April

Re tshwanetse go nna le tumelo mo setlhabelong sa gagwe sa thekololo gore re bone botshelo jo bo sa khutleng. (Baef. 1:7) Ba Jesu a reng ke ba “dinku tse dingwe” ga ba a tshwanela go ja senkgwe le go nwa beine kwa Dijong Tsa Morena Tsa Maitseboa. (Joh. 10:16) Le fa go ntse jalo, ba tshwanetse go ja nama le go nwa madi a ga Jesu. Ba dira jalo ka go bontsha gore ba na le tumelo mo setlhabelong sa gagwe. (Joh. 6:53) Ba ba jang senkgwe le ba ba nwang beine bone, ba bontsha gore ke karolo ya kgolagano e ntšha le gore ba tlile go busa le Jesu kwa legodimong. Bakeresete ba ba tloditsweng le ba dinku tse dingwe ba tshwanetse go bontsha gore ba na le tumelo gore ba bone botshelo jo bo sa khutleng. w24.12 13 ¶14, 16

Ka nako ya Dijo Tsa Morena Tsa Maitseboa, Jesu o ile a naya baaposetoloi ba gagwe senkgwe a bo a ba bolelela gore se emela mmele wa gagwe. Go tswa foo, o ile a ba naya beine a bo a re e emela “madi a kgolagano.” (Mar. 14:22-25; Luke 22:20; 1 Bakor. 11:24) Jehofa o dirile kgolagano e ntšha le “batho ba Iseraele,” e leng batho ba ba tlileng go busa le Jesu “mo Bogosing Jwa Modimo.” (Baheb. 8:6, 10; 9:15) Ka nako ya Dijo Tsa Morena Tsa Maitseboa, Jesu o ne a bua le “letsomanyane.” Setlhotshwana seo se ile sa simolola ka baaposetoloi ba ga Jesu ba ba ikanyegang ba ba neng ba na le ene mo bosigong joo. O ile a ba naya senkgwe gore ba se je le beine gore ba e nwe. Ke bone ba ba tlileng go busa le Jesu kwa legodimong. w24.12 11 ¶9-10

Jesu o ile a rekisiwa ke tsala e a neng a atamalane le yone. Go tswa foo, batho ba ba neng ba sa mo rate ba ile ba mo tshwara, ba mo tlhapatsa ba bo ba mo latofatsa ka gore o dirile dilo tse a neng a sa di dira. Gape ba ile ba mo atlholela loso ba bo ba mo kokotela mo koteng. Fa Jesu a ntse a diragalelwa ke dilo tseno, Jehofa o ne a utlwa botlhoko thata. E re ka Jehofa a na le maatla, o ne a ka dira gore Morwawe a se ka a boga. Mme ga a a ka a dira jalo. Goreng? O dirile jalo ka gonne a re rata. Setlhabelo sa ga Jesu se bontsha gore Jehofa o go rata go le kana kang. O ne a ntsha Morwawe yo a mo ratang thata, a bo a itshokela kutlobotlhoko e e seng kana ka sepe ya go mmona a bolawa gore re tle re gololwe mo boleong le mo losong. (1 Joh. 4:9, 10) O batla go re thusa gore re tswelele re mo direla le fa gone re na le boleo, e bile o batla go bo tlosa mo nakong e e tlang. w24.08 6 ¶13-14

Re kgona go bona gore Jehofa o a re rata fa re akanyetsa kwa teng ka tsela e a neng a utlwile botlhoko ka yone fa Morwawe a ne a bogisiwa setlhogo. Satane a re ga go na motlhanka ope wa Modimo yo o tla tswelelang a ikanyega mo go Ene fa a lebane le mathata. Go bontsha gore seo ke maaka a matala, Jehofa o ile a letla Jesu gore a boge pele a swa. (Jobe 2:1-5) O ne a ntse a mo lebile fa batho ba ba neng ba mo ganetsa ba mo sotla, le fa masole a mo itaya a bo a kokotelwa mo koteng ya tlhokofatso. Gape o ile a bona fa Morwawe yo a mo ratang thata a bolawa setlhogo. (Math. 27:28-31, 39) O ne a ka kgona go thibela seo ka gonne o na le maatla. (Math. 27:42, 43) Le fa go ntse jalo, fa a ne a ka mo thusa, go ne go se kitla go nna le thekololo e bile re ne re se kitla re nna le tsholofelo. Ka jalo, Jehofa o ne a letla gore Morwawe a bogisiwe mo go botlhoko go fitlha a swa. w25.01 22 ¶7

