Tiro ya Batlhanka ba Bodiredi ke Efe?

Baebele e bua ka ditlhopha tse pedi tsa banna ba Bakeresete ba ba tlhokomelang maikarabelo a phuthego—“balebedi le batlhanka ba bodiredi.” (Bafilipi 1:1) Gantsi go na le bakaulengwe ba ba ntseng jalo ba ba direlang mo phuthegong nngwe le nngwe. Batlhanka ba bodiredi ba dira ditiro dife tse di re solegelang molemo?

Ba thusa setlhopha sa bagolwane. Batlhanka ba bodiredi ke banna ba ba godileng semoyeng, ba ba ka ikanngwang le ba ba kelotlhoko, bangwe ba bone ba basha mme ba bangwe ba godile. Ba dira ditiro tsa botlhokwa mo phuthegong mme e le tse di tshwanetseng go dirwa gangwe le gape e bile e le tse di tlhokang maatla. Seno se thusa bagolwane gore ba kgone go tlhoma mogopolo mo tirong ya go ruta le go disa phuthego.

Ba dira ditiro tsa botlhokwa. Batlhanka bangwe ba bodiredi ba abelwa go nna batlhokomedi gore ba amogele botlhe ba ba tlang dipokanong. Bangwe ba ka nna ba direla mo lephateng la dibuelagodimo, la go aba dikgatiso, la go tlhokomela diakhaonto tsa phuthego le go abela maloko a phuthego tshimo e ba tshwanetseng go e bereka. Gape ba thusa ka go tlhokomela Holo ya Bogosi. Bagolwane ba ka nna ba ba kopa go thusa bagodi ba ba mo phuthegong. Le fa batlhanka ba bodiredi ba ka tswa ba neilwe maikarabelo afe, go iketleeletsa go a dira go dira gore botlhe mo phuthegong ba ba tlotle.—1 Timotheo 3:13.

Ke banna ba Bakeresete ba ba tlhomang sekao se se molemo. Batlhanka ba bodiredi ba tlhophiwa ka gonne ba na le dinonofo tse di molemo tsa semoya. Fa ba neetse dipuo kwa dipokanong, ba nonotsha tumelo ya rona. Ka go re tlhomela sekao se se molemo mo tirong ya go rera, ba re thusa go nna matlhagatlhaga. E re ka ba dirisana sentle le setlhopha sa bagolwane, ba dira gore go nne le boipelo le kutlwano mo phuthegong. (Baefeso 4:16) Fa nako e ntse e ya, le bone ba ka nna ba tshwanelega go nna bagolwane.

• Batlhanka ba bodiredi ke banna ba ba ntseng jang?

• Batlhanka ba bodiredi ba thusa jang gore dilo di dirwe sentle mo phuthegong?