Go Godisetsa Bana ba Gago go Rateng Jehofa

“Morwaaka, ha pelo ea gago e le botlhale, pelo ea me e tla itumèla, eboñ ea me.”—Diane 23:15.

1. Ke boitumelo bofe Jo bo kgethegileng joo batsadi ba ka nnang le jone, mme wena jaaka motsadi o tshwanetse wa dirang kaga gone?

A BO e le boitumelo jang ne go bona bana bannye ba golelago nna batlhanka ba ba godileng ba Modimo! Fa go ntse goya-goya kgatlhego ya bone e nna e gola, ba tseye kitso, ba nne le kgono, ba nne kafa letlhakoreng la boammaaruri jwa Bokeresete, ba oketse kgolo, ba ineele go Modimo le go nna batlhanka ba gagwe ba ba ikanyegang. Fa o le motsadi, o ka thusa bana ba gago jang mo tseleng e ntle eno? Ka phepafalo seno se batla boiteko. Moaposetoloi Paulo o ne a botsa gore batho ba ne ba ka “dumèla yañ mo go èna eo ba e señ ba utlwe kaga gagwè,” mme ebile ba ka utlwa jang fa mongwe a sa ba rute?—Baroma 10:14.

2. Re ka thusa bana ba rona jang go anaanela Jehofa Modimo?

² Bana ba bannye ba gakgamadiwa ke dilo. Serurubele, nonyane, sethunya, tlhaga, loapi, naledi—dilo tseo tsotlhe di ba jesa kgakge. Abo tseno e le dipaka tse di ntle jang ne tseo di re neelang go ka bua ka Mmopi le mabaka a gore re ka mo leboga! Mopesalema o ne a kwala ka go re: “Ke selō se se molemō go ntshetsa Yehofa malebogō.” (Pesalema 92:1) O ka mo lebogela dikgakgamatso tsa tlholego, di-tsa botshelo le boammaaruri jwa Lefoko la gagwe. Bana ba gago ba tla elatlhoko tebogo ya gago mme ebile ga ba kitla ba e lebala.—Pesalema 8:3, 4; 19:1; Baroma 1:20; Duteronome 8:10; Diane 22:6.

3. Tsela e nngwe e ntle ya go ruta bana ba rona ke efe? Fa dikai.

³ Banyana ba bannye ba rata dipolelo. Modimo o ne a itse ka seno. O dirile gore dipolelo di le dintsi tsa boammaaruri di kwadiwe mo Bibeleng—dipolelo tseo di ka rutang le bone banyana ba bannyennye kaga ditsela tsa Modimo. Ka sekai, tseno di bontsha gore re tshwanetse ra nna le tumelo jaaka Aberahame, re Mo ikanye fela jaaka Joshue le Kalebe, re Mo utlwe re sa le basha fela jaaka Samuele le Timotheo, le go emela tumelo ya rona jaaka makawana bo Shaderake, Meshake le Abedenego.a

4. Ke dikai dife tse re nang natso tsa bana bao ba ileng ba ithuta ditsela tsa Modimo, mo gompienong le mo metlheng ya Bibela?

⁴ Bana ba ithuta ka bofefo thata. Ba ithuta mafoko a babapatsi le dilo di le dintsi tse fa gongwe o eletsang ekete ba ka bo ba seka ba di utlwa. Abo go le botlhokwa jang ne go ba thusa gore ba ithute kaga Modimo le ditsela tsa gagwe! Batho ba le bantsi ba ile ba akgela kafa bana ba ka neelang ditlhaloso tse di ntle mo dipokanong tsa Bokeresete, le kafa ba ka tlhakanelang ka teng mo Sekolong sa Tirelo sa Bolegodimo ba santse ba le babotlana. Babotlana ba ba ntseng jalo ke dikai tse di bonalang tsa bomosola jwa tao ya Bibela kaga go thapisa bana. Batsadi ba Baiseraele ba ne ba tshwanetse go ruta bana ba bone ka metlha, mme le eleng “banyana” le bone ba ne ba tlisiwa go tla go utlwa molao wa Modimo o balwa. Bana ba bone ba ne ba tshwanetse go reetsa le gore ba “ithutè go boiha Yehofa Modimo oa [bone].”—Duteronome 31:12, 13; 6:5-9.