Ke Nisane 16, ka ngwaga wa 33 C.E. Barutwa ba ga Jesu ba hutsafetse e bile ba tshogile. Barutwa ba bangwe ba le babedi ba ya kwa motsaneng mongwe o o bidiwang Emao. Monna mongwe yo ba sa mo itseng o a tla a bo a tsamaya le bone. Barutwa ba mmolelela dilo tse di utlwisang botlhoko tse di diragaletseng Jesu. Monna yono o simolola go ba bolelela dilo tse ba neng ba se kitla ba di lebala. O dirisa Dikwalo le boporofeti go tlhalosa gore goreng Mesia a ile a tshwanelwa ke go boga le go swa. Fa ba goroga kwa Emao, ba lemoga gore monna yono ke Jesu yo Modimo a mo tsositseng. (Luke 24:13-35) Fa Jesu a sena go tsosiwa, o ile a fetsa malatsi a le 40 a le mo lefatsheng pele a boela kwa legodimong, e bile o ile a iponatsa kwa barutweng ba gagwe ka makgetlo a le mantsi mo malatsing ao. Jesu o ile a kgothatsa barutwa bao ba gagwe ba ba neng ba hutsafetse e bile ba tshogile. Seo se ile sa dira gore ba itumele le gore ba nne le bopelokgale jwa go rerela batho ba bangwe dikgang tse di molemo le go ba ruta. w24.10 12 ¶1-3

Bana ba ikgolela fela, mme gone go ka se itiragalele fela gore rona re nne Bakeresete ba ba godileng sentle. Ka sekai, bakaulengwe le bokgaitsadi ba kwa Korintha ba ile ba ithuta boammaaruri, ba kolobediwa, ba amogela moya o o boitshepo ba bo ba ithuta dilo di le dintsi mo go moaposetoloi Paulo. (Dit. 18:8-11) Le fa go ntse jalo, dingwaga di le dintsi fa ba sena go kolobediwa, ba ne ba ise ba nne Bakeresete ba ba godileng sentle. (1 Bakor. 3:2) Motho a ka se nne Mokeresete yo o godileng sentle fa a se na keletso ya go dira jalo. Ka jalo, ba ba ‘ratang go tlhoka maitemogelo’ e ka se nne Bakeresete ba ba godileng sentle. (Diane 1:22) Ga re batle go tshwana le motho yo o batlang gore batsadi ba gagwe ba mo direle ditswetso le fa a setse a godile. Go na le moo, mongwe le mongwe wa rona o tshwanetse go tsaya matsapa go nonotsha botsala jwa gagwe le Jehofa. Fa e le gore o batla go nna Mokeresete yo o godileng sentle, kopa Jehofa gore a go thuse go nna le ‘keletso le maatla a gore o dire jalo.’​—Bafil. 2:13. w24.04 4 ¶9-10

Jehofa o re bolelela gore o ikutlwa jang ka go atlhola batho. (Esek. 33:11) Jehofa a ka se ka a fedisa batho go se na mabaka a a utlwalang. O kutlwelobotlhoko e bile o re bontsha nonofo eno fa go tlhokega. Ke eng se re se itseng ka batho ba ba se kitlang ba tsosiwa? Baebele e bua ka ba le mmalwa fela. E re bolelela gore Jesu o ile a re Judase Isekariota ga a kitla a tsosiwa, ka gonne o ne a itse gore Jehofa le Jesu ba ne ba ikutlwa jang ka se a neng a se dira, mme o ile a se dira. (Mar. 14:21; Joh. 17:12; w07 7/15 ts. 18.) Gape Jesu o ile a re bangwe ba baeteledipele ba bodumedi ba ba neng ba le kgatlhanong le ene, ga ba kitla ba tsosiwa. (Math. 23:33) Moaposetoloi Paulo le ene o ne a re batlhanogi ba ba sa ikwatlhayeng ga ba kitla ba tsosiwa.​—Baheb. 6:4-8; 10:29. w24.05 4 ¶10-11

Fa re nna re atamalane le Jehofa, Satane ga a ka ke a re utlwisa botlhoko go ya go ile. (1 Joh. 3:8) Kwa lefatsheng le lesha, Jehofa o tla tswelela a sireletsa ditsala tsa gagwe tse di ikanyegang gore go se ka ga nna le sepe se se senyang botsala jwa gagwe le bone, e bile ga ba kitla ba swa. (Tshen. 21:4) Ke tshiamelo e kgolo tota go nna mo tenteng ya ga Jehofa, e bile re ka itumelela go nna tsala ya gagwe go ya go ile. (Esek. 37:27) Mme gone, re tshwanetse go dira eng gore re tswelele re le mo go yone? E re ka re itse gore moeng o naka di maripa, fa mongwe a ne a ka go laletsa kwa ntlong ya gagwe ga go pelaelo gore o ne o tla itshwara sentle. Ka tsela e e tshwanang, re batla go dira sengwe le sengwe se Jehofa a batlang gore re se dire gore re tswelele re le baeng ba gagwe. Tsela e re ratang Jehofa ka yone e re tlhotlheletsa gore re dire sotlhe se re ka se kgonang gore re mo ‘itumedise.’ (Bakol. 1:10) Go dira jalo go tla re thusa gore re se ka ra dira dilo tse di sa mo itumediseng. Re batla go ‘tsamaya le Modimo wa rona re le boingotlo.’​—Mika 6:8. w24.06 4 ¶8-9

