Dikopano tsa Kgaolo tsa “Kutlwano ya Bogosi”
“KUTLWANO YA BOGOSI.” A setlhogo se sentle ebile se tshwanela jang dikopano tsa rona tsa kgaolo tsa 1983! Leka motlha ga go ise go ke go nne le tlhoka-kutlwano e e kanakana mo lefatsheng. Makgotla a bodumedi, Katoliki le Porosetanta ka go tshwana, a mekamikilwe ke kgotlhang le kgang. Diphathi tsa bopolotiki di a betabetana. Leka motlha ga go ise go ke go nne le tlhakantsuke e e kana-kana mo kgwebong kana mo papading jaaka go ntse gompieno. Leka motlha setheo sa lelapa ga se ise se ke se kgautlhanngwe ke tlhoka-kutlwano e e kana-kana jaaka monna le mosadi ba lwantshana, ba gatana ka dinao le go tlhalana. Ebile ke leng go kileng ga nna le phatlha ya losika e e kana-kana jaaka go ntse mo metlheng ya gompieno, fa batsadi le bana ba ntse ba katogana fela thata?
Phapaanong e e gakgamatsang go seno sotlhe ke ya phuthego ya ga Jehofa e e bonalang, setlhopha sa basupi ba Bakeresete ba ga Jehofa. Ba kitlane, go feta 2 400 000, lefa ba aname le mafatshe a a kana ka 205 le ditlhake tsa lewatle. Kutlwano ya bone ke e e fenyang dithibedi tsa bomorafe, le dithibedi tsa puo le lotso, dithibedi tsa mokgwa wa botshelo le tsa itsholelo. Ke eng seo se ba kitlantseng? Kobamelo e e itshekileng ya ga Jehofa Modimo.—Sefania 3:9.
Go tshwanetse ga nna jalo ka balatedi ba boammaaruri ba ga Keresete, ka jaana ke eng seo moaposetoloi Paulo a se kwaletseng Bakorintha mo go 1 Bakorintha 1:10? O rile ‘go se nne dikgaogano mo go bone, mme ba tshwanetse ba bua botlhe ka tumalano le gore ba tshwanetse go nna mogopolo o le mongwe fela le go nna tshekatsheko e le nngwe fela.’ Ka mo go tshwanang mo go Bafilipi 3:15, 16 o gakolola gore ba ba godileng ba nne maikutlo a a ntseng jalo. A mme kutlwano ga e a tshwanela go tshwaya balatedi ba boammaaruri ba ga Keresete ponong ya mafoko a gagwe a gore ka go ratana ga bone Bakeresete botlhe ba boammaaruri ba tla lemogiwa? Eleruri, lorato lo dira kutlwano.—Yohane 13:34, 35.
Tota kutlwano eno e ne ya bolelelwa pele mo go Isaia 52:8, ka mafoko ano: “A lencwe ya balebedi ba gago! ba choletsa lencwe, ba ōpèla mmōgō: gonne ba tla bōna ba lebanye mo matlhoñ, mogañ Yehofa o boèlañ mo Siona.” Mabaka a a bonalang a bontsha gore go phuthwa gape ga Siona go ne ga simolola ka 1919.
Eleruri ga go motlhofo go boloka kutlwano eno. Seno e le ka ntlha ya bogale jo bogolo jwa ga Diabolo, ka a itse gore o na le nako e khutshwane, ebile gape le ka ntlha ya go swahala ga bodumedi jotlhe le mekgwa ya go tshela ya batho mo motlheng wa rona. (Tshenolō 12:9, 12) Dijo tsa semoya tseo di tla abiwang monongwaga kwa dikopanong kwantle le pelaelo di tla nonotsha boikemisetso jwa batlhanka botlhe ba ga Jehofa go fokotsa makoa a botho, ditlhaelo le bosaitekanelang ka ntlha ya leina la ga Jehofa Modimo le tiro ya gagwe. Thulaganyo eno e e molemo e tla simolola ka Labone mo tshokologong le go fitlhelela Sontaga mo tshokologong. E tla bo e le mo nakong sentle le go agelela, ebile kwantle le pelaelo botlhe ba tla tloga kopanong eno ba tlhomeletswe ga botoka go direla Jehofa Modimo ka kutlwano le bakaulengwe ba bone mme le ka boikemisetso jo bo nonofileng jwa go dira jalo.