5, 6. O ka thusa bana ba gago jang go ithuta ditsela tsa Modimo?

⁵ O ka nna wa bo o itse mo gontsi kaga Lefoko la Modimo, mme seo ga se reye gore bana ba gago le bone ba ntse jalo. Ga ba je kitso boswa. Go mo go wena jaaka motsadi go ba ruta dilo tse di gakgamatsang tsa Modimo le go dira gore seno se ikuele, gore ba tle ba batle go ithuta.

⁶ A bana ba gago ba tlhaloganya dithuto tsa motheo tsa Bibela? A ba ithutile melao-metheo ya yone ya botshelo jwa malatsi otlhe? A o na le thuto ya Bibela ya lelapa ya ka metlha le bone? Fa ba santse ba le babotlana, a o ile wa ithuta Go Reetsa Morutisi yo Mogolo, ka dithuto tsa yone tse di masome a mane le borataro tse di kwaletsweng selekanyong sa bone? Fa e le gore o dirile seo, mme bana ba gago ba gola jaanong, a o ithutile le bone Bosha Jwa Gago—Go Iponela Molemo mo go Jone, eo e bakaanyetsang ka boikitsiso jo bo tlhomologileng go thusa batho ba banana go lebana le botshelo? Bibela e bolela gore Timotheo o ne a ile a rutiwa dilo tse go tswa “mo bonyaneñ.” Go amega ga ga Jakobe kaga ‘mosepele wa banyana’ fa ba ne ba ya kwa Seira go bontsha botlhokwa jwa go tsamaya ka mosepele o ba ka o kgonang. Fa o ithuta le bone o tshwanetse wa nna selekanyong se ba ka se tlhaloganyang, le go ya ka boleele jo bo utlwalang jwa dingwaga tsa bone.—2 Timotheo 3:15; Genesise 33:14.

Nonofo ya Boammaaruri

7, 8. (a) Ke ka ntlhayang fa kitso ya boammaaruri e le botlhokwa jaana? (b) Batsadi ba ka thusa bana ba bone jang go anaanela dipokano tsa Bokeresete?

⁷ Boammaaruri jwa Modimo ke maatla a a nonofileng. Bo ka fetola kakanyo le botho jwa batho ba ba godileng. Bibela e re “kaga mokgwa oa botshelō yoa lona yoa galè, lo apolè motho oa bogologolo . . . le go re, lo shahadiwè mo moeeñ oa pelo tsa lona.” (Baefesia 4:22-24; Bakolosa 3:9, 10) Ka go bo bo nonofile go le kalo, boammaaruri jwa Bokeresete bo ka baakanyetsa ka tshireletso e kgolo mo baneng ba gago. Batho ba banana ba nna gangwe le gape ba bontsha kanaanelo ka ntlha ya maiteko a ka metlha ao a dirilweng ke batsadi ba bone go ba isa kwa dipokanong koo go buisanngwang ka Lefoko la Modimo, lefa e ka ne e rile pele ba bo ba batla go ya kana nnya. Mosha mongwe o ne a re: “Tota lantlha gone ke ne ke sa batle go ya. Ke ne ke sa tlhaloganye mo gontsi. Go tswa foo ke bo ke itharabologelwa tota go bo jaana ke ne fitlhela gore: Bona tlhe, ke ithuta kaga Bibela!”

⁸ Batsadi ka bontsi ba ipaakanyetsa go sa le gale le bana ba bone, gore bana ba tle ba tlhaloganye. Ba bangwe ba kgothaletsa bana ba bone go ikgakolola dintlha di sekae go tswa pokanong le go bua ka tseno fa ba boela gae. Le rona re ka gopola fela kafa go neng ga nna le dipuisano tse di tlhagafetseng tse di ntseng jalo fa malapa a Baiseraele a ne a boa kwa kobamelong ya one kwa Jerusalema.—Duteronome 31:10-13; Luke 2:41, 42.

Tirelo ya Bomodimo

9, 10. Ke eng seo o ka se dirang go thusa bana ba gago go anaanela tirelo ya Bokeresete?

