Dipotso tse di Tswang go Babadi
■ Morwaaka, yo o kolobeditsweng a le mo dingwageng tsa bolesome, ga jaanong o nyetse ebile o na le lelapa. Ka ntlha ya dikgatelelo tsa go jaka botshelo o tsidifetse moyeng ebile gaa kopanele le phuthego. A o tshwanetse go lebiwa jaaka motho yo o “itomolotseng”?
Ga go sepe mo tlhalosong ya gago se se tla tlhokang pono eo. Potso e ka bo e tlhagisitswe ka ntlha ya go se tlhaloganye se se kaiwang ke go lebiwa jaaka yo o “itomolotseng.”
Tora ya Tebelo ya March 1, 1982, tsebe 10 e bontshitse gore go na le pharologanyo gareng ga (a) Mokeresete yo o koafalang mo moyeng a bo a tsidifala, le (b) motho yo o itatolang ka phepafalo gore gaa sa tlhole e le Mosupi wa ga Jehofa, a dira gore bagolwane ba phuthego ba itsise gore o “itomolotse.” Go bonala ekete morwao o tshwanela tlhaloso ya ntlha.
Tora ya Tebelo e umakile gore Bakeresete bangwe ba koafala mo tumelong le mo moyeng. Seno se diragetse le mo lekgolong la ntlha. (Baroma 14:1, 2; 1 Bakorintha 11:30) Ga go reye gore ba setse ba emisitse go nna Bakeresete. Tota lefa ba setse ba le bokoa mo e leng gore ga ba sa tlhole ba abela ba bangwe “Mahoko a a Molemō” ebile ba kgaoditse go tla dipokanong, mme ba sa tlisetse phuthego ya Bokeresete kgobo, ba santse ba ka tsewa jaaka bakaulengwe le bokgaitsadi ba rona ba semoya. Re tshwanetse ra batla go ba thusa ka lorato, re latela kgakololo ya ga moaposetoloi Paulo e e reng: “Me rea lo laea, ba ga echo, rea re, tlhagisañ ba ba huduañ, nametsañ ba ba lapañ pelo, pepetletsañ ba ba bokōa, Io nnè pelotelele mo go botlhe.” Lemororo gantsi bagolwane e le bone ba etelelang-pele mo go seno, go tshwanetse ga elwa tlhoko gore kgakololo eno e ne e neelwa botlhe ba “phuthègō ea Bathesalonia.” (1 Bathesalonika 1:1; 5:14) Jalo bagolwane le ba bangwe ba ka neela thuso e e lorato le kgothatso, ba gakologelwa kgakololo eno: “Choletsañ mabōgō a a lepeletseñ, le mañōlè a a reketlañ; me Io dihèlè dinaō tsa Iona ditsela tse di siameñ, gore se se tlhotsañ se se ka sa lokologa, me bogolo se tlè se sidilègè.”—Bahebera 12:12, 13; Tshenolo 3:1-3.
Ruri ke kgang e e farologaneng kaga yo e neng e le Mokeresete mme a “itomolotse.” Lefoko leno le dirisiwa segolo mo maemong a mabedi ano:
Jwa ntlha, lefa go sa tlwaelega, motho o ka swetsa ka gore gaa sa tlhole a batla go nna Mosupi gotlhelele. Ga re reye motho yo o tshwanang le yo o tlhalositsweng fa godimo, ebong Mokeresete yo o koafetseng moyeng kana yo o kgobegileng marapo yo o ka tlhagisang dipelaelo dingwe. Bogolo, re raya mongwe yo ka maikaelelo a bolelang gore gaa sa tlhole e le mongwe wa Basupi ba ga Jehofa gotlhelele. Ereka mo nakong e e fetileng a nnile leloko le le kolobeditsweng la phuthego ka bogagagwe, go tla bo go siame jaanong gore a itsise phuthego gore o fedisa botsalano joo. Go ka nna molemo thata fa a ka dira seno ka go kwalela bagolwane lekwalo le le khutshwane, mme tota lefa a itlhagisa ka molomo a sa belaele gore o latlha kemo ya gagwe e le Mosupi, bagolwane ba ka dirisana le kgang eno.—1 Yohane 2:19.
Boemo jwa bobedi bo akareletsa motho yo o latlhang kemo ya gagwe le phuthego ka go kopanela le mokgatlho wa lefatshe oo boikaelelo jwa one bo ganetsanang le kgakololo e e fitlhelwang go Isaia 2:4, moo re balang jaana kaga badihedi ba Modimo: “[Ba] tla thula dichaka tsa bōnè magale a megoma, le marumō a cōna dithipa tsa mabèlè: morahe ga o ketla o ekèla morahe chaka; le gōna ga ba ketla ba tlhōla ba ithuta tlhabanō gopè.” Gape, jaaka go tlhagisitswe go Yohane 17:16, “bōnè ga se ba lehatshe, hèla yaka nna [Jesu] ke se oa lehatshe.”—Bapisa Tshenolō 19:17-21.
Mo boemong bongwe le bongwe jwa a mabedi ano, motho ka lefoko kana ka ditiro fela o khutlisitse boemo jwa gagwe ka phepafalo jaaka mongwe wa Basupi ba ga Jehofa, a itomolola ka boene. Ka jalo, bagolwane ba tla itsise phuthego ka bokhutshwane gore motho yono o itomolotse ka boene. Bao ba leng mo phuthegong ba tla amogela tshwetso ya motho yoo mme morago ga moo ba tla mo leba jaaka mokaulengwe wa bone wa nako e e fetileng yo ba tla sekeng ba kopanela le ene, mo tumalanong le seo re se balang go 1 Bakorintha 5:11 le 2 Yohane 9-11.
Jaaka re ka lemoga, morwa yo o koafetseng mo moyeng mme a tsidifetse yo potso e botswang kaga gagwe gaa “itomolola” mo go e nngwe ya dintlha tseno tse pedi mme phuthego ga e a itsisiwe. Jalo go sa ntse go kgonega gore a thusiwe ka boikutlo jwa Baroma 15:1: “Me yana rona ba re leñ thata, re chwanetse go pepetletsa dithetelèlō tsa ba ba bokōa.”—Bona gape Isaia 35:3.