Jehofa o ile a laela Aborahame gore a ntshe morwawe e bong Isake setlhabelo. Seno se tshwanetse sa bo se ile sa utlwisa Aborahame botlhoko fela thata. Mme gone, Aborahame o ne a ikemiseditse go ikobela Jehofa. Fa a ne a tloga a bolaya morwawe, Jehofa o ile a mo kopa gore a se ka a dira jalo. Sekai seno se bontsha se Jehofa a neng a tla se dira mo nakong e e tlang. O ne a ikemiseditse go ntsha Morwawe yo a mo ratang setlhabelo ka gonne a rata batho. (Gen. 22:1-18) Mo Molaong o Jehofa a neng a o neile Baiseraele, o ne a ba laela gore ba ntshe ditlhabelo ka diphologolo. (Lefi. 4:27-29; 17:11) Ditlhabelo tseo di ne di bontsha gore Jehofa o ne a tlile go ntsha setlhabelo se se di gaisang. Setlhabelo seo se ne se tla golola batho mo boleong gotlhelele. Jehofa o ile a laela baporofeti ba gagwe gore ba kwale ka losika lo a neng a lo solofeditse. Ba ile ba tlhalosa gore Morwa Modimo o ne a tlile go diragalelwa ke dilo tse di utlwisang botlhoko a bo a bolawa gore a golole batho, go akaretsa le wena, mo boleong le mo losong. Ruri seno se a ama!​—Isa. 53:1-12. w24.08 4 ¶7-8

Fa o bala Baebele, akanya gore o ka dirisa jang se o se badileng. Ipotse go re: “Nka dirisa jang se ke se ithutileng, gone jaanong le mo nakong e e tlang?” Ka sekai, a re re o bala 1 Bathesalonika 5:17, 18. Fa o sena go bala ditemana tseno, ema go sekae mme o ipotse gore o rapela gakae le gore a o akanyetsa kwa teng pele o rapela. Gape o ka akanya ka dilo tse dintle tse Jehofa a go diretse tsone. Gongwe fa o rapela, o ka lebogela tse tharo. Tota le fa o dirisa metsotso e le mmalwa go akanya ka se o se badileng, o ka kgona go tlhaloganya Baebele le go dira se e reng o se dire. Fa o dirisa mokgwa ono letsatsi le letsatsi fa o ithuta Baebele, fa nako e ntse e tsamaya o tla gatela pele. w24.09 4-5 ¶9-10

Jehofa o re bopile ka tsela e e kgatlhang. Le fa re itumela fa batho ba bangwe ba re abela, re itumela thata fa e le rona re ba abelang. Re a itumela fa re kgona go thusa badumedimmogo le rona e bile ba lebogela se re ba diretseng sone. Mme le fa ba ka tswa ba leboga kgotsa ba sa leboge, re itumelela gore re dirile se se siameng. Nna o gopotse gore fa o abela ba bangwe, “Jehofa o na le bokgoni jwa go go naya mo gontsi thata go feta seo.” (2 Ditir. 25:9) Ga go na ope yo o kgonang go abela batho ba bangwe jaaka Jehofa! Re a itse gore ga go na masego ape a a lekanang le a Jehofa a tlileng go re naya one. Ka jalo, a re direng sotlhe se re ka se kgonang go tswelela re etsa Rraarona yo o kwa legodimong e bong Jehofa yo o abang ka bopelotshweu. w24.09 31 ¶20-21

Jehofa o kutlwelobotlhoko e bile o pelotlhomogi. (Pes. 103:13; Isa. 49:15) Fa re utlwile botlhoko, le ene o utlwa botlhoko. (Seka. 2:8) O re thusa gore re mo itse le gore re nne ditsala tsa gagwe. (Pes. 25:14; Dit. 17:27) Gape Jehofa o boikokobetso, “o a inama gore a lebe legodimo le lefatshe, gore a kakatlolole motho wa maemo a a kwa tlase mo loroleng.” (Pes. 113:6, 7) Dilo tseno tsotlhe, di dira gore re batle go mo galaletsa. Re galaletsa Jehofa ka gonne re batla gore batho ba bangwe ba mo itse. Batho ba le bantsi ga ba itse boammaaruri ka Jehofa. Goreng? Ka gonne Satane o foufaditse megopolo ya bone ka go anamisa maaka ka Jehofa. (2 Bakor. 4:4) Satane o dirile gore batho ba dumele gore Jehofa ke Modimo yo o bogale, ga a amege ka rona le gore ke ene a bakelang batho mathata a mantsi mo lefatsheng. Mme rona re itse boammaaruri! Re na le tshono ya go bolelela batho gore Jehofa ke Modimo yo o ntseng jang, le go ba thusa gore le bone ba mo galaletse.​—Isa. 43:10. w25.01 3 ¶6-7

