Go Fodisa ka go Rapelela—Go Fodisa Jang?

‘“MOSETSANA yole yo o rweleng setshe-getsa-molala. Se role. O fodisitswe. Palamela kwano o galaletse Jesu.” Mosetsana o tswa mo setulong sa gagwe go ya kwa seraleng. A re o arilwe ga 12 mme o sale a bolawa ke bolwetsi jwa ramatiki fa e sa le ka 1973. A eme fa pele ga moperisiti, o ntse a akga-akga molala wa gagwe. Moperisiti o a mo segofatsa, babogedi ba opa diatla mme moperisiti a re: “O fodisitswe!”’

Akanya ka boipelo jwa motho yo o alafilweng bolwetsi jwa ramatiki! A dilo tse di ntseng jaana ruri dia diragala?

Dipego tse di ntseng jaaka eno go Sunday Telegram ya Worcester di akantsha gore di ka nna tsa diragala. Ga go gakgamatse fa go fodisa ka go rapelela ga segompieno go gogela kgatlhego e ntsi. Balwetsi ba thologela kwa bafodising ba ba rapelelang, ba solofela kalafi. A ditsholofelo tsa bone dia diragadiwa? A go fodisa ka go rapelela ruri go na le matswela mo go alafeng bolwetsi? Go fodisa jang?

KE ENG?

Tota, go fodisa ka go rapelela go tla ka mefuta-futa. Kwa Bophirima, gantsi go dirwa mo ditirelong tse di tshwerweng ke moefangele kana ke baruti ba ditumelo tse dikgolo—gongwe tseo di dirisanang le mokgatlho wa phodiso ya semoya. Bafodisi bano ba ba rapelelang ba iphaka go etsa Jesu Keresete le baaposetoloi ba gagwe, ba bile ba ikutlwa gore Modimo ka boone ke one motswedi wa maatla a bone.

Setlhopa se sengwe ke “bafodisi” ba ditumelo tse e seng tsa Bokeresete—baperisiti ba “masankoma,” dingaka tsa setswana, bo-ramelemo, jalo le jalo. Bano ba dumela gore bolwetsi bo dirwa ke meya e e bosula, mme ba dira meletlo ya go leleka meya eo.

Go bo go nna le “dingaka tsa semoya” tse di dirang se ba se bitsang “go ara ga semoya.” Mo Philippine, ka sekai, ba bolela gore ba tsenya diatla tsa bone fela mo teng ga mmele wa motho yo o lwalang ba bo ba ntsha mesifanyana e e suleng le matsadi a madi. Ka mo go begiwang ka teng, “balwetsi” ba bone ga ba utlwe sepe gotlhelele ebile ga go sale dipadi dipe tse di bonalang morago.

Labofelo, go na le bao ba reng “phodiso” ya bone ga e amane ka gope le bodumedi kana tumelo. Ba re yone ke tiro ya tlholego, e leng tsela ya go rafa nonofo e e re dikologileng, kana e e mo mmeleng ka boone, ya phodiso e e gakgamatsang. Bangwe ba bano ba rata go bidiwa “bafodisi ba semoya” go na le “bafodisi ba ba rapelelang.”

A E A FODISA?

Karabo ya potso eno e ikaegile ka yo o mmotsang. Badumedi ba gone ba bolela ka kalafi e ba e boneng kana ba e itemogeletseng ka bobone. Babelaedi ba gone ba umaka batlhatlhobisi ba ba sekasekileng ditiragalo tse di bolelwang e le phodiso e e gakgamatsang mme ba feditse ka gore ga e diragale. Goreng go na le kganetsano?

Ka gongwe go ka tswa go na le phoso ya boammaaruri. Mosadi mongwe o ne a dumela ruri fa a alafilwe kankere ya kgoro ya popelo. O ne a diriwa tlhatlhobo e e neng ya bontsha gore o na le kankere; jalo a ya kwa mofodising yo o rapelelang. Nako e e latelang fa a itlhatlhoba, ya bo e seo. O dumela tota gore mofodisi yo o rapelelang o mo alafile. Mme ngaka ya gagwe e ne ya re matswela a ntlha a tlhatlhobo a ne a le phoso, jaaka go tle go diragale.

Mo dinakong tse dingwe, batho bao ba solofelang go bona kgakgamatso fela thata ba tsenelela mo kakanyong ya go eletsa. Mosetsanyana yo o neng a bolawa ke kankere e e setseng e mo topetse o ne a ya kwa mofodising yo o rapelelang. Morago o ne a tlhatlhobiwa gape ke ngaka ya gagwe. “Fa ngaka e mpona o ne a sa dumele,” a bua jalo a itumetse. “Ke ne ke tshwanetse go swa mo dikgweding tse pedi. Mme go ne go ise go diragale sepe . . . Ga ke a tshwanela go ka bo ke tshela mme ga ke itse gore ke ka baka lang fa Modimo o mpolokile.” Ka kutlo-botlhoko, o ne a swa pele ga ngwaga e ise e fele morago ga moo.

Ngaka nngwe e kile ya tsopolwa e re go fola ga molwetsi wa gagwe e ne e le kgakgamatso. Lefa go ntse jalo, fa mmegi wa koranta nngwe a ne a latedisisa kgang eno, ngaka eo e ne ya re lefoko “kgakgamatso” e ne e le “seka-puo.” O ne a tlhomamisegile gore phodiso eo e ne e le “tiragalo ya tlholego.” “Ga ke bone gore re ka supa gore Modimo o ne wa tsenelela ka boone,” a rialo. “Ke bone selo se se ntseng jaana se diragala mme go sena go rapelelwa.”

Go na le mabaka a a dirang gore go nne thata go atlhola se tota se lerileng “kalafi” nngwe. Tlhotlheletso ya mogopolo mo botsogong jwa mmele e santse e tlhaloganngwa ka mo go sa lekanang fela. Go fola ga malwetsi mangwe ga go kake ga bolelelwa-pele. Mangwe a fola ka lebaka le le sa itsiweng. Malwetsi a le mantsi a fodisiwa ke mmele ka boone, fa gongwe ka thuso ya melemo. Ngaka William A. Nolan o akantsha gore e ka ne e le gore boikutlo jo bo gotetseng jwa tirelo ya go rapelela bo dira gore malwetsi mangwe a alafege ka bofefo go na le jaaka a ne a ka dira ka tlwaelo. Gape go tshwanetswe ga elwa tlhoko gore bontsi jwa mo go bolelwang e le kalafi ke tokafatso fela e se kae mo seemong sa motho yo o lwalang.

Bafodisi bangwe ba ba rapelelang ba lemoga kgonego ya gore bontsi jwa kalafi ga se ya kgakgamatso. Moperisiti yo o dirisanang le mokgatlho wa phodiso ya semoya o ne a re: “[Kalafi] nngwe ke ya mogopolo, e nngwe ke ya go tshoga mme e nngwe e ka tlhalosiwa ka lebaka la tlholego.” Morago a oketsa ka go re: “Ga ke na bothata bope ka moo gonne e ntse ke tsa boammaaruri.”

Legale, ga se botlhe ba ba amogelang kgopolo ya gore kalafi e na le tlhaloso ya tlholego. Bontsi ka boammaaruri ba dumela gore dikgakgamatso di a diragala le gore batho ba ba lwalang ba fodisiwa ke nonofo nngwe e e gaisang motho. Ka gone, mmotsi o ka neela mabaka ka go re: ‘Phodiso ya go rapelela e ka thusa, kana e ka seka ya thusa. Mme e ka gobatsa ka eng fa o e leka fela?’ Potso e ke ya botlhokwa.