⁹ Malebana le go arola mo tirong ya go rera ya phatlalatsa, babotlana ba lona ka tsela nngwe ba ka nna ba tswa ba leba tirelo ya bomodimo fela jaaka Jeremia: “Ao, Yehofa Modimo! bōna ga ke itse go bua: gonne ke ñwanyana hèla.” Jalo, go botlhokwa go ba thapisa kgato ka kgato. Go ya fela ka dingwaga tsa bone le botswelelo ba ka kokota lebati, ba aba taletso, ba bala temana ya Lekwalo, ba neelana ka dikgatiso tse di thailweng mo Bibeleng kwa magaeng fa ga bone, kana le eleng go tshwara dithuto tsa Bibela.—Yeremia 1:6, 7.

¹⁰ Boikutlo jwa gago bo tla ama bana ba gago fela thata. Mosupi mongwe yo mmotlana o ne a re: “Mama o itumelela tirelo tota. Nako le nako fa a boa, o tla ka sengwe se se monate go se re bolelela.” Fa batho ba banana ba bereka ditiro tse dingwe gore bommaabo ba tle ba dire kgwedi nngwe e le babulatsela (moreri wa nako e e tletseng), ba ikutlwa gore ba bontlhanngwe jwa se a se dirang mme ba gopola ka nako eo ba tla nnang le ditshiamelo tse di ntseng jalo ka bobone. Mongwe wa dingwaga tse di masome a mabedi le bongwe o ne a re: “Batsadi ba me ba ne ka metlha ba ntemotsha fa ba gopola gore go bulatsela e ne e le tsela e ntle-ntle ya botshelo.” Mosha yo mongwe o ne a tlhalosa a re: “Ga ke gakologelwe lefa e le ka motlha ope bobulatsela bo neng jwa seka jwa tlhongwa jaaka mokgele.” Batho ba banana ba ka ipela mme ba nna le maitemogelo a a itumetseng a go direla Jehofa, ka jaana e le “Modimo o o itumetseng,” mme Keresete Jesu ke “ena Mothata yo o itumetseng yo o esi.”—1 Timotheo 1:11; 6:15, NW.

Kanaanelo

11-13. Mengwe ya melemo eo tumelo ya gago e e baakanyetsang bana ba gago ke efe mabapi le (a) go boifa isagwe? (b) go boifa loso?

¹¹ Go botlhokwa go tlhomamisa gore bana ba gago ba anaanela dilo tseo ba nang natso mme e le tseo batho ba bangwe ba ka neng ba sena natso.

¹² Sengwe sa dilo tseo ba nang natso ke polokesego. Basha ba gompieno ka kakaretso ba buisana ka mathata a lefatshe kwa sekolong, ba bile ba a bona mo thelebisheneng. Ba bua kaga kgotlelo ya dilo, ntwa ya atomiki le tshenyego ya lefatshe e e ka nnang gone. Ka go sa tshwane le bone, Basupi ba ba botlana ba na le tsholofelo le go ikutlwa ba bolokesegile. Ba itse gore Modimo o ka se letle gore dilo di ye go fitlha koo, mme e leng gore o tla “senya ba ba senyañ lehatshe.”—Tshenolo 11:18.

¹³ Bontsi Jwa ditsala tsa bone bo boifisiwa ke loso. Mongwe wa dingwaga tse di lesome le boraro o ne a re: “Motho go gola fela ka go itse gore o tla swa ga go bonale go siame.” Basha ba gago ba itse gore Bibela e re baswi “ga ba itse sepè,” le gore “maikaèlèlō a [bone] a nyèlèle,” jalo baswi ba ka se nne mo tlhokofatsong. Ba itse gape gore Dikwalo di solofetsa botshelo—gore batho ba le bantsi ba ba mo mabitleng ba tla “cwa,” ka jaana go tla nna ‘tsogo ka letsatsi la bohelo.’ Basha ba gago ba ka bala mafoko ano a kgomotso mo Bibeleng mo go Moreri 9:5, 10; Pesalema 146:4; Yohane 5:28, 29 le Yohane 11:11-25.