Le fa Jesu a ne a dira se se siameng ka metlha e bile a dira dikgakgamatso, Satane o ile a dirisa batho bangwe gore ba anamise maaka a matala ka ene. Ka sekai, baeteledipele ba bodumedi ba ile ba bolelela batho gore Jesu o leleka madimona ka maatla a a tswang kwa “mmusing wa madimona.” (Mar. 3:22) Fa Jesu a ne a sekisiwa, baeteledipele ba bodumedi ba ile ba mo latofatsa ka gore o tlhapaditse Modimo e bile ba ile ba tlhotlheletsa batho gore ba kope gore Jesu a bolawe. (Math. 27:20) Moragonyana fa balatedi ba ga Jesu ba ne ba rera dikgang tse di molemo, batho ba ba sa ba rateng ba ile ba tlhotlheletsa batho ka tsela e e phoso gore ba tlhasele Bakeresete bao. (Dit. 14:2, 19) Makasine wa Tora ya Tebelo wa December 1, 1998 o ile wa tlhalosa gore “batho bao ga ba a ka ba gana fela go reetsa molaetsa o Bakeresete ba neng ba o rera, mme gape ba ne ba bua dilo tse di tsitsibanyang mmele ka bone gore batho ba se ka ba ba reetsa le gore ba ba tlhoe.” Satane o sa ntse a bua maaka ka batho ba ga Jehofa. Baebele e a re ‘o tsietsa lefatshe lotlhe.’ w24.04 11 ¶15-16

Motho ga a newe tshono ya go tshelela ruri go ikaegile ka gore o sule leng. Jehofa ke moatlhodi yo o tshiamiso e bile ditshwetso tse a di dirang ka metlha di siame. (Pes. 33:4, 5) Ka jalo, ga re belaele gore “Moatlhodi wa lefatshe lotlhe” o tla dira se se siameng. Gape motho ga a newe tshono ya go tshelela ruri go ikaegile ka gore o nna kwa kae. Go tla bo go sa utlwale go akanya gore Jehofa a ka atlhola batho ba le bantsi ba ba nnang mo mafelong a ba sa kgoneng go utlwa molaetsa wa Bogosi kwa go one a re ke “dipodi.” (Math. 25:46) Moatlhodi wa lefatshe lotlhe o amega ka batho bao go feta kafa rona re amegang ka bone ka gone. Ga re itse gore Jehofa o tla dira eng ka nako ya pitlagano e kgolo. Gongwe bangwe ba batho bao ba tla nna le tshono ya go ithuta ka Jehofa, go dumela mo go ene le go mo direla fa a tla bo a itshepisa leina la gagwe mo lefatsheng lotlhe.​—Esek. 38:16. w24.05 12 ¶14-15

Batho ba ga Jehofa ba rata go thusana. (2 Bakor. 8:4) Le fa go ntse jalo, ka dinako tse dingwe ba tlhoka go nna pelokgale gore ba dire jalo. Ka sekai, fa ntwa e runya, bagolwane ba ba mo lefelong leo ba a itse gore bakaulengwe le bokgaitsadi ba tlhoka go kgothadiwa, go engwa nôkeng, go newa Dibaebele le dikgatiso kgotsa go thusiwa ka dilo tse ba di tlhokang. Ka jalo, e re ka bagolwane ba rata bakaulengwe le bokgaitsadi, ba dira sotlhe se ba ka se kgonang go ba thusa gore ba nne le dilo tse ba di tlhokang, le fa seo se ka tsenya matshelo a bone mo kotsing. Fa maemo a le maswe, go botlhokwa gore re nne seoposengwe. Ka jalo, ikobele ditaelo tse ofisi ya lekala e lo nayang tsone. (Baheb. 13:17) Bagolwane ba tshwanetse go nna ba bala ditaelo tsa gore ba ka ipaakanyetsa masetlapelo a tlholego jang, le gore ba ka dira eng fa a nna teng. (1 Bakor. 14:33, 40) Nna pelokgale mme o le podi matseba. (Diane 22:3) Akanya pele o dira sengwe. Dira sotlhe se o ka se kgonang gore o nne o sireletsegile. Ikaege ka Jehofa. Gopola gore Jehofa o batla gore wena le bakaulengwe le bokgaitsadi lo nne lo sireletsegile. w24.07 4 ¶8; 5 ¶11

