Dithapelo le Maiteko Dia Duelwa

MOAPOSETOLOI Paulo wa Mokeresete o kgothaleditse badumedi ka ene gore ba “nnèlè rure mo thapeloñ.” (Bar. 12:12) Ebile e ne e le ka lebaka le le utlwalang, ka gobo Paulo o ne a itse gore thapelo e e ntseng jalo e molemo. Modimo eleruri o araba dithapelo tse di tshwanetseng tseo di leng mo tumalanong le thato ya bomodimo. Gantsi, legale, go iteka ka natla go tshwanetse ga tsamaisana le thapelo e e mahehe. Go tshwantsha:

Mo masimong a magolo a dipanana kwa Ecuador go ne go na le setlhopanyana sa baboledi ba bogosi jwa Modimo ba ka ne ba le 10. Ka metlha ba ne ba tshwanetse go tsamaya ka dioura di le nne gore ba ye dipokanong, ebile tshimo ya bone ya go supa e gasagane mo eleng gore ba tsaya dioura di le pedi go ya go di le tharo ka dinao go fitlhelela baagelani ba bone. Mme Basupi bano ba ga Jehofa ba ne ba duelelwa maiteko a bone a go phatlalatsa, kana go itsise, “mahoko a a molemō.”​—Isa. 52:7.

Mosupi mongwe mo kgaolong eo​—monna wa dingwaga di le 60—​o ne a rapela gore Jehofa Modimo a mo thuse mo go boneng le go tsamaiseng thuto ya Bibela le motho mongwe yo o kgatlhegang. Ka bonako o ne a setse a tsamaisa e le nngwe. Lefa go ntse jalo, mmoledi yo wa Bogosi o ne a tswelapele go rapela gore Modimo o ka mo segofatsa gore matsapa otlhe a gagwe mo tshimong e e kwa thoko eo a ungwe. Phelelo? Ebu, ka bonako o ne a setse a ithuta Bibela le batho ba le bane ba ba farologaneng bao ruri ba kgatlhegelang “mahoko a a molemō.”

Maiteko a baboledi bano ba Bogosi ba le 10 le one a segofaditswe. Seno se bonetse fa ba kgonne go tlisa batho ba le 80 puong ya phatlalatsa ka nako ya ketelo ya molebedi yo o etang. Bangwe bao ba neng ba tlile ba ne ba tsamaile dioura di le dintsi gore ba nne gone.

Ekane ke kwa dikgaolong tse di kwa thoko kana kae, Basupi ba ga Jehofa ba itumelela go abalana le ba bangwe “mafoko a a molemo a Modimo yo o itumetseng.” (1 Tim. 1:11, NW) Gangwe le gape dithapelo tsa bone tse di tswang pelong le maiteko a bone a a tlhoafetseng dia duelwa fa ba ntse ba dira jalo. Ke ka ntlhayang o sa tlotle Bibela le Basupi fa ba go etela gape? Go dira jalo go ka go thusa ka bowena mo moyeng.