Melemo ya Boikgapho Le go Se Nyale Lefufa
GO TLA go fitlha jaanong, dimilione di ka nna 30 tsa batho di na le baerase ya AIDS, mme ba ba fetang dimilione tse 6 ba sule. Go fitlhelwa e tshwere ba bangwe ba basha ba le 8500 letsatsi le letsatsi—ba le 1400 mo go bone e le bana, ba gantsi ba swang mo ngwageng wa bone wa ntlha wa botshelo. Matsholo a go tweng ke a tlhakanelodikobo e e sireletsegileng a ile a tsibosa setšhaba, mme bangwe ba akanya gore seno ga se a lekana. Dr. Steven J. Sainsbury o ne a kwala jaana go The Tampa Tribune: “AIDS ke bolwetse jo bo bolayang, mme maiteko ape fela a a tsewang go kganela go anama ga yone e tshwanetse go nna a a dirang ka diperesente di le 100.”
Dr. Sainsbury o ne a akgela jaana malebana le go dirisa dikhontomo jaaka mokgwa wa go kganela AIDS: “E lebe ka tsela eno. A re re gongwe ka mabaka a a sa itseweng, dikoloi ka tshoganetso di simolola go thunya nako le nako fa mongwe a di dumisa. Boradikoloi ba bolawa ke seno mo nageng yotlhe. Kgabagare, puso e tla ka tharabololo. Ba re, tshela selonyana seno mo peterolong, mme poifo ya gore e tla thunya e tla fokotsega ka diperesente di le 90. A o ka tsaya gore bothata bo rarabolotswe? A o tla nna o kgweetsa koloi ya gago? Ga ke dumele. Jalo he, ke ka ntlha yang fa re amogela gore dikhontomo ke tsone tharabololo ya AIDS?”
E re ka a lemogile gore AIDS gantsi e bakwa ke tlhakanelodikobo, Dr. Sainsbury o ne a tla ka tharabololo eno: “A go se tlhakanelwe dikobo go fitlha motho a siametse go ka nyalana le monna kana mosadi a le mongwe yo o sa tshwaetsegang. Dilo tsa botlhokwa ke boikgapho le go se nyale lefufa.”
Baebele e laela batho ba ba iseng ba nyale gore ba ikgaphe mo go tlhakaneleng dikobo mme ba ba nyetseng gore ba se nyale lefufa. Molao wa maemo a a kwa godimo wa Baebele o iletsa kgokafalo, boaka le bosodoma. (Mathaio 19:4-6; 1 Bakorintha 6:9, 10; 7:8, 9) Le fa bontsi bo nyatsa molao ono, ba re o setse o feletswe ke nako kana ke wa bogologolo, boitsholo jwa Baebele bo dira gore motho a itekanele sentle le go nna a ritibetse mo maikutlong.—Isaia 48:17.