Jehofa—Kago e e Godileng e e Thata

POLOKO e tla ka go ikanya Jehofa, jaaka bokgaitsadi ba bana ba motho go tswa kwa borwa-botlhaba jwa Fora ba itemogetse. Mongwe wa bone o anela jaana:

“E ne e le ka 12:30 a.m. mme rotlhe re ne re ithobaletse ka kagiso. Ka tshoganyetso, re ne ra thantshiwa ke modumo o o sa tlwaelegang o tswa kafa boapeelong, mme ka nako eo monna a bonala fa mojako. Kgaitsadiake ka go tshoga, o ne a goa, a re: ‘Jehofa, Jehofa, re thuse tswee tswee!’ Fa monna yo a utlwa mafoko ano o ne a re raya are re didimale a ntse a re bopela ka thipa le segotlhi. Re leboga Jehofa gonne tshisibalo ya rona e ne ya re boela mme ra apara.

“Motseneledi o ne a palame mo mathuding a rona a boalo jwa borataro mme o ne a itshegile seatla fa a ne a thuba fenstere ya boapeelo gore a tsene. Ka jalo ke ne ka mo fapa ntho ya gagwe mme ka mo direla dijo le kofi go mo thusa go fedisa masaledi a bojalwa. Gape, ke ne ka buisana nae kaga Jehofa, ke mmontsha ka moo re tshwanetseng ra mo ikanya ka teng. O ne a araba ka gore gaa itse Jehofa, ebile a roga le leina la gagwe. Fa a ne a ntse a lebile, kgaitsadiake o ne a bala Bibela mme ka rapela ka setu. Go bonala e kete o tenwa ke tshisibalo eo, o ne a sela galase ya fenstere e e thubegileng a e baya fa kgokgotsong ya kgatsadiake, a ntse a beile thipa kafa morago ga molala wa gagwe, a bo a re: ‘Fa o ka itshikinya fela, madi a tla tsutsurutla!’ Ka tlolela godimo mme ka bua ka lentswe le le utlwalang ka re: ‘Ga o re tshose, ka gobo re na le Jehofa yo o tla re sireletsang le go re golola. Tota lefa o ka re bolaya re na le tsholofelo ya tsogo.’ A gakgamaditswe ke mafoko ano, o ne a lesa.

“E ne e kane e le 2:45 a.m. fa a ne a re o a tsamaya, mme ka mo ntsha ka kgoro. Fa a ntse a tswela kwa ntle, o rile: ‘Go siame kea utlwa. Jehofa o nonofile go nkgaisa.’ Morago ga go notlela boapeelo, re ne ra leboga Jehofa Modimo wa rona ka thapelo, yo a sa re latlhang.”—Dia. 18:10.