DIPOTSO tse di tswang go BABADI
● Paulo o rile molebedi wa phuthego o tshwanetse a nna “monna eo mosadi a le moñwe hèla.” Ke ka ntlhayang fa a ne a ka balela ntlha eno mo gare ga ditshwanelego tsa balebedi, ereka go ne go se Mokeresete yo o neng a ka nna le basadi ba babedi kana ba le bantsi?
Go 1 Timotheo 3:2 moaposetoloi Paulo o kwadile jaana: “Ke gōna mookami oa phuthègō o na le go nna motho eo o senañ mokgōbō, e le monna eo mosadi a le moñwe hèla, a ikgapile.” Polelo “mosadi a le moñwe hèla” e ne e tla kaya gore monna o ne a sa belaelwe ka gope kaga dikamano tse di maswe tsa bonna le bosadi, gore o ne a bontsha sekao sa boemo jwa Bokeresete kaga lenyalo.
Jesu o ne a laetse gore barutwa ba gagwe ba tshegetse thulaganyo ya Modimo ya lenyalo ya ntlha-ntlha, eleng ya monna a le mongwe go mosadi a le mongwe. (Math. 19:5, 6) Ka gone, go ne go se ope yo o neng a ka kolobediwa jaaka Mokeresete go fitlhela a tlogela go nna monyala-lefufa. Lefa go ntse jalo go ne go tshwanela ka Paulo go gatelela kgang eno faele kaga bagolwane, ka gobo go nyala lefufa go ne go letleletswe mo Bojudeng ebile go ka bo go ne go le gone mo mafatsheng ao Bokeresete bo neng bo tla phasalalela go one. Motho yo mosha yo o kopanelang le phuthego o tshwanetse go bona sentle mo sekaong sa bagolwane gore lenyalo la mosadi a le mongwe fela, eseng la lefufa, e ne e le thulaganyo e e amogelesegang go Bakeresete.
Mme polelwana “monna eo mosadi moñwe hèla” e ka akaretsa mo go oketsegileng. Ka nako eo go repa ga boitsholo mo go neng go le gone go ne go bontshwa ke ditlhalano tse di motlhofo le tsa kgapetsa gammogo le go nyalana gape.
“Mo paakanyetsong e e maswe ya tlhalano e e letleletsweng ka bobedi ke molao wa Segerika le wa Seroma, go ne go tlwaelegile thata ka monna le mosadi go kgaogana, mme ba nyalane le ba bangwe ba sele, ba ntse ba tshela boo-babedi. Ka gone monna a ka nna le basadi ba ba tshelang ba le bararo kana ba bane; kana, tota-tota, basadi bao botlhe e nnileng bomogatse ka tatelano.” (The Life and Epistles of St. Paul, ka Conybeare le Howson) Mokeresete o ne a tshwanetse go farolagana. O ne a tla gololesega go tlhala le go nyala yo mongwe o sele fa fela molekane wa gagwe a ne a dirile “boaka” (boitsholo jo bo maswe jo bo feteletseng tota jwa bonna le bosadi). (Math. 5:32; 19:9) Tshwanelego ya “monna eo mosadi a le moñwe hèla” e ne e tla kaya gore mogolwane o ne a tla tlhoma sekao mo go sa nneng monna yo o tlhadileng mosadi kwantle ga mabaka a Dikwalo mme morago ga moo a nyala gape.
Baithuti bangwe ba tlhalogantse gore 1 Timotheo 3:2 e kaya gore mogolwane o ne a se kitla a nyala labobedi gotlhelele. Lefa go ntse jalo, seo Jesu a se umakileng pelenyana le seo Paulo a se kwadilweng mo dikwalong tse dingwe se bontsha gore go nyala gape go ne go se phoso, ka jalo go ne go se kitla go dira gore monna a nne le mokgobo kana go mo dira gore a se tshwanelegele go direla jaaka mogolwane mo phuthegong. Gakologelwang gore Paulo o kwadilwe gore go ne go tla nna molemo fa batlholagadi (mme ka mo go utlwalang, le baswagadi) ba nyala bogolo go go babalelwa ka kgotelo kana go nna balotlhanyi ba ba ditshwakga.—1 Bakor. 7:8, 9, 36-39; 1 Tim. 5:13, 14.
Go nna ga mogolwane “monna eo mosadi a le moñwe hèla” gape go ne go tla akantsha botlhoka-molato jwa gagwe kaga go nyala lefufa kana boaka. O ne a tshwanetse go tlhoka mokgobo wa boitsholo mo botshelong jwa gagwe jwa lenyalo, a ikanyega ebile a le boammaaruri go mosadi wa gagwe. Ka gone, The New English Bible e fetolela temana eno ka tsela e, molebedi “o tshwanetse go tlhoka mokgobo, a ikanyega go mosadi wa gagwe a le mongwe.”
Ka jalo, fa Paulo a ne a re molebedi o tshwanetse go nna “monna eo mosadi a le moñwe hèla,” ka mantswe a sekae fela, o ne a gatelela sekao se se kwa godimo sa boitsholo seo se neng se tshwanetse go tlhomiwa ke mogolwane yo o nyetseng go tswa dintlheng tse di farologaneng. Mongwe le mongwe o ne a tshwanetse go mo leba mme a bo a lemoga gore e ne e le sekao se se tshelang sa pono e e tsholetsegileng ya lenyalo e e fitlhelwang mo Bokereseteng jwa boammaaruri.