Kgosi Dafide o ne a itse Jehofa e bile a ikaega ka ene. Fa Kgosi Saulo le ba bangwe ba ne ba batla go mmolaya, Dafide o ne a rapela Jehofa a mo kopa gore a mo thuse. Fa Jehofa a sena go araba thapelo ya gagwe, Dafide o ne a re: “Jehofa o a tshela!” (Pes. 18:46) Dafide o ne a raya jang? O ne a raya gore Jehofa ke Modimo wa boammaaruri e bile ka dinako tsotlhe o thusa batlhanka ba gagwe. Dafide o ne a itse gore Modimo wa gagwe o bona sengwe le sengwe se se mo diragalelang e bile o batla go mo thusa. Seo se ile sa dira gore a ikemisetse go tswelela a direla Jehofa le gore a mmake. (Pes. 18:28, 29, 49) Fa re tlhatswegile pelo gore Jehofa ke Modimo yo o tshelang, re tla kgona go mo direla re le matlhagatlhaga. Re tla nna le maatla a go itshokela diteko e bile re tla dira ka natla mo tirong ya gagwe. Gape re tla nna re ikemiseditse go atamalana le ene. w24.06 20-21 ¶3-4

Re ka ithuta eng mo mafokong a moaposetoloi Paulo a neng a a bolelela Bathesalonika? Fa re utlwa sengwe se se sa dumalaneng le se re se ithutileng mo Baebeleng, kgotsa re utlwa magatwe a a tsitsibanyang mmele, re tshwanetse go nna le temogo. Ka nako ya puso ya Soviet Union, batho ba ba sa re rateng ba ne ba naya bakaulengwe lekwalo le go neng go lebega e kete le tswa kwa ntlokgolo ya lefatshe lotlhe. Lekwalo leo le ile la kgothaletsa bakaulengwe bangwe gore ba itirele setlhotswana. Le fa go ne go lebega e kete lekwalo leo le tswa kwa ntlokgolo ya lefatshe lotlhe, bakaulengwe ba ba ikanyegang ga ba a ka ba dumela kgang eo ka gonne ba ne ba lemoga gore lekwalo leo le ne le sa dumalane le se ba se rutilweng. Le gompieno, batho ba ba sa rateng boammaaruri, ka dinako dingwe ba dirisa Internet le metswedi ya go ikgolaganya le batho ba bangwe go re tlhakanya tlhogo le go re kgaoganya. Go na le gore re ‘letle batho gore ba fetole tsela e e siameng e re akanyang ka yone,’ re tshwanetse go sekaseka gore a se re se utlwang kgotsa se re se balang se dumalana le boammaaruri jo re bo rutilweng.​—2 Bathes. 2:2; 1 Joh. 4:1. w24.07 12 ¶14-15

Tshwetso ya botlhokwa thata e re ka e dirang ke ya go ineela mo go Jehofa le go mo direla re na le bakaulengwe le bokgaitsadi. Jehofa o batla gore mongwe le mongwe wa rona a dire jalo. Ka ntlha ya eng? O batla gore re atamalane le ene le gore ba tshelele ruri. (Dute. 30:19, 20; Bagal. 6:7, 8) Jehofa ga a pateletse ope gore a mo direle. O batla gore mongwe le mongwe wa rona a itirele tshwetso eo. Mme go tweng fa Mokeresete yo o kolobeditsweng a dira boleo jo bo masisi? Fa a sa ikwatlhaye, o tshwanetse go tlosiwa mo phuthegong. (1 Bakor. 5:13) Le fa go ntse jalo, Jehofa o batla gore motho yoo a ikwatlhaye le gore a atamalane le ene gape. Tota e bile, lebaka la botlhokwa la go bo Jehofa a ntshitse thekololo ke gore a itshwarele batho ba ba ikwatlhayang. E re ka Jehofa e le Modimo yo o lorato, o rotloetsa batho ba ba dirileng boleo jo bo masisi gore ba ikwatlhaye.​—Seka. 1:3; Bar. 2:4; Jak. 4:8. w24.08 14 ¶1-2

Fa moaposetoloi Johane a ne a kwala lekwalo la gagwe la boraro, bangwe ba ne ba ruta dithuto tsa maaka e bile ba ne ba dira gore go nne le dikgaogano mo phuthegong. Mme gone, ba bangwe ba ile ba tswelela ba “tsamaya mo boammaaruring.” Ba ne ba ikobela Jehofa e bile ba “tshela go ya ka ditaelo tsa gagwe.” (2 Joh. 4, 6) Bakeresete bano ba ba ikanyegang ba ne ba dira gore Johane a itumele e bile ba ne ba ipedisa pelo ya ga Jehofa. (Diane 27:11) Re ithuta eng? Re ithuta gore fa re tswelela re ikanyega mo go Jehofa re tla itumela e bile ba bangwe le bone ba tla itumela. (1 Joh. 5:3) Ka sekai, re tla itumela ka gonne re dira gore Jehofa a itumele. Jehofa o a itumela fa a bona re gana go dira dilo tse di sa siamang ka gonne re ikobela melao ya gagwe. Baengele le bone ba a itumela. (Luke 15:10) Le rona re a itumela fa re bona bakaulengwe le bokgaitsadi ba tswelela ba ikanyega. (2 Bathes. 1:4) Fa lefatshe leno la ga Satane le senngwa, re tla itumelela gore re ile ra tswelela re ikanyega mo go Jehofa. w24.11 12 ¶17-18