14. Ke ka ntlhayang fa go nna le boammaaruri go tshwanetse go nna botlhokwa mo baneng ba gago?

¹⁴ A mme gape, bana ba gago ba lemoga botlhokwa jwa boammaaruri jo ba nang le jone? Mosupi mongwe yo mmotlana o ne a re: “Seo se neng sa nkgogela mo boammaaruring ke seo bo leng sone—boammaaruri. Ka metlha ke ne ke batla go tlhalosediwa dilo, ke ne ke botsa ka metlha ke re: Ka ntlhayang? Bibela e tshwana fela le go le motshegare, ruri o ka itshwarelela ka yone.” Jesu o ne a re: “boamarure bo tla lo golola.” Bo ile jwa golola diketekete, eseng fela mo bokgobeng jwa bodumedi mme gape le mo diokobatsing, boitsholong jo bo sa siamang, kotsing ya malwetsi a dikobo, tumela-botlhoding, dithutong tsa motheo tsa maaka le ditlhobaelong le mathata ao a fitlhelwang mo lefatsheng leno le le boikepo.—Yohane 8:32.

15. Batsadi le bana ka go tshwana ba tshwanetse ba tlhotlhelediwa jang ke boammaaruri Jo bo tlhalositsweng mo go: (a) 1 Yohane 4:9, 10? (b) 2 Petere 3:13?

¹⁵ A o rutile bana ba gago botlhokwa jwa lorato lwa Modimo le kutlwelobotlhoko? A ba lemoga gore go ne go rayang mo go ene go romela Morwawe mo lefatsheng jaaka thekololo? (1 Yohane 4:9, 10; Baroma 8:38, 39) A ba lebile ka boitumelo tebelelong ya botshelo jo bo sa khutleng mo lefatsheng la paradaise? (2 Petere 3:13) Go anaanela ga gago masego a a ntseng jalo go tla kgothaletsa bana ba gago gore ba felele ba di anaanela. Dikwalo di bolela gore batsadi ba tshwanetse ba boife Modimo le go boloka ditaolo tsa gagwe “gore go ko go nnè sentlè nabō, le bana ba bōnè ka bosakhutleñ!”—Duteronome 5:29.

16. Ke eng seo bana ba tshwanetseng go thusiwa go se lemoga kaga mosola wa Lefoko la Modimo mo lelapeng la bone?

¹⁶ A bana ba gago ba lemoga seo kitso ya Lefoko la Modimo e ka neng e se diretse lelapa la lona? Bana ba gago ba ka ne ba na le balekane ba sekolo bao, ka ntlha ya tlhalano, ba nang le bommè ba le babedi kana bararo kana borre. Fa lelapa la gaeno e le le le tshwaraganeng, leo batsadi ba ileng ba ineela mo go yo mongwe ka lobaka lo loleele, a bana ba gago ba lemoga fa seno se le tumalanong le melao-metheo ya Bibela? (Bahebera 13:4) A ba lemoga gore melao-metheo e e fitlhelwang mo Bibeleng e ba thusa gore ba nne le boikutlo jwa polokesego, bolekane, thuano, boikaelelo, kaelo, phitlhelelo le bomosola jwa botho joo batho ba banana ka bontsi ba tlhokileng go nna natso?

17, 18. Bana ba ka bona jang gore Lefoko la Modimo le na le mosola mo go bone: (a) mo malapeng a a kgaoganeng ka bodumedi? (b) mo magaeng a batsadi-bangwefela?

¹⁷ Mme gongwe o ka ne o akanya ka go re: ‘Ba-lelapa la gaetsho ba kgaogane—monna wa me (kana mosadi) ga a dirise melao-metheo e e ntseng jalo.’ Seo ga se go kganele go e dirisa. Bibela e re banna ba ba sa dumeleng ba ka “[kgōnwa] kwa ntlè ga lehoko ke mokgwa o montlè oa basadi ba bōnè.” Fa molekane wa gago yo o sa dumeleng a ka kgatlhiwa ke sekao sa gago se se molemo, akanya ka phelelo eo go dirisa ga gago ka boikanyego melao-metheo ya bomodimo go ka nna le yone mo baneng ba gago!—1 Petere 3:1, 2.

¹⁸ Kana gongwe o ka ne o le motsadi-mongwefela, o tshwanelwa ke go godisa bana ba gago o le nosi. Fa go ntse jalo, itsise bana ba gago bothata jono. Tshegetsanang. Dira gore ba bone pharologano magareng a botshelo jwa bone le jwa malapa a mangwe a batsadi-bangwefela a ba a itseng. Abo ba na le lesego jang ne go nna mo legaeng leo botagwa, botlhapelwa, boaka le ditiro tse dingwe tsa nama di sa tseneng teng!—1 Bakorintha 6:9, 10; Bagalatia 5:19-21.

