jalo, lemororo tumelo e e ipolelwang fela e sa tshele jaaka setopo, ka go tshwarega mo ditirong tse di tlhotlheletsang Bakeresete tse di siameng re supa gore re na le tumelo e e tshelang e e phepa.—Yakobe 2:14-26.

Goreng Re na le go Laola Loleme?

Kobamelo e e itshekileng, e e tlhoafetseng gape e biletsa kgato e e tlhomameng ya go laola loleme. Selo se le sengwe, Bakeresete botlhe—mme bogolo jang barutisi mo phuthegong—ba tshwanetse go tila dipono tse di sa siamang. Jakobe o ne a kaya gore jaaka dipitse di ka laolwa ka ditomo, re ka laola mebele yotlhe ya rona e e sekametseng mo sebeng fa re laola loleme lwa rona. Antsaana, le eleng sekepe se segolo se ka kgwediwa ka lomatsana fela! Mme fa re palelwa ke go laola loleme lwa rona, lo ka dira tshenyo e kgolo thata, fela jaaka molelo o o peperetlang. Ka tshebo, bosupi jwa maaka, go senya yo mongwe leina le tse di tshwanang, loleme lo lo sa laolweng gape lo ka ‘leswefatsa’ mmele otlhe, le senya mmele wa sebui otlhe. Gape, loleme lo lo sa laolweng lo ka tlhosetsa tsela yotlhe ya botshelo ebile le ka nna tshenyo e kgolo jaaka Molete [Gehenna].—Yakobe 3:1-6.

Gone, go laola loleme go tlhoka boiteko jo bogolo thata. Lefa motho yo o leofileng a ile a kgona go katisa diphologolo tsa mefuta yotlhe, ga ise a kgone go laola loleme ka boitekanelo. Mme re tshwanetse go dira ka natla go kganela loleme. Ereka loleme lo ka dira dikakgelo tse di gobololang, tsa tshebo, lo ka timetsa ka go ruta maaka, jalo le jalo, ke selo se se gobatsang se se tletseng ka tšefi e e bolayang tota. Mme a ko o akanye fela gore go tla bo go sa tshwanela jang go sa dirise loleme sentle—lo lo diretsweng bogolo go baka Modimo—go hutsaka batho bao ba bopilweng ke ene! Seno se tla bo se sa tshwanela fela jaaka metsi a a monate le a a botlhoko a ka tswa mo motsweding o o tshwanang kana ditlhware mo ditlhareng tsa mofeige.—Yakobe 3:7-12.

Ke Mang Yo Ruri a Leng Botlhale?

Botlhale jwa boammaaruri bo a tlhokafala go Bakeresete botlhe mme bogolo jang barutising ba ba bangwe ba ba tshwaregileng mo kobamelong e e itshekileng. Motho yo ruri a leng botlhale o bontsha poifo e e tshwanetseng go Modimo ebile o pelonolo. Tota, go direla ka tshwanelo jaaka morutisi monna o tshwanetse go nna pelo-namagadi, a se bogale, a se boikgogomoso le go sa re ke ene tsela le boammaaruri. Gape, lefufa le kgang ga di tshwanele morutisi wa Mokeresete kana molatedi ofe fela wa ga Keresete. Go na le moo, botlhale jwa bao ba nang le maungo a e seng a bomodimo ao ke jwa sehologolo, le eleng jwa bodimona.—Yakobe 3:13-16.

Botlhale jwa selegodimo bo boitsheko, bo kagiso, bo bonolo ebile bo “rapèlèsège ka boheho.” Ka motlhala, morutisi wa Mokeresete yo o bonolo ga a ipuelepuele fela. Mme gareng ga dilo tse dingwe, botlhale jwa selegodimo bo tletse “mauñō a a molemō,” ao a akareletsang ditiro tsotlhe tse di dumalanang le molemo, tshiamo le boammaaruri. Ka tlholego, gore tshiamo e kgone go gola, go tshwanetse ga nna le kagiso. Barutisi le ba bangwe mo phuthegong bao ba godisang kagiso ba bontsha gore eleruri ba botlhale.—Yakobe 3:17, 18.

