Maaka a Nthla—A Builwe ke Mang?
MO TOROPONG nngwe yamo borwa jwa Afrika banna ba babedi ba ne ba kgweetsa go feta marakanelo a ditsela. Mabone a diroboto a ne a le matala, mme ba ile ba emisiwa ke lepodise la dipalangwa le le ba boditseng la re: “Ke ka ntlhayang fa lo feta mabone a le mahibidu?” Banna ba babedi bano ba ne ba ganela gore ba dirile jalo. Mme lepodise la re: “A lo ntshema sefofu?” Mme a simolola go kwala thekethe. Mokgweetsi a araba ka boleta a re: “Go na le Mongwe kwa godimo yo o itseng seo o se dirang.” Lepodise la okaoka . . . mme la ba tlogela.
Ee, lepodise leno le ne le bua maaka. A go a gakgamatsa? Le e seng. Go aka go tsetsepeletse mo bathong. Jaaka go tle go buiwe: “Nna o bua maaka gantsi mme batho ba tla a dumela.” Bo-radipolotiki ba bantsi ba bonala ba dumalana le seno, mme mo megopolong ya ba bantsi, dipolotiki di amana thata-thata le go bua maaka.
Batho ba bua maaka ka ntlha ya mabaka a mantsi-ntsi. Mokeresete yo o peloephepa yo o neng a tlhoka tiro ka lobakanyana o ne a kopa tiro kwa femeng nngwe ya dilo tse di rekisiwang. Mme mookamedi wa yone o ne a mo tlhagisa ka go re: “Gore o tle o rekise dilwana tsa me o tshwanetse wa kgona go bua maaka go gaisa ba bangwe!” Mokeresete yo a gana tiro eo.
Tota le batho ba bodumedi, fa ba sa ngaparele ditekanyetso tsa bomodimo, baa aka. A o gakologelwa gore baeteledipele ba bodumedi ba Bajuda ba rileng fa ba ne ba utlwa gore Jesu wa Nasaretha yo o bolailweng o ne a tsositswe mo baswing? Ba ne ba naya masole a a neng a disitse phupu ya ga Jesu pipa-molomo gore ba re: “Barutwa ba gagwè ba tsile bosigo, ba mo ucwa re robetse.”—Mathaio 28:12-15.
Mme go bonala ekete go aka ga se ga tlholego mo bathong. Dr. Lewis Thomas o kwadile jaana: “Go ya kafa ke tlhaloganyang ka teng, motho gaa ne a bua maaka, lefa a le mannye jang, kwantle ga go ntsha mosinyana golo gongwe mo mosimaneng o o lefifi wa boboko, mo go bakang gore methapo e ube ka tshoganetso, kana gore di-hormone tsa methapo tsa mothale mongwe di gorometsege . . . ka jalo, go aka go baka kgagamalo, tota lefa re aka gore re itshireletse, re itlhofofaletse, re falole, kana re bone morokotso.” (Discover, December 1980) Ditiragalo tse tsa mmele ke tsone tse di bulelang sesupa-maaka.
Ereka maaka a baka kgagamalo jaana, a simolotse jang?
Maaka a Ntlha a Builwe ke Mang?
Jesu Keresete o kgetholotse moaki wa ntlha, ebile o bontshitse gore e ne e se motho. O rile: “E re ha [Satane] a bua maaka, o bua mo e leñ ga gagwè, gonne ke moaki, le rra aōna maaka.” (Yohane 8:44) Ka jalo moaki wa ntlha ke Satane Diabolo. O simolotse go bua maaka leng? Go ya ka Bibela, ke fela morago ga tshimologo ya ditiragalo tsa lotso lwa batho.
Tiragalo eo e kwadilwe mo bukeng ya Bibela ya Genesise, mme maaka ao mo bathong e ne e le kgang ya botshelo le loso. Modimo o ne wa bontsha monna wa ntlha, e leng Adame, gore go tswelapele ga gagwe a ntse a tshela go ikaegile mo kutlong. O ile a neela Adame molao o o motlhofo gore a o boloke a bo a re fa a ka palelwa ke go boloka molao oo ‘rure o ne a tla swa.’ Mme Satane ka go senya leina o ne a aka a re: “Rure ga lo ketla lo shwa.” E ne e le maaka a ntlha mo go a a dibilione ao a utlwilweng mo lefatsheng leno.—Genesise 2:17; 3:4.
Gompieno ba bantsi ga ba dumele pego eo ya mo Bibeleng. Mme Jesu, monna yo o kileng a tshela yo o nang le boammaaruri go gaisa, o ne a tlhomamisa gore pego e e mo go Genesise ga se tlhamane mme ke tiragalo ya boammaaruri. (Mathaio 19:4, 5) Eleruri, matswela a maaka ao a santse a na le rona. A baketse lotso lwa batho kudumedi.