O tshwanetse go tsaya lobaka lo lokae pele o bolelela motho gore o a mo rata? Fa o ka potlakela go mmolelela, o tla akanya gore ga o akanye sentle pele o dira tshwetso. (Diane 29:20) Mme fa o tsaya lobaka lo loleele thata, segolobogolo fa a lemogile gore o a mo kgatlhegela, a ka akanya gore o okaoka go dira ditshwetso. (Mor. 11:4) Nna o gopotse gore pele o bolelela motho gore o a mo rata, ga o ka ke wa itse gore a lo tla nyalana. Mme pele ga o ya kwa go ene, o tshwanetse go tlhatswega pelo gore o batla go nyala kgotsa go nyalwa le gore o tlhophile sentle. O ka dira eng fa o lemoga gore mongwe o a go kgatlhegela mme wena o sa ikutlwe jalo ka ene? O tshwanetse go bontsha ka tsela e o itshwarang ka yone gore ga o mo kgatlhegele. O ka mo utlwisa botlhoko fa o dira gore a akanye gore o batla go ratana le ene mme go sa nna jalo.​—Baef. 4:25. w24.05 22-23 ¶9-10

Batlodiwa ba ba ikanyegang ke bone fela ba Jesu a tla ba ‘tseelang kwa’ Bogosing jwa gagwe. Mme batlodiwa botlhe ba ba sa nneng ba disitse, ga ba kitla ba phuthiwa le “ba ba tlhophilweng.” (Math. 24:31) Batlhanka botlhe ba ga Jehofa ba ba nang le tsholofelo ya go tshelela ruri mo lefatsheng le bone ba tshwanetse go nna ba disitse le go nna ba ikanyega. Re ithutile dilo di le dintsi ka Jehofa. Re a itse gore sengwe le sengwe se a se dirang se siame. Ka jalo, ga re tshwenyege fa Jehofa a tlhopha Bakeresete ba bangwe gore e nne batlodiwa mo motlheng wa rona. Seno se re gopotsa batho ba Jesu a neng a bua ka bone mo setshwantshong sa tshimo ya morara ba ba neng ba simolola go bereka ka 5:00 maitseboa. (Math. 20:1-16) Ba ile ba newa tuelo e e lekanang le ya ba ba ileng ba simolola tiro mo mosong. Ka tsela e e tshwanang, batlodiwa ba ba tlhophilweng mo nakong e re tshelang mo go yone, ba tla newa tuelo e e tshwanang le ya batlodiwa ba ba tlhophilweng bogologolo fa ba tswelela ba ikanyega. w24.09 24 ¶15-17

Jesu o re tlhometse sekao se sentle sa gore re ka dira eng fa batho ba sa re tshware sentle. Batho ba le bantsi ba ne ba sa mo tshware sentle, go akaretsa le ba lelapa la gagabo. Ba masika a gagwe ba ne ba re o a tsenwa, baeteledipele ba bodumedi ba ne ba re madimona ke one a mo nayang maatla e bile masole a Baroma a ne a mo sotla, a mmogisa e bile a ile a mmolaya. (Mar. 3:21, 22; 14:55; 15:16-20, 35-37) Le fa go ntse jalo, Jesu o ile a itshoka mme ga a a ka a ipusolosetsa. Re ithuta eng mo go se Jesu a ileng a se dira? (1 Pet. 2:21-23) Jesu o re tlhometse sekao se sentle sa gore re dire eng fa batho ba bangwe ba sa re tshware sentle. O ne a itse gore ke leng a tshwanetseng go didimala, le gore ke leng a tshwanetseng go bua. (Math. 26:62-64) Ka dinako dingwe fa batho ba ne ba bua maaka ka ene, o ne a sa bue sepe. (Math. 11:19) Mme fa a ne a tlhopha go bua sengwe, o ne a sa tlhapatse batho ba ba neng ba mmogisa kgotsa ba ba neng ba mo tshosetsa. w24.11 4-5 ¶9-10

