మంచి ఫ్రెండ్స్‌ ఎలా ఉంటారు?

బైబిలు ఇచ్చే జవాబు

లైఫ్‌లో హ్యాపీగా ఉండాలన్నా, సక్సెస్‌ అవ్వాలన్నా మనకు ఫ్రెండ్స్‌ కావాలి. మంచి ఫ్రెండ్స్‌ ఉంటే మనలో ఉన్న మంచి లక్షణాలు బయటికి వస్తాయి. మనకు ఉన్న టాలెంట్స్‌ ఏంటో తెలుస్తాయి.—సామెతలు 27:17.

అయితే, మనం ఫ్రెండ్స్‌ చేసుకునేటప్పుడు చాలా జాగ్రత్తగా ఉండాలని బైబిలు చెప్తుంది. మన ఫ్రెండ్స్‌ సరిగా లేకపోతే మనకు కష్టాలు తప్పవు. (సామెతలు 13:20; 1 కొరింథీయులు 15:33) అలాంటి ఫ్రెండ్స్‌ ఉండడంవల్ల మనం పిచ్చిపిచ్చి నిర్ణయాలు తీసుకుంటాం. మనకు ఉన్న మంచి లక్షణాలు కూడా గాల్లో కలిసిపోతాయి.

ఈ ఆర్టికల్‌లో

• మంచి ఫ్రెండ్స్‌ ఎలా ఉంటారు?

• బైబిల్లో ఉన్న కొంతమంది మంచి ఫ్రెండ్స్‌

• దేవునికి ఫ్రెండ్‌ అవ్వొచ్చా?

• ఫ్రెండ్స్‌ గురించి బైబిలు సలహాలు

మంచి ఫ్రెండ్స్‌ ఎలా ఉంటారు?

బైబిలు ప్రకారం, మనలాంటి టేస్ట్‌లు ఉన్నవాళ్లను లేదా మనలాంటి హాబీలు ఉన్నవాళ్లను మంచి ఫ్రెండ్స్‌ అని అనుకోకూడదు. ఎందుకంటే, బైబిల్లో ఒకతను కీర్తన 119:63 లో ఇలా రాశాడు: “నీకుa భయపడే వాళ్లందరికీ, నీ ఆదేశాలు పాటించేవాళ్లకు నేను స్నేహితుణ్ణి.” దేవునికి నచ్చనిది చేయడానికి భయపడేవాళ్లను అలాగే దేవుడు చెప్పేవి చేసేవాళ్లను అతను ఫ్రెండ్స్‌ చేసుకున్నాడు.

ఒక మంచి ఫ్రెండ్‌ అంటే ఎలా ఉండాలి? బైబిలు ఏం చెప్తుందో చూడండి.

• “నిజమైన స్నేహితుడు ఎల్లప్పుడూ ప్రేమిస్తాడు, కష్టకాలంలో అతను సహోదరుడిలా ఉంటాడు.”—సామెతలు 17:17.

• “ఒకరినొకరు నాశనం చేసుకోవాలని చూసే సహవాసులు ఉన్నారు, సహోదరుడి కన్నా ఎక్కువగా ప్రేమించే స్నేహితుడు కూడా ఉన్నాడు.”—సామెతలు 18:24.

ఆ మాటల్నిబట్టి మంచి ఫ్రెండ్‌ అంటే నమ్మకస్థుడై ఉండాలి, ప్రేమ-దయ చూపించాలి, అతనికి పెద్ద మనసు ఉండాలి. మీరు సక్సెస్‌ అయినప్పుడే కాదు, మీరు ఫెయిల్‌ అయినప్పుడు కూడా మీ పక్కన ఉండేవాళ్లే నిజమైన ఫ్రెండ్స్‌. అలాగే మీరు తప్పటడుగులు వేసినా, వేయాలనుకున్నా మొట్టికాయ వేసే ధైర్యం ఉన్నవాళ్లే నిజమైన ఫ్రెండ్స్‌.—సామెతలు 27:6, 9.

బైబిల్లో ఉన్న కొంతమంది మంచి ఫ్రెండ్స్‌

వయసు, పుట్టిపెరిగిన పరిస్థితులు, సంస్కృతి, స్థాయి వీటికి సంబంధం లేకుండా మంచి ఫ్రెండ్స్‌ అయినవాళ్లు బైబిల్లో ఉన్నారు. అలాంటి మూడు స్నేహ బంధాల గురించి చూద్దాం.

• రూతు, నయోమి. రూతు, నయోమి అత్తాకోడళ్లు. వాళ్ల వయసులో కూడా చాలా తేడా ఉంది. పైగా, రూతు పుట్టిపెరిగిన పరిస్థితులు నయోమి కన్నా చాలా వేరుగా ఉన్నాయి. ఇన్ని తేడాలు ఉన్నాగానీ, వాళ్లు అత్తాకోడళ్లలా కాకుండా ప్రాణ స్నేహితులుగా ఉన్నారు.—రూతు 1:16.

• దావీదు, యోనాతాను. వాళ్ల మధ్య దాదాపు 30 ఏళ్ల వయసు తేడా ఉంది. అయినాగానీ వాళ్లిద్దరు “దగ్గరి స్నేహితులయ్యారు” అని బైబిలు చెప్తుంది.—1 సమూయేలు 18:1.

• యేసు, ఆయన అపొస్తలులు. యేసు ఒక బోధకుడు, ప్రభువు. కాబట్టి అపొస్తలులు కన్నా పై స్థానంలో ఉన్నాడు. (యోహాను 13:13) అలాగని వాళ్లని ఫ్రెండ్స్‌గా చేసుకోకూడదు అనుకోలేదు. ఆయన బోధ వినేవాళ్లందరికీ ఆయన క్లోజ్‌గా ఉండేవాడు. అందుకే ఆయన ఇలా అన్నాడు: “నేను మిమ్మల్ని స్నేహితులని పిలిచాను, ఎందుకంటే నా తండ్రి దగ్గర విన్న వాటన్నిటినీ నేను మీకు తెలియజేశాను.”—యోహాను 15:14, 15.

దేవునికి ఫ్రెండ్‌ అవ్వొచ్చా?

అవ్వొచ్చు. బైబిలు ఇలా చెప్తుంది: “నిజాయితీపరులకు ఆయన దగ్గరి స్నేహితుడు.” (సామెతలు 3:32) మరో మాటలో చెప్పాలంటే ఎవరైతే పద్ధతిగా, నిజాయితీగా, మర్యాదగా ఉంటారో, తప్పొప్పుల విషయంలో ఆయన చెప్పేది వింటారో వాళ్లందర్నీ దేవుడు తన స్నేహితులుగా చేసుకుంటాడు. ఉదాహరణకు, బైబిల్లో అబ్రాహాము అనే వ్యక్తిని దేవుడు నా స్నేహితుడు అని పిలిచాడు.—2 దినవృత్తాంతాలు 20:7; యెషయా 41:8; యాకోబు 2:23.