Ditiro tse di Phepa

19, 20. (a) Batsadi ba ka thusa jang go tlatsa ditlhokafalo tsa bana ba bone tsa puisano le bokopano? (b) Ka matswela afe?

¹⁹ Bana ba tlhoka go tshameka. Bongwe jwa maemo a a itumedisang ao Bibela ea kopanyang le tsosoloso ya tempele ya Jerusalema e ne ya nna “tshimane le tshetsana ba tshameka mo mebileñ ea ōna.” (Sekaria 8:5) Bana ba bile gape ba tlhoka nako ya gago. Ke fela fa o senya nako le bone, o ba letla go bua, le go reetsa tota-tota seo ba se buang, o ka nnang le puisano le bone, o ka itseng mathata a bone le go ba tswa thuso. Lemororo bana ba Bakeresete ba sa keteke malatsi a a rileng a boikhutso a a simologileng mo boheitaneng, batsadi ba bone gantsi ba rulaganyetsa dinako tsa boitumelo—go ya go iphokisa phefo, maitiso le ba bangwe kana monate mongwe o o phepa. Ba nna ba amogela dimpho nako le nako fa ngwaga o ntse o ya koo. Malapa mangwe a nna le modironyana fa bagagabo-mogolo ba etile. Batsadi ba kgothaletsa bokopano jo bo phepa le Bakeresete ba bangwe ba ba botlana. Fa lelapa le le kwa bothokong, basha ba ka nna le ditsala tse ba kwalelanang natso tseo ba di boneng kwa dikopanong tsa Bokeresete.

²⁰ Rre mongwe o a tle a botse bana ba gagwe a re: “A le ikutlwa le latlhegetswe ke sengwe ka ntlha ya tumelo ya lona?” Mme karabo e nne: “Ele ruri nnya!” E ne ya re fa mosha mongwe a bapisa botshelo jwa gagwe le balekane ba gagwe ba sekolo, a re: “Selo se le sengwe fela se se ntatlhegetseng ke go tsena mo matshwenyegong a mantsi.”

Thuso e e ka Kwantle

21. Lemororo go lemogwa gore go thapisa bana ke boikarabelo jwa batsadi, ba bangwe ba ka thusa jang?

²¹ Boikarabelo jwa go ruta bana ba rona ke boikarabelo jo e leng jwa rona. Bibela e bontsha gore rre o tshwanetse a etelelapele, mme mmè o tshwanetse go thusa. E re: “Morwaaka, utlwa thutō ea ga rrago, me u se ka ua tlogèla molaō oa ga mmago.” (Diane 1:8; Baefesia 6:4) Mme seno ga se reye gore ba bangwe ba ka se thuse. Phuthego ke lelapa, mme kgafetsa-kgafetsa banna bagolo ba ba godileng ba nna ba bolela ka thuso e e kgethegileng eo mongwe mo phuthegong a neng a e ba neela fa ba ne ba sa le babotlana. Basupi ba ba tlhagafetseng ba gakologelwa ka lorato batho bao ba ileng ba ya le bone kwa tirelong ya Bokeresete morago bogologolo. Batho ba banana ba go anaanela tota fa ba bagolwane ba ba bontsha kgatlhego e e ntseng jalo mme ba ba thusa go nna mo tseleng e e siameng.—Diane 13:20.

Sekao sa Gago

22. Sekao se o se tlhomang se na le botlhokwa bofe?

²² Go botlhokwa mo baneng ba gago go bona gore o lebile kaelo go Modimo le gore o dirile Lefoko la gagwe bontlhanngwe jwa gago—gore ruri o a le dumela le go le dirisa mo botshelong jwa gago. (Pesalema 143:10) Ba bona boikutlo jwa gago. Fa o tsaya dipokano jaaka mmereko, o bua bagolwane leswe, o nyatsa maloko mangwe a phuthego le go tenegela nako e e senngwang mo tirelong ya ga Jehofa, go matshwanedi gore bana ba gago ba latele sekao sa gago se se bosula. Mme fa o leba dithulaganyo tseno tsa bolegodimo jaaka masego a magolo a a tswang go Jehofa, go ntse go le matshwanedi gore bana ba gago le bone ba tla dira. Go godisa bana ga se thata-thata go dira dilo di sekae tse dikgolo mme e leng palo e kgolo ya tse di potlana. Fa o dira dilo tse di potlana di sekae tse di siameng letsatsi le letsatsi, go bonala sentle fa o tla kgona go dirisana le dipe fela tse dikgolo tse di ka tsogang.—Luke 16:10; Mathaio 25:21.

