“Go Tsalwa Sesha” Go a Tuma

“GO TSALWA GAPE GO A ANAMA.” E ne e le setlhogo sa pego ya dikgang go tswa Los Angeles eo e bonetseng go Post ya New York ya May 19, 1980. Pego eno e ne ya tswelela ka go re: “Mo e ka nnang go feta sephatlo sa Ma-Amerika otlhe a bagolo a ile a nna le boitemogelo jwa go ya go ile jwa Sekeresete jwa ‘go tsalwa sesha,’ ga bega jalo potsolotso e e dirilweng. Potsolotso eno . . . e bontsha gore didikadike tse 84 tsa bagolo ba Amerika ba dirile boitlamo ka bobone go Jesu Keresete joo ba bo kayang bo santse bo ba tlamile.” Nako nngwe pele ga mo tshekatsheko nngwe e ne ya bega gore mo e ka nnang sephatlo sa basha ba Baganetsa-Makatoliki “ba ile ba nna le boitemogelo jwa ‘go tsalwa sesha.” “Para de ya beke le beke ya July 6, 1980, e ne ya bolela gore bo-ntlhophang ba botautona jwa United States ka nako eo, e leng Carter, Reagan le Anderson, ba ne ba iphaka gore ke Bakeresete ba “go tsalwa sesha.”

Bakeresete ba “go tsalwa sesha” ka dinako tse dingwe ba re katlego ya bone mo kgwebong e dirwa ke go tsalwa sesha. Ramaemo mongwe yo o neng a atlega thata kwa New York o begwa fa a ile a re: “O ikanegela Morena fela mme Morena o a go thusa. Ka nako nngwe, fa ke ne ke tshwanelwa ke go reka motšhine wa Bonwit Teller, ke ne ke tlhaelelwa ke R2,5 million mme ke sa itse gore ke ka a bona jang. Tota e ne e le kgakgamatso. Mme go ne ga diragala se se tshwanang fa ke ne ke reka motšhine wa Tiffany mme ke tlhaelelwa ke R1 million.” Mo setlhogong seo se neng se re “Batshameka-kgwele ba go ‘tsalwa sesha’ baa Ntsifala,” pego go tswa San Fransisco e ne ya bolela ka batshameki ba kgwele bao ba iphakileng go bo ba tsetswe sesha, e bo e tsopola batshameki ba kgwele ba le mmalwa bao ba rileng katlego ya bone e tlisitswe ke go tsalwa sesha. Mongwe wa bone o ne a re: “Ga se gantsi ke tle ke botsolotswe, ka jalo ke rata gore ke itseele sebaka seno go leboga Jesu Keresete. O kwa pele-pele mo botshelong jwa me.” Yo mongwe o ne a bolela gore go “motlhofo fela thata go tshameka motshameko wa kgwele, gammogo le motshameko wa botshelo, fa Modimo e le motshameki-mmogo.”

Me gape, pego kaga katlego ya tsa madi ya “The Electric Church” e ne ya re: “Go Gasa mo Moweng ga Sedumedi e Nna Papadi e Kgolo, Go Anamela go U.S. Yotlhe. Bakeresete ba Go Tsalwa Sesha Gantsi Ba Duelela Dipontsho: Katlego ya ga Jerry Falwell. Boikaelelo: ‘Go Fitlhelela Dipelo le Dikgetsana tsa Madi.’”—The Wall Street Journal.

Lefa go ntse jalo, ga se bo-rabodumedi botlhe mo go La-Bodumedi ba ba itumelelang tlwaelo e. Ka gone Times ya New York e ne ya bolela gore ‘Ma-Presbytery a mefama-mebedi kaga tiro ya boefangele le gore tlhotlheletso ya ditlhopha tsa ba “Go Tsalwa Sesha” e ne ya ganetsanwa ke setlhopha sa bone sa bodumedi.’ Bangwe ba ne ba tshwaya tlwaelo eno e le go kubusa maikutlo fela, mme perofesa mongwe wa sekolo sa boruti o ne a ngongoregela gore “baithuti ka bontsi ba ne ba le tlhogo-di-thata” ka ntlha ya boikutlo jwa bone jwa “go tsalwa sesha.” Mo sekolong sengwe sa boruti mo e ka nnang sephato sa baithuti ba ne ba iphaka gore ba tsetswe sesha.

Ka kakaretso mogopolo ke gore “go tsalwa sesha” go tshwana fela le go “itlama” ga motho gore a direle Modimo le Keresete, eo e leng tsela eo baefangele ba tlhalosang kgang eno ka teng. Se se tsosa dipotso dingwe: Jesu o ne a re tsela e e isang botshelong e tshesane ebile e thata le gore e ne e tla bonwa ke ba sekae fela. (Math. 7:13, 14) Gangwe le gape o ne a tlhalosa gore balatedi ba gagwe ba ne ba se karolo ya lefatshe. (Yoh. 15:19; 17:16) Mafoko ano a gagwe a ka dumalanngwa jang le boiphako jwa gore mo e ka nnang go feta sephatlo sa bagolo mo U.S. ba ile ba nna le boitemogelo jwa “go tsalwa sesha”? Moo ebile ga se gone gotlhe. Fa sephatlo sa bagolo botlhe ba lefatshe lengwe e le Bakeresete ba “go tsalwa sesha,” ke ka ntlhayang fa go na le boganana jo bo kana-kana, go na le bokebekwa jo bo kana-kana, tsietso e e kana-kana ya makgetho, go bola mo go kana-kana ga bopolotiki, boitsholo jo bo maswe jwa bonna le bosadi jo bo kana-kana, thato e e kana-kana ya dilo tse di bonalang, boikutlo jwa “nna-pele” jo bo kana-kana? A Bibela e solofetsa katlego mo go tsa kgwebo mo go bao ba ‘tsetsweng sesha’? A Modimo le Keresete ba nna batshameki-mmogo le batshameki ba kgwele, ba ba thusa go fenya metshameko?

Jesu o ne a raya mmusi wa Mojuda, e leng Mofarisai Nikodemo a re: “Amarure, amarure, kea gu raea, Ha motho a sa tsalwe ke metse le Mōea, ga a kake a tsèna mo bogosiñ yoa Modimo. U se gakgamale ka go bo ke gu reile, ka re, Lo na le go tsalwa sesha.” (Yoh. 3:5, 7) Jesu o ne a rayang ka mafoko ano? Boikaelelo jwa ga Jehofa Modimo mo go direng gore bangwe ba tsalwe sesha ke bofe, mme bao ba tsetsweng sesha ba patelesegile go dira eng? Ke ka dikgato dife motho a tsalwang sesha? Pele ga fa dipotso tse di ka arabiwa ka mo go kgotsofatsang, go tlhokafala gore re tlhomamise mabaka a a rileng a motheo malebana le melao-metheo ya ga Jehofa Modimo le maikaelelo a gagwe mabapi le lefatshe le motho.

[Setshwantsho mo go tsebe 3]

Jesu o reile Nikodemo a re: “Lo na le go tsalwa sesha”

[Setshwantsho mo go tsebe 4]

‘Ba ba bonang tsela e e isang botshelong ga ba bantsi’