Re Ka Thibela Kgang Jang?

Kagiso ya baobamedi-mmogo le Jakobe e ne e senngwa ke gore bangwe gareng ga bone ba ne ba le molato wa dilo tse di jaaka go tlhaola batho, go atlhola ba bangwe e seng kafa tshwanelong le go nna le lefufa. Seno se ne sa felela ka kgang ya mo phuthegong. Mme motswedi wa ntwa eno e ne e le eng? Ebu, e ne e le dikeletso tse di sa kgorisiweng tsa boikgotsofatso jwa senama! Dikeletso tse di phoso tse di ntseng jalo di ne tsa gogela mo bopelotshetlheng jo bo maswe-maswe le moyeng wa letlhoo, wa go bolaya.—Yakobe 4:1-3.

Go thibela kgang mo phuthegong re tshwanetse go tila botsala le lefatshe leo le gogelang mo kgokahalong ya semoya. Seno se biletsa go tila boikutlo, mekgele, ditsela le ditiro tsa lefatshe la batho ba ba ikgaogantseng le Modimo. Lefa tshekamelo ya letlhoo e godisa kgang le go gatelela ka thata batho ba ba leofileng, e ka lwantshiwa ka moya wa Modimo, eleruri tshupo ya bopelonomi jwa gagwe jo bo sa tshwanelang. Thuso eo e gone ka batlhanka ba ba ikokobeditseng ba ga Jehofa ba ka metlha ba rapelelang thuso ya gagwe le go mo utlwa. Ka katlego ba ka ganetsa Diabolo. Mme kana, bape ba ba ipolelang go nna Bakeresete bao ba bontshitseng boikutlo jo bo phoso ba tshwanetse go atamela Modimo ka thapelo, ba ikokobetse pele ga gagwe le go ithiba go bua kgatlhanong le bakaulengwe ba bone kana ba ba atlhola ka fa go sa tshwanelang. Abo go sa tshwanela jang ne ka batho ba ba leofileng go atlhola bagabone fa Jehofa e le ene Monei-Molao yo Mogolo le Moatlhodi!—Yakobe 4:4-12.

Go tila go iikanya ka boikgantsho gape go tla tlatseletsa kagisong ya phuthego. Ereka botshelo mo tsamaisong eno bo tshwana le mouwane o o nyelelang, re tla bo re le boeleele go ganelela mo go jone le go ipelehatsa ka seo re rulaganyetsang go se dira. Go na le moo, re tshwanetse bobotlana mo dipelong tsa rona re bo re ka re, “Ha Morèna [Jehofa] a rata.” Tota, re ka se fitlhelele sepe se se tla nnelang ruri kwantle ga kamogelo le thuso ya gagwe, mme o tlhoka boikokobetso le temogo ya go itse gore ke ene motswedi wa botshelo le tsotlhe tse di molemo. Re tshwanetse go dira tumalanong le kitso eno, ka go bo go dira ka tsela e nngwe e sele ke boleo.—Yakobe 4:13-17.

Goreng Re na le go Bontsha Bopelotelele?

Gareng ga dilo tse dingwe, Jakobe o latela ka go otlela tlhokafalo ya go bontsha bopelotelele. Go bonala gore, mo gareng ga diphuthego go ne go na le batho ba se kae ba ba neng ba humile bao ba neng ba lemoga jaaka ene, gore letlotlo la dilo tsa di bonalang le ne le sena mosola fa le bapisiwa le mahumo a semoya a Bakeresete ba nang le one. Lefa go ntse jalo, jaaka setlhopha, bahumi ba ne ba gatelela bahumanegi ba bile ba ganetsa basiami. Jakobe o ne a kaya gore re tshwanetse ra emelana le tseno le mathata a mangwe ka bopelotelele go tlo go “tsamaee Morèna” Jesu Keresete a tle. Re tshwanetse go tshwana le molemi yo ka bopelotelele a letelang thobo. Fa re ne re ka nna pelo-khutshwane mme ra palelwa ke go itshoka ka boikanyego, re ne re tla latlhegelwa ke kgololo le masego ao a neng a tla tla ka go nna gone ga Morena.—Yakobe 5:1-8.