23. Ditebelelo tsa gago di ka ama bana ba gago jang?

²³ Go botlhokwa thata mo baneng ba gago gore ba itse lefelo je le kgethegileng je ba nang le lone mo pelong ya gago. Ba tshwanetse go itse gore ruri o a ba rata, le gore o ka swaba fa ba ka palelwa ke go latela melao-metheo ya bomodimo. Solomone o ne a kwala a re: “Morwaaka, ha pelo ea gago e le botlhale, pelo ea me e tla itumèla, eboñ ea me.” Gape le gore “Rragwè mosiami o tla ipela thata.” (Diane 23:15, 24) Mme gotweng fa e le gore—fa bana ba gago ba ntse ba gola mme gongwe ba utlwa tlhotlheletso nngwe ya boitaolo—ba bo ba dira sengwe seo o se buisantseng le bone mme ka gone ba itse gore ga se a siama mo matlhong a Modimo? Se itlhaganelele go ba tlhoboga kana go khutlela go leka go ba thusa. Gakologelwa gore le bone ga ba itekanela mme ba ka nna ba bo ba raletse motlha wa phetogo o o boima. Go sa kgathalege kgobego-marapo ya gago, tswelela-pele go ba bontsha kutlwisiso, mme gone o tsepame ebile o phepafetse, gore go latela melao-metheo ya Modimo e le ruri go tla ba siamela thata.—Yakobe 3:2.

24. Ke tuelo efe eo batsadi ba ka e solofelang fa ba ile ba godisa bana ba bone go ya kafa melao-metheong ya bomodimo?

²⁴ Go a itumedisa go bona bana ba rona ba golela mo makaung le basading ba meroba ba bantle, go ba bona ba tsaya maikarabelo a bone ba bo ba dirisa mo matshelong a bone dilo tseo re lekileng go di ba ruta. Fela jaaka Paulo a ile a kgothatsa Timotheo yo mmotlana, le rona re a re go bana ba rona: “U tlhōhalèlè go ichupa u le molebosègi mo Modimoñ, u le modihi eo o senañ go tlhaywa ke ditlhoñ, u bua lehoko ya boamarure ka tshiamō.” (2 Timotheo 2:15) He re ka re ka bana ba rona sebele, bao ba bileng ba tla bo ba nnile ba semoya: “Ga ke na boitumèlō bopè yo bo hetañ yo, yoa go utlwa ha bana ba me ba nntse ba tsamaea mo boamarureñ.”—3 Yohane 4.

[Mokwalo o o kwa tlase]

A O Gakologelwa Dintlha Tseno?

◻ Ke ka ntlhayang fa re tshwanetse go ikanyega mo go ruteng bana ba rona kaga Modimo le boammaaruri jwa gagwe?

◻ O ka dira jang gore dipokano tsa Bokeresete di kgatlhise bana ba gago?

◻ Jaaka batsadi ba ba lorato, re tla goga bana ba rona jang, kgato-ka-kgato, mo tirelong ya bomodimo?

◻ Re batla go tlhomamisega gore ba a lemoga masego afe?

[Lebokoso mo go tsebe 27]

Bana ba tlhoka peo-tseleng, kaelo le ditekanyetso, Bibela e re: “Boeleele bo bohelecwe mo peduñ ea ñwanyana.” (Diane 22:15) Mme fa batsadi ba kgatlhega ka mo go lekaneng go tlhoma ditekanyetso le go bona gore bana ba bone baa di tlhaloganya le go nna mo go tsone, bana ba ikutlwa ba babalesegile—batsadi ba bone ga ba na go ba letla go dira dilo tseo di ka nnang tsa ba gobatsa.

[Setshwantsho mo go tsebe 28]

Fa mosha a ntse a gola mo mmeleng . . .

[Setshwantsho mo go tsebe 29]

batsadi ba ka mo thusa go tswelela pelo mo semoyeng