A re re o naya motho yo o mo ratang mpho e ntle e a e tlhokang. O ne o tla utlwa botlhoko tota fa a ne a ka e baya a bo a sa e dirise. Mme ga go pelaelo gore o ne o tla itumela fa a ne a ka lebogela mpho eo a bo a e dirisa. Sekai seno se amana jang le mpho e Jehofa a re neileng yone ya thekololo? Jehofa o ntshitse Morwawe gore a re swele. O tshwanetse a bo a itumela tota fa a bona re lebogela mpho eno le tsela e a re ratang ka yone! O re neile thekololo ka gonne a re rata. (Joh. 3:16; Bar. 5:7, 8) Mme gone, fa nako e ntse e tsamaya, re ka nna ra se ka ra tlhola re lebogela mpho ya thekololo jaaka pele. Go dira jalo go tla bo go tshwana le go baya mpho e ntle e Jehofa a re neileng yone mo lefelong le le fitlhegileng. Gore seo se se ka sa direga, re tshwanetse go nna re akanya ka se Jehofa le Jesu ba re diretseng sone. w25.01 26 ¶1-2

Mokaulengwe yo o tshwanelegang go nna mogolwane ga e a tshwanela go nna monna yo o sa tswang go sokologa. Le fa gone go sa tlhokege gore o nne le dingwaga di le dintsi o kolobeditswe, o tlhoka go nna le nako ya go nonotsha botsala jwa gago le Jehofa le go ithuta go dira ditshwetso tse di siameng o dirisa Baebele. Pele ga o ka nna mogolwane, fela jaaka Jesu, o tshwanetse go nna boikokobetso mme o ikemisetse go direla Jehofa ka tsela epe fela e a e batlang. O tshwanetse go nna pelotelele le go letela Jehofa gore a go neye dikabelo tse di oketsegileng mo phuthegong. (Math. 20:23; Bafil. 2:5-8) O tshwanetse go bontsha gore o a ikanyega ka go ikobela melao ya ga Jehofa le ka go reetsa kaelo e o e newang ke phuthego ya ga Jehofa. Baebele e a re balebedi ba tshwanetse go itse go ruta. A seno se raya gore o tshwanetse o a bo o le setswerere fa o neela dipuo? Nnyaa, ga se bagolwane botlhe ba ba kgonang go neela dipuo tse di monate. Mme gone, fa ba rera le fa ba dira maeto a bodisa ba tshwanetse go itse go dirisa Baebele sentle gore ba kgone go ruta le go kgothatsa bakaulengwe le bokgaitsadi. w24.11 23-24 ¶14-15

Fa go na le sengwe se o sa se tlhaloganyeng mo Baebeleng, dira dipatlisiso. Go tswa foo, akanyetsa kwa teng ka se o se ithutileng le gore se go ruta eng ka Jehofa, Morwawe le ka tsela e ba re ratang ka yone. (Pes. 119:97, ntlh.) O se ka wa kgobega marapo fa o sa bone sepe se sesha kgotsa se se kgatlhang fa o bala kgotsa o dira dipatlisiso. Leka go akanya ka motho yo o batlang gauta. Gantsi o fetsa diura kgotsa malatsi a le mantsi pele a e bona. Mme gone, ga a ineele. O tswelela a e batla a le pelotelele ka gonne o a itse gore gauta nngwe le nngwe e a e bonang e botlhokwa mo go ene le fa e ka tswa e le nnye. Dilo tse re di ithutang mo Baebeleng di botlhokwa go feta gauta! (Diane 8:10) Ka jalo, nna pelotelele, tswelela o bala Baebele mme o batle dilo tse disha tse o ka di ithutang mo go yone.​—Pes. 1:2. w25.01 25 ¶14-15

Jehofa o lebeletse gore re ikemisetse go itshwarela ba ba re utlwisang botlhoko. (Pes. 86:5; Luke 17:4; Baef. 4:32) Sengwe se mongwe a se dirang kgotsa a se buang se ka re utlwisa botlhoko thata, segolobogolo fa re atamalane thata le motho yoo kgotsa e le mongwe mo lelapeng. (Pes. 55:12-14) Ka dinako dingwe re ka nna ra galefa kgotsa ra kgopisega thata jaana mo re ikutlwang e kete re tlhabilwe ka thipa. (Diane 12:18) Re ka nna ra leka go itlhokomolosa tsela e re ikutlwang ka yone, mme go dira jalo go tshwana le fa mongwe a tlhabilwe ka thipa a bo a e tlogela fela a sa dire sepe ka yone. Ka tsela e e tshwanang, go ka nna thata gore re itshwarele mongwe fa re itlhokomolosa tsela e re ikutlwang ka yone. Gantsi re a galefa fa mongwe a re kgopisa. Baebele e a re go ka direga gore re galefe. Le fa go ntse jalo, e re tlhagisa gore re se ka ra tswelela re galefile. (Pes. 4:4; Baef. 4:26) Ka ntlha ya eng? Ka gonne gantsi ke ka sewelo re ka dirang dilo sentle fa re galefile. (Jak. 1:20) Nna o gopotse gore ka dinako dingwe o ka galefa fa mongwe a go kgopisitse. Mme gone, o ka itlhophela gore a o tla tswelela o galefile kgotsa nnyaa. w25.02 15 ¶4-6