Jaaka baobamedi ba boammaaruri, re tshwanetse gape ra nna pelotelele ka badumedi-ka-rona, re sa ba tenegele, re ngunanguna ka mo go sa tshwanelag kana go ngongolela kwa teng kaga bone ka moya wa go sa itumele gotlhelele. Se se latelang Jakobe o ne a supa gore baperofeti ba ga Jehofa ba ne ba tlhoma sekao sa go bogela bosula le go bontsha bopelotelele. Fela jaaka Jobe wa bogologolo, re ka bona kgomotso mo ntlheng ya gore re tla bona tlhomogelo pelo e kgolo ya ga Jehofa le boutlwelo botlhoko fa ka bopelotelele re itshoka ka dipelo tse di itshekileng di tlhomilwe ka go tia go Modimo.—Yakobe 5:9-11.

Thapelo e Tswelela Go Le Go Kae?

Morago ga go gakolola Bakeresete-kaene go sa dire maikano ka sengwe le sengwe mme a e seng a sepe, Jakobe o ba kgothaletsa go rapela. Bogolo jang thapelo e botlhokwa fa mongwe a boga ka ntlha ya bokoa jwa semoya kana bolwetsi. Go tla bo he go tshwanela go bitsa bagolwane ba phuthego, bao ba ka bontshang dikgakololo tse di gomotsang tsa Dikwalo tseo di tshwanang jaaka lookwane lo lo thobang. Bagolwane bano ba tla rapelela mongwe yo o tlhokang thuso, mme “mokokotlèlo oa mosiami” o o ntseng jalo o tla tswelela. Jehofa o tla itshwarela maleo a a ka neng a dirilwe ke motho yo o boikokobetso le boikotlhao, a bo a mo tsosolosetsa mo botsogong jwa semoya. Gore “mokokotlèlō oa mosiami o thusa thata” go supega ka ntlha ya gore dithapelo tsa ga Elija di ne tsa arabiwa ke Jehofa.—Yakobe 5:12-18.

Go tweng fa e le gore Mokeresete o ne a ka tswa mo tseleng ya boammaaruri? Batho ba ba tshwanelegang semoyeng ba tshwanetse ba leka go mo thusa ka ditsela tsa thapelo e e tlhoafetseng le go dirisa ka tlhagafalo Lefoko la Modimo. Fa yo o fositseng ka gone a ‘sokololwa mo tseleng ya gagwe ya timelo,’ moya wa gagwe—moleofi ka boene—o tla falodiwa mo go atlholweng le mo losong lwa bosaeng kae.

Motho yo o neng a mo nyatsa o ne a dira tebang le go bipa, kana go itshwarela, dibe tsa motho yo o leofileng.—Yakobe 5:19, 20.

Gatelang Pele mo Kobamelong e e Itshekileng

Lokwalo lwa ga Jakobe ka tlhamalalo lo araba dipotso tse di botlhokwa di le mmalwa, jaaka re setse re lemogile. Mme rona ka borona re tla leba jang kgakololo eno e e tlhotlheleditsweng ya bomodimo e e tswang mo mogolwaneng yo o nang le maitemogelo? Ke e e tlhamaletseng ebile e utlwala mo semoeng. Ka jalo a re tla e latela?

Fa ka tlhoafalo re dirisa kgakololo ya ga Jakobe, e tla re thusa go itshokela diteko, go dirisa bodumedi jwa boammaaruri, go tila go tlhaola batho le go itshupa ka ditiro tse di molemo gore re na le tumelo ya mmatota, le e e tshelang. Gape, e tla re thusa go laola loleme, go dira ka botlhale jwa selegodimo, go thibela kgang mo phuthegong le go bontsha bopelotelele jaaka basupi ba ga Jehofa ba ba ikokobeditseng, le ba ba rapelang. Tota-tota, ka go latela kgakololo ya ga Jakobe, re tla kgona ga botoka go tlotla Rraa rona wa selegodimo yo o lorato ka go gatela pele mo kobamelong e e itshekileng le e e tlhoafetseng.