Jesu o ile a dirisa setshwantsho go bontsha gore motho yo o ipolokelang madi mme gone “a sa huma mo matlhong a Modimo,” ke seeleele. (Luke 12:16-21) Ga go na ope yo o itseng gore go tla direga eng mo nakong e e tlang. (Diane 23:4, 5; Jak. 4:13-15) Gape Jesu o ile a re batho ba ba batlang go nna balatedi ba gagwe, ba tshwanetse go ikemisetsa go “tlogela dilo” tse ba nang le tsone. (Luke 14:33) Bakeresete ba bogologolo ba kwa Judea ba ne ba itumetse le fa gone ba ile ba latlhegelwa ke dilo tse ba neng ba na le tsone. (Baheb. 10:34) Mo motlheng wa rona, bakaulengwe le bokgaitsadi ba le bantsi ba ile ba latlhegelwa ke ditiro ka gonne ba sa tseye letlhakore mo dipolotiking. (Tshen. 13:16, 17) Ke eng se se ba thusitseng? Ba ne ba tlhatswegile pelo ka se Jehofa a se solofeditseng. O ne a re: “Ga nkitla ke go tlogela, e bile ga nkitla ke go latlha.” (Baheb. 13:5) Re dira ka natla gone jaanong go rulaganya dilo tse re tla di tlhokang mo nakong e e tlang. Mme fa re ka diragalelwa ke dilo tse re sa di lebelelang, re tshepa gore Jehofa o tla re naya dilo tse re tla di tlhokang. w25.03 29 ¶13-14

Jehofa o re thusa gore re nne Bakeresete ba ba godileng sentle. O dirisa bagolwane mo phuthegong gore ba re thuse go gola “go fitlha mo selekanyong se Keresete a neng a godile ka sone.” (Baef. 4:11-13) Gape Jehofa o re naya moya o o boitshepo go re thusa gore re ‘akanye jaaka Keresete.’ (1 Bakor. 2:14-16) Mo godimo ga moo, o re kwaletse dibuka tse nnê mo Baebeleng tse di buang ka botshelo jwa ga Jesu le ka bodiredi jwa gagwe. Fa o akanya ka tsela e Jesu a neng a akanya ka yone e bile o dira dilo jaaka ene, o ka kgona go nna Mokeresete yo o godileng sentle. Mokeresete yo o godileng sentle, ga a a tshwanela fela go ithuta “dithuto tsa ntlha ka ga Keresete.” w24.04 4-5 ¶11-12

Letsatsi le letsatsi re dira ditshwetso. Dingwe tsa tsone go motlhofo go di dira, jaaka gore re tla ja eng mo mosong kgotsa re tla robala nako mang. Tse dingwe tsone go thata go di dira. Di ka ama botsogo jwa rona, ba malapa a rona le tsela e re direlang Jehofa ka yone, e bile di ka dira gore re itumele kgotsa re se ka ra itumela. Mme gone, re batla gore ditshwetso tse re di dirang di tswele rona le ba malapa a rona mosola. Mo godimo ga moo, re batla gore di itumedise Jehofa. (Bar. 12:1, 2) Selo sa botlhokwa se se ka go thusang gore o dire ditshwetso tse di siameng ke go batla dintlha tsotlhe. Goreng seno se le botlhokwa? A re re motho yo o lwalang o ya kwa ngakeng. A ngaka eo e tla mmolelela gore o tshwerwe ke eng pele e mo tlhatlhoba kgotsa e mmotsa dipotso? Nnyaa. Ka tsela e e tshwanang, pele o dira ditshwetso, o tshwanetse go batla dintlha tsotlhe. w25.01 14 ¶1-3

Jehofa o kutlwelobotlhoko e bile “ga a eletse gore motho ope a senngwe.” O ile a dira eng go bontsha batho ba ba dirileng maleo a a masisi gore o ba utlwela botlhoko? (2 Pet. 3:9) Kgosi Dafide o ile a dira boaka a bo a bolaya motho. Ao e ne e le maleo a a masisi tota. Le fa go ntse jalo, Dafide o ile a ikwatlhaya, mme Jehofa o ile a mo itshwarela. (2 Sam. 12:1-12) Kgosi Manase o ile a fetsa dingwaga di le dintsi a dira dilo tse di bosula. Mme gone, Jehofa o ile a mo utlwela botlhoko a bo a mo itshwarela ka gonne a ne a ikwatlhaya. (2 Ditir. 33:9-16) Dikai tseno di re bontsha gore Jehofa o re utlwela botlhoko fa go na le lebaka la gore a dire jalo. O tlile go tsosa batho ba re tlotlileng ka bone ka gonne ba ile ba lemoga gore ba dirile maleo a a masisi ba bo ba ikwatlhaya. w24.05 4 ¶12